Faasalalau Atu le Manogi o le Poto o le Atua

“Ua faafetai i le Atua, o le ua matou manumalo ai pea lava ona o Keriso, o le ua matou faaali atu ai foi i nuu uma le manogi o le mataupu ia te ia.”—2 KORINITO 2:14.

1. O le ā le manogi o loo tatou talanoaina i inei, ma e faapefea ona manatu i le faaeaga o le faasalalauina atu o le manogi?

SOSOGI, sosogi! M-m-m-m! O e lagonaina ea le manogi manaia? I inei, tatou te lē o faasino atu i le sasala o le manogi o fugalaau, ae na i lo lea, i se manogi faafaatusa e mapuna mai i tusitusiga aupito sili ona manaomia i le lalolagi. O nei tusitusiga e lē o na sa amata mai e ni tagata ae o se teu fugalaau faafaatusa ua faagaeeina e Lē na ia foafoaina foi fugalaau manogi na o loo teuteuina ai le lalolagi. O le faaeaga o le faasalalau atu o lenei manogi o le poto o le Atua o se oloa tāua e sili. Ioe, o se auaunaga e faapitoa lona tāua—e lē maua e tagata uma, e lē o auai i ai le fanau lautele a tagata.

2. O anafea na amata ai e soʻo o Keriso ona faasalalau atu se manogi faafaatusa, ma faatasi ai ma ā iʻuga?

² O lenei oloa tāua tautele sa tuuina atu i luga o soʻo o Keriso ina ua faailoa atu ia i latou se auaunaga tiotio ia Ieova le Atua i le aso o Penetekoso i le tausaga e 33 T.A. I le faatumuina i le agaga paia, na amata ai ona latou faasalalau atu le manogi faafaatusa, o loo auiliiliina ai “vavega o le Atua.” (Galuega 2:1-4, 11) E ala ia i latou o le a oo atu ai le manogi o le poto o le Atua i isi, e lē gata i tagata Iutaia peritomeina faaletino ae faapea foi ma nuu ese lē peritomeina, i ituaiga, o atunuu ma gagana. (Galuega 10:34, 35) O loo vaavaai atu soʻo faamaoni i lenei auaunaga o se mea e sili atu ona tāua na i lo ʻoa faitino uma ua faaputuina e tagata mo i latou lava.

3. I le ā le mamao ua oo atu i ai le faasalalauina o le manogi o le poto o le Atua, ma o le ā le fesili e manaomia ona tatou fesili ifo ai ia i tatou lava?

³ I aso nei, ua tauaveina atu ai i le lalolagi aoao le galuega sili o le faasalalauina atu o le manogi o le poto o le Atua—i se fua e sili atu na i lo le mea sa iai muamua i le talafaasolopito o le fanau a tagata. Ua aofia ai le molimau atu i le fanau uma a tagata e uiga i le Malo o le Atua ua faavaeina nei i lalo o lana Tupu tofia, o Iesu Keriso. (Mataio 6:10; Galuega 1:8) Pe e te vaavaai atu i lena auaunaga o le faalauiloaina o le Tupu ma lona Malo e avea o se oloa e lē mafaatauina? O Iesu Keriso, o lē na taʻimua i le talaʻiga o le tala lelei o lena Malo, na ia talisapaia lea mea i lena auala, i le faataatiaina o le faaaʻoaʻo.—Mataio 4:17; 6:19-21.

Faamanogiina le Auala o le Solo Manumalo

4. E tusa ai ma le 2 Korinito 2:14, ua faapefea ona taʻitaʻiina nei e le Atua ana auauna i le lalolagi, ma i le ā le faataʻitaʻiga anamua ua faasino atu i ai upu a Paulo?

