O le ā le Uiga o Tulafono e Sefulu ia te Oe?

I TOTONU o le tolu masina talu ona faasaoina i latou mai Aikupito i le 1513 T.L.M., na tolauapi ai le nuu o Isaraelu i luma o le Mauga o Sinai i le vao. I le poloaiga a Ieova, na alu aʻe ai le perofeta o Mose i le mauga ma faalogo atu ai i le folafolaga a le Atua faapea o le a Ia faia le nuu o Isaraelu ma Ana ‘mea totino faapitoa mai nuu uma lava.’ Ona taʻu atu lea e Mose o lenei mea i tagata e ala i toeaina o le nuu. “Ona tali faatasi mai lea o le nuu uma, Matou te faia lava mea uma ua fetalai mai ai Ieova.”—Esoto 19:1-8.

Ina ua mavae lea, ona taʻu manino atu lea e le Atua o Tulafono e Sefulu ia Mose, ma faatomua atu ai nei tulafono i le faaupuga: “O aʻu o Ieova lou Atua, o le na aumaia oe nai le nuu o Aikupito, o le mea sa nofo pologa ai.” (Esoto 20:2) O lenei Tusi Tulafono sa mo tagata Isaraelu, o ē na taʻu atu i ai i le Uluai Poloaiga: “Aua neʻi e fai mo oe ni atua ese i oʻu luma.”—Esoto 20:3.

I le iʻuga, na tuuina atu ai e Ieova ia Mose le faatonuga i isi poloaiga tauatua mo Isaraelu. (Esoto 20:4–23:19) O le tuufaatasia o nei mea uma, na aumaia ai se aofaiga pe ā ma le 600 tulafono. Ma maeu le faafiafiaina ai i le iloa faapea na muamua atu le agelu a le Atua i luma o le nuu e saunia le auala e ulu atu ai i le Nuu Folafolaina! (Esoto 23:20-22) Na faalauiloa mai e Ieova: “Ou te faia vavega i luma o lou nuu uma, e lei faia lava i le lalolagi uma, po o nuu ese uma; e vaaia foi le galuega a Ieova e le nuu uma e te i ai oe; auā o le mea matautia o le a ou faia ia te oe.” O le ā le mea na manaomia e le Atua mai ona tagata ina ia taui atu ai? “Ia e tausi i le upu ou te fai atu ai ia te oe i le asō.” Ioe, o le usiusitai i tulafono uma a Ieova ma talia sa o se tiute tauave.—Esoto 34:10, 11.

Le Uiga o Tulafono e Sefulu mo Isaraelu

I le avea o se iʻuga o la latou solaaga na puipuia tauatua, mai noataga i Aikupito, sa oo ai ina iloa e tagata Isaraelu le suafa o le Atua i se uiga fou. Sa avea Ieova ma o latou Laveai. (Esoto 6:2, 3) I le iʻuga, sa oo ai ina latou iloa le uiga faapitoa o le poloaiga lona tolu mo i latou, auā i lea na faasaina ai i latou mai le taʻu o le suafa tauatua i se auala lē talafeagai.—Esoto 20:7.

Ae faapefea le poloaiga lona fa, lea e fesootai atu ma le aso Sapati? O lenei poloaiga na faatomua ai le faaaloalo mo mea paia, e pei ona sa muai faaalia e Ieova ina ua faatuina le tausia “o le sapati” e tusa ai ma le aoina o le manai. (Esoto 16:22-26) Ona sa leʻi vave usiusitai nisi tagata Isaraelu, na faamanatu manino atu ai e Ieova ia i latou faapea ua uma ona ia tuuina atu ia i latou lena faatonuga. “Faauta ea, ua tuuina mai e Ieova le sapati ia te outou. . . . Ona malolo lea o le nuu i le aso fitu.” (Esoto 16:29, 30) Mulimuli ane, na faaalia ai e Ieova le matuā uigā o lenei faatulagaga i le taʻua e faapea: “O le faailoga lea e faavavau ia te au atoa ma le fanauga a Isaraelu.”—Esoto 31:17.

