O le Soifuaga o Iesu ma Lana Faiva

Ua Toe Asiasi atu i le Malumalu

UA FAATOʻĀ uma lava ona faaaluina e Iesu ma ona soʻo lo latou po lona tolu i Petania talu ona latou taunuu mai mai Ieriko. Nei la e malamalama aʻe le taeao sesegi o le Aso Gafua, Nisani 10, ae ua iai i latou i le ala agaʻi atu i Ierusalema. Ua fia taumafa Iesu. O lea, ina ua silasila atu o ia i le laau o le mati ma ona lau, ona ia maliu atu lea i ai ina ia silafia pe o iai ni ona fua.

Ua vave tutupu lau o le laau ae leʻi oo i le tau talu ai o le tau mo mati e faatoʻā oo mai ia Iuni, ae o lea faatoʻā oo i le faaiʻuga o Mati. Ae peitai, sa lagona lelei lava e Iesu faapea talu ai ona ua vave ona tutupu lau, atonu la ua iai foi ma ni ona fua. Ae ua faameo o ia. O lau o le laau ua tuuina atu ai se vaaiga taufaasese. Ona fetuu lea e Iesu le laau, i lona fetalai atu, “Aua lava nei toe ʻaina e se tasi sou fua e oo i le faavavau.” I le lomiga o loo mulimuli mai o lenei mekasini, o le a tatou naunau fiafia ai e iloa iʻuga o le fetuuina e Iesu o le laau o le mati ma le uiga faafaatusa o lenei mea.

I le faaauau atu pea, sa leʻi pine ae taunuu loa Iesu ma ona soʻo i Ierusalema. Ua maliu atu o ia i le malumalu, lea na ia asiasi atu i le aoauli o le aso ananafi. Ae peitai, o le asō, ua fai ai loa sana gaoioiga, e pei ona sa ia faia i uluai tausaga e tolu ua mavae ina ua maliu mai o ia i le Paseka i le 30 T.A. Na tulia i fafo e Iesu i latou sa faatau mai ma faatau atu mea i le malumalu, ma tafuli laulau a tagata faatau tupe ma i latou na faatau lupe. Sa oo lava ina lē faatagaina e ia se tasi e ave atu ni ipu i le malumalu.

I le taʻusalaina o i latou o ē o loo fesuiai tupe ma faatauina atu manu i le malumalu, ua fetalai atu o ia: “E le ua tusia ea, ‘E taʻua loʻu fale o le fale tatalo mo nuu uma’? A ua faia e outou ma ana o e fao mea.” O i latou o ni ē faomea auā ua latou tapā ni tau tetele lē talafeagai o mea mai ia i latou o ē e itiiti lava sa latou filifiliga, ae na ona faatau mai ia i latou o ni manu e manaomia mo le taulaga. O lea ua manatu ai Iesu i nei feutagaiga faapisinisi o se ituaiga o faiga taufaamataʻu fai faamalosi po o le faomea.

Ina ua faalogo ai faitaulaga sili, tusiupu, ma alii sili o tagata i le mea ua faia e Iesu, ona latou toe saili foi lea i se auala e mafai ona fasiotia ai o ia. I lea ua latou faamaonia ai faapea e loto maaa pea i latou ma e lē masuia. Peitai, latou te lē iloa se auala e faaumatia ai Iesu, talu ai o loo mulimuli atu pea i ai tagata uma ina ia faalogologo ia te ia.

E ese ai mai tagata Iutaia moni, ua ō mai foi tagata o Nuu Ese i le Paseka. O i latou nei o tagata faatoʻā liliu, o lona uiga ua faaliliuina i latou i le lotu a tagata Iutaia. O nisi tagata Eleni, atonu o tagata faatoʻā liliu, ua latou faalatalata atu ia Filipo ma talosaga atu e fia feiloai ia Iesu. Ona alu atu lea o Filipo ia Aneterea, atonu ina ia fesili atu pe e talafeagai lea feiloaiga. Atonu o loo iai pea Iesu i le malumalu, i le mea o loo mafai ai e tagata Eleni ona vaai ia te ia.

Ua silafia e Iesu ua itiiti ni nai aso o totoe mo ia, o lea na te faataʻitaʻia ai ma le matagofie lona tulaga: “Ua oo mai ona po e oo ai le Atalii o le tagata i lona mamalu. E moni, e moni, ou te fai atu ia te outou, Afai a e le paū le fua o le saito i le eleele ma pala ai, e tumau pea o le mea e tasi; a e afai e pala, ona fua mai ai lea o fua e tele.”

O le fatu e tasi o le saito e itiiti lona tāua. Peitai, e faapefea pe a tuu i le eleele ma “pala,” ma iʻu ai lona ola e pei o se fatu? Ona pala lea ma i se taimi ona tupu ai lea ma avea ma laau e maua mai ai le tele ma tele o saito. E faapena foi, o Iesu ua na o se tagata lelei atoatoa e toatasi. Ae pe a maliu faamaoni o ia i le Atua, ona avea lea o ia ma auala o le tuuina atu o le ola e faavavau i tagata faamaoni o ē o iai foi lea lava agaga faataulagaina lea o loo ia te ia. I lea, ua fetalai ai Iesu: “O lē faapelepele i lona ola, e faamāumau e ia i ai, a o lē ʻinoʻino i lona ola i lenei lalolagi, e leoleo ai e ia e oo i le ola faavavau.”

E manino lava e lē o manatu Iesu e na o ia lava, auā na ia toe faamatala atili mai: “A fia auauna mai se tasi ia te au, ia mulimuli mai o ia ia te au; o le mea ou te i ai aʻu, e i ai foi laʻu auauna; pe a auauna mai foi se tasi ia te au, ona viia lea o ia e le Tamā.” Maeu se taui ofoofogia ona o le mulimuli atu ia Iesu ma auauna ia te ia! O le taui o le faamamaluina e le Tamā ina ia aufaatasi ma Keriso i le Malo.

I le manatu e uiga i le puapuaga tele ma le maliu tiga o loo faatali mai mo ia, ua faaauau atu ai Iesu: “O loo ātu neʻi loʻu loto, pe se a foi se mea ou te fai atu? Loʻu Tamā e, faaola mai ia te au i lenei itu aso.” Ana seʻi mafai la ona alofia le mea o loo faatali mai mo ia! Peitai e leai, e pei ona ia fetalai: “O le mea lava lea na ou oo mai ai i lenei itu aso.” O loo ioe faatasi Iesu ma le faatulagaga atoa a le Atua, e aofia ai lona lava maliu faataulagaina. Mataio 21:12, 13, 18, 19; Mareko 11:12-18; Luka 19:45-48; Ioane 12:20-27.

◆ Aiseā ua faatalitalia ai e Iesu ina ia maua ni fua o le mati e ui lava e lē o le tau lea e fua ai?

◆ Aiseā ua taʻua ai e Iesu i latou na faia fefaatauaiga i le malumalu o “e fao mea”?

◆ I le ā le auala ua pei ai Iesu o se fatu saito ua pala?

◆ O le ā le lagona o Iesu e uiga i le puapuaga ma le maliu o loo faatali mai mo ia?