⁴ Aiseā e tatau ai ona tausia o se oloa tāua le auauna atu i le Atua? O le tasi o mafuaaga ona e oo lava i le taimi nei o i latou o ē o loo auauna ia Ieova ua iai se faaeaga matuā mataʻina o le taʻitaʻiina e le Atua i se solo sili manumalo. E tusa ai ma le New International Version, ua faapea mai le 2 Korinito 2:14: “Ua faafetai i le Atua, o lē na taʻitaʻia pea i matou i le solo manumalo ai pea lava ona o Keriso ma e ala ia i matou ua faasalalau atu ai i mea uma le manogi o le poto ia te ia [“o le faasalalau atu o lo matou poto ia te ia i le lalolagi atoa e pei o se mea faamanogi matagofie!” Phillips].” O na upu a le aposetolo o Paulo e foliga mai sa faasino atu i ni faiga faaanamua o le iai o ni solo manumalo.a

5, 6. (a) O le ā na tupu i solo manumalo i le taimi o Roma anamua, ma o le ā na faaalia e le manogi lelei i tagata eseese? (e) O le ā le faatatauga faaleagaga o le tala faatusa i le 2 Korinito 2:14-16?

⁵ I aso o le malo o Roma, o se tasi o faamamaluina aupito sili ona maualuga sa mafai ona tuuina atu e le Senate i se taʻitaʻiʻau manumalo o le faatagaina lea o ia e faamanatuina lona manumalo i se solo taugata o le manumalo. O le solo a tagata Roma sa agaʻi lemu atu faatasi ma le Via Triumphalis ma agaʻi atu i le auala faataamilo i le malumalu o Iupita i le tumutumu o le Matietie o Capitoline. O tupu, perenise, ma taʻitaʻiʻau sa pueina i taua, faatasi ma a latou fanau ma ē na auai, sa taʻitaʻiina atu e faamauina i filifili, sa masani lava ona saei ese o latou lavalava, ina ia faamāina ma faamasiasi i latou.

⁶ A o agaʻi atu le solo i le aai o Roma, sa fetogi atu e le toatele o tagata i luma o le kariota manumalo ni fugalaau, ma faamu mea manogi i le auala atoa. O lenei manogi sasala na faaalia ai le mamalu ma se olaga sili ona saogalemu mo fitafita manumalo. Ae sa faailogaina ai foi le oti i tagata na faatagataotauaina ua lē mafai ona faamagaloina o ē o le a faasalaina i le oti i le faaiʻuga o lenei solo. O lenei mea ua avatu ai le malamalama i le faatatauga faaleagaga a Paulo o le tala faatusa i le 2 Korinito 2:14-16. O lena ata ua tuuina atu ai Paulo ma uso Kerisiano e avea o tagatanuu tuutoina o le Atua, “e tusa ia Keriso” o loo mulimuli uma atu i le solo manumalo a le Atua ma ua taʻitaʻiina e Ia i se solo manumalo sili faatasi ma le ala ua sasala i le manogi.

Le Manogi o le Ola po o le Manogi o le Oti

7, 8. (a) Ua faapefea ona faasalalau atu e Molimau a Ieova le manogi lelei o le poto o le Atua? (e) A o faasalalau atu e Molimau le manogi faafaatusa, o le ā le uiga faaalia o i latou ua faasaoina? (i) O le ā le uiga faaalia o loo iai mai ia i latou o le a faaumatia pe malaia?

⁷ E ala i le faasalalau atu i le lautele i so o se mea upu moni o le Tusi Paia faatatau i le Malo o le Atua i lalo o Keriso, ua faasalalau atu ai, ma faaalialia, ma faia ina ia faailoa atu i so o se mea e Molimau a Ieova le manogi lelei o le poto o le Atua mamalu o lē o lana upu moni ua faasaolotoina ai i latou mai lotu sese. Ua latou savavali atu ma le manumalo i le auaunaga a Ieova. O lo latou ofoina atu o le auaunaga i le avea o ni Molimau mo ia ma lana Tupu ua faapei o ni mea manogi lelei ia Ieova. I lea, ua mafai ai ona tatou talisapaia le uiga o upu a le aposetolo ina ua ia faapea mai: “O le nanamu i matou ia Keriso i le Atua i e o faaolaina, atoa ma e o malaia; o le manogi o le oti e oo i le oti i nisi; a o le manogi o le ola e oo i le ola i nisi [“ se mea faamanogi matuā tāua na te aumaia le ola,” The New English Bible; “le manogi e faafouina ai o le ola lava ia,” Phillips].”—2 Korinito 2:15, 16.

