Ia Mataʻu ia Ieova, o Lē Faafofoga i Tatalo
“Le faafofoga tatalo e, e o atu ia te oe tagata uma lava.”—SALAMO 65:2.
1. Aiseā e ao ai ona tatou faatalitalia Ieova ina ia iai ni ana mea manaomia mo i latou o faanaunau e faalatalata atu ia te ia i le tatalo?
O IEOVA LE ATUA o le “Tupu o le vavau.” O ia foi o “Le faafofoga tatalo,” o lē ‘e ō atu i ai tagata uma lava.’ (Faaaliga 15:3, NW; Salamo 65:2) Ae ao faapefea ona latou ō atu ia te ia? E aiaia e tupu faalelalolagi mea faapena e pei o lavalava ma le amio a i latou ua faataga e ō atu i o latou luma. O lea, e mautinoa lava, e tatau ona tatou faatalitalia le Tupu o le Vavau e iai ni manaoga e tatau ona faafetaiaia e so o se tasi e manao e alu atu i ona luma ma le faatoga ma le faafetai.—Filipi 4:6, 7.
2. O ā fesili ua mapuna aʻe i le mataupu o le tatalo?
2 O le ā e manaomia e le Tupu o le Vavau mai ia i latou o loo faalatalata atu ia te ia i le tatalo? O ai e mafai ona tatalo ma faafofogaina? Ma e uiga i le ā e mafai ona latou tatalo ai?
Faalatalata atu i le Tupu o le Vavau
3. O ā faaaʻoaʻoga e mafai ona e tuuina mai o ni tatalo na ofoina atu e auauna a le Atua anamua, ma pe sa latou faalatalata atu ia te ia e ala i se puluvaga?
3 A o leʻi avea o ia ma tagata agasala, o Atamu, o se “atalii o le Atua,” e mautinoa lava sa fesootai ma le Tupu o le vavau. (Luka 3:38; Kenese 1:26-28) Ina ua tuuina atu e le atalii o Atamu o Apelu “uluai tama a lona lafu” i le Atua, e lē taumatea o lenei ofoina atu sa ō faatasi ma faaupuga o le faatoga ma le viiga. (Kenese 4:2-4) Sa fausia e Noa, Aperaamo, Isaako, ma Iakopo ni fata faitaulaga ma faalatalata atu ia Ieova i le tatalo faatasi ma a latou taulaga. (Kenese 8:18-22; 12:7, 8; 13:3, 4, 18; 22:9-14; 26:23-25; 33:18-20; 35:1, 3, 7) Ma o tatalo a Solomona, Esera, ma le au faisalamo faagaeeina tauatua ua faaalia ai sa faalatalata atu tagata Isaraelu i le Atua e aunoa ma so o se puluvaga.—1 Tupu 8:22-24; Esera 9:5, 6; Salamo 6:1, 2; 43:1; 55:1; 61:1; 72:1; 80:1; 143:1.
4. (a) O le ā le faalatalata atu fou i le Atua i le tatalo sa faavaeina i le uluai senituri? (e) Aiseā ua alagātatau faapitoa ai le faapea e tatau ona ofoina atu tatalo i le suafa o Iesu?
4 O se faalatalata fou atu i le Atua i le tatalo sa faatuina i le uluai senituri T.A. Sa auala mai i lona Alo, o Iesu Keriso, o lē na iai se alofa faapitoa mo le fanau a tagata. I lona uluai soifuaga a o leʻi avea ma tagata, na auauna ai ma le olioli Iesu e avea o le “tufuga,” sa fiafia i mea e fesootai ma le fanau a tagata. (Faataoto 8:30, 31) A o avea o se tagata i le lalolagi, sa fesoasoani ai ma le alofa Iesu i le itu faaleagaga i le fanau a tagata lē lelei atoatoa, na faamaloloina ē mamaʻi, ma na oo lava ina faatutū i ē ua oti. (Mataio 9:35-38; Luka 8:1-3, 49-56) I lo mea uma lava, o Iesu ‘na tuuina atu lona solu e fai ma togiola mo le toatele.’ (Mataio 20:28) O lea, maeu le alagātatau faapea o i latou ua faaavanoaina i latou lava i le togiola e tatau ona faalatalata atu i le Atua e ala ia te ia lenei o lē e alofa tele i le fanau a tagata! Ua na o lenei lava le auala e faalatalata atu ai i le Tupu o le Vavau, auā na fetalai Iesu lava ia: “E le alu atu lava se tasi i le Tamā, pe a le ui mai ia te au” ma, “O mea uma tou te ole atu ai i le Tamā i loʻu igoa, e foai mai e ia ia te outou.” (Ioane 14:6; 16:23) O le ole atu mo ni mea i le suafa o Iesu o lona uiga o le iloa faapea o ia le auala e faalatalata atu ai i Lē Faafofoga i tatalo.
