Tala Faatusa—O se Ki i le Pāʻiaina o Loto

SA FESOLASOLATAʻI Tavita ona o le fia faasaoina o lona ola. O lona fili, o Saulo le tupu faauuina o Isaraelu. Ae peitai, o Saulo o se tagata e tumu i le inoino ia Tavita, e mafua ona o le lotoleaga. I le fia fasioti o le tupu ia Tavita, ua na aumaia ai nei ni fitafita e 3,000. Ona o le matuā sili ona toatele na lalafi ai Tavita ma ona tagata i le muliana i le vao.

A o faaputuputu faatasi Tavita ma ona tagata i le pogisā o le ana, ona tupu lea o se mea ofoofogia. Ua alu atu le tupu o Saulo i le ana lava lenei e malōlō ai. Ona alu ane lemu ai lea o Tavita i lona fili ua lē mafesoasoania, ma le auupega i lona lima. Ae ua matuā faateʻia tagata o Tavita, ona e leʻi fasiotia e ia le tupu. Sa na ona ia tipi esea o le pito o le ofu tele o Saulo. E oo lava i si nei mea ua salamō ai Tavita, ua faapea mai: “Ia faamamao e Ieova ia te au ona ou faia lena mea i loʻu alii, le ua faauuina e Ieova, e faaoo ai loʻu lima ia te ia, auā o ia ua faauuina e Ieova.”—1 Samuelu 24:1-6.

Ua aʻoaʻo mai e lenei tala a le Tusi Paia se lesona matuā aogā lava e uiga i le faaaloalo i le pule ua tuuina mai e le Atua. Ua pāʻia ai foi le loto, atonu i se tulaga e sili atu ona uigā na i lo i se fautuaga tuusaʻo. O le ituaiga malosi lena o loo iai i tala ua faamauina i le Afioga a le Atua mo le faatonuina o i tatou.—Roma 15:4.

E tusa ai ma lena itu, ua faapea foi ona taumafai Molimau a Ieova e faia e sili atu na i lo le na ona taʻu atu o ni mea moni pe a latou talaʻi atu le tala lelei, faia suesuega faale-Tusi Paia i aiga, avatu lauga faale-Tusi Paia, pe molimau atu foi lē fuafuaina. Latou te taumafai ina ia pāʻia le loto e ala i le faamatala atu o ni mea moni na oo ia i latou, ma i le faaaogāina o tala faatusa. Ua faamatalaina i la latou Theocratic Ministry School Guidebook e faapea: “O tala faatusa e faagaee ai le naunau ma faamatilatila ai manatu tāua. Latou te saveʻuina i luga le faagasologa o manatu o se tasi ma faafaigofie ai ona puʻe manatu fou. O tala faatusa e filifilia lelei faatasi ma manatu talafeagai lelei e mafai ona faafesootai ma faalogona ootia. . . . I se mea e tupu mai, e mafai ona faaaogā se tala faatusa e aveesea ai se manatu faafiatonu po o se faiga faasālaese.”a—Itulau 168.

I lana tusi, Essentials of Public Speaking, ua matauina ai e Warren DuBois faapea: “Ia tuu atu i le tusitala po o le failauga e faamatala mai ona manatu e ala i gaoioiga po o upu a tagata, ma o le mataupu aupito sili ona faigata e manaomia ai le olaola ma le felanulanuai.” I lea, o le faaopoopo atu o le olaola ma le felanulanuai i se feau ua uma ona faaleo atu ma e aumaia ai le ola, e mautinoa lava o le a fesoasoani i faifeau Kerisiano e pāʻia le loto.

Tala Faatusa e Aʻoaʻo Ai

O le ā le ituaiga o tala faatusa e sili ona maua ai ni iʻuga lelei? E masani lava, o se tala faatusa e faavae i se mea e faigofie i le au faalogologo ona faamatala mai. Sa faataatia e Iesu Keriso se faaaʻoaʻoga lelei e tusa ai o lenei mea. I lana Lauga i luga o le Mauga, sa tautala ai Iesu e uiga i na mea e masani ai e pei o masima, lamepa, ma manu felelei. (Mataio 5:1–7:29) Mo se faataʻitaʻiga, sa masani tagata uma lava ma lamepa po o molī e mu i suauu olive ma i nisi taimi sa faatutū i luga o tuugalamepa. O le mea lea, sa tatau ai ona iloa lelei e soʻo o Iesu faapea e ao ona avea i latou ma ē tauaveina le malamalama faaleagaga ina ua ia taʻu atu ia i latou: “Latou te le tutuina foi le lamepa i le tuu ai i lalo o le mea e fua ai saito, a e tuu i luga lava o le tuugālamepa ia pupula atu ai i e o i le fale uma. Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tamā o i le lagi.” (Mataio 5:15, 16) O ni tala faatusa faigofie e fetaui lelei ma le mataupu, o le a fesoasoani i faifeau Kerisiano e faamanino manatu ma aʻoaʻoga a le Tusi Paia.

