O le Afioga a le Atua o le Upu Moni
“Ia e faapaiaina i latou i lau upu moni; o lau afioga o le upu moni lea.”—IOANE 17:17.
1. Na faapefea ona manatu le faisalamo Eperu i le Tusi Paia, ae o le ā le vaaiga i ai a le toatele i aso nei?
“O LAU afioga o le sulu lea i oʻu vae, ma le malamalama i loʻu ala.” (Salamo 119:105) O le faamatalaga lena a le faisalamo Eperu. E na o sina toaitiiti i aso nei e iai so latou faaaloalo faapena mo le Afioga a le Atua. Ua iai i lenei 20 senituri le Afioga a le Atua i tulaga o tusitusiga e pei o le Tusi Paia. Ua faaliliuina i le tele o gagana ma tufatufaina i se tulaga ua sili atu lona aoao na i lo se isi lava tusi i talafaasolopito. Peitai, e toatele e mumusu e talia faapea o se lamepa mo o latou vae. E oo lava ia i latou o ē faapea mai o Kerisiano, ua filifili i se tulaga sili, latou te mulimuli atu i o latou lava manatu na i lo le tuu atu i le Tusi Paia e faamalamalamaina o latou ala.—2 Timoteo 3:5.
2, 3. O le ā le vaaiga a Molimau a Ieova i le Tusi Paia, ma o ā aogā ua aumaia e lenei ia i latou?
2 I se matuā faaeseesega, o i tatou o Molimau a Ieova tatou te malilie faatasi ma le faisalamo. Ia i tatou, o le Tusi Paia o le taʻiala lea ua tuuina mai e le Atua. Ua tatou iloa “o Tusi Paia uma lava e mai le Agaga o le Atua ia, e aoga foi ia e aʻoaʻo ai, e aoai ai, e faatonu ai, e faapoto ai foi i le amiotonu.” (2 Timoteo 3:16) E lē pei o le toatele i aso nei, tatou te lē mananao e tofotofo i mataupu tau i amioga mamā pe lē mamā foi. Ua tatou iloa le mea e saʻo auā ua taʻu mai faapea e le Tusi Paia ia i tatou.
3 Ua aumaia e lenei mea ia i tatou aogā e sili ona lelei. Ua oo ina tatou iloa Ieova, ma ua tatou aʻoaʻoina foi ana fuafuaga ofoofogia mo le lalolagi ma le fanau a tagata, o lea ua tatou mautinoa ai faapea e mafai ona maua se lumanai pupula mo i tatou ma o tatou aiga. Tatou te malilie faatasi i le loto atoa ma le faisalamo o lē na faapea mai: “Ua tele lava loʻu naunau i lau tulafono; ou te mafaufau i ai i le aso atoa. O au poloaiga e sili ai ona poto o aʻu i e ita mai ia te au; auā e ia te au lava ia e faavavau.”—Salamo 119:97, 98.
Molimau e Ala i Amio
4. O le ā le avega tauave ua tuu mai i o tatou luga e ala i le iloaina faapea o le Tusi Paia o le Afioga a le Atua?
4 O le mea lea, ua ia i tatou mafuaaga uma e ioe ai i upu a Iesu na faasino atu i lona Tamā: “O lau afioga o le upu moni lea.” (Ioane 17:17) Ae o le iloaina o lenei mea moni ua tuu ai se avega tauave i o tatou luga. E ao ona tatou fesoasoani i isi ina ia iloatino faapea o le Afioga a le Atua o le upu moni. I lenei auala o le a latou mafai ai foi ona olioli i faamanuiaga ua tatou tofo totino i ai. E mafai faapefea ona tatou fesoasoani ia i latou i lena auala? Mo le mea e tasi, e tatau ona tatou faia taumafaiga uma ina ia faatatauina ai mataupu silisili a le Tusi Paia i o tatou olaga i aso taitasi. I lena auala, o le a iloa ai e ē loto saʻo faapea o le auala a le Tusi Paia e silisili ona lelei.
