E Silafia Lelei i Tatou e Ieova!

E SILAFIA moni i tatou e Ieova,ae maise lava pe afai o i tatou o ana auauna faamaoni. E lē iloa lelei i tatou e a tatou uo vavalalata, o tauaiga, e oo lava i mātua, e pei ona silafia ai e Ieova. Ioe, e sili atu ona silafia lelei i tatou e le Atua na i lo le iloa o i tatou e i tatou lava!

O le silafia lelei atoatoa e Ieova o ana auauna sa faaata lelei mai i le Salamo 139. O le ā na fai mai ai Tavita i lena salamo? Ma pe e tatau faapefea i le silafia o i tatou e le Atua ona aafia ai a tatou upu ma gaoioiga?

Le Tele o le Silafia e Ieova!

Talu ai o le Atua o Lē na Foafoaina i tatou, e tatau ai ona tatou faatalitalia o ia e iai sona silafia atoatoa o i tatou. (Galuega 17:24-28) O lea, na mafai ai e Tavita ona faapea mai: “Ieova e, ua e suesue mai ia te au, ua e silafia lava aʻu.” (Salamo 139:1) O le silafia e le Atua o Tavita sa pei o se silafia na mauaina e ala i se sailiiliga maeʻaeʻa. I le fiafia e mauaina le sailiiliga maeʻaeʻa a Ieova ia te ia, na matuā manaonao atu ai le faisalamo i le faatonutonuga ma le taʻitaʻiga a le Atua. E faapena foi, ‘ua tuu atu e Molimau a Ieova o latou ala ia Ieova, faalagolago ia te ia,’ i le mautinoa o le a ia faia pea lava le mea saʻo. (Salamo 37:5) E iai se lagona o le saogalemu faaleagaga i o tatou loto ona ua tatou saili ina ia taʻitaʻia e le atamai faaleatua, ma ua tatou gauai atu ma le loto i ai i le taʻitaʻiga tauatua. (Faataoto 3:19-26) I le pei o Tavita, e mafai ona faamafanafanaina i tatou mai le iloa ua matauina e le Atua i tatou, malamalama i o tatou faafitauli, ma e sauni pea lava e fesoasoani mai ia i tatou.

“O oe lava ua e silafia loʻu nofo i lalo ma loʻu tulai i luga,” na faailoa mai ai le faisalamo. (Salamo 139:2a) Sa silafia e le Atua mea uma e uiga i gaoioiga a Tavita, e pei o lana nofo i lalo ina ua iʻu le aso mai galuega ma lona toe tulai aʻe ina ua mavae le moe i le po. Afai o i tatou o Molimau a Ieova, ia mautinoa ua silafia lelei foi i tatou e Ieova.

Ua taʻu mai e Tavita: “Ua e silafia mamao mai oʻu manatunatu.” (Salamo 139:2e) E ui ina afio le Atua i le lagi e mamao tele mai le vaaiga faalelalolagi, ae sa ia silafia manatunatuga o Tavita. (1 Tupu 8:43) E lē tatau ona faateʻia ai i tatou i lea vaaiga, auā e “vaai Ieova i le loto.” (1 Samuelu 16:7; Faataoto 21:2) O le mea moni faapea e iloiloina e le Atua o tatou manatu e ao ona uunaia ai i tatou e manatunatu i mea e mamā, e amio lelei, e viia. Ma maeu se fetaui o lo tatou faaleo atu e lē aunoa o o tatou manatunatuga i le tatalo ma le loto, ina ia tatou maua ai le taʻitaʻiga tauatua ma le ‘manuia a le Atua’!—Filipi 4:6-9.

Na faaopoopo mai le faisalamo: “Ua e suesue i loʻu savali ma loʻu taoto, ua e masani lava ma oʻu ala uma.” (Salamo 139:3) O le fuaina o le savali a Tavita mai le isi nofoaga i le isi nofoaga ma lana taoto a o malōlō e manino lava sa uiga faapea na iloiloina ma le faaeteete e Ieova mea uma na faia e le faisalamo. Sa fuaina e Lē Silisili ona Maualuga gaoioiga uma a Tavita ma mautinoa ai i le tulaga faalenatura moni o ana gaoioiga. Sa iai i le Atua le silafia atoatoa i ala o Tavita, o ala na ia uia i le olaga. Pe a iloiloina foi faapena i tatou e lo tatou Tamā faalelagi, tau ina ia ona maua mai i tatou o loo tatou auauna ma le faamaoni ia te ia ma o loo tumau i “le ala o le amiotonu,” lea e taʻitaʻiina atu i le ola e faavavau.—Faataoto 12:28.

