Avea Aao e Faavavau o Ieova ma Ou Lagolagosua

“O le Atua o le faavavau o lou nofoaga lea, ma ua i lalo ifo aao e faavavau.”—TEUTERONOME 33:27, “American Standard Version.”

1, 2. Aiseā e mafai ai e tagata o Ieova ona mautinoa lana lagolagosua?

E MANATU mai Ieova i ona tagata. Auā, i taimi uma lava o puapuaga o tagata Isaraelu, ‘na mafatia ai o ia’! I le alofa ma le agalelei, na ia “siitia [ai] i latou ma ave ia i latou.” (Isaia 63:7-9) O lea afai tatou te faamaoni i le Atua, e mafai ona tatou mautinoa lana lagolagosua.

² Sa faapea mai le perofeta o Mose: “O le mea e te nofo ai o le Atua o le faavavau lea; o i ou lalo foi aao o le faavavau.” (Teuteronome 33:27) Fai mai se isi faaliliuga: “O le Atua o le faavavau o lou nofoaga lea, ma ua i lalo ifo aao e faavavau.” (American Standard Version) Ae faapefea ona lagolago e aao o le Atua ana auauna?

Aiseā ua Tele Nauā ai Faigata?

3. O afea o le a olioli atoatoa ai le fanau a tagata usiusitai i “le saolotoga [mamalu] o le fanau a le Atua”?

³ E lē avea la tatou auaunaga ia Ieova ma auala e puipuia ai i tatou mai faigata ua masani ona oo i tagata lē lelei atoatoa. Na faapea mai le auauna a le Atua o Iopu: “O le tagata ua fanau mai i le fafine, ua saasaa ona aso, mona ua tumu i le atuatuvale.” (Iopu 14:1) A “o tausaga o matou olaga,” na fai mai ai le faisalamo: “O lo latou malosi o i ai le tiga ma le puapuaga.” (Salamo 90:10) O le a iai pea le olaga i lena auala seia oo ina ‘tuusaunoa le foafoaga mai le nofo pologa i le iʻuvale ma maua ai le saolotoga mamalu o le fanau a le Atua.’ (Roma 8:19-22) O le a tupu lena mea i le taimi o le Afe Tausaga o le Pulega a Keriso. O i inā o le a tofo ai tagatānuu faaletagata o le Malo i le laveaiina mai le agasala ma le oti e faavae i le taulaga togiola a Iesu. I le faaiʻuga o le Meleniuma, o le a fesoasoani ai Keriso ma ana aumea o tupu ma faitaulaga i le fanau a tagata usiusitai ina ia oo i le lelei atoatoa, ma o i latou e faamaoni i le Atua i le taimi o le tofotofoga faaiʻu a Satani ma ana temoni o le a tusia o latou igoa e faavavau i le “tusi o le ola.” (Faaaliga 20:12-15) Ona latou olioli atoatoa ai lea i le saolotoga mamalu o le fanau a le Atua.

4. Na i lo le faitio e uiga i o tatou aiaiga i le olaga, o le ā e ao ona tatou faia?

⁴ I le taimi nei, na i lo le faitio e uiga i o tatou aiaiga totino i le olaga, inā tatou faalagolago ia ia Ieova. (1 Samuelu 12:22; Iuta 16) Seʻi o tatou loto faafetai ia mo lo tatou Faitaulaga Sili, o Iesu, o lē ua mafai ai ona tatou faalatalata atu i le Atua “ina ia alofaina ai o i tatou, ia maua ai foi le alofa tunoa e fesoasoani mai i ona aso e tatau ai.” (Eperu 4:14-16) Ia aua lava neʻi o tatou pei o Atamu. Auā, na ia tuuaʻia sese Ieova faapea ua ia foaiina atu ia te ia se avā leaga, e faapea: “O le fafine na e au mai ia te au, ua na au mai ia te au le fua o le laau, ona ou ʻai ai lea.” (Kenese 3:12) Ua aumaia e le Atua mea lelei ae na te lē aumaia ni faigata ia i tatou. (Mataio 5:45; Iakopo 1:17) E masani a ona avea mala o se iʻuga o le leai o so tatou lava atamai po o ni mea sese a se tasi. E mafai foi ona oo mai ia i tatou ona o lo tatou tulaga agasala ma ona o loo ola i se lalolagi ua nofo toilalo i le malosi o Satani. (Faataoto 19:3; 1 Ioane 5:19) E ui i lea, ua lagolagoina pea e aao e faavavau o Ieova ana auauna faamaoni o ē o loo tatalo ma faalagolago ia te ia ma faatatauina totino fautuaga a lana Afioga.—Salamo 37:5; 119:105.