5. O le ā le fautuaga na tuuina mai e Peteru e faatatau i le molimau atu e ala i a tatou amio?
5 O le manatu tāua lenei o le fautuaga a le aposetolo o Peteru i fafine Kerisiano o ē o a latou tane e lē talitonu. Na ia faapea atu ia i latou: “Ia faapea outou fafine, ia usiusitai i a outou lava tane, afai foi e le faalogo nisi i le upu, ia maua i latou i le amio lelei a avā.” (1 Peteru 3:1) O le mataupu silisili foi lea sa i tua o lana fautuaga i tane, fafine, ma tamaiti uma—ina ua ia faapea atu: “Ia lelei a outou amio i luma o nuu ese, o le mea latou te fai upu leaga ai ia te outou, peiseai o tagata amio leaga outou, latou te vaavaai ai i a outou amio lelei, ona latou vivii atu ai lea i le Atua i le aso e asiasi mai ai o ia.”—1 Peteru 2:12; 3:16.
Le Atamai Silisili o le Tusi Paia
6. Ua fesoasoani faapefea Peteru ia i tatou e vaai ai i le tatau ona tatou fesoasoani atu i isi ina ia talisapaia le Tusi Paia?
6 E lē gata i lea, ua mafai foi ona fesoasoani Kerisiano i isi ina ia talisapaia le Tusi Paia pe afai latou te fai e pei ona fautua ai foi Peteru: “Ia paia le Alii [Keriso, NW] i o outou loto. Ia saunia pea lava outou e tali atu ma le agamalu ma le mataʻu ia i latou uma o e fesili mai ia te outou i le uiga o le faamoemoe o loo ia te outou.” (1 Peteru 3:15) E ao i faifeau Kerisiano ona mafai ona puipuia le Tusi Paia ma faamalamalama atu i isi faapea o le Afioga a le Atua. E mafai faapefea ona latou faia lea?
7. O le ā le mea moni e uiga i le Tusi Paia ua faataʻitaʻia ai faapea e ao ona avea o le Afioga a le Atua?
7 O se tasi o fuaitau e uunaia ai ni fefulisaiga ua maua i le tusi o Faataoto. I inā ua tatou faitau ai: “Loʻu atalii e, afai e te talia aʻu upu, ma e teu i lou loto aʻu poloaiga, e uai atu ai ou taliga i le poto, ona . . . e maua ai le poto i le Atua. Auā o Ieova na te foai mai le poto; mai lona fofoga le poto ma le faautauta.” (Faataoto 2:1-6) Ua maua le atamai o le Atua lava ia i itulau o le Tusi Paia. Pe a iloa e se tagata faamaoni lena atamai loloto, e lē mafai ai ona ia lē taulau i le iloatinoina faapea e sili atu le Tusi Paia i le na o se upu a tagata.
8, 9. Ua faapefea i le fautuaga a le Tusi Paia e faatatau i le tausia o le vaaiga paleni i le mauaina o le tamaoaiga ona faaalia lona saʻo?
8 Seʻi manatunatu i ni nai faaaʻoaʻoga. I aso nei, o se tulaga manuia o le olaga e masani lava ona fua i tulaga tau tupe. O le tele o mea e maua e se tagata, o le tele foi lea o le manuia ua ia manatu o loo iai o ia. Ae peitai, ua lapatai mai le Tusi Paia e faasaga i le soona faamamafa o mea faaletino. Na tusi le aposetolo o Paulo: “O e manao i le fia mauoa, e maua i latou i le faaosoosoga, ma le mailei, ma tuʻinanau e tele e valea ai ma leaga ai, o mea ia e goto ai tagata i le fanoga ma le malaia. Auā o le manao i tupe, o le pogai lea o mea leaga uma lava; ua mananao tele i ai nisi, ona sese ai lava lea o i latou i le upu o le faatuatua, ua tuʻia ai ua ati i latou e i latou i puapuaga e tele.”—1 Timoteo 6:9, 10; faatusatusa Mataio 6:24.
9 Ua faaalia e mea tutupu maeu le alagātatau o lenei lapataiga. Ua matauina e se tagata suesue tau i le mafaufau: “O le avea ma sē e Numera 1 ma mauʻoa e lē oo ai ia te oe se lagona ua e faataunuuina se mea, le loto malie, le faaaloalogia ma le alofagia moni.” Ioe, o i latou o ē faaaluina uma o latou malosi i le sailia o le tamaoaiga e masani lava ona iʻu atu i faalogona tiga ma faaumatia ai le faamoemoe. A o faailoa mai e le Tusi Paia le tāua o tupe, ua ia faasino atu foi i se mea e sili atu ona tāua: “Ua fai le atamai ma puipuiga e pei ona fai tupe ma puipuiga; ae o le aogā o le poto e faapea, o le atamai lava ia, e faaolaina ai ē ua maua.”—Failauga 7:12, NW.