O lea, seʻi manatu i le poloaiga tutasi lona sefulu, ua faasaina ai le matapeapea. O le tulafono lenei e leai se tagata e mafai ona faamalosia. O Isaraelu taitoatasi sa nofo aitalafu i lona Atua, o Ieova, o lē na te suesueina loto o tagata taitoatasi ma iloa ai o latou faanaunauga.—Esoto 20:17; 1 Samuelu 16:7; Ieremia 17:10.

Se Manatu ua Fetuunaia

Na taʻu atu e Iesu Keriso, o lē na fanau mai i le nuu o Isaraelu, i ona soʻo e faapea: “Aua neʻi outou manatu ua ou sau e tatalaina le tulafono po o le au perofeta; ou te lei sau e tatalaina, a ia faataunuuina.” (Mataio 5:17) Na tusi le aposetolo o Paulo i Kerisiano Eperu: “O le tulafono ua i ai le ata o mea lelei atali, a e le o le matuā tusa o ia mea.” (Eperu 10:1) Ana faapea o oe o se Eperu na faaliliuina i le Faa-Kerisiano, o le ā mafai faapefea ona e malamalama i nei faamatalaga? Na talitonu nisi sui o le uluai faapotopotoga Kerisiano faapea o le faitau selau o tulafono uma na tuuina atu e le Atua e ala ia Mose, e aofia ai ma Tulafono e Sefulu, o loo faatatauina pea. Ae pe o le manatu saʻo lea?

Manatu i nei upu a Paulo i tagata Iutaia o ē na avea ma Kerisiano i le itumalo o Kalatia: “O i tatou o Iutaia moni, a e le ni tagata agasala mai nuu ese, ua tatou iloa e le taʻuamiotonuina se tagata i galuega o le tulafono, a o le faatuatua ia Iesu Keriso; o i tatou foi ua tatou faatuatua ia Keriso Iesu, ina ia taʻuamiotonuina i tatou i le faatuatua ia Keriso, a e le o galuega o le tulafono; auā e le taʻuamiotonuina se tagata e tasi i galuega o le tulafono.” (Kalatia 2:15, 16) E moni, o se tulaga amiotonu i luma o le Atua sa leʻi faalagolago i le usiusitai atoatoa i le Tulafono faa-Mose, auā i le tulaga lē lelei atoatoa faaletagata, sa lē mafai ai. Na faaopoopo mai Paulo: “O i latou uma o e faalagolago i galuega o le tulafono, ua faafanoina i latou; auā ua tusia, Ia faafanoina i latou uma o e le tumau i mea uma lava ua tusia i le tusi o le tulafono ia faia. . . . Na faatauina mai i tatou e Keriso ai le faafanoga o le tulafono, ina ua faafanoina o ia mo i tatou.”—Kalatia 3:10-13.

Afai na lē toe iai soʻo Iutaia o Iesu i lalo o le faafanoga o le Tulafono, pe sa iai la ni Kerisiano na iai le avega tauave ina ia tausia poloaiga uma ia na tuuina atu ia Isaraelu? Na tusi ai Paulo i tagata Kolose: “[O le Atua] ua faamagaloina mai a outou agasala uma lava; ina ua sōloia le tusilima na sala ai i tatou i tulafono sa tetee mai ia te i tatou, ua aveeseina ai foi nai le vaeloto, ma faamauina ai [Keriso] i fao i le satauro.” (Kolose 2:13, 14) E aunoa ma se masalosalo, e toatele uluai Kerisiano sa manaomia le fetuutuunai o o latou mafaufauga ma iloa ai faapea ua ‘tuusaolotoina i latou mai le tulafono.’ (Roma 7:6) E ala i le faaalia o le faatuatua i le maliu faataulagaina o Iesu, lea na aumaia ai le iʻuga i le Tulafono ma faaava ai le auala mo le faatuina o le “feagaiga fou” na valoia, na iai ai ia i latou le faamoemoe o le mauaina o se tulaga amiotonu ma Ieova.—Ieremia 31:31-34; Roma 10:4.

