Faaatoatoaina o le Faapaiaina i le Mataʻu i le Atua
“Ia tatou faamamā ia te i tatou i mea uma e leaga ai le tino atoa ma le agaga, ia faaatoatoaina [le] faapaiaina i le mataʻu i le Atua.”—2 KORINITO 7:1.
1. E faapefea ona tatou iloa faapea ua iloa e agelu sili ona maualuga le paia o Ieova?
O IEOVA o le Atua paia. Ua faalauiloa mai e agelu sili ona maualuluga i le lagi lona paia i faaupuga mautinoa lava. “E paia, e paia, e paia Ieova o ʻau; ua tumu le lalolagi uma i lona mamalu.” O lena faaupuga sa o se valaau e faagaeeina ai a serafi na vaaia i se faaaliga e le perofeta o Isaia i lona valu o senituri T.L.M. I le faaiʻuga o le uluai senituri T.A., na vaaia ai e le aposetolo o Ioane ni faaaliga o mea o le a tutupu i le “aso o le Alii,” lea ua tatou i ai nei. Na ia vaaia ni meaola se fa o faataliolio i le nofoalii o Ieova ma faalogo ai ia i latou o alalaga ma le lē mapu: “E paia, e paia, e paia [Ieova] le Atua e ona le malosi uma lava, o le na soifua, o loo soifua foi, o le a afio mai.” O nei faalauiloaga sautuatolu mai meafaiola agaga faalelagi a Ieova ua faamamafa ai le paia silisili o Lē na Foafoaina Mea.—Isaia 6:2, 3; Faaaliga 1:10; 4:6-8.
Paia ma Vavaeese
2. (a) O ā vala e lua o i ai o le paia, ma ua faapefea ona paia Ieova i nei vala uma e lua? (e) Na faapefea ona faamamafaina e Mose le paia o Ieova?
2 O le paia o lona uiga ia lē na ona mamā ma lē filogia faalotu peitai ia vavaeese foi, pe ia faapaiaina. O Ieova e silisili ona mamā, pe e lē filogia; e matuā vavaeese atoatoa o ia mai atua eleelea uma o atunuu. O lenei vala o lona paia, po o le faapaiaina, sa faamamafaina e Mose ina ua ia usuina le pese: “Ieova e, o ai ea se ua tusa ma oe i le vao atua? O ai se ua tusa ma oe, o lē silisili ona paia.?”—Esoto 15:11.
3. I ā auala na manaomia ai ona paia tagata Isaraelu uma, ma na faapefea ona fesoasoani Ieova ia i latou e tusa ai ma nei mea?
3 Sa manaomia e le Atua paia o Ieova faapea o Isaraelu anamua, o ona tagata i luga o le lalolagi, sa tatau foi ona paia. Sa manaomia lenei mea e lē gata i ositaulaga ma sa Levī a e faapea foi ma le nuu atoa. Na fetalai Ieova ia Mose: “Fai atu ia i le faapotopotoga uma o le fanauga a Isaraelu, ia faapea atu ia i latou, Ia paia outou; auā o aʻu o Ieova lo outou Atua e paia lava aʻu.” (Levitiko 19:2) I lena itu, na avatu ai e Ieova ia i latou tulafono e fesoasoani ia i latou ia tumau ai i le mamā faaleagaga, i amio, i le mafaufau, i le faaletino, ma i a latou faamanatuga, lea na i fesootai ma la latou tapuaiga i le fale fetafai, ma mulimuli ane, i le malumalu.
O se Nuu ua Vavaeese
4, 5. (a) Na faapefea ona avea Isaraelu faaletino o se nuu ua faapaiaina? (e) O le ā o manaomia i le Isaraelu faaleagaga, ma ua faapefea ona faamautinoa mai e Peteru lenei mea?