⁸ Ua logo i tino o tagata loto faamaoni e iai manatu pei ni mamoe le suamalie o le poto o Ieova a o faasalalauina atu e ana Molimau. I na tagata, o le galuega o le molimau atu ua iai le manogi o le soifua maloloina ma le ola, o le ola ai, le upu moni e aumaia ai le ola. Ua latou faafetai atu ia Ieova ma lana Tupu, o ē ana le solo manumalo o loo latou ʻauai atu i ai, ma alalaga ma le leo tetele: “O i ai le faaolataga i lo tatou Atua o lē tietie i le nofoālii, atoa ma le Tamai mamoe.” (Faaaliga 7:10) Ua latou manavaina le ea o le upu moni o le Malo, o le manogi faafouina o le ola e taʻitaʻiina atu ai i le ola. Ae ua faaleagaina e Satani ma ana temoni le malosi o le manogi a i latou na o loo taupeupe pea i lotu sese, ina ia taofia ai pea o latou isu ma teena ai ma le ʻinoʻino le upu moni. Ia i latou o “e o malaia” ua faasalalauina atu i ai e le upu moni ma ē faamaoni o loo latou tauaveina le manogi o le oti e taʻitaʻiina atu ai i le oti. Pe e pei ona taʻua e le New International Version e faapea: “I ē ua avea ai i matou ma manogi o le oti.” Ua faapea atu i ai le faaliliuga a Phillips: “I ē mulimuli mai ua foliga i ai e pei o se manogi e oti ai o le faaumatiaga.”

9. O le ā le fesili ua fesili ai nei Paulo, ma o le ā lau tali i ai, ma aiseā?

⁹ “Po o ai foi sē ua lava ona agavaa mo nei mea?” ua fesili ai le aposetolo. (2 Korinito 2:16, NW) O lona uiga ua fai atu, “ma o ai e mafai ona agavaa mo galuega e pei o lenei?” (The Jerusalem Bible) “Ma mo se auaunaga e pei o lenei o ai ua talafeagai?” (Weymouth) O le tali faale-Tusi Paia o: Molimau a Ieova! Aiseā? Ona e na o i latou tuuina atu o ē e moni e lē taufaasese, e loto faamaoni, ma e lē sailia ni a latou lava mea ma le manatu faapito ma o ē tautala atu i le upu moni, na o le upu moni e aunoa ma le faagutugutulua i lotu sese, e agavaa mo lenei galuega o le faasalalauina atu o le manogi o le poto o le Atua.—Kolose 1:3-6, 13; 2 Timoteo 2:15.

10. Aiseā ua lē agavaa ai taʻitaʻi lotu mo le galuega o le faasalalauina atu o le manogi o le poto o le Atua?

¹⁰ O taʻitaʻi lotu Kerisinetoma, o ē o loo saili se tulaga lelei i lenei lalolagi, ua lē taulau ona taʻuagavaaina ma tatau mo lenei auaunaga lē manatu faapito. Aiseā? Auā ua lē taulau ona latou ausia mea manaomia ua faaalia mai e le faamatalaga a Paulo: “O i matou nei, e le pei o le toatele o e o faafilogia le afioga a le Atua; a ua matou tautalatala atu mai le loto lelei, mai le Atua foi, o i luma o le Atua, o i matou ua ia Keriso.” (2 Korinito 2:17) Pe e pei ona taʻua ai e le New International Version: “I le lē pei o le toatele, matou te lē faafilogia le afioga a le Atua mo se faasiliga. I le tuufaafeagai, ua matou tautala atu ai ma le faamaoni i luma o le Atua e ala ia Keriso, e pei o tane na aauina mai le Atua.”

11, 12. (a) Aiseā ua lē avea ai Molimau o ni “e faafilogia le Afioga a le Atua” ona o le talia o foai? (e) I le faaeseesega ma le faaliliuga faamatala gatā o le Faa-Kerisiano ua faatauina e le toatele, o le ā ua tuuina atu e Molimau a Ieova?

¹¹ O Molimau a Ieova ua aauina atu e le Atua, ma ua latou faia la latou galuega molimau atu i lalo o le finagalo o le Atua. A o latou saunia mo tagata naunau fiafia tusi matuā tāua ma isi lomiga o loo faamatala ai le Afioga a le Atua, ma talia foai tauofo mo le galuega talaʻi o le Malo i le lalolagi aoao, o lena faiga e lē o faafilogia pe faamatala gatā ai le Afioga a le Atua. O le mea moni, o na foai ua na o ni fesoasoani agaʻi i le faasalalauina o le poto o le Atua i isi foi.