Faatumauina i Taimi o Maʻi

5. O le ā le faalaeiauga e mafai ona maua e ē mamaʻi mai le Salamo 41:1-3?

⁵ O le toatele o i tatou ua mafatia i nisi o taimi ona o maʻi. E ui i lea, ua faapea mai Tavita: “Amuia le tagata ua [magafagafa i] le ua mativa; e faasaoina o ia e Ieova i le aso vale. E tausia o ia e Ieova ma faaolaina; e manuia foi o ia i le nuu; e te le tuua foi o ia i le manao o e ita ia te ia. E lagolago ane Ieova ia te ia i le taotoga o lona maʻi; e te liua lona moega uma lava i lona maʻi.”—Salamo 41:1-3.

6, 7. Sa fesoasoani faapefea le Atua ia Tavita a o maʻi i lona moega, ma e mafai faapefea e lenei mea ona faalaeiau ai auauna a Ieova?

⁶ O se tagata magafagafa e fesoasoani atu o ia i ē matitiva. E mafai ona oo mai “le aso vale” i so o se tulaga malaia po o se vaitaimi faaumiumi o faigata e faavaivai ai se tagata. E faalagolago o ia i le Atua na te leoleoina o ia i taimi o faamaʻi, ma e ‘faailoa atu e isi lona fiafia i le lalolagi’ e ala i le faasalalauina o le tala i feutagaʻiga alofa a Ieova ma ia. Sa fesoasoani le Atua ia Tavita i le “taotoga o lona maʻi,” atonu i le taimi sa sili ona mafatia ai ina ua saili le atalii o Tavita o Apisaloma e fōua le nofoalii o Isaraelu.—2 Samuelu 15:1-6.

⁷ Talu ai sa faaalia e Tavita le magafagafa i ē faamaulalo, na ia lagona ai faapea o le a faatumauina o ia e le Atua a o maʻi i lona moega. (Salamo 18:24-26) E ui ina matuā tigaina, ae sa ia mautinoa faapea o le a ‘suia lona moega’ e le Atua, e lē i le aveeseina faavavega o le maʻi, ae i le faalaeiauina o ia i manatu faamafanafana. E pei ai ua liua e Ieova lona moega mai le maʻi i le toe malosi. I se tulaga tutusa, afai tatou te mafatia i maʻi o ni auauna a le Atua, o le a lagolagoina i tatou e aao e faavavau o Ieova.

Faamaisega mo Ē Loto Momomo

8. Ua faapefea ona faaalia e se tasi o Kerisiano maʻi lona faalagolago i le Atua?

⁸ E mafai e maʻi ona faapogaia ai le loto momomo. O se tasi Kerisiano na maʻi tigaina i nisi taimi, sa lē lava lona malosi e faitau ai. Ua ia faapea mai: “Na mafua i lenei mea ona ou oo i le tele o ootiaga o le loto momomo, i faalogona ua lē toe aogā, ma e oo lava foi i loimata.” I le iloaina faapea o loo manao Satani e solipalaina o ia i le loto vaivai, na ia tau faasaga atu ai, i le iloa faapea e faatasi ma le fesoasoani a Ieova o le a lē mafai ai ona ia toilalo. (Iakopo 4:7) Ua avea lenei tagata o se faalaeiauga i isi o ē iloa lona faalagolago i le Atua. (Salamo 29:11) E ui foi ina faataotolia i le falemaʻi, ae telefoni atu o ia i ē mamaʻi ma isi ina ia atiina aʻe faaleagaga i latou. Ua faamalosia ia lava e ala i le faalogologo i kaseti puʻeleo o musika o le Malo ma mataupu o lenei mekasini ma lona soa o le Awake! ma i le auaumea faatasi ma uso Kerisiano. Ua faapea mai lenei uso: “Ou te talanoa e lē aunoa ia Ieova i le tatalo, ma ole atu ia te ia e foai mai ia te aʻu le malosi, le taʻitaʻiga, le faamafanafanaga, ma le fesoasoani e tutumau ai.” Afai o oe o se Kerisiano ua oo i ni faafitauli matuiā tau le soifua malōlōina, ia faalagolago pea ia Ieova ma ia avea ona aao e faavavau ma ou lagolagosua.

