O le Soifuaga o Iesu ma Lana Faiva

O Taupou Popoto ma Taupou Vālea

NA SEʻI faatoʻā uma lava ona tali e Iesu le augani ane a ona aposetolo mo se faailoga o lona faatasi mai i le mana o le Malo. Nei ua ia saunia ai ni vaega atili o le faailoga i ni faataoto se tolu, po o ni tala faatusa.

O le faataunuuga o tala faatusa taitasi o le a matauina ai e i latou o loo ola i le taimi o lona faatasi mai. Ua ia faailoa atu le faailoga muamua i upu nei: “O ia ona po e tusa ai le malo o le lagi ma taupou e toasefulu, o e na ave a latou lamepa, ma latou o atu e faafetaiai i le faatoafaiavā. Ua popoto le toalima o i latou, a e vālea le toalima.”

E ala i lenei faaupuga “e tusa le malo o le lagi ma taupou e toasefulu,” e lē o le uiga o le fetalaiga a Iesu faapea o le afa o i latou o le a ō atu i le Malo faalelagi o ni tagata vālea ma o le isi afa e popoto! E leai, ae o le uiga o lana fetalaiga e faapea i le fesootai atu ma le Malo o le lagi, o loo iai se vala e pei o lenei pe pei foi o lena, po o o mea i le fesootai atu ma le Malo o le a pei o lena mea ma lenei mea.

O taupou e toasefulu ua faaatagia ai Kerisiano uma o ē o loo i le faasologa pe o faapea mai o loo iai i le faasologa o le Malo faalelagi. O i le Penetekoso 33 T.A. na folafolaina ai le faapotopotoga Kerisiano i se faaipoipoga ma le Faatoafaiavā faamamaluina ua toe faatuina, o Iesu Keriso. Ae o le faaipoipoga e tatau ona faia i le lagi i se taimi e lē o patino i le lumanai.

I le tala faatusa, o taupou e toasefulu na ō atu ma se fuafuaga e faafeiloaia le faatoafaiavā ma auai i le faagasologa o le faaipoipoga. Pe a taunuu mai o ia, o le a latou faamalamalamaina le auala o le solo i lamepa, i lea ua faamamaluina ai o ia a o ia aumaia lana faatoanofotane i le fale ua uma ona saunia mo ia. Ae peitai, ua faamatala e Iesu: “O e vālea ua ave a latou lamepa, a e lei avea ma ni suāuu. A o e popoto ua ave ni suāuu i a latou fagu faatasi ma a latou lamepa. Ua tuai mai le faatoafaiavā, ona taufaitulemomoe ai lea o i latou uma, ua momoe lava.”

O le umi o le tuai mai o le faatoafaiavā ua faaalia ai faapea o le faatasi mai o Keriso e pule e avea o se Tupu o le a i le lumanai mamao lava. I le faaiʻuga na afio mai o ia i lona nofoalii i le tausaga e 1914. I le po umi a o leʻi afio mai o ia, sa momoe uma ai taupou. Ae e leʻi taʻusalaina ai i latou i lenei mea. O le taʻusalaina o taupou vālea ona sa leʻi aumaia ni suāuu mo a latou lamepa. Ua faamatala e Iesu pe ua faapefea ona mataala taupou a o leʻi afio mai le faatoafaiavā:

“A ua oo i le tulua o po, ona sau ai lea o lē alaga, Faauta, ua sau le faatoafaiavā; ina o ia outou e faafetaiai ia te ia. Ona tutū ai lea o ia taupou uma lava, ma teuteu a latou lamepa. Ona fai atu ai lea o e vālea i e popoto, Au mai ni a outou suāuu mā matou; auā o le a mamate a matou lamepa. A ua tali mai o e popoto, ua faapea mai, Neʻi le lava ia i matou ma outou; a e lelei ona outou o i e faatau ma faatau mai ai ni a outou.”

O le suāuu ua faaatagia ai le mea o loo tausia ai le faamalamalamaina o Kerisiano moni e avea o malamalama, o lona uiga, o le Afioga faagaeeina a le Atua, lea o loo taofi mau i ai, faatasi ma le agaga paia, lea o loo fesoasoani e faamalamalamaina lena Afioga. O le suāuu faaleagaga ua mafai ai e taupou popoto ona faasusulu atu le malamalama i le talia o le faatoafaiavā i le taimi o le solo i le tausamaaga o le faaipoipoga. Ae o le vasega o taupou vālea ua lē iai ia i latou, i a latou lamepa, le suāuu faaleagaga o loo manaomia. O lea ua faamatalaina ai e Iesu le mea na tupu:

“Ua o [taupou vālea] e faatau [ni a latou suāuu], ona sau ai lea o le faatoafaiavā; o [taupou] ua saunia foi ua latou ulufale atu faatasi ma ia i le tausamaaga, ona pupuni ai lea o le faitotoa. E mulimuli ane, ona o mai ai lea o isi taupou, ua faapea mai, Le Alii e, le alii e, ia e tatala [mai] le puipui mo i matou. A ua tali atu o ia, ua faapea atu, E moni, ou te fai atu ia te outou, ou te le iloa outou.”

Ina ua uma ona afio Keriso i lona Malo faalelagi, na ala mai ai le vasega o taupou popoto o Kerisiano moni faauuina i lo latou faaeaga o le faasusulu atu o le malamalama i lenei lalolagi pogisa e viia ai le toe foi mai o le Faatoafaiavā. Ae o i latou na faaatagia e taupou vālea sa leʻi sauniuni ina ia saunia lenei viiga o le talileleia. O lea pe a oo mai le taimi, e leʻi tatalaina atu e Keriso le faitotoa o le tausamaaga o le faaipoipoga i le lagi ia i latou. Ua ia tuua i latou i fafo i le pogisa aupito pouliuli o le po i le lalolagi, ina ia faaumatia faatasi ma i latou uma o ē fai amio leaga. Ua faaalia e Iesu, “O lea, ia outou mataala ai, auā tou te le iloa le aso po o le itu aso e sau ai le Atalii o le tagata.” Mataio 25:1-13.

◆ O ai ua faaatagia e taupou e sefulu?

◆ O anafea na faia ai le folafolaga i le faaipoipo atu i le faatoafaiavā, ae o afea e taunuu ai ina ia ave lana faatoanofotane i le tausamaaga o le faaipoipoga?

◆ O le ā ua faaatagia e le suāuu, ma o le ā ua mafai e taupou popoto ona faia i le mauaina o le suāuu?

◆ O fea e faia ai le tausamaaga o le faaipoipoga?

◆ O le ā le taui sili na lē maua e taupou vālea, ma o le ā lo latou iʻuga?