¹² O le toatele i aso nei, pe iloa pe lē iloa, ua latou faatauina se faaliliuga faamatala gatā o le Faa-Kerisiano, ona e fetaui ma o latou faanaunauga manatu faapito ma ua lē pumoomoo ai le auala o o latou olaga. Latou te talitonu e talia i latou e le Atua ona ua latou faapea mai latou te alolofa ia te ia mai i o latou loto. Ae peitai, pe a faaalia le Afioga a le Atua e feteenai ma o latou talitonuga ma amioga, ona latou mimilo lea o mau o le Tusi Paia ina ia faamaualugaina ai o latou manatu totino i luga aʻe o le malamalamaga saʻo faale-Tusi Paia. (Mataio 15:8, 9; 2 Peteru 3:16) Ae o Molimau a Ieova latou te tuuina atu le upu moni mamā, ma le lē filogia mai le Tusi Paia, lea ua saunia ai se manogi lelei e talia e le Atua ma i ona tagata tapuai faamaoni. O le mea lea ua latou tūlei ese ai tu faalotu uma lava ma faanaunauga ina ia maua le poto moni o le Atua.

13. O ai, e ese ai mai Kerisiano faauuina, o loo iai i le solo manumalo a le Atua, ma o le ā o loo latou faia i so o se mea latou te ō atu i ai?

¹³ E moni, o le iai i le solo manumalo a le Atua i le ō faatasi ma Keriso o se faaeaga lē mafaatusatusaina o loo olioli ai e lē gata i Kerisiano faauuina ae faapea foi ma le “motu o tagata e toatele” o “isi mamoe” e oo lava i le taimi nei, ona ua latalata mai le manumalo o le Malo. (Faaaliga 7:4, 9; Ioane 10:16) A o tatou aloalo atu mo isi manumalo atili a lo tatou Tupu manumalo, i so o se mea lava la tatou te ō atu i ai, tatou te faasalalau atu ai le poto o le Atua e aumaia ai le ola e pei o se mea faamanogi, po o se mea manogi tautele, ia i latou o ē o loo faananau o latou loto mo le upu moni ma le amiotonu. Maeu se faaeaga mo i latou o ē ua taʻuagavaaina mo lenei galuega mataʻina!—Ioane 17:3; Kolose 3:16, 17.

Tuuina atu le Pule e Avea ai o ni Mea Faamanogi Faaletagata

14. Aiseā e lē manaomia ai e i latou o loo faasalalauina atu le manogi o le poto o le Atua, ona maua ni tusipasi o ni faamaoniga mai tagata?

¹⁴ Ae pe manaomia e i latou o ē faasalalauina atu le manogi o le poto o le Atua ma lona Malo, ni tipiloma po o ni tusipasi o le faamaoniga mai tagata? E leai! Ua uma ona tofia, pe filifilia i tatou, e avea o Molimau mo Lē Silisili ese o le vateatea. I lea, e lē manaomia ai ona tatou faatalatū i le ō atu i le fanua e faasalalau le manogi o le tala lelei o le Malo o le Atua. Ia teu i mafaufau o loo taʻitaʻia i tatou e Ieova. Sa tauaveina atu le faiva a Iesu i le feagai ai ma tala “faatuʻi ese . . . o e agasala.” (Eperu 12:3) Peitai, o le faamaumauga o le faiva i le fanua a Iesu, e pei ona iai i le Tusi Paia, o loo tumau pea ona moni, ma o lana galuega i le fanua sa tautala e faamalō ia te ia ma finau e lagolagoina o ia i le avea o se faifeau moni a Ieova le Atua.

15. Na faaalia faapefea e le aposetolo o Paulo faapea e lē manaomia e Kerisiano moni ni “tusi e taʻulelei ai”?

¹⁵ Sa fetaiaʻi le aposetolo o Paulo ma se tulaga luʻi faapena i ona aso e ala i le tuuina atu o lenei finauga: “A matou toe amata ea ona taʻulelei i matou ia te i matou? pe aoga ea ia te i matou, pei o isi, ni tusi e taʻulelei ai e avatu ia te outou? po o tusi e taʻulelei ai mai ia te outou? O outou o la matou tusi, o tusia i o matou nei loto, ua iloa ma faitaulia e tagata uma. O loo faaalia outou, o outou o le tusi a Keriso ua saunia e i matou, e lei tusia i le vaitusi, a o le Agaga o le Atua soifua; ua le tusia i papatusi maa, a o papatusi aano o le loto.”—2 Korinito 3:1-3.