Talu ai e leai se mea na te ono tautala i ai e mafai ona natia mai le Atua, na faapea mai ai Tavita: “A o leai lava se upu i loʻu gutu, faauta, Ieova e, ua e silafia uma lava.” (Salamo 139:4) Afai ua tatou puapuagatia tele ma ua tatou lē iloa se upu e tatalo atu ai, e “fesoasoani mai i lo tatou vaivai” le agaga o Ieova. (Roma 8:26) I a tatou talanoaga, e silafia e le Atua mea o loo i laugutu ae ua lē o faaleo atu, auā na te silafia o tatou faalogona moni. Ma afai e ia i tatou le alofa lea e tupu aʻe mai le “faatuatua faamaoni,” o le a lē taitai ona tatou taumafai e faasese isi i ‘upu faaʻoleʻole.’—1 Timoteo 1:5; Roma 16:17, 18.

Na faaopoopo mai Tavita: “Ua e siosio mai i oʻu tua atoa ma oʻu luma, ua e faaee mai foi lou aao i luga ia te au.” (Salamo 139:5) I se uiga, na siosiomia ai e Ieova Tavita i totonu e pei o se aai ua siomia e le taua. E foliga mai sa iloa lelei e le faisalamo faapea e iai tuaoi o mea e mafai ona ia faia i lona olaga. Sa ia iloa foi faapea e lē mafai ona ia sola ese mai fofoga o Ieova o loo silasila mai ma lona aao, po o lana pulega. O le mea moni, sa leʻi taumafai Tavita e sola ese, ma e lē tatau foi ona faapena i tatou. Ae seʻi tatou faia pea i tatou lava ma le iloa lelei faapea o le aao o Ieova o loo i luga o i tatou i le avea o ana Molimau.

O le silafia e Ieova o Tavita na faatumuina ai o ia i le mataʻu. I lea, na ia faalauiloa mai ai: “O le poto lea e sili ona faigata ia te au, ua maualuga, ou te le mafaia.” (Salamo 139:6) O lea o le silafia aʻiaʻi e Ieova o i tatou i le avea o ni tagata taitoatasi e lē mafai ona tatou fuafuaina, e ui lava i le tatou tomai po o le toleniga. Talu ai e lē matāea e le malamalama faaletagata, o lea e mafai ai ona tatou mautinoa faapea e silafia e Ieova le mea ua silisili ona lelei mo i tatou. I lea, afai tatou te tatalo mo se mea ma o lana tali mai o le leai, seʻi tatou gauai i le finagalo tauatua. E pei ona tusia e le aposetolo o Ioane: “Pe afai tatou te ole atu ai se mea e tusa ma lona finagalo, e faafofoga mai o ia ia te i tatou.”—1 Ioane 5:14.

E Lē Mafai ona Sola e se Mai le Agaga o le Atua

E lē gata ina tali mai Ieova i tatalo a ana auauna faamaoni ae galue foi lona agaga ia i latou ma fesoasoani ia i latou e faia lona finagalo. O le mea moni, na fesili Tavita: “Ou te alu ea ifea ai lou Agaga? Ou te sola ifea ai ou luma?” (Salamo 139:7) Sa iloa e le faisalamo e lē mafai ona ia sola ese mai le agaga o Ieova, po o le malosi galue, lea e mafai ona pai atu e oo lava i vaega sili ona mamao o le vateatea. Ma e leai se isi e mafai ona sola ese mai fofoga o le Atua, o lona uiga, o le sola ese mai lana silafaga. E moni, na “tulai Iona e sola i Tasesa ai luma o Ieova,” ae na lē mafai e lena perofeta ona sola ese mai le iʻa tele lea na tofia e le Atua e foloina o ia, pe sola ese foi mai le tiute tauave mo lona tofiga tauatua. (Iona 1:3, 17; 2:10–3:4) O lea seʻi o tatou faalagolago i le agaga o Ieova ina ia tatou mafai ai ona faataunuu tofiga ua tuuina mai e le Atua.—Sakaria 4:6.

