O le Soifuaga o Iesu ma Lana Faiva

Ua Oso aʻe se Finauga

MUAMUA LAVA i le afiafi po, na aʻoaʻo ai e Iesu se lesona matagofie o le auaunaga loto maulalo i le mulumuluina o vae o ona aposetolo. Ina ua mavae lea, ona ia faailoa atu lea o le Faamanatuga o lona maliu o loo fotuai mai. O lenei, ae maise lava i le manatu e uiga i le mea na seʻi faatoʻā uma ona faia, ua tupu nei se mea e ofo ai. Sa aafia ona aposetolo i se fefinauaiga aasa i le po o ai o i latou e tino mai e sili! E foliga mai, o se tasi lenei o vaega o se finauga o loo faaauau pea.

Ia manatua ina ua uma le faaliliuina o Iesu i luga o le mauga, na fefinauai le au aposetolo po o ai o i latou e sili. E lē gata i lea, sa talosaga atu Iakopo ma Ioane i ni nofoaga sili i le Malo, na iʻu ai i se isi foi fefinauaiga atili i le va o aposetolo. Nei la, i lona po mulimuli faatasi ma i latou, pagā le faanoanoa atonu sa ia Iesu i le silasila atu ia i latou o toe fefinauai foi! O le ā ua ia faia?

Na i lo le otegia o le au aposetolo ona o a latou amio, ua toe talanoa atu foi ma le onosai Iesu ia i latou ua faapea atu: “O tupu o nuu ese ua aliitai i latou; o e pule foi ia i latou ua taʻua i latou o e agalelei. A e le faapea outou; . . . Auā po o ai lē sili; o lē taoto ea e ʻai, po o lē auauna mai? E le o lē taoto e ʻai ea?” Ona ia faamanatu atu lea ia i latou o lana faaaʻoaʻoga, i lona fetalai atu: “A o aʻu nei, o loo ia te outou pei o le auauna lava.”

E ui lava i o latou lē lelei atoatoa, ae ua pipii atu le au aposetolo ia Iesu i le taimi o ona tofotofoga. O lea ua ia fetalai atu ai: “E faapei ona tofia mai e loʻu Tamā o le malo ia te au, e faapea foi ona ou tofia outou.” O lenei feagaiga totino i le va o Iesu ma ona soʻo faamaoni na faafesootai atu ai i latou ia te ia ina ia auai i lona nofoaga mamalu. E na o se numera faatapulaaina e 144,000 ua mulimuli ane avatua i lenei feagaiga mo se Malo.

E ui lava ua tuuina atu i le au aposetolo lenei fuafuaga ofoofogia o le auai faatasi ma Keriso i le pulega o le Malo, ae i le taimi lea o loo vaivai faaleagaga i latou. “E tausuai outou uma ona o aʻu i lenei lava po,” ua fetalai atu ai Iesu. I le taʻu atu ia Peteru faapea sa tatalo o ia e fai mona sui, na uunai atu ai Iesu: “Pe a liua mai oe, ona e faamalosi ai lea i ou uso.”

“Laʻu fanau e,” ua faamatala atu ai Iesu, “e toe itiiti nai aso ou te i ai ia te outou, tou te saili mai ia te au, a e pei ona ou fai atu ia Iutaia, O le mea ou te alu i ai, tou te le mafai ona ō i ai; e faapea foi ona ou fai atu nei ia te outou. O le poloaiga fou ou te tuu atu ai ia te outou, ia outou fealofani; faapei ona ou alofa atu ia te outou, ia fealofani foi outou. O le mea lea e iloa ai e tagata uma lava o oʻu soo outou, pe afai ua outou fealofani.”

“Le Alii e, po o fea e te maliu atu i ai?” ua fesili atu ai Peteru.

“O le mea ou te alu i ai, e te le mafai ona mulimuli atu nei ia te au,” ua tali atu ai Iesu, “a o se aso e te mulimuli atu ai ia te au.”

“Le Alii e, pe se a le mea ou te le mafai ai ona mulimuli atu nei ia te oe?” ua fia iloa ai e Peteru. “Ou te tuuina atu loʻu ola ona o oe.”

“E te tuuina atu ea lou ola ona o aʻu?” ua fesili atu ai Iesu. “E moni, ou te fai atu ia te oe, O lenei aso, o le po nei lava, a o lei oo i le vivini faalua o moa, e te faafiti faatolu mai ia te au.”

“E ui ina tā oti lava faatasi ma oe,” ua tetee atu ai Peteru, “ou te le faafiti lava ia te oe.” Ma a o fai mai foi faapena isi o le au aposetolo i le upu lava e tasi, a ua gugutu atu Peteru: “E ui lava ina tausuai o tagata uma ona o oe, ou te le tausuai lava aʻu.”

I le faasino atu i le taimi ina ua ia aauina atu aposetolo i se talaʻiga faataamilo i Kalilaia e aunoa ma ni ato tupe ma ni taga meaʻai, ua fesili atu Iesu: “Pe na outou matitiva ea i se mea e tasi?”

“E leai lava,” ua latou tali mai ai.

“A o lenei, ai se tagata e ana se ete tupe, ina tago ia i ai, e faapea foi sana ʻato,” ua ia fetalai atu ai, “o le tagata foi e leai sana pelu, ia avatu lona ofu e faatau aʻi mai. Auā ou te fai atu ia te outou, e tatau ona taunuu mai ia te au o le mea ua tusia, o lea, Na faitauina foi o ia faatasi ma e pagotata; auā foi o le a faaiuina mea ua tusia ia te au.”

O loo faasino atu Iesu i le taimi o le a faasatauroina ai o ia faatasi ma pagota, po o tagata agasala. Na ia faaalia foi faapea o ona soʻo o le a fesagaʻi ma sauaga matuitui i se taimi mulimuli ane. “Le Alii e, faauta, o pelu nei e lua,” ua latou fai atu ai.

“Soia,” ua tali atu ai o ia. E pei ona o le a tatou iloa, o le iai o pelu ia i latou o le a vave faatagaina ai Iesu e aʻoaʻoina se isi lesona matuā tāua. Mataio 26:31-35; Mareko 14:27-31; Luka 22:24-38; Ioane 13:31-38; Faaaliga 14:1-3.

◆ Aiseā e matuā ofo ai i le fefinauaiga a le au aposetolo?

◆ Ua faapefea ona taulimaina e Iesu le finauga?

◆ O le ā ua faataunuuina e le feagaiga ua faia e Iesu ma ona soʻo?

◆ O le ā le poloaiga fou ua tuu atu e Iesu, ma o le ā le tāua o lea mea?

◆ O le ā le soona faamautinoa ua faaalia e Peteru, ma o le ā ua fetalai atu ai Iesu?

◆ Aiseā ua eseese ai faatonuga a Iesu e uiga i le tauaveina o se ato tupe ma se taga meaʻai, ma faatonuga na sa ia muai tuuina atu?