Fesili Mai le Au Faitau

◼ Pe ao i se Kerisiano ona alofia le kofe ma le ti ona e iai le vailaau e taʻua o le caffeine e mafai ona aafia ai le tagata?

E lē o taʻua e le Tusi Paia le kofe po o le ti. Ae o le mea o loo ia fai mai ai e mafai ona fesoasoani i le Kerisiano e filifili pe o le a ia inu le kofe po o le ti.

O le vailaau oona o le caffeine e mafai ona aafia ai le mafaufau ma le tino. E faitau miliona ipu kofe ma ti ua inuina e lē aunoa, o lea ua faapea mai ai Dr. Melvin Konner: “O le [caffeine] o le mea moni, atonu ua avea o se vailaau oona e tiotio ai le mafaufau ua sili ona faaaogāina i le lalolagi.” E mafai ona ia faateleina le mataala, mapuna aʻe ai faalogona loloto i totonu o se tasi, ma faanatinati ai le fetafeai o le toto ma sela i totonu o totoga. Ona o lena mea o le vailaau e aafia ai tagata na te lē o faamaonia faapea e ao i se Kerisiano ona teena le vailaau oona o loo i totonu o mea inu (kofe, ti, faguinu o le cola, maté) po o meaʻai (e pei o sukalati).

O le alakaholo o se vailaau oona foi e mafai ona aafia ai le mafaufau ma le tino, peitai o le ā o fai mai le Tusi Paia e uiga i ai? Ua faailoa mai e le Tusi Paia faapea o le uaina (po o isi meainu e iai le alakaholo) e mafai ona “faafiafia ai loto o tagata” pe aveesea ai foi uiga mafatia o se tagata ua tiga le loto. (Salamo 104:15; Faataoto 31:6, 7) Peitai, e lē o faaalia mai i le Afioga a le Atua faapea e tatau i tagata tapuai moni ona alofia meainu uma e iai le alakaholo. O le mea o loo taʻusalaina e le Tusi Paia o le faaaogāina i se auala lē tatau o le alakaholo—le onā.—Teuteronome 21:18-21; Faataoto 20:1; Hosea 4:11; 1 Korinito 5:11-13; 1 Peteru 4:3.

Ae peitai, e faapefea le faapea mai e mafai ona pulea se tagata e le vailaau o le caffeine? O le toatele o ē ua fai ma masani le inu i le kofe, ti, po le maté ua tupu aʻe ai se tulaga o le faalagolago i ai, e ui lava ua fefinauai pe o se vaaiga faafomaʻi moni lenei. A lē o lea ua oo ia i latou ni lagona o āuga ua lē mafai ona aveesea e pei o le ulu tiga po o le faafaufau, pe afai e taofia lo latou uiga masani o le inu o le vailaau oona o le caffeine. Ia toe manatua ai foi i inei, le manatu faale-Tusi Paia e uiga i meainu e iai le alakaholo. E ui o le toatele o tagata ua pulea e le alakaholo, ae lē o faasaina i Kerisiano pe afai e tagofia i se auala e onomea. Sa taumafa e Iesu le uaina; sa oo foi ina faavavega ona ia faia le uaina i le tausamaaga o se faaipoipoga.—Mataio 26:29; Ioane 2:3-11.

Ae tumau pea, atonu ua lagona e se Kerisiano faapea o le a ia filifilia ia lē tuuina o ia i se tulaga lamatia i le faalagolago atu i le vailaau oona o le caffeine. Afai o lona taofia o le inuina e lē aunoa o le vailaau oona o le caffeine ua avea ma mea e ilitata ai (“e tete ai ona o le kofe”), e mafai ona ia manatunatu e faamamao ese mai le vailaau o le caffeine e avea o se faataʻitaʻiga o le ‘pulea o ia lava.’ (Kalatia 5:22, 23) Ona e lē o taʻua mai i le Tusi Paia le faamamao ese mai meainu o loo iai le vailaau oona o le caffeine, o le filifiliga la e uiga i le kofe po o le ti e tatau ona faia e tagata taitoatasi. E alagatatau le paleni pe afai e inuina e se Kerisiano so o se tasi o nei mea.—Faatusatusa le Tito 2:2.

O le paleni ua faaogatotonu ai foi i le fesili i tulaga lamatia e mafai ona iai i le soifua maloloina. E toatele ua latou taʻua mai tulaga lamatia o le tele o le inuina o le vailaau oona o le caffeine (pe mai le kofe, ti, faguinu o le cola, po o isi lava mea inu po o meaʻai). Peitai, mo suesuega taitasi uma e fesootai faapitoa atu ma le tulaga lamatia o le soifua maloloina ona o le vailaau oona o le caffeine, ae foliga mai ua faasino atu se isi mea i le tuufaafeagai.

O le moni o le tulaga paleni ua faailogaina le mea ua fai mai ai le Tusi Paia e uiga i le meli suamalie. O se mea masani, ma o le ʻaina o lea mea e avea o se meaʻai e faatupu malosi o se mea faalenatura (pe a faaeseese atu i le manavaina o le asu o le tapaa i totonu o māmā). (1 Samuelu 14:26, 27; Mataio 3:4) Ae peitai, e mafai ona e maʻi pe a ʻai tele ai. Ua lapatai mai le Tusi Paia: “Ua e maua ea le meli? ia e ʻai faatatau i ai; neʻi e maʻona tele ai, ona e puai ai lea.”—Faataoto 25:16, 27.

O nisi tagata e matuā lē mafai lava ona latou aai i le meli. E faapena foi, ona o mafuaaga faalesoifuamaloloina, atonu ua manaomia ai e nisi ona aloese mai le alakaholo, caffeine, mea o loo faia i le suasusu, po o isi meaai ma meainu. Atonu e alofia e nisi mea faapena ona o a latou lava filifiliga totino pe ona o le salalau atu o le loto maaleale, e lē mananao e faatiga i se tasi. Ua faamanatu mai ai e lenei mea ia i tatou e uiga i le faamatalaga a le aposetolo o Paulo: “Afai e tausuai loʻu uso ona o le mea e ʻai, ou te le toe ʻai lava i tino o manu e oo i le faavavau, ina neʻi tausuai ai loʻu uso ia te au.”—1 Korinito 8:13.

I le iʻuga, seʻi tatou gaoioi taitoatasi e tusa ai ma lana lava faaiʻuga e aunoa ma le lagona faapea e manaomia ona faamalosia lana filifiliga i isi. Na tusi Paulo: “Aua neʻi taʻufaatauvaaina lē ʻai i le le ʻai ma le ua le ʻai, aua neʻi faasala o ia i le ua ʻai; auā ua talia o ia e le Atua. O ai ea oe lē faasala atu i le auauna a le tasi?”—Roma 14:3, 4.