5. O le ā le uiga faaalia o le Atua agaʻi i le lalolagi o le fanau a tagata, ma o le ā le uiga ua iai i lenei mea i le tatalo?
5 Ae maise lava e ao ona tatou talisapaia le alofa na faaalia e Ieova e ala i le saunia o le togiola. Na fetalai Iesu: “Auā ua faapea lava ona alofa mai o le Atua i le lalolagi [o le fanau a tagata], ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.” (Ioane 3:16) O le loloto o le alofa o le Atua ua matuā lelei ona faamatalaina i upu a le faisalamo: “E pei ona maualuga o le lagi i le lalolagi, e faapea ona tele o lona alofa i e matatau ia te ia. E pei ona vava mamao o sasae ma sisifo, e faapea lava ona faamamao e ia ia i tatou o a tatou solitulafono. E faapei ona alofa mutimuti vale o le tamā i lana fanau, e faapea lava ona alofa mutimuti vale o Ieova i e matatau ia te ia. Auā ua silafia lava e ia le mea na fai aʻi i tatou; ua manatu ia o le efuefu lava i tatou.” (Salamo 103:11-14) Maeu le faamafanafana loto e iloa faapea o tatalo a Molimau tuuina atu a Ieova ua ō atu i se Tamā alofa faapena e ala i lona Alo!
Se Faaeaga Faatapulaa
6. Faatasi ai ma le ā le uiga e tatau ona faalatalata atu ai ia Ieova i le tatalo?
6 E lē faatagaina e tupu faaletagata so o se tasi lava e ulu atu i le maota o le tupu e aunoa ma le faasilasilaina atu. O se avanoa e talanoa atu ai i le tupu o se faaeaga e faatapulaaina. E faapena foi i le tatalo i le Tupu o le vavau. E moni, o i latou e faalatalata atu ia te ia e ala ia Iesu Keriso faatasi ma le talisapaia tatau o le mamalu silisili ese o le Atua e mafai ona faatalitalia e faafofogaina. E tatau ona faalatalata atu i le Tupu o le Vavau ma se uiga migao, ma se uiga tapuai. Ma o i latou o loo faanaunau ina ia faafofogaina e tatau ona faaalia “le mataʻu ia Ieova.”—Faataoto 1:7.
7. O le ā “le mataʻu ia Ieova”?
7 O le ā “le mataʻu ia Ieova”? O se migao uigaese mo le Atua, e ō faatasi ma le mataʻu mamā i le faia o se mea e lē fiafia ai o ia. O lenei gatete e faavae mai i le loloto o le loto faafetai mo lona alofa agalelei ma le lelei. (Salamo 106:1) Ua aofia ai le faailoaina o ia e avea o le Tupu o le vavau, o lē e iai le aiā ma le mana e aumaia ai le faasalaga, e aofia ai le oti, i luga o so o se tasi e lē usiusitai ia te ia. O tagata e faaalia le mataʻu ia Ieova e mafai ona tatalo ia te ia faatasi ma le faatalitalia o le a faafofogaina.
8. Aiseā e faafofoga ai Ieova i tatalo a i latou e matataʻu ia te ia?
8 E masani lava, e lē talia e le Atua tatalo a ē amio leaga, lē faamaoni, ma tagata faafiaamiotonu. (Faataoto 15:29; Isaia 1:15; Luka 18:9-14) Ae o i latou o ē matataʻu ia Ieova e faafofogaina auā ua latou faafetaui atu i ana tapulaa amiotonu. Peitai, ua latou faia e sili atu. O ē matataʻu ia Ieova ua latou faia se tuuina atu i le Atua i le tatalo ma faailogaina lenei mea e ala i le uia o le papatisoga i le vai. I lea ua latou maua ai se faaeaga lē mataofiofia o le tatalo.
