Tu Mausalī i le Saolotoga Faa-Kerisiano!
Mea Tāua mai le Tusi a Kalatia
O IEOVA o le Atua o le saolotoga. (2 Korinito 3:17) O lona Alo, o Iesu Keriso, na fetalai: “E iloa foi e outou le upu moni, e tuu saʻoloto foi outou e le upu moni.” (Ioane 8:32) Ma i le faataʻitaʻi ia Keriso, na talaʻi atu ai e le aposetolo o Paulo le tala lelei o le saolotoga.—Roma 6:18; 8:21.
E ala i le folafola atu o lena feau e aumai ai le saolotoga, na faavaeina ai e Paulo faapotopotoga i Kalatia (o se itumalo o Roma i Asia Itiiti) i le taimi o lana uluai malaga taamilo faamisionare (47-48 T.A.). Sa iloa e tagata Kalatia le filifiliga a le vaega pule faapea o le peritomeina e lē o toe manaomia mo Kerisiano. (Galuega 15:22-29) Ae sa saili tagata Iutaia ina ia aumaia i latou i se noataga e ala i le maumauai atu pea faapea ia peritomeina i latou. O lea sa faamamafa atu ai e Paulo le saolotoga faa-Kerisiano i le tusi na ia tusia i tagata Kalatia mai Korinito po o Anetioka i Suria pe tusa o le 50-52 T.A. Mo se faataʻitaʻiga, na ia faapea atu: “Auā . . . o le saʻolotoga na faasaʻoloto mai ai i tatou e Keriso. O le mea lea ia tumau mausalī ai, ma aua neʻi toe taofia outou i le amo o le pologa.”—Kalatia 5:1, NW.
Ua Puipuia e Paulo Lona Tulaga Faaaposetolo
Na muai faaalia e Paulo faapea o lona tofiga faaaposetolo sa auala mai ia “Iesu Keriso, ma le Atua.” (1:1–2:14) Ona o le faaaliga, na ō ai Paulo (faatasi ma Panapa ma Tito) i Ierusalema e faatatau i le fesili e uiga i le peritomeina. I inā na iloa ai e Iakopo, Kefa (Peteru), ma Ioane faapea na tuuina atu ia te ia le malosi e avea ai o ia o se aposetolo i nuu ese. Ma ina ua mulimuli ane vavae ese mai e Peteru o ia mai tagata talitonu o Nuu Ese i Anetioka ona o lona fefe i Kerisiano Iutaia mai Ierusalema, ona aʻoaʻi atu lea o Paulo ia te ia.
Na Faapefea ona Taʻuamiotonuina?
Sa faia foi e le aposetolo se manatu malosi faapea e na o le faatuatua lava ia Iesu Keriso e mafai ai e so o se tasi ona taʻuamiotonuina. (2:15–3:29) Na maua e tagata Kalatia le agaga o le Atua, e lē ona o galuega o le tulafono, ae ona o le talia o le tala lelei i le faatuatua. Sa faatuatua atalii moni o Aperaamo, ae o loo taumafai tagata taitoatasi ina ia faamaonia i latou lava e taʻuamiotonuina e ala i “galuega o le tulafono, ua faafanoina.” Aiseā? Talu ai latou te lē mafai ona tausia i le tulaga lelei atoatoa le Tulafono. O le mea moni, o le Tulafono na faaalia ai agasala ma sa avea o le ‘taʻitaʻitama e taʻitaʻiina atu ai ia Keriso.’
Tu Mausalī!
E ala i lona maliu, ‘na tatalaina ai i latou sa i lalo o le tulafono’ e Keriso. Ae tatau i ona soʻo ona tutū mausalī i le saolotoga faa-Kerisiano. (4:1–6:18) O lea sa manaomia ai e tagata Kalatia ona tetee atu i so o se tasi e taumafai e faasese i latou ina ia talia le amo o le nofo pologa. E lē gata i lea, sa lē tatau ona latou faaaogāsese lo latou saolotoga, ae ia tetee atu i “galuega a le tino” ma faaalia fua o le agaga o le Atua. O i latou o loo saili ina ia tuuina i latou i noataga o le Tulafono sa mananao “e fia taʻuleleia e tagata,” e ‘alofia ai sauaga, ma maua ai se pogai e mitamita ai. Ae peitai, na faaalia e Paulo faapea e lē aogā le peritomeina po o le lē peritomeina. Na i lo o lea, “tau lava ina ia faafouina i latou.” Sa tatalo o ia mo le filemu ma le alofa tunoa ina ia iai i luga o le Isaraelu faaleagaga, i latou na o le foafoaga fou.
O le tusi a Paulo i tagata Kalatia na fesoasoani ia i latou e tetee atu ai i ē o loo saili ina ia faapologaina faaleagaga i latou. Tau foi ina ia fesoasoani lenei mea ia i tatou e faaalia ai le fua o le agaga ma tumau mausalī i le saolotoga faa-Kerisiano.
[Pusa/Ata i le itulau 6]
O Faailoga e Iloa Ai: “Aua le toe faalavelave se tasi ia te au,” na tusi ai Paulo, “auā o aʻu ou te tauave i faailoga o le Alii o Iesu i loʻu nei tino.” (Kalatia 6:17) Faatasi ai ma nisi o tagata faapaupau anamua, sa faailogaina pologa ina ia iloa ai o latou matai. O mamanu eseese sa susunuina pe tatāina i o latou tino. E lē taumatea, o le tele o faiga leaga faaletino na oo i le tino o Paulo ona o lana auaunaga faa-Kerisiano na iloga ai ni mailaila, e molimau ai i lana faamatalaga i le avea o se auauna faamaoni a Keriso, o lē na sauaina ona o Ia. (2 Korinito 11:23-27) O nei mea atonu o “faailoga” na sa faasino atu i ai Paulo, pe atonu sa manatu o ia i le olaga sa ola ai i le avea o se Kerisiano, i le faaalia o fua o le agaga o le Atua ma le tauaveina o lana faiva.
[Ata]
O se pine siliva e ulaina e pologa Roma