Lo Latou Uiga mo i Tatou

Pe o le uiga o lenei mea faapea o Tulafono e Sefulu, se vaega autū o le Tulafono, ua leiloa lo latou uiga uma mo Kerisiano? Ma le mautinoa lava e leai! E ui lava e lē o fusia faaletulafono ai Kerisiano i nei Tulafono e Sefulu, ae o nei tulafono o loo faauau pea ona ofoina atu ai taʻiala aogā, e pei lava ona faia i isi poloaiga o le Tulafono faa-Mose. Mo se faataʻitaʻiga, na fetalai mai Iesu o poloaiga aupito sili e lua o poloaiga ia o loo manaomia ai le alofa i le Atua ma tuaoi. (Levitiko 19:18; Teuteronome 6:5; Mataio 22:37-40) I le fautuaina o Kerisiano Roma, na sii mai ai e Paulo poloaiga lona ono, fitu, valu, ma lona sefulu, i le faaopoopo mai: “Afai foi ua toe se isi poloaiga, o loo ua aofia lava i lenei upu, Ia e alofa atu i lē lua te tuaoi, ia pei o oe lava ia te oe.”—Roma 13:8, 9.

O lea, i le avea o se vaega o le Afioga faagaeeina a le Atua, o le ā le fuafuaga ua aogā ai Tulafono e Sefulu i aso nei? Ua latou faaalia maia manatu o le Atua i mea. (2 Timoteo 3:16, 17) Manatu i le auala ua latou faia ai lenei mea.

O uluai poloaiga e fa o loo faatāuaina ai o tatou tiute tauavea agaʻi ia Ieova. (Muamua) O ia o le Atua o lē o loo tumau pea ona tuutoina aʻiaʻi i ai. (Mataio 4:10) (Lona Lua) E leai se tasi o ona tagata tapuai e tatau ona faaaogā faatusa. (1 Ioane 5:21) (Lona Tolu) E tatau ona saʻo ma ia faamamaluina lo tatou faaaogāina o le suafa o le Atua, ia aua lava neʻi lē faaaloalo i ai. (Ioane 17:26; Roma 10:13) (Lona Fa) E tatau ona faaautū lo tatou olaga atoa i mea paia. Ua mafai e lenei mea ona tatou malōlō ai, po o le ‘faia o le sapati,’ mai le auala faafiaamiotonu.—Eperu 4:9, 10.

(Lona Lima) O le usiusitai o tamaiti i o latou mātua e faaauau pea ona avea o se maa tulimanu o le autasi faaleaiga, e aumaia ai faatasi ma faamanuiaga a Ieova. Ma maeu se faamoemoe ofoofogia ua ofoina mai e lenei “uluai tulafono . . . ua i ai le mea ua folafolaina”! O le a lē gata ina “manuia ai oe” ae o le a “e nofo tuluʻi ai i luga o le laueleele.” (Efeso 6:1-3) Ona ua tatou ola nei i “aso e gata ai” o lenei faiga leaga o mea, ua ofoina atu ai e lena usiusitai faaleatua i tagata talavou le faamoemoe o le lē oti lava.—2 Timoteo 3:1; Ioane 11:26.

O le alofa mo o tatou tuaoi o le a puipuia ai i tatou mai le faapogaia o se afaina ia te ia ona o na galuega leaga e pei o le (Lona Ono) fasioti tagata, (Lona Fitu) mulilua, (Lona Valu) gaoi, ma le (Lona Iva) o le molimau pepelo. (1 Ioane 3:10-12; Eperu 13:4; Efeso 4:28; Mataio 5:37; Faataoto 6:16-19) Ae faapefea o tatou faanaunauga? O le poloaiga (Lona Sefulu) e faasaga i le matapeapea, ua faamanatu mai ai ia i tatou faapea e manaomia e Ieova ina ia tonu pea o tatou manatu i lana silafaga.—Faataoto 21:2.

Maeu se tamaoaiga o le uiga ua tatou maua i Tulafono e Sefulu! Ona e faavae i mataupu silisili tauatua e pei ona iai na o le a lē taitai ona lē toe aogā, e tatau ai ona tatou faatāuaina i latou o ni faamanatuga tautele o o tatou avega tauave ina ia alofa i le Atua ma o tatou tuaoi.—Mataio 22:37-39.

[Ata i le itulau 6]

O le maliu o Iesu na faaiʻuina ai le Tulafono, e aofia ai Tulafono e Sefulu na tuuina atu ia Isaraelu i le Mauga o Sinai