4 O le mamao sa mulimuli atu ai Isaraelu i tulafono a le Atua, o lo latou tutū ese lea mai nuu taʻuvalea sa siomia ai i latou. Sa faaesea i latou e avea o ni tagata ua vavaeese, pe na faapaiaina, mo le auaunaga i le Atua paia o Ieova. Na taʻu atu e Mose ia i latou: “Auā o oe o le nuu paia mo Ieova lou Atua, na filifilia oe e Ieova lou Atua ina ia avea ma nuu mona, o le oloa tāua e sili i nuu uma lava o i le fogāeleele.”—Teuteronome 7:6.
5 O lena mamā ma le vavaeese ua manaomia foi i le Isaraelu faaleagaga. Na tusi le aposetolo o Peteru ia i latou na filifilia e avea o Isaraelu faaleagaga: “Ia pei o fanau gauai, aua neʻi faatusaina outou e outou i o outou tuʻinanau tuai, a o vālea outou; a e pei ona paia o ia na valaauina outou, ia faapea foi outou ona paia i a outou amio uma; auā ua tusia, Ia paia outou, auā o aʻu nei e paia lava aʻu.”—1 Peteru 1:1, 14-16.
6, 7. (a) Ua faapefea ona faamatalaina sui o le “motu o tagata e toatele” i le Faaaliga mataupu e 7, ma o le ā o manaomia moni mai ia i latou? (e) O le ā o le a talanoaina i palakalafa o mulimuli mai?
6 I le mataupu e 7 o le Faaaliga, o ē auai o le “motu o tagata e toatele” ua faamatalaina faapea “o loo tutū i latou i luma o le nofoālii [o Ieova] ma luma o le Tamai mamoe, ua oofu i latou i ofu sisina,” ua “ta foi o latou ofu, ma ua faasinasinaina o latou ofu i le toto o le Tamai mamoe.” (Faaaliga 7:9, 14) O o latou ofu sinasina ua faaatagia ai lo latou tulaga mamā ma le amiotonu i luma o Ieova, lea ua ia tuuina atu ia i latou ona o lo latou faatuatua i le toto togiola o Keriso. O lea, ua manino lava la e lē gata o Kerisiano faauuina a e “o isi mamoe” foi e tatau ona tumau i le mamā faaleagaga ma tau amio ina ia talia ai la latou tapuaiga e Ieova.—Ioane 10:16.
7 Seʻi tatou talanoaina nei pe na faapefea i tagata o Ieova i aso ua mavae ona manaomia le faamaonia atu o i latou lava e mamā ma paia ma le pogai ua faatatauina ai ia lava mataupu silisili i tagata o le Atua i aso nei.
Mamā Faaleagaga
8. Mo ā pogai na tatau ai i tagata Isaraelu ona tausia lo latou vavaeese mai lotu o Kanana?
8 Sa tatau ia Isaraelu faaletino ona tausia lo latou matuā vavaeese ma le faamaoni mai i faiga lotu lē mamā a isi nuu. I lona fetalai atu e ala ia Mose, na taʻu atu ai e Ieova ia Isaraelu: “Ia oe, neʻi e osi le feagaiga ma e o nonofo i le nuu o le a e alu atu i ai, neʻi avea ai ma mailei ia te oe; a ia outou sofaia o latou fata faitaulaga, ia nutipala i o latou tupua [na faaaogā e fesootai atu ma tapuaiga inosia o feusuaiga faaleituaiga], ma vavae i lalo o latou tupua o Asaira. Auā e te le ifo i se tasi atua; auā o Ieova, o le Fuā, o lona lea suafa, o le Atua fuā lava o ia [po o, “le Atua e matuā manaomia le tuutoina atu i na o ia,” faamatalaga i lalo a le New World Translation Reference Bible]. Neʻi e osi le feagaiga ma e o nonofo i le nuu, e mulilulua ai foi i latou i o latou atua, ma fai taulaga i o latou atua.”—Esoto 34:12-15.
