O le Soifuaga o Iesu ma Lana Faiva

Ua Faaiʻuina le Faiva i le Malumalu

UA FAIA e Iesu lana faailoaina atu mulimuli i le malumalu. O le mea moni, ua ia faaiʻuina lana faiva i le lautele i luga o le lalolagi seʻi vagana ai mea e leʻi oo mai, o lona faamasinoga ma le faasalaina o ia i le oti i le tolu aso mulimuli ane. Ua ia faaauau nei ona faitioina le au tusiupu ma Faresaio.

E faatolu ona ia alaga atili atu: “Oi talofa ia te outou o tusiupu ma faresaio, tagata pepelo!” Muamua na ia alaga atu le oi talofa ia i latou ona ua latou faamamā i “le tua o le ipu ma le tanoa, a o totonu ua tutumu i mea ua faoa ma le amioleaga.” O lea ua apoapoai atu ai o ia: “Ia e muai faamamā i totonu o le ipu ma le tanoa, ina ia mamā atoa ma le tua.”

Ona sosoo ai lea ma lona fetalai atu, oi talofa i tusiupu ma Faresaio ona o lo latou taumafai e nanā i totonu mea inosia ma le pala i foliga faatagā faaaloalo ma le fia mamalu mai fafo. “E tutusa outou ma tuugamau ua faasinasinaina,” ua fetalai atu ai o ia, “o loo matagofie i fafo, a o totonu ua tutumu i ivi o tagata oti, ma mea leaga uma.”

I le faaiʻuga, ua faaalialia ai lo latou pepelo i lo latou fiafia e atiina aʻe tuugamau mo le au perofeta ma teuteu i ia tuugamau ina ia tosina mai ai tagata, i a latou lava galuega agalelei. Peitai, e pei ona faaalialia e Iesu, o i latou o fanau “a e na fasiotia perofeta.” E moni, so o se tasi o lē na te faaalialia lo latou faafiaamiotonu ua i se tulaga lamatia!

I le faaauau pea, ua fetalai atu ai e Iesu ana upu malolosi o le faasalaga. “O outou gata, o fanau a gata feai,” ua fetalai atu ai o ia, “pe faapefea ona outou sosola i le faasala i Kēna?” O Kena o le vanu sa faaaogā e lafoai i ai otaota a Ierusalema. Ua fetalai atu e Iesu na upu ona o lo latou tausisi i o latou ala leaga, o le a puapuagatia tusiupu ma Faresaio i le faaumatiaga e faavavau.

E faatatau ia i latou o ē ua ia aauina atu e avea ma ona sui, ua fetalai atu Iesu: “O isi o i latou tou te fāsiotia ma faasatauroina; a o isi tou te sasaina i o outou sunako, ma tulituliloa ia te i latou i lea aai ma lea aai; ina ia oo ia te outou le toto uma o e amiotonu ua faamaligiina i le lalolagi, e afua i le toto o Apelu le tagata amiotonu, e oo i le toto o Sakaria le atalii o Parakaio [na taʻua o Ieoiata i le 2 Nofoaiga a Tupu], na outou fasiotia i le va o le malumalu ma le fata faitaulaga. E moni, ou te fai atu ia te outou, e oo mai nei mea uma i luga o lenei tupulaga.”

Talu ai ona sa matuā aʻoaʻia mamafa ma le lototele e Sakaria taʻitaʻi o Isaraelu, “na latou au faatasi i taupulepulega faasaga ia te ia ma fetogi ia te ia i maa i le faatonuga a le tupu i le lotoā o le malumalu o le fale o Ieova.” Ae, e pei ona valoia e Iesu o le a tauia Isaraelu ona o le toto o ē amiotonu uma ua faamaligiina. I le 37 tausaga mulimuli ane, i le 70 T.A., na taui atu ai lava ia i latou ina ua faaumatia e ʻau tau a Roma Ierusalema, ma e sili atu i le miliona tagata Iutaia na faaumatia.

A o manatunatu Iesu i lenei tulaga e mataʻu ai, sa tiga o ia. “Ierusalema e, Ierusalema e,” ua toe alaga tasi atu ai o ia, “ua tele lava oʻu manao e faapotopoto i lau fanau, e pei o le moa ona ofaofatai i lana toloai i lalo o ona apaau, a e lei mafafai outou. Faauta, ua tuua lo outou fale, e faatafunaina.”

Ona toe faaopoopo atu lea o Iesu: “Auā ou te fai atu ia te outou, tou te le toe iloa mai aʻu, seia outou fai mai, Ia manuia lē maliu mai i le suafa o le Alii (o Ieova).” O lena aso, o le toe faatasi mai lea o Keriso, pe a ia afio mai i le mamalu o lona Malo, ma e iloa atu o ia e tagata i mata o le faatuatua.

Ua maliu atu nei o ia i se nofoaga i se mea na mafai ai ona ia silafia pusa e teu ai tupe i totonu o le malumalu ma o loo tuu i ai e le motu o tagata tupe i totonu. Sa lafo i ai e tagata mauoa le tele o tupe. Peitai, ona sau ai lea o se fafine mativa ua oti lana tane ma lafo i ai ni tupe iti faatauvaa se lua.

Ona valaau atu lea i ona soʻo, ua fetalai atu Iesu: “E moni, ou te fai atu ia te outou, o mea a lena fafine mativa ua oti lana tane, ua lafo i le mea e teu ai tupe, ua sili ia i a latou uma na lafo i ai; auā o i latou uma, ua latou lafo nisi mea mai a latou mea ua tele; a o ia ua mativa ua ia lafo ana mea uma sa ia te ia, o ana mea uma e ola ai.” Ina ua uma ona fetalai atu i nei mea, ona maliu e se lea o Iesu mai le malumalu mo le taimi mulimuli.

I le maofa i le telē ma le matagofie o le malumalu, na fai atu ai ma le ofo ona soʻo: “Le aʻoaʻo e, ina silasila ia i nei maa ua tetele lava, ma nei fale, ua tetele lava!” E moni, o maa, na faapea mai e taʻi 35 futu [11 mita] le uumi, e sili atu i le 15 futu [5 mita] le lautele, ma e sili atu i le 10 futu [3 mita] le maualuga!

“Ua e iloa ea nei fale tetele?” ua tali atu ai Iesu. “E le tuua le tasi maa i luga o le tasi maa a e uma lava ona soloia i lalo.”

Ina ua uma ona fetalai atu o nei mea, ona sopo atu lea o Iesu ma ona soʻo i le Vanu o Ketarono ma feaei atu i le Mauga o Olive. Ma sa mafai ona latou vaavaai mai ai i inā i le malumalu matuā matagofie. Mataio 23:25–24:3; Mareko 12:41–13:3; Luka 21:1-6; 2 Nofoaiga a Tupu 24:20-22, NW.

◆ O le ā ua faia e Iesu i le taimi o lana asiasiga mulimuli i le malumalu?

◆ Ua faapefea ona faaalialia le faafiaamiotonu o tusiupu ma Faresaio?

◆ O le ā le uiga o le “faasala i Kēna”?

◆ Aiseā ua fetalai atu ai Iesu faapea e sili mea na lafo e le fafine ua oti lana tane ia i latou o ē mauoa?