Talu ai sa iloa e Tavita o le a faigata ona alu ese mai le Atua, na ia faapea mai ai: “Afai ou te alu ae i le lagi, o i ai lava oe; afai ou te fofola soʻu moega i seoli, faauta, o i ai lava oe.” (Salamo 139:8) I aso o le faisalamo, o le ‘alu aʻe i le lagi’ sa uiga i le alu aʻe i ni mauga maualuluga, o tumutumu ia e masani ona puaoa i ao. Ioe, afai tatou te iai i luga o se tumutumu mauga sili ona maualuga, e pai atu le agaga o le Atua ia i tatou. A e lē gata i lea, e lē mafai ona tatou sosola ese mai lana silafaga pe afai tatou te mau i Seoli, ua faauigaina faafaatusa i ai vaega sili ona maualalo o le lalolagi.—Faatusatusa Teuteronome 30:11-14; Amosa 9:2, 3.

“Afai e faia mo aʻu apaau o le taeao, ma ou nofo i le tuluʻiga o le sami,” na faapea mai ai Tavita, “e taʻitaʻi mai ia te au i lea lava mea e lou aao, e taofi mai foi ia te au lou aao taumatau.” (Salamo 139:9, 10) O le ā ua uiga i ai “apaau o le taeao”? O nei upu ua faamatalaina faafatusolo i ai le malamalama o le taeao, e pei o iai ni ona apaau, e vave ona fofola atu mai sasae i sisifo. Ae faapefea pe afai sa mafai e Tavita ona tago atu i apaau o le taeao ma oo atu ai i le sami sili ona mamao po o motu i le itu i sisifo? O le a tumau pea ona ia gauai atu i le aao o le Atua, po o le faatonutonuga ma le taʻitaʻiga. E ala i Lona agaga, o le a iai ai i inā Ieova e taʻitaʻi ma le agaalofa le faisalamo.—Salamo 51:11.

Pouliuli e Lē o se Faafitauli mo le Atua

E lē o le mamao po o le pouliuli e mafai ona tuuesea ai se tasi mai le oo atu i ai o le Atua. O lea na faaopoopo mai ai Tavita: “Afai ou te faapea atu, E ufitia lava aʻu i le pouliuli; ona fai lea o le po ma malamalama e siosiomia ai aʻu. Auā o le pouliuli e le pouliuli lava lea ia te oe; e malamalama le po pei o le ao; e tusa lava ia te oe le pouliuli ma le malamalama.” (Salamo 139:11, 12) E lē mafai e se tagata ona ufiufitia i le pouliuli atoatoa, e pei ua taofia ai. Ae ia Ieova o le a faaalia o ia e pei o loo tu i le malamalama o le ao. E leai se tasi e mafai ona natia mai le Atua so o se agasala na faia i le pouliuli.—Isaia 29:15, 16.

O le natia e lē mafai ona pupuni ai le silafia e Lē na Foafoaina i tatou. E tusa ai o lenei mea na faapea mai Tavita: “Auā sa ia te oe oʻu manatunatu; na e ufiufi ia te au i le manava o loʻu tinā. Ou te vivii atu ia te oe, auā na faia aʻu e ala ai ona matautia ma ofo tele ai; o mea na e faia, o mea mamana ia; ua ou matuā iloa e aʻu nei mea. E lei lilo loʻu tino ia te oe, ina ua faia aʻu i le mea lilo, ina ua saunia aʻu i mea loloto i le lalolagi. Na silasila mai ou fofoga i oʻu tino uma ina o afuafua; ua tusia foi uma lava i lau tusi, o ona aso foi na faia ai [vaega o le tino], a o leai ni oʻu [se vaega maʻoti o le tino] tino.”—Salamo 139:13-16.

O Ieova le Atua, o lē na te silafia o tatou faalogona loloto, na ia saunia ni fatugaʻo mo Tavita. I le loloto i totonu o le tino, o fatugaʻo o ni totoga e sili ona loloto ona natia i totonu e lē mafai ona vaaia, peitai e mafai e le Atua ona silasila i ai. E mafai foi ona ia silasila e oo lava i le manava o le tinā. Ioe, e mafai e Ieova ona silasila i le tuputupu aʻe o le tagata. I le na o le mafaufau lava i le auala ofoofogia na faia ai o ia i totonu o le manava na uunaia ai Tavita e vivii i Lē na Faia o ia. E manino lava sa faasino atu e le faisalamo i le manava o le tinā e avea o “mea loloto i le lalolagi.” I inā, na natia ai mai le vaaiga a le tagata peitai sa silafia e le Atua, o ponaivi o se pepe, uaua, musele, o neura, ma alatoto ua tuufaatasia.