16. O le ā le ituaiga o tusi o loo tuuina atu e Molimau a Ieova e avea ma faamaoniga mautinoa faapea o la latou faiva e mai le Atua?

¹⁶ E lē o iloa pe talia e pule faalelalolagi lo tatou tofiga e avea o Molimau a Ieova. Ae seʻi avea la tatou galuega o le faasalalau atu o le manogi o le poto o Ieova e tautala atu mo ia lava! O lenei galuega e lē mafai ona soloia, e ui lava e mumusu nisi tagata e faitau lenei faamaoniga mautinoa o la tatou faiva. Ua tuuina mai e taʻitaʻi lotu a latou pepa faamaonia o tusipasi mai tino o pule faataʻitaʻi lotu. Ae peitai, o na pepa, ua na o ni fasipepa, o upu a tagata. A o Molimau a Ieova, e lē gata ina siitia mai le lagolagosua a le Afioga a le Atua, ae tumau lava ona avea o ni molimau i le tino ma le toto. O le motu o tagata e toatele o isi mamoe o ē ua ausia e le tala lelei o le Malo ua aoaoina foi i le itu taumatau o le Tupu a Ieova. (Mataio 25:33, 34) O nei mea uma o la tatou tusi o faamatalaga, o se tusi faapea i le avea o i tatou o Molimau a Ieova, ua tatou tauaveina ai i so o se mea lava i o tatou loto ma mafaufau ma e mafai ona faaalia ma le mautinoa. O i latou o loo tutū mo le pule silisili ese a le Atua i le vateatea, ma faia se vaega i le auauna atu i le Atua i le ō faatasi ai ma Molimau a Ieova, ua avea i latou lava o tusi o faamatalaga e lē mafai ona mou ese atu mai le faitauina ma iloa e tagata uma.

17. Ua faapefea ona tusia la tatou “tusi a Keriso,” ma aiseā ua faapea mai ai Paulo ua tusia i loto?

¹⁷ O le mea moni, o le mea lenei ua feita ai ma matatauʻa tagata o lotu sese pe a latou faitau i ai. E ui lava i lea, o le motu o tagata e toatele ua faateleina o isi mamoe o se tusi o faamatalaga mai ia Iesu Keriso, le Leoleo Mamoe Lelei, o lē o loo ia faaaogāina uma Molimau a Ieova i lana galuega faafaifeau. O i tatou o le peni, po o se meafaigaluega faaletagata, ua ia faaaogā e tusi ai lenei tusi. E lē o tusia le tusi i se vaitusi e mafai ona tapē, ae o loo tusia e ala ma i le malosi galue, po o le agaga, o le Atua, lea o loo galue i totonu o i tatou. E lē pei o le tulaga o Mose ina ua tusia le tusi o Tulafono e Sefulu i le aao o le Atua i papa maa e lua. O la tatou tusi o loo tusia i maa faaletagata o loto o tagata, talu ai o la tatou faiva faaleagaga ua fua mai ai se suiga o mafaufau ma loto i le talia o le manogi o le tala lelei.

18. O le ā le iʻuga na avea ai i latou na talia le tala lelei o se tusi o fautuaga?

¹⁸ O la tatou galuega faatasi ma le Afioga a le Atua ua na faia se faamamafaga i luga o i latou o talia ma talisapaia le tala lelei ma ua na aumaia ai ni suiga ofoofogia ia i latou. O la latou filifiliga e auauna i le Atua ua faamaonia e lē na o sina faagaeega na tulai mai i lea taimi ona o se faalogona ootia na gaepu aʻe i totonu o i latou e ala i se fai evagelia faaootia loto. Na i lo lea, o loo faaalia ai se faaliliuina tumau o o latou olaga e faavae i upu moni manino pei ni maatioata o le Tusi Paia. O le alofa mo le Atua moni, o Ieova, ua uunaia ai i latou ina ia ‘toese lo latou tagata tuai ma ona faanaunauga taufaasese, ae ia ofu i le tagata fou,’ lea o loo faaalia ai “le fua o le Agaga.” (Efeso 4:20-24; Kalatia 5:22, 23) O le mea lea, i le iʻuga, ua faia ai i latou ma tusi o faamatalaga. E sili atu ona tautala manino na i lo so o se tusi na tusia e i tatou po o so o se faalapotopotoga vaaia na te mafai ona aauina atu i tatou.

