E Mautinoa le Autasi e Ala ia Keriso
Mea Tāua mai le Tusi o Efeso
I LE amataga lava o le 52 T.A., na talaʻi atu ai le aposetolo o Paulo i Efeso. O lenei aai mauʻoa i faiga faapisinisi i Asia Itiiti sa avea foi o le ogatotonu o lotu sese. Ae na olaola ai le Faa-Kerisiano i inā ina ua mavae le toe foi atu o Paulo i Efeso, pe ā ma le taumalulu o le 52/53 T.A. Sa ia lauga atu i aso taitasi i fale aʻoga ma na molimau atu mai lea fale i lea fale a o nofo ai o ia i inā mo le tolu o tausaga.—Galuega 19:8-10; 20:20, 21, 31.
A o faafalepuipuiina i Roma pe ā ma le 60-61 T.A., na tusi ai Paulo i Kerisiano Efeso. O le autasi faatasi ma e ala ia Iesu Keriso o le matua lena o lana tusi. O le mea moni, o loo aofia ai ni faasinoga se 13 i le ʻautasi ma Keriso,’ e sili atu lea na i lo so o se isi lava tusi na tusia e Paulo. I le pei o tagata Efeso, ua mafai foi ona tatou maua aogā mai upu a Paulo e uiga i le vaega a Keriso, e alofia ai amioga lē mamā ma tetee atu ai i le malosi o agaga leaga.
O le Autasi o le Fuafuaga a le Atua
Muamua lava, na faamatala atu Paulo pe o le a faapefea ona aumaia e le Atua le autasi e ala ia Keriso. (1:1-23) Na fuafuaina e Ieova ina ia aoaoina faatasi mea uma o i le lagi ma mea o i le lalolagi e ala i le “faaopoopoina” (o se auala e pulea ai mataupu). E ala ia Keriso, o le a autasia ai e le Atua ia lava faatasi ma i latou ua filifilia mo le ola faalelagi ma isi o ē o le a ola i le lalolagi. I aso nei, ua autasia ai e le Atua ē faauuina ma le “motu o tagata e toatele,” ma o le ‘aoaoina o mea uma lava i le lalolagi’ o le a faaauau pea seia faalogo i latou uma o i tuugamau i le siufofoga o Iesu ma latou ō mai ai. (Faaaliga 7:9; Ioane 5:28, 29) E ao ona tatou loto faafetai mo lenei mea, e pei ona tatalo ai Paulo faapea o le a talisapaia e tagata Efeso le sauniuniga a le Atua mo i latou.
Ona sosoo ai lea ma le uaʻi atu o manatu i Kerisiano o Nuu Ese, o ē na oti i le agasala. (2:1–3:21) E ala ia Keriso, na soloia ai le Tulafono ma faataatia ai le faavae mo tagata Iutaia ma Nuu Ese ina ia autasia ai ma avea ma malumalu mo le Atua ina ia afio ai i le agaga. O le tulaga faatausi mea o Paulo sa tatau ona faailoa atu ai le mea lilo paia faapea o tagata o Nuu Ese ua mafai ona ō mai ina ia autasi ma Keriso, o lē ua mafai ai ona latou faalatalata atu i le Atua ma le saoloto e tautala ai. Na toe tatalo Paulo mo tagata Efeso, i le taimi lea ua talosaga atu ai ia Ieova ina ia uunaia i latou ia mausalī i le faatuatua ma le alofa.
O Vala ua Siitia ai le Autasi
Na faaalia e Paulo faapea ua aumaia pea e le Atua vala e autasia ai. (4:1-16) Faatasi ai ma nei mea ua iai le tino e tasi faaleagaga o le faapotopotoga lea. O lenei tino e galue i le autasi i lalo o le tulaga ulu o Keriso. Ma na te saunia meaalofa i tagata e fesoasoani ai ia i latou uma ina ia tasi i le faatuatua.
Ua faia foi e Ieova ina ia mafai ona faaalia uiga faa-Kerisiano na e siitia ai le autasi. (4:17–6:9) I le ofuina o le “tagata fou,” ua alofia ai e Kerisiano na uiga lē faaleatua e pei o faamatalaga lē mamā. Latou te savavali ma le atamai, faaalia le faaaloalo mo Keriso, ma faaalia le gauai tatau.
E faaopoopo atu i ai, ua faapogaia e le Atua Kerisiano ina ia mafai ai ona latou tetee i malosi o agaga leaga o loo saili e faamalepeina lo tatou autasi. (6:10-24) O le ofutau faaleagaga mai le Atua ua saunia ai sea puipuiga. O lea seʻi o tatou faaaogā lea mea ma tatalo ma le naunautai, ia faaaofia ai uso talitonu i a tatou talosaga.
Maeu se fautuaga lelei na avatu e Paulo i tagata Efeso! Seʻi tau ina tatou utagia lea fautuaga e ala i le alofia o amioga lē mamā ma ia tetee atu i malosi o agaga leaga. Ma seʻi tatou talisapaia loloto le autasi ua tatou olioli ai e ala ia Iesu Keriso.
[Pusa/Ata i le itulau 21]
Ū Fanafana Mu: O le ofutau faaleagaga e aofia ai le “talipupuni o le faatuatua” lea ua mafai ai ona tatou tetee atu, pe lē afaina ai i tatou, i “u fanafana mu” a Satani. (Efeso 6:16) O nisi ū fanafana mu na faaaogāina e tagata Roma o ni ofe e pūpū totonu e iai ma se matatao maai lena sa faatumuina i vaioona e mu ai. Sa fana atu ia mea mai i se aū alualu lemu ina ia alofia ai le pē o le afi, ma o le fufui i se vai o le a na ona faateleina ai le malosi o le mumū. Ae o talita lapopoa sa puipuia ai fitafita mai na aū, e pei lava ona mafai e le faatuatua ia Ieova o ana auauna ona “tinei o u fanafana mu uma lava a loo leaga.” Ioe, e fesoasoani le faatuatua ia i tatou e tetee atu ai i na mea e pei o osofaiga mai agaga leaga faapea foi ma faaosoosoga e faia le mea sese, ina ia tuliloa ai se auala manao tele i mea faitino o le olaga, ma ia lolo atu i le mataʻu ma le masalosalo.