Atonu sa taulai atu tala faatusa sili ona malolosi a Iesu i tagata. Ia iloilo na tala faatusa sa faamaumauina i le Luka mataupu e 15 ma le 16. Sa faitioina e le au tusiupu ma le au Faresaio Iesu i lona talia o tagata agasala ma le au ao lafoga. I le tali atu, sa ia faamatala atu ni tala e faagaeetia ai e uiga i tagata. Sa ia fetalai e uiga i se leoleo mamoe o lē na maua lana mamoe na leiloa, o se fafine na toe maua lana tupe na leiloa, i se atalii faamaumauʻoa o lē na toe foi mai i le aiga, ma se auauna tausimea amioletonu.

O tala faatusa moni ma mea moni na tutupu i le olaga e mafai ona matuā aogā i se faifeau Kerisiano. Mo se faaaʻoaʻoga, ia matau pe na faapefea ona faamatala e Alexander H. Macmillan, o lē na faimalaga i le tele o atunuu mo le 60 tausaga i le avea o se failauga i le lautele, le upu moni mai le Tusi Paia e uiga i le oti. I se taimi puupuu lava a o leʻi maliu lona tamā, o lē na talitonu faapea e lē mafai lava ona oti le solu, sa faia ai e Macmillan lenei talanoaga ma ia:

“Sa fesili saʻo mai lava loʻu tamā ia te aʻu: ‘Atalii, pe o le a ia te aʻu ea se lagona e tuua toatasi i le tuugamau a o oʻu faatalitali atu i le malo ina ia amata lana galuega o le faatumuina o le lalolagi i le lelei atoatoa?’

“O se fesili lena sa lē mafai e se tagata talavou ona nofo sauni e tali atu e faamalieina ai se tagata matua o lē sa leʻi taitai lava ona mafaufau i lena mea.

“I le tali atu sa ou fesili ai ia te ia: ‘Tamā, sa e moe lelei anapo?’

“Na tali mai o ia, ‘Ioe loʻu atalii, na ou moe lelei ina ua uma ona aumai ia te aʻu e le fomaʻi ni fualaau moe.’

“‘Sa iai la sou lagona tuua toatasi a o e moe?’

“ʻE leai, e leʻi iai soʻu lagona faapena. Maimau pe ana mafai ona ou moe i taimi uma lava, auā o le taimi lena, ou te lē lagona ai se tiga.’”

Ona faitau atu lea e A. H. Macmillan i lona tamā le Iopu 14:13-15 ma le 3:17-19 ma faapea atu: “Ia, ua e iloa la tamā, o ē ua oti, ua momoe i le oti ma ua lē toe iloa se mea a o iai i lena tulaga, e mafai la faapefea ona iai so latou lagona tuua toatasi?”

Maeu se aʻoaʻo atu uigā! Afai o oe o se tasi o Molimau a Ieova, e mafai foi ona e faaaogā ni mau ma tala faatusa ina ia ofi gofie i le mafaufau ma le loto.

Sailia o Tala Faatusa

Ae o fea e mafai ona e maua ai ni tala faatusa uigā po o ni mea moni na tutupu i le olaga? E tele mea e mafai ona aumaia mai lau pusa teu oloa o mea na e tofo totino lava oe i ai. O se faataʻitaʻiga, pe e te manao e faataʻitaʻi atu i ai faamanuiaga e maua i le faatuatua, le mana o le tatalo, po o le olioli i le faiva? Afai o oe o se Kerisiano tuuina atu, o le a faapena foi ona e faamatala mea eseese na tutupu i lou lava olaga. Atonu e te faalogo i tala mananaia o ni mea na tutupu i isi i se sauniga a le faapotopotoga, pe a o talanoa ma uso Kerisiano. Pe atonu foi e te faitau i se mea na tupu i se isi e faalaeiau ai, i le Yearbook of Jehovah’s Witnesses. O le mea moni, ua saunia e le Watch Tower Publications Index le avanoa e lomia ai ni mea na tutupu i isi mai le lalolagi aoao.