9. O ā faaaʻoaʻoga e faaalia ai faapea e faasoesa le loto momomo i nisi taimi i tagata faaleatua?

⁹ O le loto momomo o se faafitauli ua leva. A o i lalo o tofotofoga, na fasa ai Iopu e pei o se tagata ua lagona le tuulafoaiina e le Atua. (Iopu 29:2-5) Na faanoanoa foliga o Neemia ona o le tulaga faatamaʻia o Ierusalema ma ona pa, ma sa matuā momomo le loto o Peteru i lona faafitia o Keriso na mafua ai ona ia tagi lotulotu. (Neemia 2:1-8; Luka 22:62) Sa atuatuvale Epaferoti ona na faalogo Kerisiano i Filipi sa maʻi o ia. (Filipi 2:25, 26) Na afaina nisi o Kerisiano i Tesalonia i le loto momomo, o le mea lea na uunaia ai e Paulo uso i inā e “faamafanafana i e loto iti.” (1 Tesalonia 5:14) E faapefea la ona fesoasoani le Atua i tagata faapena?

10. O le ā atonu e aogā i le taumafai e faafetaiaia le loto momomo?

¹⁰ E tatau ona faia se filifiliga totino e uiga i togafitiga mo le loto momomo ogoogo.a (Kalatia 6:5) Atonu e aogā le lava o le malōlō ma le paleni o gaoioiga. Na i lo le manatu i faafitauli eseese o se mea telē e tasi, atonu o le a iloa e se tagata loto momomo le aogā o le galue ina ia foia faafitauli e taitasi i le taimi. E matuā aogā foi se fesoasoani faamafanafana mai toeaina o le faapotopotoga, ae maise lava pe afai e faapogaia e lenei faafitauli tau le soifua malōlōina se popolega faaleagaga. (Iakopo 5:13-15) I na mea uma, e matuā tāua lava ona faalagolago ia Ieova, ‘ia lafo atu mea uma tatou te popole ai ia te ia, auā e manatu mai o ia ia i tatou.’ O tatalo faatauanau ma e sau mai le loto e mafai ona aumaia ai i se tasi ‘le filemu o le Atua e leoleoina ai le loto ma le malosi faalemafaufau e ala ia Keriso Iesu.’—1 Peteru 5:6-11; Filipi 4:6, 7.

Fesoasoani Ieova ia i Tatou e Onosai i Faanoanoaga

11-13. O le ā e mafai ona fesoasoani e faatoʻa filemu ai le faanoanoa i le maliu o sē pele?

¹¹ O se isi mea e sili ona mafatia ai o le maliu o sē e pele ia i tatou. Na tagituʻi Aperaamo i le maliu o lana avā, o Sara. (Kenese 23:2) Ina ua oti lona atalii o Apisaloma, sa ootia Tavita i le faanoanoa. (2 Samuelu 18:33) Ma e oo foi i le tagata lelei atoatoa o Iesu sa “tagi” ina ua oti lana uo o Lasalo! (Ioane 11:35) O lea, e oo mai le faanoanoa pe a aveesea e le oti sē e pele ia i tatou. Peitai o le ā e mafai ona fesoasoani e faatoʻa filemu ai sea faanoanoa?

¹² E fesoasoani le Atua i ona tagata ina ia onosai i ootiaga o faanoanoaga. Ua faapea mai lana Afioga o le a iai se toetu. O le mea lea, tatou te lē “faanoanoa [ai], pei o isi e leai so latou faamoemoe.” (1 Tesalonia 4:13; Galuega 24:15) E fesoasoani le agaga o Ieova ia i tatou ina ia maua le filemu ma le faatuatua ma ia mafaufau loloto i le lumanai matagofie ua folafola mai i lana Afioga, na i lo le ufitia i manatu faanoanoa e uiga i sē pele ua maliu. E mafai foi ona maua le faamafanafanaga mai le faitauina o le Tusi Paia ma tatalo i “le Atua . . . e ana le faamafanafanaga uma.”—2 Korinito 1:3, 4; Salamo 68:4-6.

