O le Soifuaga o Iesu ma Lana Faiva

Ua Taʻusalaina e Iesu Ē Tetee ia te Ia

UA MATUĀ faafememeai lava e Iesu taʻitaʻi lotu o ē tetee ia te ia, o lea ua latou matataʻu ai e toe fesili atili atu ia te ia. O lea ua ia taʻimua ai i le faaalialia o lo latou valea. “Se a la outou taofi i le Keriso?” ua ia fesili atu ai. “Se atalii ea ia o ai?”

“O le alo o Tavita,” ua tali atu ai le au Faresaio.

E ui lava, e leʻi faafitia e Iesu le avea o Tavita o le tupuaga faaletino o le Keriso, po o le Mesia, ae ua ia fesili atu: “O lenei, pe faapefea ona taʻua e Tavita e ala i le agaga [i le Salamo 110] o ia o lona ‘Alii,’ i le faapea mai, ‘ua fetalai ane Ieova i loʻu Alii: “Ia e nofo i loʻu itu taumatau, seia ou faia ē ua fai oe ma o latou fili ma mea e tu ai ou vae”’? O lenei, afai ua taʻua o ia e Tavita o le ‘Alii,’ pe faapefea ona fai o ia mona atalii?” (NW)

Ua lē magagana mai le au Faresaio auā latou te lē iloa le faailoaga moni o le Keriso, po o lē ua faauuina. O le Mesia ua lē na o se fanau faaletagata a Tavita, e pei ona manino o loo talitonu i ai le au Faresaio, ae sa soifua o ia i le lagi ma sa sili ia Tavita, po o lona Alii.

Ua faliu atu nei i le motu o tagata ma ona soʻo, ona lapatai atu lea o Iesu e uiga i tusiupu ma Faresaio. Ona o i latou nei o loo aʻoaʻoina le Tulafono a le Atua, ua ‘latou nonofo i le nofoa o Mose,’ ona uunai atu lea o Iesu: “Ia outou anaana ai ma ia outou faia mea uma latou te fai atu ai ia te outou e anaana i ai.” Ae ua ia faaopoopo atu: “A e aua tou te faaaʻoaʻo i a latou amio; auā ua latou fai atu, a e latou te le faia.”

O i latou o tagata faafiaamiotonu, ma ua taʻusalaina e Iesu i latou i upu e pei ona sa ia fetalai atu ai a o taumafa i le fale o se Faresaio i ni masina muamua atu. “Ua latou fai a latou galuega uma,” ua ia fetalai atu ai, “ina ia iloa ai e tagata.” Ma ua ia saunia ni faaaʻoaʻoga, e pei ona matauina:

“Ua latou faalautele i a latou filateri,” o mea latou te ofuina e avea o ni puipuiga. O nei mea o ni mea iti, e fusi i le muaulu po o le ogalima, o loo iai vaega e fa o le Tulafono: Esoto 13:1-10, 11-16; ma le Teuteronome 6:4-9; 11:13-21. A ua faateleina e le au Faresaio tulaga o nei mea ina ia avatu ai le faailoga faapea o loo latou maelega i le Tulafono.

Ua faaauau Iesu faapea ua latou “faatele i tuupao o latou ofu.” I le Numera 15:38-40 ua poloaiina ai tagata Isaraelu ina ia faia ni tuupao i o latou ofu, ae ua faia e le au Faresaio a latou tuupao e sili atu ona uumi na i lo so o se isi lava. O mea uma e faia ona o le faalialia! “Ua latou fiafia foi i le mea sili e taoto ai,” ua toe fetalai atu ai Iesu.

E faanoanoa lava, ona ua aafia ai ona lava soʻo i lenei faanaunauga mo le fiasili. O lea ua ia fautuaina i latou: “A o outou, aua neʻi taʻua outou o rapi; auā e toatasi la outou aʻoaʻo, o le Keriso lea; a o outou uma o le au uso outou. Aua foi neʻi tou taʻua se tasi i le lalolagi o lo outou tamā; auā e toatasi lo outou Tamā, o i le lagi ia. Aua foi neʻi taʻua outou o [taʻitaʻi]; auā e toatasi la outou [taʻitaʻi], o le Keriso.” E tatau i le au soʻo ona aveesea mai ia i latou le faanaunauga o le fia numera muamua! “O lē sili ia te outou e fai lea ma a outou auauna,” ua apoapoai atu ai Iesu.

Ona sosoo ai lea ma lona faailoa atu o le faasologa o oi talofa po o auega i tusiupu ma Faresaio, i le taʻua pea o i latou o ē faafiaamiotonu. Ua latou “pupuni le malo o le lagi i tagata,” ua fetalai ai o ia ma ua latou “faauma fale o fafine ua oti a latou tane; ua faaleleva foi a [latou] tatalo e fai ma ufiufi.”

“Oi talofa ia te outou taʻitaʻi tauaso!” ua fetalai ai Iesu. Ua ia taʻusalaina le leai o ni aogā faaleagaga o le au Faresaio, e pei ona faaalia i manatu eseese ua latou faia. Mo se faaaʻoaʻoga ua latou faapea mai, ‘Ai se tauto i le malumalu, ua leai lea, a o se tauto i le auro o le malumalu, ua mau lea.’ E ala i lo latou matuā faamamafaina o le auro o le malumalu na i lo o le faamamafaina o le tāua faaleagaga o lena nofoaga o le tapuaiga, ua latou faaalia ai le tauaso i a latou amio.

O lea, e pei ona ia faia muamua atu, ua taʻusalaina e Iesu le au Faresaio mo le faagaloina o “mea silisili o i le tulafono, o le amiotonu, ma le alofa, ma le faamaoni” a ua matuā uaʻi atu i le totogiina o le sefuluai, po o mea e sefuluai mea, o laulaau e leai se aogā.

Ua taʻua e Iesu Faresaio o “taʻitaʻi tauaso, ua . . . faapilia le namu, a ua . . . folo atoa le kamela.” Ua latou faapilia le namu mai i a latou uaina, e lē ona e faapea ua na o se iniseti, ae ona e lē mamā e tusa ai ma a latou faamanatuga. Peitai, o lo latou tuulafoaia o mea e sili ona mamafa o le Tulafono ua faatusaina lea i le folo atoa o le kamela, o se manu foi e lē mamā i a latou faamanatuga. Mataio 22:41–23:24; Mareko 12:35-40; Luka 20:41-47; Levitiko 11:4, 21-24.

◆ Aiseā ua lē magagana ai le au Faresaio ina ua fesiligia i latou e Iesu e uiga i upu a Tavita i le Salamo 110?

◆ Aiseā ua faalautele ai e Faresaio o latou filateri ma tuupao o o latou ofu?

◆ O le ā le fautuaga ua avatu e Iesu i ona soʻo?

◆ O ā manatu eseese ua faia e le au Faresaio, ma ua faapefea ona taʻusalaina i latou e Iesu ona o le faagaloina o mea e silisili?