10. Aiseā e tatau ai ona tatou utagia le fautuaga a le Tusi Paia ina ia mataala i a tatou aumea?
10 E tele tulafono faapea a le Tusi Paia tau i amioga. O le isi e faapea: “O lē latou te feoai ma tagata popoto, e poto lava ia; a o le uo a e valelea, e leaga ai lava ia.” (Faataoto 13:20) Ua faamaonia foi le moni o lenei i mea na tutupu. O omiga mai tupulaga ua taʻitaʻiina atu ai tagata talavou i le onanā, faaaogāseseina o vailaau oona, ma amioga lē mamā. So o se tasi e miomio faatasi ma i latou e faaaogāina gagana masoā e mulimuli ane ua latou faaaogā foi lea lava gagana leaga. E toatele ua gaoi mea mai i o latou pule ona ‘o loo fai foi e isi.’ E moni, e pei ona faapea mai le Tusi Paia: “O le feoai ma e amio leaga e leaga ai amio lelei.”—1 Korinito 15:33.
11. Na faaalia faapefea e se suesuega tau i le mafaufau le atamai o le mulimuli atu i le Tulafono Faaauro?
11 O se tasi o fautuaga pupuu e sili ona taʻutaʻua i le Tusi Paia o lea ua taʻua o le Tulafono Faaauro: “O mea uma foi tou te loto i ai ia faia e tagata ia te outou, ia faapea lava ona outou faia ia te i latou.” (Mataio 7:12) Ana fai e mulimuli tagata i lenei tulafono, semanū o le a manino mai le avea o le lalolagi ma nofoaga e sili atu ona lelei. Ae tusa lava pe lē mulimuli le fanau lautele a tagata i le tulafono, ae sili ona lelei mo oe lava ia ona faia faapea. Aiseā? Auā na faia i tatou ina ia tausi atu i isi ma manatu mamafa atu ia i latou. (Galuega 20:35) I se suesuega tau i le mafaufau na faia i le Iunaite Setete ina ia sailia ai po o ā uiga faaalia o tagata pe a latou fesoasoani atu i isi, na latou oo atu ai i lenei faaiʻuga: “E foliga mai la, faapea, o le tausi atu i isi, o se vaega sili lea o le natura faaletagata e pei ona tausia o i tatou e i tatou lava.”—Mataio 22:39.
Le Fautuaga a le Tusi Paia—Lona Atamai Tutasi
12. O le ā se vala e tasi ua avea ai le Tusi Paia o se mea tutasi?
12 E moni, i aso nei, o loo iai le tele o puna o fautuaga i fafo atu o le Tusi Paia. Ua iai i nusipepa itu mo fautuaga, ma ua tutumu fale tusi i tusi e sue ai e le tagata le fesoasoani mo ia lava. E faaopoopo i ai, ua iai fomaʻi o le mafaufau, o tagata faufautua popoto, ma isi ua ofoina atu fautuaga i so o se matātā. Ae ua tutasi le Tusi Paia i vala e tolu. Muamua, e aogā pea lava ana fautuaga. E lē taitai ona faapea ua na o se aʻoaʻoga po o se manatu, ma e lē taitai foi faia ina ia faaleaga ai i tatou. So o se tasi e mulimuli atu i fautuaga a le Tusi Paia e tatau ona ioe faatasi ma le faisalamo ina ua faapea atu i le Atua i le tatalo: “O āu mau e faamaonia le matuā maufaatuatuaina.”—Salamo 93:5, NW.
13. O le ā ua faaalia ai le matuā sili atu o le Tusi Paia na i lo o puna faaletagata o le atamai?
13 Lona lua, ua mausalī le Tusi Paia e tusa ma mea tutupu i le faagasologa o taimi. (1 Peteru 1:25; Isaia 40:8) O fautuaga mai puna faaletagata ua iloa lelei lava le mafai ona fesuisuiai, ma o le mea sa aogā i le isi tausaga e masani lava ona toe faitioina i le tausaga e sosoo ai. Ae peitai, e ui lava toetoe 2,000 tausaga ua mavae talu ona uma ona tusia le Tusi Paia, ae ua iai pea fautuaga silisili ona atamai, ma o ana faaupuga ua fetaui mo le aoao uma. E faatatauina faatasi ma āuga tutusa lelei e tusa lava pe tatou te nonofo i Aferika, i Asia, i Amerika i Saute po o Matu, i Europa, po o atumotu o le vasa.