A o leʻi oo ina tino mai vaega o le tino o Tavita i totonu o le manava o lona tinā, sa silafia e le Atua lona iai. Aiseā? Auā o le fuafuaina o se pepe na mulimuli mai ai se fua patino, e pei o loo usiusitai atu i faatonuga o loo faamauina i se tusi. Maeu le faaalia ai i lenei mea o le atamai ma le tomai o Ieova e silasila ai e oo lava i mea e natia! E ao foi ona faia ai i tatou ia talisapaia faapea ua fuafuaina e le Atua le fanau a tagata ma faafetai ai ia te ia mo le saunia o se faasologa ofoofogia lea ua iʻu i lo tatou iai e avea o ni tagata taitoatasi.

Maeu le Tautele o Manatu o le Atua!

Pe a mafaufau e uiga i le tuputupu aʻe o se pepe i le manava, na manatunatu ai Tavita i le atamai o le Atua. I lea, na alaga ai ma le ofo le faisalamo: “Le Atua e, ua matuā sili ou manatunatu ona aoga ia te au, ua sili lava ona tele o lo latou faitau aofai.” (Salamo 139:17) Na faapelepele e Tavita manatu o Ieova le Atua, ma ona o le tele na ofo ai o ia ona o le “tele o lo latou faitau aofai.” Afai e tautele manatu o le Atua ia i tatou, o le a tatou filiga la e avea o ni tagata suesue o le Tusi Paia. (1 Timoteo 4:15, 16) O ona manatu faamauina e “aoga foi ia e aʻoaʻo ai, e aoai ai, e faatonu ai, e faapoto ai foi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava.”—2 Timoteo 3:16, 17.

E faatatau i manatu o Ieova, na faapea mai Tavita: “Afai ou te faitaulia, ua sili ia ona tele i le oneone; a aʻu ala, tā te i ai pea ma aʻu.” (Salamo 139:18) Talu ai o manatu o le Atua e sili ona tele na i lo o le oneone, afai e amata e Tavita ona faitau i le tafa o ata, e lē mafai ona uma i le taimi e moe ai. I le ala mai i le taeao, o le a iai pea o ia ma Ieova. O lona uiga o le a faitauina pea e ia manatu o le Atua. O le mea moni, talu ai ona tatou te manaomia le taʻitaʻiga a Ieova, o le tatalo ma le mafaufau loloto i ona manatu ma fuafuaga atonu o le a lelei ona faatumuina ai o tatou mafaufau i le taimi mulimuli o le po ma i le uluai mea lava i le taeao.—Salamo 25:8-10.

Taui ma Sui mo Ē Amioleaga

Talu ai o taʻitaʻiga poto a le Atua, o le ā le lagona o Tavita e uiga ia i latou na teena le taʻitaʻiga tauatua? Na ia tatalo: “E moni, le Atua e, e te fasioti i e amio leaga; o lea, ia o e se atu ai ia te au outou tagata ua totolima, o e fai upu ia te oe e faatupu ai le leaga; e taʻutaʻu fua i lou suafa o e ita ia te oe.” (Salamo 139:19, 20) Sa leʻi taumafai Tavita e fasiotia tagata amio leaga ae na tatalo atu faapea atonu o le a maua e i latou le taui ma sui i le aao o Ieova. E tatau ona ia i tatou lea lava uiga. Mo se faaaʻoaʻoga, e mafai ona tatou tatalo mo le faamalosi e tautala ai i le Afioga a le Atua pe afai e sauaina i tatou e fili. (Galuega 4:18-31) Ae tatou te lē saili ina ia faaleagaina o tatou fili, auā ua tatou iloa faapea na fetalai Ieova: “O ia te au le taui ma sui, ou te taui atu.”—Eperu 10:30; Teuteronome 32:35.