¹³ E mafai ona tatou maua le faamafanafanaga mai le faamoemoe o le toetu e pei ona maua e Iopu faaleatua, o lē na alaga atu: “E! fia natia aʻu e oe [Ieova] i le tuugamau ma ia e faaliloina aʻu, seia mavae atu lou toasa; ia e atofaina mai se aso mo aʻu, ma ia e manatua mai ai aʻu. Afai e oti le tagata, e toe ola mai ea o ia? Ou te faatalitali atu i aso uma o le taua ua tofia ai aʻu, seia oo ina suia o aʻu. Ia e valaau mai, ona ou tali atu ai lea ia te oe; ia e finagalo alofa i le galuega a ou aao.” (Iopu 14:13-15) E lē masani ona tatou matuā faanoanoa pe a alu malaga se uō pele, auā tatou te faatalitalia e toe feiloai ma ia. Atonu foi o le a faaitiitia le faanoanoa pe afai tatou te manatu i le oti o se Kerisiano faamaoni i se auala faapena. Afai sa ia te ia le faamoemoe faalelalolagi, o le a ia toe maleifua mai la nai le moe o le oti i inei i le lalolagi i le taimi o le Afe Tausaga o le Pulega a Keriso. (Ioane 5:28, 29; Faaaliga 20:11-13) Ma afai o loo tatou faamoemoe e ola e faavavau i le lalolagi, atonu o le a tatou iai i inei e faafeiloaia a tatou uo pele e toe tutū mai.

14. Sa faapefea ona faafetaiaia e ni fafine Kerisiano se toalua le maliliu o a la tane?

¹⁴ Ina ua mavae le maliu o lana tane, sa iloa e se tasi o tuafafine faapea e tatau pea ona faaaogā lona olaga i le auaunaga i le Atua. E lē gata ina toʻaga e ‘faia le tele o mea i le galuega a le Alii,’ ae na ia suʻiina foi se ie ufi moega i ni fasi ieie e 800. (1 Korinito 15:58) Ua ia faapea mai, “Sa o se galuega lelei tele lenei, ona i taimi uma lava na ou galue ai, sa mafai ona ou faalogologo i musika o le Malo ma lipine faale-Tusi Paia, ia e faatumu ai pea loʻu mafaufau.” Na te manatua ma le fiafia se asiasiga a se toeaina agavaa ma lona toalua. Sa faasino atu e le toeaina mai le Tusi Paia, faapea e manatu moni mai lava le Atua i fafine ua oti a latou tane. (Iakopo 1:27) E leʻi lolo atu foi se isi fafine Kerisiano i sona lava faanoanoa ina ua maliu lana tane. Na ia talisapaia le lagolagosua a uō ma faaalia ai le naunau e sili atu i isi. Fai mai a ia, “Sa atili masani ai ona ou tatalo ma atiina aʻe se faiā vavalalata ma Ieova.” Ma maeu se faamanuiaga o le mauaina o le lagolagosua a aao e faavavau o le Atua!

Fesoasoani i Taimi Tatou te Sese Ai

15. O le ā le manatu autū o upu a Tavita i le Salamo 19:7-13?

¹⁵ E ui ina tatou alolofa i le tulafono a Ieova, ae tatou te sese lava i nisi taimi. O lenei tulaga, e lē taumatea lo tatou mafatia ai, e pei ona tupu ia Tavita, o lē sa sili atu ona naunau i tulafono, o afioga, o poloaiga, ma faaiʻuga faafaamasinoga a le Atua, na i lo le auro. Sa ia faapea mai: “Ua apoapoaiina mai ai foi lau auauna; e tele foi le taui pe a tausi i ai. O ai ea na te iloa amio sese? Ia e faamagalo ia te au i agasala lilo. Ia e taofi foi i lau auauna i agasala faamaualuga; aua neʻi pule ia ia te au; ona sao ai lea o laʻu amio, ou te le nofo sala foi i le leaga sili.” (Salamo 19:7-13) Seʻi o tatou iloiloina la ia upu.