E mafai faapefea ona e faamatala ma le uigā se mea na tupu? O se tasi auala, o le faatupuina o se fua lelei o le talisapaia, e fesoasoani lea ia te oe e maua ai le uaʻi totoʻa mai o lau au faalogologo. E mafai ona e faatomuaina lau tala i se mea na tupu i lou faapea atu: “O se tasi paeonia, sa ia iloa e ia lava le faamanuiaina e Ieova o i latou o ē faalagolago atu ia te ia.” O le taimi lava lena, e taumānatu ai loa lau aufaalogologo po o ā faamanuiaga sa olioli ai le tagata talaʻi faataimi atoa o le Malo. Ia mautinoa la ona faamatala atu ia i latou.

Taumafai e faamatala i au lava upu se mea na tupu. Ia auiliili, auā o le faia faapea e faaopoopo atu ai se fesootaiga lelei i se tala. E ala i le faamalamalama atu o se ata manino o vala uma ua aofia ai, o le a sili ai ona faigofie ona e faagaee lau aufaalogologo. Ae ia mautinoa e te lē o aafia i le faamatalaina o se tala e lē taulau ai ona latou malamalama pe aiseā ua e faamatala atu ai le mea na tupu. Ia alofia foi le soona faatelē, auā e ui ina atonu e mafai e lenei mea ona faamālie ai se tala i le faalogologo, ae mafai foi ona aveesea ai le maufaatuatuaina o le mea o e faamatala atu. O le mafuaaga lava lea e tasi, ia faamamao ai foi i le faamatala atu o ni mea e lē faamaonia po o le faamatala o ni mea tutupu e lē o mafai ona e iloa pe saʻo.

Faaolaolaina o le Tusi Paia

O mea tutupu e sili ona maua ai aʻoaʻoga o loo maua i le Tusi Paia lava ia. Mo se faaaʻoaʻoga, seʻi faapea ua e manao e faaali i se tagata aʻoga o le Tusi Paia po o se aofia faapea e mafai e tamaiti ona faia se tulaga mautū mo Ieova le Atua. Atonu ua e filifili e faaaogā le tala i le teine lea e lē o taʻu maia lona igoa o lē na talanoa atu i le avā a Naamanu e uiga i le perofeta a Ieova o Elisaia. Muamua ia faitau le faamatalaga i le 2 Tupu 5:1-5. Atonu loa lea e te fesili atu: “O e manatu o le ā le faigata sa iai mo lenei teine e tausisia ai lona faamaoni i le Atua i se nuu e tapuai i atua sese? Pe sa leʻi manaomia ai ea mo ia le lototele ina ia tautala atu ai ma le mautinoa e uiga ia Ieova ma lana perofeta?”

O le muai faia o ni suesuega e mafai ona fesoasoani ia te oe e faaolaola ai le tala o faamatala. E mafai ona e maua ni faamatalaga aogā i lalo o ulutala NAAMANU, SURIA, ma ELISAIA i le Watch Tower Publications Index. O faasinoga i le ogatotonu [cross-references] i le New World Translation of the Holy Scriptures e mafai ona taʻitaʻiina ai oe mai le faamatalaga i le 2 Tupu e oo i le Salamo 148:12, 13, ua tatou faitau ai faapea: “O taulelea atoa ma teine, o toeaina atoa ma tama; ia latou vivii atu i le suafa o Ieova; auā ua na o lona suafa e mamalu; o lona viiga ua sili lea i le lalolagi atoa ma le lagi.” Maeu se faalaeiauga mo tagata talavou ina ia tautala ma le faamalosi i le afioga a le Atua!—Galuega 4:29-31.

Afai o oe o se faifeau Kerisiano, ‘ia e matuā uaʻi atu i lau aʻoaʻoga’ e tusa ai ma lenei tulaga. (1 Timoteo 4:16) Aua le tau ina taʻu atu o le upu moni—ae ia faataʻitaʻi. Ia faaolaola ma ia uigā atu faamatalaga faale-Tusi Paia. Faaaogā mea tutupu ma tala faatusa e fetaui lelei. O auala na e pāʻia ai le loto.

[Faaopoopoga i lalo]

[Ata i le itulau 29]

I le pei o Iesu, e mafai e faifeau Kerisiano i aso nei ona faaaogā tala faatusa olaola e faaoo atu ai la latou feau ma pāʻia ai le loto