O le Soifuaga o Iesu ma Lana Faiva

Pe a Afio mai Keriso i le Mana o le Malo

O LOO iai pea Iesu ma ona aposetolo i le Mauga o Olive. I le tali atu i la latou fesili mo se faailoga o lona faatasi mai ma le faaiʻuga o le faiga o mea, ua ia taʻu atu ai nei ia i latou le tala mulimuli i se faasologa o ni tala faatusa se tolu. “Pe a sau le Atalii o le tagata i lona mamalu, ma le au agelu paia uma faatasi ma ia,” ua amata atu ai Iesu, “ona tietie ai lea o ia i lona nofoālii mamalu.”

E lē mafai e tagata ona vaaia agelu i lo latou mamalu faalelagi. O lea o le afio mai o le Atalii o le tagata, o Iesu Keriso, faatasi ma agelu e tatau ona lē vaaia e mata faaletagata. O le oo mai na taunuu i le tausaga e 1914. Ae mo le ā le fuafuaga? Ua faamatala e Iesu: “E faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe ma ʻoti; ona tuu ai lea e ia o mamoe i lona itu taumatau, a o ʻoti i lona itu tauagavale.”

I le faamatalaina o le mea o le a tupu ia i latou ua tuuese atu i le itu o le finagalo malie, ua fetalai atu Iesu: “Ona fai atu ai lea o le Tupu i e o i lona itu taumatau, O mai ia, o outou ua faamanuiaina e loʻu Tamā, ia fai mo outou tofi le malo ua saunia mo outou a o lei faavaeina le lalolagi.” O mamoe o le a lē pule faatasi ma Keriso i le lagi ae o le a ʻaināina ai le Malo i se uiga o le avea o i latou o ona tagatanuu faalelalolagi. O le “faavaeina [o] le lalolagi” na faia ina ua muai fanauina e Atamu ma Eva le la fanau o ē e mafai ona maua aogā mai le sauniuniga a le Atua ina ia faaolaina le fanau a tagata.

Ae aiseā ua tuuese atu ai mamoe i le itu taumatau o le finagalo malie o le Tupu? “Auā na ou fia ʻai,” ua tali atu ai le tupu, “ona outou avane ai lea ni mea ou te ʻai ai; na ou fia inu, ona outou avane ai lea ni vai ou te inu ai; sa fai aʻu ma tagata ese, ona outou talia lea o aʻu; na ou le lavalavā, ona outou faaofuina lea o aʻu; na ou maʻi, ona outou asiasia mai lea o aʻu; na ou i le fale puipui, ona outou o ane ai lea ia te au.”

Talu ai o mamoe o loo i luga o le lalolagi, ua latou mananao ai ina ia latou iloa pe na faapefea ona latou faia o ia galuega lelei mo lo latou Tupu faalelagi. “Le Alii e, o anafea na matou iloa ai oe ua fia ʻai,” ua latou fesili atu ai, “po o fia inu, ma matou avane e te inu ai? O anafea foi na matou iloa ai oe o le tagata ese, ma matou talia oe? po o le le lavalavā, ma matou faaofuina oe? O anafea foi na matou iloa ai oe ua maʻi, po o i le fale puipui, ma matou o atu ai ia te oe?”

“E moni, ou te fai atu ia te outou,” ua tali atu ai le Tupu, “auā na faia e outou i le tasi o e aupito itiiti o oʻu uso nei, o aʻu lea na outou faia i ai.” O uso o Keriso, o i latou ia o ē o totoe o le 144,000 i luga o le lalolagi, o ē o le a pule faatasi ma ia i le lagi. Ma o le faia o mea lelei ia i latou, ua fetalai atu ai Iesu, o lo latou faia lava lea o mea lelei ia te ia.

Ona sosoo ai lea ma le fetalai atu o le Tupu i ʻoti. “O outou ua faafanoina, o ese atu ia ia te au i le afi e faavavau, ua saunia mo le tiapolo ma ana agelu. Auā na ou fia ʻai, a e tou te lei avane ni mea ou te ʻai ai; na ou fia inu, a e tou te lei avane ni vai ou te inu ai; sa fai aʻu ma tagata ese, a e lei talia aʻu e outou; na ou le lavalavā, a e tou te lei faaofuina aʻu; na ou maʻi, na aʻu i le fale puipui foi, a e tou te lei asiasia aʻu.”

Ae peitai, ua faitio atu ʻoti: “Le Alii e, o anafea na matou iloa ai oe ua fia ʻai, pe fia inu, po o se tagata ese, pe le lavalavā, po o maʻi, po o i le fale puipui, ma matou lei auauna atu ia te oe?” O le faamasinoga lē manuia ua maua e ʻoti, sa faia i le faavae lava lea e tasi na manuia ai le faamasinoga o mamoe. “Auā na outou le faia i le tasi o e aupito itiiti o i latou nei [o oʻu uso],” ua tali atu ai Iesu, “o aʻu lea ua outou le faia i ai.”

O lea o le faatasi mai o Keriso i le mana o le Malo, muamua lava a o leʻi oo i le iʻuga o lenei faiga leaga o mea i le puapuaga tele, o le a avea o se taimi o le faamasinoga. O ʻoti o le a “o atu . . . i le sala e faavavau; a o e amiotonu [o mamoe] e o atu i le ola e faavavau.” Mataio 25:31-46; Faaaliga 14:1-3.

◆ Aiseā e tatau ai ona lē vaaia le faatasi mai o Keriso, ma o le ā le galuega ua ia faia i lea taimi?

◆ I le ā le uiga o le a ʻaināina ai le Malo i mamoe?

◆ O anafea na amata ai le “faavaeina [o] le lalolagi,” ma aiseā ua faapea ai?

◆ I le ā le faavae ua faamasinoina ai tagata e tusa lava po o ni mamoe po o ni ʻoti?