9. O ā faatonuga maʻoti na tuuina atu i le vaega totoe faamaoni o ē na tuua Papelonia i le 537 T.L.M.?
9 I senituri mulimuli ane, na faagaeeina ai e Ieova Isaia e faailoa atu nei upu faavaloaga i le vaega totoe faamaoni o ē na toe foi mai i Iuta mai Papelonia: “O ese ia, ina o ese outou, ia outou o atu nai lea mea; aua neʻi paʻi atu i se mea leaga; o atu ia outou nai totonu ia te ia; ia mamā outou o e tauave ipu a Ieova, [e tatau ona faaaogā i le toe faafoisiaina o le tapuaiga mamā i le malumalu i Ierusalema].”—Isaia 52:11.
10, 11. (a) O ā faatonuga tutusa na tuuina atu i Isaraelu faaleagaga i le uluai senituri T.A.? (e) Ua faapefea ona mulimuli atu i nei faatonuga a e maise lava talu mai le 1919 ma le 1935, ma i le ā le isi auala na tausia ai e le au faauuina ma a latou aumea le mamā faaleagaga?
10 E faapena foi Isaraelu faaleagaga ma a latou aumea ona tatau ona tausia i latou ia lē faaleagaina e lotu ifo i tupua o lenei lalolagi. I lona tusi atu i Kerisiano faauuina i le faapotopotoga i Korinito, na taʻua ai e le aposetolo o Paulo: “Pe faapefea foi ona loto faatasi o le malumalu o le Atua ma tupua? auā o outou o le malumalu o le Atua soifua, pei ona fetalai mai o le Atua, Ou te nofo i totonu ia te i latou, ou te savali foi i totonu ia te i latou; e fai aʻu mo latou Atua, e fai foi i latou moʻu tagata. O lea ia o mai ai outou nai totonu ia te i latou, ma ia outou vavae mai, ua fetalai mai ai le Alii [o Ieova], aua foi tou te papai atu i se mea leaga; ona ou talia ai lea o outou.”—2 Korinito 6:16, 17.
11 Talu mai le 1919 na faasaolotoina ai tagata o le vaega totoe faauuina ua faamamāina ma faateaeseina le eleele, mai lotu ifo i tupua a Papelonia le Aai Tele. (Malaki 3:1-3) Ua latou utagia le valaau faalelagi: “Loʻu nuu e, ia outou o ese ia te ia, ina neʻi faatasia outou i ana agasala, ina neʻi tofusia foi outou i ona mala.” (Faaaliga 18:4) Talu mai le 1935 na faapena foi i se motu o tagata e toatele ua faateleina o “isi mamoe” ona utagia lenei valaau ma lafoaia ai lotu lē mamā faa-Papelonia. O i latou faauuina ma a latou aumea ua tausia foi lo latou mamā faaleagaga e ala i le aloese mai fesootaiga uma ma manatu e afaina ai o aposetate.—Ioane 10:16; 2 Ioane 9-11.
Mamā Tau Amio
12. (a) E ala i ā tulafono na siitia ai e Ieova le tulaga tau amio mamā o Isaraelu e sili aʻe i nuu na siomia ai i latou? (e) O ā tulafono sa patino lava ona aʻiaʻi mo le vasega faaositaulaga?
12 E ala i le feagaiga o le Tulafono, na siitia ai e Ieova ni tulaga tau amio a Isaraelu e sili mamao atu i tulaga o amioga paʻū maulalo a nuu o loo siosiomia ai. O faaipoipoga ma olaga faaleaiga sa o ni tulafono e puipuia ai i Isaraelu. O le tulafono lona fitu o Tulafono e Sefulu na faasaina ai le mulilua. O le mulilua ma le faitaaga sa matuā faasalaina mamafa. (Teuteronome 22:22-24) O taupou sa puipuia i lalo o le Tulafono. (Teuteronome 22:28, 29) O tulafono mo faaipoipoga sa patino lava lo latou aʻiaʻi mo le tofi faaositaulaga. A e mo le ositaulaga sili, sa manaomia ona ia filifilia se taupou mamā e fai ma ana avā.—Levitiko 21:6, 7, 10, 13.
