O le Soifuaga o Iesu ma Lana Faiva

Ua Lē Taulau ona Latou Maileia Iesu

O LOO aʻoaʻo Iesu i le malumalu ma ua seʻi faatoʻā uma ona ia taʻu atu i ona fili faalotu tala faatusa e tolu na faaalialia ai a latou amio leaga. Ua feita le au Faresaio ma faia ni taupulepulega ina ia maileia o ia i le fai atu o se tala ua latou manatu o le a mafai ai ona molia o ia. Ua latou taupulepule e faia se togafiti ma aauina atu o latou soʻo, faatasi ma le au Herotiano, ina ia taumafai e maileia o ia.

“Le aʻoaʻo e,” ua fai atu ai nei tamaloloa, “ua matou iloa o oe le faamaoni, ua e aʻoaʻo foi i le ala o le Atua ma le faamaoni, e te le mataʻu foi i se tasi; auā e lei faailogaina e oe se tagata. O lenei, ia e taʻu mai ia te i matou, pe se a lau taofi? pe sa ea ona avatu o taulaga ia Kaisara pe leai?”

E leʻi faavaleaina Iesu i nei faaneetaga. Ua silafia e ia faapea afai e fai atu, ‘E leai, e lē tatau i le tulafono pe saʻo ona totogi o lenei taulaga,’ o le a taʻusalaina o ia i le taufaasese faasaga ia Roma. Peitai, afai e fai atu o ia, ‘Ioe, e tatau ona tou totogi lenei taulaga,’ ona inoino ai lea o tagata Iutaia ia te ia, auā e lē mananao i latou e gauai atu ia Roma. O lea na tali atu ai o ia: “O outou tagata pepelo, se a le mea ua outou tofotofo mai ai ia te au? Faaali mai ia ia te au se tupe o le taulaga.”

Ina ua latou avane ia te ia le tupe, ona fesili atu lea o ia: “O ai ea e ona lenei faatagata ma lenei tusi?”

“E o Kaisara,” ua latou tali atu ai.

“O lenei, o mea a Kaisara, ia outou avatu ia Kaisara; a o mea a le Atua ia avatu ia i le Atua.”

Ia, ina ua faalogo nei tagata i lenei tali tumu i le poto, ona latou ofo ai lea. Ma ua latou ō ese ae tuua na o ia.

Ina ua vaai atu ua lē taulau le au Faresaio i le maua o se mea faasaga ia Iesu, ona faalatalata atu lea o le au Satukaio, o ē na faapea mai e leai se toetu, ma fesili atu ia te ia: “Le aʻoaʻo e, ua fai mai Mose, Afai e oti se tasi e leai sana fanau, ia fai lana avā ma avā a lona uso, ia tupu ai se gafa mo lona uso. Sa ia te i matou le au uso e toafitu; na fai avā le ulumatua, ua oti foi o ia; e leai foi sana fanau, o lea na tuuina atu ai lana avā mā lona uso. Na faapea foi o lona lua, ma lona toatolu, ua oo lava i le toafitu. A e muliai oti foi le fafine. O lenei, a oo i le toe tu, o ai so latou o le toafitu e fai māna le avā? auā na fai avā uma ai.”

Ona tali atu lea o Iesu ua faapea atu: “E le o lenei ea ua outou sese ai, ina ua outou le iloa upu o Tusi, ma le mana o le Atua? auā pe a latou toe tutū mai i e ua oti, latou te le fai avā pe nofo tane; a e peitai latou te faapei o agelu o i le lagi. A o e ua oti, ma lo latou toe tu, ua outou le faitau ai ea i le tusi a Mose, i le laau talatala, na fetalai mai le Atua ia te ia, ua faapea, O aʻu o le Atua o Aperaamo, o le Atua foi o Isaako, o le Atua foi o Iakopo? E le o le Atua ia o e ua oti, a o le Atua o e ola; o lea, ua tele ai lava lo outou sese.”

Ua toe maofa foi le motu o tagata i le tali a Iesu. E oo lava i nisi o tusiupu ua latou iloa: “Le aʻoaʻo e, ua tonu lau upu.”

Ina ua iloa e le au Faresaio ua lē mautali le au Satukaio ia Iesu, ona latou faapotopoto ai lea ma ō mai ia te ia. Ina ia tofotofoina atili o ia, ua fesili atu se tasi o i latou: “Le aʻoaʻo e, o le fea poloaiga o i le tulafono ua sili?”

Ua tali atu Iesu: “E sili lenei i poloaiga uma, Faalogo mai ia Isaraelu e; o le Alii [o Ieova] lo tatou Atua, o le Alii e toatasi ia. Ia e alofa foi i le Alii lou Atua ma lou loto atoa, ma lou agaga [solu] atoa, ma lou manatu atoa, ma lou malosi atoa. E faapena foi lona lua, o lenei, Ia e alofa atu i lē lua te tuaoi, ia pei o oe lava ia te oe. E leai lava se tasi poloaiga e sili i na poloaiga.” O le mea moni, ua faaopoopo atu Iesu: “O nā poloaiga e lua ua autu ai le tulafono uma ma le au perofeta.”

“Mālie a oe le aʻoaʻo e, o le tonu lea ua e fetalai mai na,” ua ioe ai se tusiupu. “Auā e toatasi lava le Atua; e leai lava se tasi ua na o ia. Ia alofa foi ia te ia ma le loto atoa, ma le manatu atoa, ma le agaga atoa, ma le malosi atoa; ma ia alofa i lē la te tuaoi e pei o ia lava ia te ia, e sili lea i taulaga mu atoa, ma taulaga uma.”

I le iloa faapea ua tali atu ma le poto le tusiupu, ona taʻu atu lea e Iesu ia te ia: “E te le vava mamao oe ma le malo o le Atua.”

O le tolu nei o aso—Aso Sa, Aso Gafua, ma le Aso Lua—talu ona aʻoaʻo Iesu i le malumalu. Ua faalogo tagata ia te ia ma le fiafia, ae o loo mananao taʻitaʻi lotu loto tiga e fia fasioti ia te ia. Mataio 22:15-40; Mareko 12:13-34; Luka 20:20-40.

◆ O le ā le taupulepulega leaga ua faia e Faresaio ina ia maileia ai Iesu, ma o le ā o le a iʻu i ai pe afai na te avatu le tali o le ioe po o le leai?

◆ Ua faapefea foi ona sao Iesu mai taumafaiga a le au Satukaio e maileia o ia?

◆ O ā isi taumafaiga atili na faia e le au Faresaio e tofotofo ai Iesu, ma o le ā le iʻuga?

◆ I le taimi o lana faiva mulimuli i Ierusalema, e fia aso na aʻoaʻo ai Iesu i le malumalu, faatasi ai ma ā iʻuga?