Afai o le a fasiotia e le Atua tagata amio leaga, o le a aveesea na tagata totolima mai ia Tavita. Ua iai so latou faamaumauga o le agasala i le sasaaina o le toto, ma ua latou fai mai foi ni mea e uiga ia Ieova e tusa ai ma o latou lava manatu, e lē ogatasi ma ona manatu. Ae lē gata i lea, ua tatau ai ona oti i latou mo le aumaia o le faalumaina i le suafa o le Atua i le faaaogāina i se auala lē faaaloalo, e ala lea i lo latou faaaogāina a o latou faia fuafuaga leaga. (Esoto 20:7) Seʻi aua lava neʻi taʻusalaina i tatou i agasala faapena!

Talu ai ona o tagata amio leaga sa nofosala i le faamasaaina o le toto ma aumaia ai le faalumaina i le suafa o le Atua, na folafola mai e Tavita: “Ieova e, ou te le ʻinoʻino ea ia te i latou o e ʻinoʻino ia te oe? ma e o laga atu ia te oe, ou te le matuā ʻinoʻino ea i ai? Ou te ʻinoʻino lava ia te i latou ma le matuā ʻinoʻino tele; ua fai i latou moʻu fili.” (Salamo 139:21, 22) Sa ia Tavita se lagona matuā inoino mo nei tagata auā sa latou matuā inoino ia Ieova ma sa tautala faasagatau ia te ia. Sa avea i latou o fili o le faisalamo auā sa ia matuā inoino i a latou amio leaga, e lē faaleatua, ma le tetee faasaga i Lē Silisili ona Maualuga.

Seʻi Tuu atu i le Atua na te Saili ia te Oe

Sa leʻi manao Tavita e pei o tagata amio leaga, ae sa ia iloa faapea sa lē tatau ona iai ia te ia se matauʻa ia i latou. O lea sa ia aioi atu: “Le Atua e, ia e suesue mai ia te au, ma ia e silafia loʻu loto; tofotofo mai ia ia te au, ma ia e silafia oʻu manatunatu; ma ia e silafia po o ia te au se ala e tiga ai; ma e taʻitaʻiina mai aʻu i le ala o le faavavau.” (Salamo 139:23, 24) E ao ona tatou mananao e sailia e le Atua o tatou loto ma filifili po o iai ni mea tatou te vaivai ai. (1 Nofoaiga a Tupu 28:9) E ao ona tatou fesili i le Atua ina ia suesueina i tatou, ia silafia o tatou manatunatuga lemu ma silafia pe o iai se auala e tiga ai i tatou. Afai e maua i tatou i le popole ona o a tatou mea sese pe o iai se mea tiga o iai ia i tatou po o se sese i a tatou gaoioiga, seʻi o tatou tatalo ma le loto maulalo ma gauai atoatoa i le taʻitaʻiga a le agaga o le Atua ma le fautuaga o i lana Afioga. (Salamo 40:11-13) E auala i na mea, o le a mafai ai e la tatou Uo sili ona lelei o Ieova ona taʻitaʻiina i tatou i le ala e faavavau, ma fesoasoani ia i tatou e tuliloa le ala amiotonu e taʻitaʻiina atu ai i le ola e faavavau.

Ua saunia faapea e le Salamo e 139 le faalaeiauga moni. Ua ia faaalia faapea, talu ai e leai se mea e lilo i le silafaga a lo tatou Tamā faalelagi, e mafai ona ia fesoasoani ia i tatou i taimi uma tatou te manaomia ai. (Eperu 4:16) Ae lē gata i lea, ona o Ieova na te silafia lelei i tatou na i lo o le tatou iloa e i tatou o i tatou lava, ua tatou malupuipuia ai i lana tausiga alofa. (Teuteronome 33:27) Afai tatou te fesili atu ma le loto maulalo ia te ia ina ia suesueina o tatou manatu ma aumaia i luma o tatou vaivaiga totino, ona mafai lea ona tatou faasaʻoina mea faatasi ma lana fesoasoani. O lea, ma le mautinoa lava, o le silafia e le Atua o i tatou o ni tagata taitoatasi e ao ona aafia ai o tatou ola i se auala lelei. E tatau ona uunaia i tatou ina ia avea o ni ē lagolagosua faamaoni o le tapuaiga moni ma ia savavali ma le loto maulalo i luma o Ieova, o lē na te silafia lelei i tatou.