9, 10. Pe mafai e tagata e leʻi papatisoina ona tatalo ma le faamoemoe e faafofogaina?
9 Ina ia faafofogaina e le Atua, e tatau i se tagata ona faailoa atu i le tatalo ona manatu e ōgatasi ma le finagalo tauatua. Ioe, e tatau ona faamaoni o ia, ae sili atu mea e manaomia. “A leai foi se faatuatua e le mafai ona fiafia mai o ia [le Atua],” na tusi ai le aposetolo o Paulo, “auā e tatau i lē alu atu i le Atua ona talitonu o loo soifua o ia, o ia foi na te tauia mai o e matuā saili ia te ia.” (Eperu 11:6) Ia, ae mafai la ona faalaeiauina tagata e leʻi papatiso ina ia tatalo faatasi ma le faamoemoe o le a faafofogaina?
10 O le iloa faapea o le tatalo o se faaeaga e faatapulaa, na talosaga atu ai le Tupu o Solomona ina ia faafofogaina e Ieova na o tatalo a tagata ese o ē tatalo atu i le malumalu o le Atua i Ierusalema. (1 Tupu 8:41-43) I senituri mulimuli ane, sa “tatalo i le Atua e le aunoa” le tagata o Nuu Ese o Konelio i le avea o se tagata tuutoina. I le mauaina o le poto saʻo, na tuuina atu ai e Konelio ia lava i le Atua, o lē ona o lea, na tuuina atu ai ia te ia le agaga paia. Mulimuli ane i lenei mea, na papatisoina ai Konelio ma isi tagata o Nuu Ese. (Galuega 10:1-44) I le pei o Konelio, so o se tasi i aso nei e agaʻigaʻi atu i le tuuina atu e mafai ona faalaeiauina ina ia tatalo. Ae o se tagata o lē e lē faamaoni i le suesueina o le Tusi Paia, na te lē iloa mea manaomia tauatua mo le tatalo, ma na te leʻi faaalia lava se uiga e faafiafia ai le Atua, e lē mafai la ona faapea atu ua mataʻu i le Atua, ua iai le faatuatua, pe o saili ma le naunautai ia te ia. O se tagata faapena e lē o iai i le tulaga e ofo atu ai tatalo e talia e le Atua.
11. O le ā ua tupu i nisi o ē na agaʻi atu i le tuuina atu, ma o le ā e ao ona latou fesili ifo ai ia i latou lava?
11 O nisi o ē i se tasi taimi na agaʻigaʻi atu i le tuuina atu ae mulimuli ane e foliga mai o loo iai se mea o toe taofia ai. Afai e lē o lava lo latou alofa mo le Atua i o latou loto ina ia faia ai se tuuina atu lē mataofiofia ia te ia, e tatau ona latou fesili ifo ia i latou lava pe o tumau pea ona ia i latou lea faaeaga ofoofogia o le tatalo. E manino mai e leai, auā o i latou e faalatalata i le Atua e tatau ona saili ia te ia ma le naunautai ma ia saili foi i le amiotonu ma le agamalu. (Sefanaia 2:3) So o se tasi e mataʻu moni ia Ieova o le tagata talitonu lea o lē ua faia se tuuina atu i le Atua ma faailogaina e ala i le papatisoina. (Galuega 8:13; 18:8) Ma ua na o tagata talitonu papatisoina e iai se faaeaga lē mataofiofia o le faalatalata atu i le Tupu o le Vavau i le tatalo.
“O le Agaga Paia Tou te Tatalo Ai”