14. I le ā le auala ua sili ai ona lelei le Afioga a le Atua?
14 Ma le vala mulimuli, o le faagasologa tele o fautuaga a le Tusi Paia ua lē mafaatutusaina. Ua faapea mai se faataoto i le Tusi Paia: “O Ieova na te foai mai le poto,” ma po o le ā lava le faafitauli po o se filifiliga tatou te fesagaʻi, ae o loo iai lava le atamai i le Tusi Paia lea e fesoasoani ia i tatou e foia ai. (Faataoto 2:6) O tamaiti, talavou, mātua, tagata matutua, tagata faigaluega, o pule o galuega, tagata i tulaga o pule, ua latou iloaina uma lava faapea o le atamai i le Tusi Paia ua faatatauina ia i latou. (Faataoto 4:11) E tusa lava pe tatou te fesagaʻi ma tulaga faapea sa leʻi iloaina i taimi o Iesu ma ona aposetolo, ae ua aumaia lava e le Tusi Paia ia i tatou fautuaga e aogā i ai. Mo se faaaʻoaʻoga, i tuā i le uluai senituri, sa leʻi iloa ai i Sasae Tutotonu le ulaula tapaa. I aso nei, ua matuā salalau atu. Ae ui i lea, so o se tasi e talia fautuaga a le Tusi Paia ina ia alofia le ‘aumaia i lalo o le pule [po o le pulea] e so o se mea’ ma ia faamamā mai “mea uma e leaga ai le tino atoa ma le agaga” o le a aloese ai mai lenei masani, lea e lē gata e oo ina fai ma masani ae faaleagaina ai foi le soifua maloloina.—1 Korinito 6:12; 2 Korinito 7:1.
Mo lo Tatou Lelei i se Taimi Umi
15. Aiseā ua faapea mai ai le toatele ua lē o toe aogā i aso nei le Tusi Paia?
15 E moni, e toatele ua faapea mai o le Tusi Paia ua lē o toe aogā i aso nei ma ua lē o toe fetaui ma lenei 20 senituri. Ae peitai ona o lena foi le pogai e lē o taʻu maia e le Tusi Paia mea o loo latou fia faalogo i ai. O le mulimuli atu i fautuaga faale-Tusi Paia ua galue aogā mo lo tatou lelei mo se taimi umi, ae masani lava ona manaomia ai le onosai, aʻoaʻiga, ma le lē faafiafiaina o oe lava—o uiga na e lē o taatele i se lalolagi o loo faalaeiauina ai i tatou ina ia sailia le faafiafiaina vave o le loto.—Faataoto 1:1-3.
16, 17. O ā tapulaa maualuluga o amioga mamā faaleituaiga ua faataatia e le Tusi Paia, ma ua lē amanaiaina faapefea i nei ona po?
16 Manatu i le mataupu o amioga mamā faaleituaiga. E matuā maumauai tapulaa a le Tusi Paia. Na pau lava le nofoaga mo feusuaiga faaleituaiga o totonu o le faaipoipoga, ma ua faasaina feusuaiga uma i fafo atu o le faaipoipoga. Ua tatou faitau ai: “O e faitaaga, ma e ifo i tupua, ma e mulilulua, ma e tauātane, ma e faasotoma, . . . e le fai mo latou tofi le malo o le Atua.” (1 Korinito 6:9, 10) E lē gata i lea, ua manaomia e le Tusi Paia mo Kerisiano le faaipoipo atu i le na o le toatasi le paaga, e tasi le tane mo le avā e toatasi. (1 Timoteo 3:2) Ma a o iai ni tulaga matuiā ua mafai ona faatagaina ai se talagā faaipoipoga po o se teteaga, ua faapea mai le Tusi Paia i tulaga lautele, o le noataga o le faaipoipoga e mo le olaga atoa. Na fetalai Iesu lava ia: “O le na faia tagata i le amataga, na ia faia i laua o le tane ma le fafine, na ia fetalai ane foi, O le mea lea e tuua ai e le tane o lona tamā ma lona tinā, a e faatasi ma lana avā; ona avea lea o i laua o le tino e tasi? O lea e le toe toalua ai, a o le tino e tasi i laua; o lenei, o e ua faatasia e le Atua, aua neʻi faateaeseina e se tagata.”—Mataio 19:4-6, 9; 1 Korinito 7:12-16.