13. Ia te ai e faatusaina i ai sui o le “faatoanofotane” a Keriso, ma ai se ā?
13 E faapena foi le Ositaulaga sili Maualuga, o Iesu Keriso, e i ai sana “faatoanofotane” e faia aʻe i le 144,000 o Kerisiano faauuina, o ē e pei o ni “taupou.” (Faaaliga 14:1-5; 21:9) Ua latou tausia i latou lava ia lē faaleagaina mai le lalolagi a Satani ma tumau ai i le mamā tau i aʻoaʻoga ma tau amio. Na tusi le aposetolo o Paulo i Kerisiano faauuina i Korinito: “Ua ou fuā ia te outou i le fuā faaleatua, auā ua uma ona folafola e aʻu lava ia outou faaipoipo i le tane e toatasi, ina ia ou tuuina ia Keriso outou o se taupou mamā.” (2 Korinito 11:2, NW) Na tusi foi Paulo: “Faapei o Keriso foi ona alofa mai i le ekalesia, ma foaiina mai e ia ia te ia e fai mona sui; ina ia faapaiaina ai, ina ua faamamaina i le faataeleina i le vai atoa ma le upu; ina ia na tuuina atu o ia ia te ia, o le ekalesia matagofie lava, e leai sona ila, po o se maanuminumi, po o se tasi mea faapena, a ia paia ma ia le ponā.”—Efeso 5:25-27.
14, 15. (a) O le ā e tatau ona ō faatasi ma le mamā faaleagaga o le vasega a le faatoanofotane, ma o le ā le mau ua faaalia mai ai lenei mea? (e) Ai se ā ua faamaonia ai faapea o na lava foi mea manaomia faatatau i le mamā tau i amio ua faapena foi ona faatatauina i isi mamoe?
14 O lenei mamā faaleagaga o le faatoanofotane a Keriso e tatau ona ō faatasi ma le mamā tau amio i le itu a ona sui. Na taʻua e le aposetolo o Paulo: “Aua neʻi faaseseina outou; o e faitaaga, ma e ifo i tupua, ma e mulilulua, . . . e le fai mo latou tofi le malo o le Atua. Sa faapea foi nisi o outou; a ua taeele outou, a ua faapaiaina outou.”—1 Korinito 6:9-11.
15 O na mea manaomia o le mamā tau amio e faatatauina foi i isi mamoe ua oo ina iloa manino ina ua talanoaina i latou o ē o le a tuueseina e Ieova mai lana lagi fou ma le lalolagi fou na folafolaina mai. Ua tatou faitau ai: “A o . . . e fai mea e inosia, ma e fasioti tagata, ma e faitaaga, . . . e fai o latou tofi i le lepa e mu i le afi ma le teio, o le oti faalua lea.”—Faaaliga 21:1, 8.
Faaipoipoga Mamalu
16, 17. (a) O ā mau ua faailoa ai faapea o le nofofua e lē o se mea faatauanauina mo le tausia o le mamā tau amio? (e) E mafai faapefea e se Kerisiano ona faaalia le mataʻu saʻo i le Atua i le filifilia o se paaga faaipoipo, ma ai se ā o se mea lē atamai ai le lē amanaia o faasasaga faaaposetolo?
16 Ina ia tumau ai i le mamā tau amio, e lē faatauanauina i tagata faauuina o le vasega o le faatoanofotane ma isi mamoe ona tumau i le nofo toatasi. E lē faale-Tusi Paia le faamalosia ona nofo toatasi. (1 Timoteo 4:1-3) O feusuaiga faaleituaiga i totonu o le noataga o le faaipoipoga e lē faapea ua lē mamā. Ua taʻua i le Afioga a le Atua: “Ia mamalu le faaipoipoga i tagata uma lava, o le moega foi o le faaipoipoga ia leai sona leaga, auā o le a faasalaina e le Atua o ē faitaaga ma ē mulilulua.”—Eperu 13:4, NW.