12. O afea e mafai ai ona faapea atu o loo ‘tatalo se tagata faatasi ma le agaga paia’?
12 Pe a uma ona faia e se tagata le tuuina atu i le Atua ma faailogaina e ala i le papatisoina, ona iai lea o ia i le tulaga e ‘tatalo ai faatasi ma le agaga paia.’ E faatatau i lenei mea, na tusi Iuta: “A o outou le au pele e, ia outou ati ae ia te outou i lo outou faatuatua e silisili ona paia, o le Agaga Paia tou te tatalo ai, ia outou faatumau ia te outou i le alofa o le Atua, ma faatalitali atu i le alofa o lo tatou Alii o Iesu Keriso, e oo atu i le ola e faavavau.” (Iuta 20, 21) E iai faatasi le agaga paia ma le tatalo a se tagata pe a tatalo i lalo o le taaʻiga a le agaga o le Atua, po o le malosi galue, ma i le ōgatasi ma mea o fai mai ai Lana Afioga. O le Tusi Paia, na tusia i lalo o le faagaeega a le agaga o Ieova, ua faaalia ai ia i tatou le auala e tatalo ai ma mea e talosaga atu ai i le tatalo. Mo se faaaʻoaʻoga, e mafai ona tatou tatalo ma le mautinoa faapea e aumaia e le Atua ia i tatou lona agaga paia. (Luka 11:13) Pe a tatou tatalo faatasi ma le agaga paia, ona faaalia ai lea e a tatou tatalo tulaga o o tatou loto e fiafia ai Ieova.
13. Afai tatou te tatalo faatasi ma le agaga paia, o le ā o le a tatou alofia, ma o le ā le fautuaga a Iesu o le a tatou faatatauina?
13 Pe a tatou tatalo faatasi ma le agaga paia, o le a lē faatumuina a tatou tatalo i upu maotua e leai ni uiga. Latou te lē tausisi atu i faiga e tautū i upu. E leai, e lē iai ni faaupuga faafiamamalu e lē uigā, faaupuga faaviivii e lē moni. O tatalo faapena ua taatele i Kerisinetoma ma Papelonia le Aai Tele, le emepaea o lotu sese i le lalolagi. Ae o Kerisiano moni ua latou utagia le fautuaga a Iesu: “Pe a outou tatalo aua neʻi faapei outou o tagata faafiaamiotonu; auā ua latou fiafia e tutū ma tatalo i sunako ma i fetaulaigāala o ala telele, ina ia iloa mai ai i latou e tagata . . . Ma pe a tatalo aua le tautu i upu e pei o tagata o nuu ese; auā ua manatu [sese] i latou faapea o le tele o a latou upu o le a faafofogaina ai i latou. O lea aua neʻi pei o i latou.”—Mataio 6:5-8, Byington.
14. O ā faamatalaga iloga ua faia e nisi e faatatau i le tatalo?
14 I le faaopoopo atu i fetalaiga a Iesu ma upu a tusitala o le Tusi Paia, ua faia ai e isi ni faamatalaga iloga faatatau i le tatalo. Mo se faataʻitaʻiga, na faapea mai le tusitala Peretania o John Bunyan (1628-88): “O le tatalo, o le sasaa atu lea ma le faamaoni, ma le uigā, ma le faalogona mafana o le solu i le Atua, e ala ia Keriso, i le malosi ma le fesoasoani a le Agaga, mo na mea e pei ona folafolaina mai e le Atua.” Na matauina e le faifeau Puritan o Thomas Brooks (1608-80) e faapea: “E silasila le Atua e lē o le faaupuina o au tatalo, po o le ā le lelei atonu e iai; e lē o le faatulagaina o au tatalo, po o le ā le umi atonu e faia ai; e lē o le aofai o au tatalo, po o le ā le tele atonu e faia ai; e lē o le uiga o au tatalo, po o le ā le uigā atonu o iai; ae o le faamaoni o tatalo e silasila i ai o ia.” E mafai ona faaopoopo atu i ai i nei manatu le faamatalaga a Bunyan: “I le tatalo, e sili ona lelei le iai o le loto e aunoa ma ni upu, na i lo o upu e aunoa ma se loto.” Ae afai tatou te loto faamaoni ma mafai ona faafetaiaia mea manaomia tauatua, e mafai faapefea ona tatou mautinoa o le a faafofogaina e le Tupu o le vavau a tatou tatalo?