16. Aiseā e ao ai ona tatou alofia le faamaualuga?

¹⁶ O gaoioiga faamaualuga o ni agasala e sili atu ona matuiā na i lo o mea sese. Sa faatulaʻieseina Saulo o se tupu ona o le ofoina atu ma le faamaualuga o taulaga ma mo le faasaoina o le tupu o Amaleka o Akako atoa ma manu e aupito sili ona lelei, e ui ina poloai atu le Atua e tuuina atu tagata o Amaleka ina ia faaumatia. (1 Samuelu 13:8-14; 15:8-19) Na taia le Tupu o Usia i le lepela ona o le faatinoina ma le faamaualuga o tiute faafaitaulaga. (2 Nofoaiga a Tupu 26:16-21) Ina ua momoli atu le atolaau o le feagaiga i Ierusalema ma na tau sūsulu ai povi sa latou tosoina le taavale, na faaoo atu ai e le Atua le oti ia Usa ona o le fiatoa fua taofi le Atolaau ina ia faatūsaʻo. (2 Samuelu 6:6, 7) O lea afai tatou te lē iloa le mea e fai pe afai foi e lē mautinoa pe ua faatagaina i tatou e faia se mea, e ao ona tatou faaalia le loto maulalo ma e ao ona faafesootai i latou ua iai le tofa mamao. (Faataoto 11:2; 13:10) O le mea moni, afai tatou te faia se mea sese ma le loto i ai, e ao ona tatou tatalo mo le faamagaloga ma ole atu i le Atua e fesoasoani mai ia i tatou e leoleo faasaga i le faamaualuga i le lumanai.

17. E mafai faapefea i agasala faalilolilo ona afaina ai se tagata, e ui i lea, e mafai faapefea ona maua le faamagaloga ma le toʻafilemu?

¹⁷ O agasala faalilolilo e mafai ona faapogaia ai le mafatia. E tusa ai ma le Salamo 32:1-5, sa taumafai Tavita e nanā lana agasala, peitai na ia faapea mai: “Na ou faalologo, ona palagia ai lea o oʻu ivi i loʻu faataio i le aso atoa; auā sa mamafa lou aao i luga ia te au i le ao atoa foi ma le po; ua liua lava loʻu malosi i le vevela o le tausaga vevela.” Sa vaivai Tavita, i le taumafai e titina se loto fuatiaifo ua agasala, ma ona o lona ātu na faaitiitia ai lona malosi e pei ona alu ese o le suavai e ola ai se laau i se taimi o le lāmala pe i le vevela o le tau mafanafana. E foliga mai sa ia mafatia i āuga tigā faalemafaufau ma le faaletino ma mou atu ai lona olioli ona o le lē taulau ona ia taʻutino atu. Na o le taʻutino atu lava i le Atua e mafai ai ona aumaia le faamagaloga ma le toʻafilemu. Fai mai Tavita: “Amuia le tagata ua faamagaloina lona solitulafono, ma ua ufitia lana agasala. . . . Ona ou faailoa atu ai lea ia te oe o laʻu agasala, na ou le ufitia foi laʻu amioletonu; sa ou faapea, Ou te faaali atu ia Ieova oʻu solitulafono; ona e aveesea ai lea o le leaga o laʻu agasala.” E mafai ona aogā se fesoasoani alofa mai toeaina Kerisiano ina ia toe maua ai le malosi faaleagaga.—Faataoto 28:13; Iakopo 5:13-20.

18. O ā faamaoniga o loo iai faapea e mafai ona iai ni āuga faaumiumi o le agasala, peitai o le ā e mafai ona avea ma puna o le faamafanafanaga i tulaga faapena?

