Fesili Mai le Au Faitau

◼ Pe e ao ona tatou faia se faaiʻuga mai le Mataio 7:13, 14 ma le Luka 13:24 faapea e oo lava i le toetu, e toatele tagata o le a teena le tapuaiga moni?

E leai, o nei fuaiupu latou te lē o lagolagoina lena faaiʻuga. Na i lo o lea, ua latou faafesootai faapitoa atu i le mauaina o le ola i le Malo faalelagi.

O upu a Iesu i le Mataio 7:13, 14 o se vaega o le Lauga i luga o le Mauga. Na ia fetalai ai: “Ia outou ulu atu i le faitotoa va apiapi; auā e va tele le faitotoa, e lautele foi le ala e tau atu i le malaia, e toatele foi i latou o e ui atu ai. Auā e va apiapi le faitotoa, e lauitiiti foi le ala e tau atu i le ola, e toaitiiti foi i latou o e maua.”

O le tele o mea na fetalai ai Iesu i lenei tulaga e fesootai faapitoa atu lava i le Malo faalelagi. Mo se faaaʻoaʻoga, sa ia amata i upu nei: “Amuia ē ua iloa o latou manaoga faaleagaga, auā e fai le malo o le lagi mo i latou.” (NW) Na ia fetalai faapea o ē loto mamā o le a “iloa atu le Atua” ma faapea o “le malo o le lagi” e mo i latou o le a “sauaina ona o le amiotonu.” (Mataio 5:3, 8, 10) Mulimuli ane i lena lava lauga, na fetalai ai Iesu e uiga i le auala va tele e taʻitaʻiina atu ai i le faaumatiaga ma le auala va apiapi e taʻitaʻiina atu ai i le ola. I se vaega, na ia faaopoopo atu: “E le sao atu i le malo o le lagi i latou uma o e fai mai ia te au, Le Alii e, le Alii e, na o le na te faia le finagalo o loʻu Tamā o i le lagi.”—Mataio 7:13, 14, 21.

O le uiga o le Luka 13:24 e faapena foi, e pei ona faaalia i mau o loo lagolagoina ai. Na aumaia e Iesu ni tala faatusa se lua e uiga i le “malo o le Atua.” Mulimuli ane, na fesili atu nisi ia te ia: “Le Alii e, e toaitiiti ea e faaolaina?” Na tali Iesu: “Ia outou finafinau ina ia ulu atu i le faitotoa va apiapi; auā ou te fai atu ia te outou, e toatele latou te saili ina ia ulu atu, a e le mafai lava.” O le “toatele” e faasino i tagata o ē na augani atu mulimuli ane ina ia ui atu i le faitotoa ina ua uma ona tapuni ma faamauina. O i latou nei o “e fai amio leaga” o ē sa leʻi agavaa e faatasi ma “Aperaamo, ma Isaako, ma Iakopo, ma le au perofeta uma i le malo o le Atua.” O le “toatele” sa manatu o i latou e muamua “i le malo o le Atua,” ae o le mea moni o le a avea i latou o ē mulimuli, e matuā lē iai lava i latou i lena malo.—Luka 13:18-30.

O le faamatalaga e lagolagoina ai o loo faaalia ai faapea sa feagai Iesu ma le ulu atu i le Malo faalelagi o le Atua. O taʻitaʻi lotu Iutaia i tuā i inā ua leva ona latou olioli i se tulaga faaeaina, ona o le fesoasoani a le Afioga a le Atua. Sa ia i latou le lagona faapea sa faaoaina i latou faaleagaga ma sa amiotonu i le silafaga a le Atua, i le faaeseese atu ma tagata a lautele, o ē na latou manatu maulalo i ai. (Ioane 9:24-34) Peitai, na fetalai Iesu faapea o telona ma fafine talitane o ē na talia lenei feau ma salamō e mafai ona maua le faamaoniga a le Atua.—Faatusatusa Mataio 21:23-32; Luka 16:14-31.

O tagata a lautele o ē na avea ma soʻo o Iesu sa iai i le faasologa e talia ai e avea o atalii faaleagaga ina ua tatalaina le valaau faalelagi i le Penetekoso i le 33 T.A. (Eperu 10:19, 20) E ui lava e toatele le vao o tagata sa faalogo ia Iesu, ae e toaitiiti i latou o ē na talia o ia ma mulimuli ane maua le faamoemoe faalelagi. Ae o le lafu mamoe itiiti o le fanau a tagata fanauagagaina na mauaina lena taui e mafai ona faatusatusa atu ia Iakopo i le taooto i le laoai i le lagi faatasi ma Ieova (le Aperaamo Sili) ma lona Alo (na faaatagia e Isaako). O lena mea sa aogā ona faamalosia ai se tasi lava ia ina ia filigā, peitai o le toatele o ē na faalogo ia Iesu sa leʻi faia faapea.

I le iʻuga, ua mafai ai ona tatou iloa mai le faamatalaga e faamaonia ai i nei tala e lua faapea sa faamatala atu e Iesu (e uiga i le toaitiiti o ē na ui i le auala va apiapi e tau i le ola ma amata ona faasaoina) sa fesootai muamua atu i le mauaina o le faamaoniga a le Atua i lena taimi ina ua Ia tuuina mai le faamoemoe o le ola faalelagi. E matuā toaitiiti lava o ē na faalogo i le feau o le upu moni ma aʻoaʻoina le mea sa manaomia ma tali atu ma faamaonia le faatuatua.—Mataio 22:14; 24:13; Ioane 6:60-66.

O mea e naunau tele e oo lava i aso nei, o loo maua le Tusi Paia atoa ma o loo iai le anoanoai o faataunuuga o valoaga tauatua e uiga i aso e gata ai, a e matuā toaitiiti lava e tali mai i le feau faa-Kerisiano ma tumau i le auaunaga ia Ieova. Ua fetaui lenei ma le tala faatusa a Iesu e uiga i eleele eseese. Na ia fetalai faapea o nisi o le a faalogo “i le upu o le Malo,” peitai o le a faoa ese e Satani le mea na luluina. O isi o le a talia le upu ma le olioli ae o le a lē taulau ona o puapuaga po o sauaga. Peitai o isi o le a faamaonia le lē fua ona “o le popole i lenei faiga o mea ma le taufaasese o le mana o le oa.”—Mataio 13:18-23, NW.

Ua mafai ona tatou mautinoa faapea o le a matuā eseese lava pe a toe faatutūina mai le faitau miliona ma miliona i le taimi o le Aso Faamasino. Ona lē mafai lea ona saoloto Satani e faoa ese fatu o le upu moni na luluina i o latou loto. O le a latou lē toe feagai ai ma sauaga po o popolega o lenei faiga leaga o mea. O le a aʻoaʻoina i latou i se siomaga amiotonu, e siosiomia e galuega mamana a le Atua, e aofia ai le toetu o ē ua oti ma le faamaloloina o nuu. E ioeina foi, faapea o le a lē tali mai nisi e oo lava i lena taimi. (Faatusatusa Ioane 11:45-53.) Ae e iai mafuaaga lelei e mafaufau ai faapea o le toatele o le a latou lagona le uiga o le upu, ma tali atu i ai, ma faasaoina.