E Lē Taitai Liliu Ese
15. I se uiga puupuu, o le ā na fetalai ai Iesu i le Luka 11:5-8?
15 E lē taitai punitia fofoga [taliga] o Ieova le Atua i tatalo a ana auauna tuuina atu. Na faamaninoina lenei i upu faamafanafana loto a Iesu ina ua faatalosagaina e ona soʻo le aʻoaʻoina o le tatalo. I se vaega na ia fetalai atu ai: “O ai so outou e ana le uo, e alu atu ia te ia i le tulua o po, ma fai atu ia te ia, Sole, seʻi au mai ni areto e tolu gafua, a e taui atu; auā ua sau laʻu uo ia te au i lana malaga, a e leai ni aʻu mea e laulau atu i ai; e tali mai o ia mai totonu o le fale, ua faapea mai, Aua e te faasoesa mai ia te au; ua uma ona pupuni o le faitotoa, ua matou taooto ma laʻu fanau; ou te le mafai ona tulai e avatu mā oe. Ou te fai atu ia te outou, E ui lava ina le tulai o ia, ma avatu ia te ia, ona o ia o lana uo, a e tulai, ma avatu mea uma e manao ai o ia, ona o lana faatauanau ane.” (Luka 11:1, 5-8) O le ā le manatu autū o lenei tala faatusa?
16. E tusa ai ma tatalo, o le ā na finagalo Iesu ia i tatou ia faia?
16 E mautinoa sa lē o le uiga o le fetalaiga a Iesu faapea e lē finagalo Ieova e fesoasoani ia i tatou. Na i lo o lea, e finagalo Iesu ina ia tatou faatuatua atoatoa i le Atua ma ia matuā lava le alolofa ia te ia ina ia mafai ai ona tatou tatalo e aunoa ma le faatalatū. I lea, na faaauau ai Iesu: “Ou te fai atu foi aʻu ia te outou, Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuʻituʻi atu, ona toina mai ai lea ia te outou.” (Luka 11:9, 10) O lea, e mautinoa lava e tatau ona tatou tatalo atu pea pe a oo ni sauaga ia i tatou, mafatia le loto ona o se vaivaiga totino ua mauaa i totonu, po o se isi lava tofotofoga. E nofo sauni pea Ieova e fesoasoani i ana auauna faatuatua. E lē taitai ona ia faapea mai ia i tatou: “Aua [tou] te faasoesa mai ia te au.”
17, 18. (a) Na faapefea ona faalaeiauina i tatou e Iesu ina ia ole atu mo le agaga paia, ma o le ā ua faateleina ai le malolosi o ana upu? (e) Na faapefea ona faatusatusa e Iesu feutagaiga a se matua faalelalolagi ma gaoioiga a le Atua?
17 Afai tatou te mananao e olioli i se faiā vavalalata ma le Atua, tatou te manaomia la lona agaga paia, po o le mana galue. I lea, na faaauau ai Iesu: “O ai se tamā ia te outou e avatu ea e ia i lona atalii se maa, pe a ole mai se areto? pe a ole mai se iʻa, e avatu ea ia te ia se gata a e le o se iʻa? pe a ole mai se fuāmoa, e avatu ea ia te ia se akarava? O lenei, o outou e leaga, afai ua iloa e outou ona avatu o mea lelei mā a outou fanau; e le sili ea ona foaiina mai e lo outou Tamā o i le lagi le Agaga Paia i e ole atu ai ia te ia?” (Luka 11:11-13) Ua tautala le Mataio 7:9-11 i le avatua o se maa na i lo o se areto. O le malosi o upu a Iesu ua faateleina pe afai tatou te iloa faapea o le areto i nuu o le Tusi Paia i aso anamua sa pei lona lapoa o se maa mafolafola lapotopoto. O nisi ituaiga o gata ua foliga mai e pei o nisi o ituaiga o iʻa, ma e iai se akarava itiiti paepae ua faaatagia ai le fuamoa. Peitai afai e manao mai i se areto, iʻa, po o se fuamoa, o le ā le ituaiga o tamā o le a na avatu i lana tamaitiiti se maa, gata, po o se akarava?
18 Ona sosoo ai lea ma le faatusatusa e Iesu o feutagaiga a se matua faalelalolagi ma gaoioiga a le Atua agaʻi i tagata o Lona aiga o ē tapuai. Afai tatou te avatu mea lelei i a tatou fanau, e ui lava pe tele pe itiiti o tatou leaga ona o le agasala tuufaasolo, maeu la le sili atu ona tele e tatau ona tatou faatalitalia ai lo tatou Tamā faalelagi ina ia aumaia meaalofa ofoofogia o lona agaga paia, i ana auauna faamaoni o ē saili i ai ma le loto maulalo!