¹⁸ E mafai ona iai ni āuga faaumiumi o le agasala. Na tupu lena tulaga ia Tavita, o lē na auai i le mulilua ma Patesepa, fuafuaina le oti o lana tane, ma na faaipoipo i le fafine to ua oti lana tane. (2 Samuelu 11:1-27) E ui ina faaalia i ai e le Atua le alofa mutimutivale ona o le feagaiga mo le Malo, le salamō o Tavita, atoa ma lona tausia ma le alofa mutimutivale o isi, ae na oo ia Tavita ‘le mala i lona lava aiga.’ (2 Samuelu 12:1-12) Sa oti le tamaitiiti na fanau mai i le mulilua. Na toso faamalosi e le atalii o Tavita o Amanono lona ʻafa tuafafine o Tamara ma na fasiotia o ia e ala i le faatonuga a Apisaloma le tuagane o Tamara. (2 Samuelu 12:15-23; 13:1-33) Sa faalumaina e Apisaloma Tavita e ala i le faia o ni feusuaiga ma palake a Tavita. Na ia taumafai e fōua le nofoālii peitai sa fasiotia ai o ia. (2 Samuelu 15:1–18:33) E tumau pea ona iai āuga o le agasala. Mo se faaaʻoaʻoga, atonu e salamō ma toe faaeaina i le faapotopotoga se tagata amioleaga na faateʻaina, peitai atonu e alu ni tausaga o tau faaleleia le talaaga ua faaleagaina ma manuʻanuʻa tau faalogona ootia e mafua mai le agasala. I le taimi nei, maeu se faamafanafanaga i le mauaina o le faamagaloga a Ieova ma le lagolagosua a ona aao e faavavau!

Faasaoina mai Puapuaga e Oo ia i Tatou

19. E mafai faapefea ona avea le agaga o le Atua ma fesoasoani pe a matuiā ona tofotofoina i tatou?

¹⁹ A matuiā ona tofotofoina, atonu o le a lē lava lo tatou atamai ma le malosi e faia ai se faaiʻuga ma faatinoina. I se tulaga faapena, ua iai le agaga o le Atua e “fesoasoani mai i lo tatou vaivai; auā tatou te le iloa mea tatou te ole atu ai ma le tusa, a e peitai o le Agaga, e fautua o ia mo i tatou i le oi e le mafai ona talatalaina.” (Roma 8:26) Afai e aumaia e Ieova se suiga i aiaiga, e ao ona tatou loto faafetai. E ui i lea, atonu o le a faasaoina i tatou e lona aao i se isi auala. Afai tatou te tatalo mo le atamai, atonu o le a faaalia mai e Ieova e ala i lona agaga le mea e ao ona faia ma foai mai ia i tatou le malosi e manaomia e fai ai. (Iakopo 1:5-8) Faatasi ma lana fesoasoani, e mafai ona tatou tutumau pe a ‘faanoanoa e ala i tofotofoga’ ma sao atu ai ma se faatuatua ua tofotofoina ma faamalosia.—1 Peteru 1:6-8.

20. O le ā o le a tatou olioli ai pe afai tatou te avea moni aao e faavavau o Ieova ma o tatou lagolagosua?

²⁰ Seʻi aua lava neʻi o tatou faavaivai e liliu atu i le Atua i le tatalo. Fai mai Tavita: “O loo faasaga pea lava oʻu mata ia Ieova; auā o ia lava e tatalaina oʻu vae ai le upega. Ia e liuliu alo mai ia te au, ma alofa mai ia te au; auā o aʻu ou te toatasi ma puapuagaina. Ua faateleina puapuaga o loʻu loto; ia e aveeseina aʻu i mea ou te tiga ai. Ia e silasila mai i loʻu puapuaga ma loʻu tiga; ma ia e faamagaloina aʻu agasala uma lava.” (Salamo 25:15-18) E pei o Tavita, o le a tatou olioli i le laveaiga tauatua, lona finagalo malie, ma le faamagaloga pe afai tatou te avea moni aao e faavavau o Ieova ma o tatou lagolagosua.

[Faaopoopoga i lalo]

E Faapefea ona E Tali?

◻ E fesoasoani faapefea Ieova i ana auauna o ē atonu e mamaʻi?

◻ O le ā atonu e aogā pe a tatou taumafai e faafetaiaia le loto momomo?

◻ O le ā e mafai ona fesoasoani e faatoʻa filemu ai le faanoanoa i le maliu o sē pele?

◻ E mafai faapefea e i latou e faalilolilo a latou agasala ona maua le toʻafilemu?

◻ O le ā le fesoasoani o loo iai pe a matuiā ona tofotofoina tagata o Ieova?

[Ata i le itulau 16, 17]

E mafai ona tatou maua le faamafanafanaga mai le faamoemoe o le toetu, e pei ona maua e Iopu faaleatua