17 A e peitai, o se Kerisiano e manao ina ia ‘faaatoatoaina i le faapaiaina i le mataʻu i le Atua’ e lē tatau ona i ai se lagona saoloto e faaipoipo atu i so o se tasi ua manao i ai. A o ia leʻi fautuaina ona uso Kerisiano ina ia ‘faamamā i latou mai mea uma e leaga ai le tino ma le agaga, ia faaatoatoaina le faapaiaina i le mataʻu i le Atua,’ na tusi ai le aposetolo o Paulo: “Aua tou te amo faalegatasi ma e le talitonu; auā pe faapefea ona faatasi o le amiotonu ma le amio leaga? . . . Pe faapefea foi ona tofusia faatasi o le talitonu ma le ua le talitonu?” (2 Korinito 6:14, 15; 7:1) I le avea o se sui o tagata vavaeese ma le mamā a Ieova, o se tane po o se fafine Kerisiano o lē ua manao e faaipoipo o le a ia talia le faasasaga faaaposetolo ina ia faia faapea “tau lava i le ua i le Alii,” o lona uiga, e ala i le filifilia o se tasi o lē o se auauna tuuina atu, papatisoina, ma le faamaoni a Ieova. (1 Korinito 7:39) E pei o aso ua mavae, e faapena foi aso nei, e mautinoa lava o le a o se mea lē atamai mo nisi ua tuuina atu i totonu o tagata o le Atua ona lē amanaia lenei fautuaga faale-Tusi Paia. (Faatusatusa le Teuteronome 7:3, 4; Neemia 13:23-27.) O le lē faaalia lea o le mataʻu e atoatoa ona mamā i lo tatou Matai Sili, o Ieova.—Malaki 1:6.
18. I le ā le isi auala e mafai ai e Kerisiano ona tausia le mamalu o a latou faaipoipoga?
18 E lē gata i lea, i Isaraelu, sa tuuina atu e tulafono tapulaa i gaoioiga i feusuaiga faaleituaiga e oo lava i totonu o le noataga o le faaipoipoga. Sa tatau i se tane ona faamamao mai le faia o feusuaiga ma lana avā i le taimi o lona maʻi masina. (Levitiko 15:24; 18:19; 20:18) E manaomia ai i lenei mea le magafagafa alofa ma le pulea o ia lava, i le vaega a tane Isaraelu. Pe e tatau i Kerisiano ona itiiti le magafagafa i a latou avā? Ua faapea mai le aposetolo o Peteru o tane Kerisiano e tatau ona nonofo lelei ma a latou avā “e tusa ma le poto,” o lona uiga, le poto e uiga i mea o faia aʻe ai i latou ona o “le ipu ua sili ona vaivai, o le fafine.”—1 Peteru 3:7, NW.
Savavali i “le Ala o le Paia”
19, 20. (a) Faamatala le auala va tele o loo uia e le vaega e toatele o le fanau a tagata. (e) E tatau faapefea i tagata o Ieova ona ese mai le lalolagi a Satani? (i) O le ā le auala tanu o loo uia e tagata o le Atua, o anafea na tatalaina ai, ma na o ai e faatagaina e ui ai?
19 O mea na muai taʻua ua faamamafa ai le agaʻi atu ina va telē le faga lea o loo vavaeese ai tagata o Ieova mai le lalolagi a Satani. O lenei faiga o mea faalelalolagi ua faateleina lona faamatuutuu ma le faalolololo ia te ia lava. Na taʻua e Iesu: “Ia outou ulu atu i le faitotoa va apiapi; auā e va tele le faitotoa, e lautele foi le ala e tau atu i le malaia, e toatele foi i latou o e ui atu ai.” (Mataio 7:13) O lena auala va tele o loo uia e le vaega e toatele o le fanau a tagata. I le siitia mai o upu a le aposetolo o Peteru, o lona uiga o le auala o le “faamataitu ma tuʻinanau, ma le inu tele i uaina, ma poula, ma inugāava, ma le ifo i tupua e soli ai tulafono,” o le auala lea ua taʻitaʻiina atu ai i le faia o le amio “ulavale silisili.” (1 Peteru 4:3, 4) O lona iʻuga o le faaumatiaga.