19. (a) O le ā ua faataʻitaʻia e ala i upu a Iesu o loo faamauina i le Luka 11:11-13 ma le Mataio 7:9-11? (e) Afai e taʻitaʻiina i tatou e le agaga paia, o le a faapefea ona tatou manatu i o tatou tofotofoga?
19 Ua faataʻitaʻia i upu a Iesu faapea e ao ona tatou ole atu i le Atua mo mea e sili atu o Lona agaga paia. Afai e taʻitaʻiina ai i tatou, ona tatou lē ‘faitio ai lea e uiga i mea tatou te maua i le olaga’ ma manatu i tofotofoga ma mea e lē fiafia ai o ni mea e matuā faaleagaina ai i tatou. (Iuta 16) E moni, “o le tagata ua fanau mai i le fafine, ua saasaa ona aso, mona ua tumu i le atuatuvale,” ma e toatele ua lē ola atu e oo i le iʻuga o o latou faafitauli ma le loto tiga. (Iopu 14:1) Ae aua lava neʻi o tatou manatu i o tatou tofotofoga ua pei o ni maa, gata, ma ni akarava ua tuuina mai e Lē Faafofoga i a tatou tatalo. O Ia o lē matuā tutasi o le alofa ma na te lē tofotofoina so o se tasi i mea leaga. Na i lo o lea, na te foaiina ia i tatou ‘meaalofa uma e lelei ma atoatoa.’ I le iʻuga, o le a ia faasaʻoina mea uma mo ē uma e alolofa ma matataʻu ia te ia. (Iakopo 1:12-17; 1 Ioane 4:8) O i latou ua savavali i le upu moni mo le tele o tausaga ua iloa mai mea na oo i ai faapea, e ala i le tatalo ma le faatuatua, o nisi o o latou tofotofoga e sili ona faigata ua galueaiina mo lo latou lelei ma ua faateleina ai fua o le agaga o le Atua i o latou olaga. (3 Ioane 4) O le mea moni, i le ā le auala e sili ona lelei ua mafai ona tatou aʻoaʻoina ai le faalagolago i lo tatou Tamā faalelagi ma mafai ai ona fesoasoania i tatou e atiina aʻe fua o le agaga o le alofa, olioli, filemu, onosai, agalelei, lelei, faatuatua, agamalu, ma le lē gaoia?—Kalatia 5:22, 23.
20. O ā āuga o upu a Iesu o loo faamauina i le Luka 11:5-13 e ao ona iai ia i tatou?
20 O upu a Iesu ua faamauina i le Luka 11:5-13 ua aumaia ai ia i tatou le faamautinoaga faamanuiaina o le alofa ma le tausiga lelei a Ieova. E tatau i lenei mea ona faatumuina ai o tatou loto i le loto faafetai silisili ona loloto ma le alofa. E tatau ona faamalosia ai lo tatou faatuatua ma faateleina ai lo tatou naunau ia ō atu e lē aunoa i le mea e tu ai aao o le Tupu o le Vavau ma faatalitali ai i lalo o lana tausiga alofa. E lē gata i lea, ua faamautinoa i tatou i upu a Iesu faapea o le a lē taitai ona tuulafoaia i tatou e aunoa ma se mea. E pito sili ona fiafia lo tatou Tamā faalelagi e lafo atu a tatou avega ia te ia. (Salamo 55:22; 121:1-3) Ma pe afai e ole atu i tatou o ana auauna faamaoni tuuina atu mo lona agaga paia, na te foaiina ia i tatou ma le lē mataofiofia. O lo tatou Atua alofa lenei, ma e mafai ona tatou faatuatua atoatoa faapea o ia o Lē Faafofoga i a tatou tatalo.
E te Manatua?
◻ E ala ia te ai e tatau ona tatou faalatalata atu ai i le Atua i le tatalo, ma aiseā?
◻ I le ā le auala ua avea ai le tatalo ma faaeaga faatapulaaina?
◻ O le ā lona uiga ia ‘tatalo faatasi ma le agaga paia’?
◻ E mafai faapefea ona e faamaonia faale-Tusi Paia faapea o tatalo a Molimau faamaoni papatisoina a Ieova e faafofogaina?
[Ata i le itulau 14]
E pei ona avatu e tamā faaletagata meaalofa lelei i a latou fanau, e faapena ona avatu e Ieova lona agaga paia ia i latou o ē ole atu ia te ia