17 I aso nei, ua salalau atu le lē amanaiaina o nei tapulaa. O faiga lē mamā faaleituaiga o loo talia lava. O faiā faaleituaiga i le va o talavou o faia ni tuugatala ua manatu i ai o se mea masani. O le nonofo faatasi e aunoa ma le aogā o le faaipoipoga o loo talia lava. I ulugalii faaipoipo, o feusuaiga faaleituaiga i fafo o le faaipoipoga a so o se tasi o paaga ua avea o se faiga taatele. Ma o loo pepesi le talagā faaipoipoga i lenei lalolagi o ona po nei. Ae peitai, o nei tulaga tuufaitalia ua lē o aumaia ai le fiafia. O iʻuga leaga ua faamaonia ai faapea i mea uma lava, ua saʻo ai le Tusi Paia i le tausisi maumauai atu i tapulaa o amioga mamā.
18, 19. O le ā ua iʻu i ai mai le salalau atu o le lē amanaiaina o tapulaa a Ieova i amioga mamā?
18 Na faapea mai le mekasini Ladies’ Home Journal: “O le faamamafaina o feusuaiga faaleituaiga na sa iloga ai tausaga o le onosefulu ma le fitusefulu, sa aumaia ai e lē o le fiafiaga tumau faaletagata ae o le tulaga leaga mataʻutia o le fanau a tagata.” O le “tulaga leaga mataʻutia o le fanau a tagata” i inei, ua faasino atu e aofia ai le puapuagatia o tamaiti i le matuiā o faalogona ootia ona o talagā faaipoipoga a o latou mātua ma faapea foi i tagata matutua ona mafatia ai i le loloto o tiga o faalogona ootia. Ua na faaaofia ai foi le faatupulaia o aiga e taitoatasi matua, ma se mala o teine talavou ua maua a latou pepe, a o loo faafaigata pea foi ona teaese mai i o latou tulaga faatamaiti. E lē gata i lea, ua aofia ai foi ma le tupu tele o faamaʻi pipisi ona o feusuaiga, e pei o le genital herpes, gonorrhea, sifilisi, chlamydia, ma le FFP (AIDS).
19 I le vaai atu i nei mea uma, na matauina ai e se polofesa i mataupu tau i le soifuaga lautele e faapea: “Atonu pe ua tatou tutupu aʻe ma ua lava le matutua e filifili ai pe lē o se mea sili ona lelei mo i tatou ona siitia le faamamao ese a o leʻi faaipoipo e fai ma aiaiga faapea o le mea lena e aupito sili ona tali mai i manaoga o o tatou tagatanuu ma la latou aiā i le saolotoga: saolotoga mai faamaʻi, saolotoga mai maʻito e leʻi manaomia.” Ua taʻua ma le saʻo e le Tusi Paia: “Amuia le tagata o lē faatuatua ia Ieova, a e le faasaga i e faamaualuluga, ma e ua liliu ane i mea pepelo.” (Salamo 40:4) O i latou o ē faatuatua i le atamai o le Tusi Paia ua lē faaseseina i pepelo a i latou o ē faasagatau i le Tusi Paia ma faapea mai o tulaga sili ona lē mamā tau amio e aumaia ai le fiafia. O tapulaa atamai a le Tusi Paia, pe afai e maumauai i ai, e mo le tulaga aupito sili ona lelei.
Faafitauli Faigata i le Olaga
20. O ā mataupu silisili a le Tusi Paia ua faamaonia le fesoasoani ia i latou o ē tatau ona fesagaʻia le ogoogo o le mativa i o latou olaga?