19. Ua faapefea ona faamatala e Paulo agavaa o “auauna o le feagaiga fou,” ma o le ā le iʻuga na iai i la latou galuega i le motu o tagata e toatele?

¹⁹ I le 2 Korinito 3:4-6 ua faaauau ai Paulo: “O loo ia te i matou lenei faatuatuaga i le Atua talu lava o Keriso; auā e le mafai pe a na o i matou ona manatunatu i se mea, peiseai na ia te i matou, a o le Atua e mafai ai i matou; o ia foi na sauni i matou ia tatau ona fai ma auauna o le feagaiga fou.” E ui lava e na o i latou o le vaega totoe faauuina o “auauna o le feagaiga fou,” ae o la latou galuega ua iai se iʻuga i luga o le motu o tagata e toatele o isi mamoe, ma o le a ia faaaafia ai foi le aofai e lē mafaitaulia o i latou na pei ni mamoe o loo aoaoina mai pea. O le faamautinoaga lenei ua iai i Molimau a Ieova uma lava e ala ia Keriso Iesu agaʻi ia Ieova le Atua. Ua faalaeiauina ma le loto faafetai e le vaega totoe le motu o tagata e toatele o isi mamoe, ina ia auai ma le loto atoa i le faiva o le ‘tusiaina o le tusi’ lea na valoia e Iesu Keriso i le Mataio 24:14 ma le Mataio 28:19, 20.

20. (a) O le ā ua faaalia e le lipoti a le Yearbook e uiga ia i latou o loo faasalalauina le manogi o le poto o le Atua? (e) O le ā e mafai e i tatou uma ona fai atu ai e uiga i o tatou agavaa mo le faiva o le tusia o tusi?

²⁰ O le mea lena ua latou faia, e pei ona faaalia manino mai i le lipoti a le 1990 Yearbook lea o loo faaalia ai le faasalalauina atu e Molimau a Ieova, o le manogi o le poto o le Atua i atunuu e 212. O le aofai o o latou tagata talaʻi tiotio e sili atu i le 3,787,000, ma i le na o le tausaga lava ua mavae, sa latou tuuina atu ai pe tusa ma le 835,000,000 itula i le talaʻiga o lenei tala lelei o le Malo. I le Talisuaga Afiafi a le Alii i le tausaga ua mavae, e 9,479,064 ē na auai. Ua mafai ai nei ona faapea atu le vaega totoe faauuina ma sui o le motu o tagata e toatele o isi mamoe: “O le Atua e mafai ai i matou.” Pe e pei ona faaupuina ai e le The Jerusalem Bible e faapea: “O o matou agavaa uma e mai le Atua.”

21. O le ā e ao ia i tatou uma lava ona faia, ma aiseā?

²¹ O le mea lea, ia faasalalau atu le manogi lelei e aumaia ai le ola o le poto o le Atua i nofoaga uma! Ia avea le ea o le oganuu a lau faapotopotoga o se nofoaga ua matuā sasala ai le manogi o le poto o Ieova. O lea, i le avea o se Taʻitaʻiʻau faatiokarate manumalo, o le a ia taʻitaʻiina ai oe i lana solo manumalo a o agaʻi uma atu i luma ana Molimau i lenei faiva mamalu faaonaponei!

[Faaopoopoga i lalo]

O le a Faapefea Ona E Tali?

◻ O le ā le tala faatusa ua faaaogā e Paulo i le 2 Korinito 2:14-16?

◻ O le ā le iʻuga i isi o le faasalalauina atu o le manogi o le poto o le Atua?

◻ Ua na o ai ua agavaa mo lenei galuega, ma aiseā?

◻ Aiseā e lē manaomia ai e faamanogi faaletagata ni tusi e tusia o faamatalaga mo la latou galuega?