Fesili mai le Au Faitau
◼ O le ā “le mea lelei” faapea sa lē mafai e le aposetolo o Paulo ona faia, e pei ona ia taʻua i le Roma 7:19?
I le faavae, sa faasino atu e Paulo i lona lē mafai ona faia mea lelei uma o loo faaauivi mai i le Tulafono faa-Mose. O le mea lena sa lē mafai e Paulo ma isi uma lava, e aofia ai ma i tatou, ona o le lē lelei atoatoa ma le tulaga agasala. Ae leai se mea e loto vaivai ai fua. Na tatalaina e le taulaga a Keriso le auala mo le faamagaloga a le Atua ma se tulaga lelei ma Ia.
Ua faitauina faapenei le Roma 7:19: “Auā ou te le faia o le mea lelei ou te loto i ai, a o le mea leaga ou te le loto i ai, o le mea lea ou te faia.” Ua faaalia e mau o siosiomia ai faapea sa muamua lava ona tautala Paulo e uiga i le “lelei” e uiga i le mea o faamaʻoti mai i le Tulafono. I le Roma 7 fuaiupu e 7 na ia faapea mai ai: “O le agasala ea le tulafono? Aua neʻi faapea. E moni lava, ana le se anoa le tulafono, po ua ou le iloa le agasala; auā ana le fai mai le tulafono, Aua e te tuʻinanau, po ua ou le iloa le tuʻinanau.” Ioe, ua faamanino mai e le Tulafono faapea, ua agasala uma tagata, ona ua lē mafai ona latou tausia atoatoa le Tulafono.
Ona faaauau lea ona taʻua e Paulo faapea o ia sa ‘ola a o leʻi oo mai le tulafono.’ O anafea lea? Ia, a o iai o ia i le manava o Aperaamo, a o leʻi saunia e Ieova le Tulafono. (Roma 7:9; faatusatusa le Eperu 7:9, 10.) E ui lava sa lē lelei atoatoa Aperaamo, ae o le taimi lena e leʻi tuuina mai le Tulafono, o lea, sa leʻi faamanatuina atu ai ia te ia lona tulaga agasala e ala i lona lē taulau e tausia le tele o ana poloaiga. Pe o le uiga o lena mea faapea, i le taimi lava na tuuina mai ai le Tulafono ma faaalia ai le lē lelei atoatoa o le fanau a tagata, na aumaia ai iʻuga leaga? E leai. Na faaauau mai Paulo: “O lenei foi, e paia lava le tulafono, ma le poloaiga e paia, e tonu, ma ua lelei.”—Roma 7:12.
Ia matau na faamatala e Paulo le Tulafono e “paia” ma “lelei.” I fuaiupu o sosoo mai ai, sa ia faamatalaina faapea “o le mea ua lelei”—ua faamanino mai e le Tulafono—faapea o ia o le tagata agasala, ma o lenei agasala ua tatau ai ona oti o ia. Na tusi Paulo: “Ou te le faia o le mea lelei ou te loto i ai, a o le mea leaga ou te le loto i ai, o le mea lea ou te faia. Afai foi ou te faia le mea ou te le loto i ai, ua le o aʻu e toe faia, a o le agasala o loo nofo i totonu ia te au.”—Roma 7:13-20.
I lea, o lenei faamatalaga ua faamaonia ai, e lē o tautala Paulo i le lelei lautele, pe na o ni nai galuega agalelei. (Faatusatusa le Galuega 9:36; Roma 13:3.) Sa faasino atu o ia e patino lava i le faia (po o le lē faia) o mea na sa tausisia mai e le Tulafono lelei a le Atua. Muamua lava sa ia faatinoina ma le maelega le lotu Iutaia ma—pe a faatusatusa atu i isi—o ē sa “lē ponā.” Ae peitai, e ui lava i lona mafaufau, sa avea o ia ma pologa matuā faaeteete i lena Tulafono lelei, ae sa tumau pea ona leʻi ola atoatoa ai o ia. (Filipi 3:4-6) O le Tulafono sa faaatagia ai tapulaa lelei atoatoa a le Atua, ua faaalia ai e le aposetolo faapea i lona tino, sa avea pea o ia ma pologa i le tulafono o le agasala, ma i lea ua faasalaina ai i le oti. Ae peitai, sa mafai ona maua e Paulo le loto faafetai faapea, e ala i le taulaga a Keriso, na taʻuamiotonuina ai o ia—na laveaiina mai le tulafono o le agasala ma lona iʻuga fetaui lelei, o le faasalaina i le oti.—Roma 7:25.
Ua lē o toe nonofo Kerisiano i aso nei i lalo o le Tulafono a Mose, auā ua uma ona tuʻituʻiina i fao i le satauro. (Roma 7:4-6; Kolose 2:14) Ae o se mea lelei mo i tatou ona iloa faapea sa lē o se tulafono mamafa, ua lelei ai ona tau lava ina faagalo. E leai, i le tulaga faavae sa lelei lava le Tulafono. I lea, ua iai ia i tatou le mafuaaga e faitau ai i tusi o le Tusi Paia o loo iai Tulafono ma ia aʻoaʻo ai po o le ā le mea sa manaomia mai ia Isaraelu. Ua lē o toe mamao ae faia loa e Molimau a Ieova i le lalolagi aoao lena mea, i le tausisi i la latou faasologa o le faitauina o le Tusi Paia faalevaiaso.
A o tatou faitauina le Tulafono, e manaomia ona tatou manatunatu loloto i mataupu silisili o loo faavae ai tulaga eseese ma i aogā na maua mai ai e tagata o le Atua a o latou taumafai e mulimuli i na poloaiga lelei. E ao ona tatou talisapaia foi faapea, o i tatou e lē lelei atoatoa ma i lea ua lē mafai ai ona tatou mulimuli atoatoa atu i le lelei na tatou aʻoaʻoina mai le Afioga a le Atua. Ae, a o tauivi faasaga i le tulafono o le agasala, ua mafai ona tatou olioli ona o le faamoemoe i le faasaoina e ala i le faatatauina o le taulaga a Keriso ia i tatou lava.