20 O le atamai o le Tusi Paia ua fesoasoani foi ia i tatou e taulimaina faafitauli faigata ua tatou fesagaʻi i le olaga. Mo se faaaʻoaʻoga, i le tele o atunuu, o loo iai ni Kerisiano o loo ola i se tulaga sili ona leaga o le mativa. Peitai, o loo latou feagai lava ma lo latou mativa ma maua ai pea le fiafia. Faapefea? E ala i le mulimuli i le Afioga faagaeeina a le Atua. Latou te matuā amanaia upu faamafanafana a le Salamo 55:22: “Ia e tuuina atu ia Ieova o mea e te popole vale ai; o ia lava na te tausia oe.” Latou te faalagolago atu i le Atua mo le malosi e tumau ai. Ona latou faatatauina lea o mataupu silisili a Tusi Paia ma alofia uiga masani e afaina ai, ma uiga faatautala, e pei o le ulaula ma le onā. O i latou o ni tagata galulue mamafa, e pei ona taʻulelei ai e le Tusi Paia, ma i lea ua masani ai lava ona latou iloaina e mafai ona latou fafaga i o latou aiga, ae o tagata paiē ma le loto vaivai e lē taulau. (Faataoto 6:6-11; 10:26) E lē gata i lea, latou te utagia le lapataiga a le Tusi Paia: “Aua foi e te [matauʻa] ona o e fai mea leaga.” (Salamo 37:1) Latou te lē fiafia i pelēga tupe po o isi gaoioiga solitulafono, e pei o le faatauina atu o vailaau oona. O nei mea atonu e ofoina atu ai se “vaifofo” vave i o latou faafitauli, ae o fua mo le taimi umi e oona.
21, 22. (a) Na faapefea ona utufia mai e se tasi fafine Kerisiano le fesoasoani ma le faamafanafanaga mai le Tusi Paia? (e) O le ā le mea moni atili e uiga i le Tusi Paia ua fesoasoani ia i tatou e iloatino ai faapea o le Afioga lea a le Atua?
21 Pe fesoasoani moni ia i latou o ē o loo matuā matitiva le mulimuli atu i le Tusi Paia? Ioe, e pei ona tofo totino i ai le toatele i faamaoniga. Ua tusi mai se tasi fafine Kerisiano ua oti lana tane i Asia: “E ui lava ua ou ola i se olaga mativa, ae ou te leʻi ita pe tiga ai. Ua faatumulia aʻu i upu moni o le Tusi Paia faatasi ma se vaaiga mautinoa i le lumanai.” Ua ia lipoti mai faapea ua faataunuuina i lona tulaga se folafolaga iloga na tuuina mai e Iesu. Na fetalai Iesu: “A ia outou muai saili le malo o le Atua ma lana amiotonu; ona faaopoopoina atu lea o ia mea uma ia te outou.” (Mataio 6:33) Ua ia faamaonia faapea e ala i le faamuamua o lana auaunaga i le Atua i lona olaga, na ia maua ai pea, i so o se auala mea faaletino e manaomia i le olaga. Ma ua tuuina atu ia te ia e lana auaunaga faa-Kerisiano lona faaaloalogia ma se sini i le olaga, lea ua mafai ai pea ona tumau e ui i lona mativa.
22 E moni, o le loloto o lona atamai ua faaalia ai faapea o le Tusi Paia o le Afioga lava a le Atua. E leai lava se tusi na saunia e tagata lava latou e mafai ona faaaofia ai le tele o vala eseese o le olaga ma sili ona loloto lona faautauta ma le tausisia o le mea saʻo. Ae iai le isi mea moni e uiga i le Tusi Paia ua faataʻitaʻia ai lona amataga tauatua. E iai lona mana e suia ai tagata mo le lelei. O le a tatou talanoaina lenei i le mataupu o sosoo mai.
Pe Mafai ona E Faamatala?
◻ I ā auala ua faamanuiaina ai Molimau a Ieova e ala i lo latou taliaina o le Tusi Paia e avea o le Afioga a le Atua?
◻ I le avea o ni ē talitonu i le Afioga a le Atua, o le ā le avega tauave ua ia i tatou, ma ua faapefea ona fesoasoani la tatou amio ia i tatou e faatino ai lenei avega tauave?
◻ O le ā ua faia ai le Tusi Paia o se fautua atamai e sili atu na i lo fautuaga a ē ua na o ni tagata?
◻ O ā nisi o faaaʻoaʻoga ua faaalia ai le loloto o le atamai o le Tusi Paia?