20 I le isi itu, o loo savavali tagata o le Atua i se auala ese, o se auala mamā o loo uia e tagata mamā. O le tatalaina o lenei auala i le taimi o le iʻuga na valoia mai e le perofeta o Isaia, o lē na tusi: “E i ai foi le ala tanu, ma le ala, e taʻua foi o le [Ala o le Paia, NW]; e le ui atu ai se ua leaga.” (Isaia 35:8) I lana faamatalaga e uiga i lenei valoaga, ua taʻua ai e le tusi Worldwide Security Under the “Prince of Peace”: “I le 1919 na tatalaina ai se ala tanu faafaatusa i auauna olioli a le Atua. O i latou na mananao ina ia paia i fofoga o Ieova, sa savavali i luga o lena ‘ala tanu,’ ‘le [Ala o le Paia].’ . . . I aso nei, i le matuā latalata atu lava i ‘le faaiʻuga o le faiga o mea,’ o loo tumau ai pea ona matala lena ‘ala tanu’ ua saunia tauatua. O le vao o tagata o ē ua talisapaia . . . ua ulu atu i le auala i le parataiso faaleagaga, ‘le Ala o le Paia’ lea.”a
21. Ua faapefea ma ai se ā e tatau ai i auauna a Ieova ona faaesea i latou mai le motu o tagata a le Tiapolo, ma o le ā o le a talanoaina i le isi mataupu o sosoo mai?
21 Ioe, o le vaega totoe faauuina o Isaraelu faaleagaga ma a latou aumea, o isi mamoe, ua faaesea i latou e i latou lava i aso nei e avea o ni tagata ua vavaeese mai le lalolagi a Satani, mo i latou na o ē ua matuā lē iloa i o latou mafaufau le uiga o le paia. E leai se mea e paia i le motu o tagata a le Tiapolo o loo savavali i le “ala va tele . . . e tau atu i le malaia.” E lē gata ina ua latou lē mamā faaleagaga ma tau i amio peitai i le tele o itu ua latou lē mamā ai faaletino ma o o latou foliga mai i se isi faaupuga e lē toe sili atu lava, e matuā faainaelo. Peitai, ua faapea mai le aposetolo o Paulo: “Ia tatou faamamā ia te i tatou i mea uma e leaga ai le tino atoa ma le agaga, ia faaatoatoaina [le] faapaiaina i le mataʻu i le Atua.” (2 Korinito 7:1) O auala e tatau i tagata o le Atua ona faaeteete ai ina ia mamā i le mafaufau ma le tino o le a talanoaina i le isi mataupu o sosoo mai.
[Faaopoopoga i lalo]
a Mataupu 16, itulau 134-135.
Manatu mo le Autaluga
◻ O ā vala e lua o loo i ai i le paia, ma ai se ā ua mafai ai ona faapea atu o Ieova e silisili ona paia?
◻ O ā auala e lua sa tatau ona faamaonia ai e Isaraelu i latou lava o se nuu paia?
◻ O le ā ua manaomia mo Isaraelu faaleagaga ma a latou aumea, o isi mamoe?
◻ E tatau faapefea i lo tatou mataʻu i le Atua ona aafia ai la tatou filifiliga o se paaga faaipoipo?
◻ O ā auala e lua e mafai ona mulimuli i ai i aso nei, ma ai se ā e tatau ai ona fai se filifiliga manino?
[Ata i le itulau 21]
Ua faapea mai le Afioga a le Atua: “Ia mamalu le faaipoipoga”