O le le Ki i le Faa-Kerisiano Moni?

I ASO nei, e toatele atu tagata ua faapea mai e auai i le Faa-Kerisiano na i lo i so o se isi lava vaega faalotu i le lalolagi. Ae o talitonuga o nei Kerisiano e pei ona latou taʻua ai i latou lava, e feteenaʻi, e leai so latou autasi, ma i nisi taimi e oo ai ina fasioti e le tasi le isi. E manino lava, e toatele e lē o ni Kerisiano moni. Na fetalai Iesu faapea, i o tatou aso, e toatele o le a fai atu ia te ia, “Le Alii e, le Alii e,” i se isi faaupuga, e faapea mai o Kerisiano, ae o le a fai atu o ia ia te i latou: “Ou te lei iloa lava outou; ina o ese ia outou ia te au, o outou o e fai amio leaga.” (Mataio 7:21, 23) E mautinoa lava, e leai se tasi o i tatou e manao e iai i lena vaega! O lea, e faapefea la ona tatou iloa po o i tatou o ni Kerisiano moni?

O le mea moni, e tele mea e manaomia ina ia avea ai o se Kerisiano moni. O le Kerisiano moni e tatau ona iai se faatuatua malosi auā “a leai foi se faatuatua e le mafai ona fiafia mai [le Atua].” (Eperu 11:6) O lena faatuatua malosi e tatau ona ō faatasi ma galuega saʻo. Na lapatai mai le soʻo o Iakopo “e faapea foi le faatuatua ua mate pe a leai ni galuega.” (Iakopo 2:26) E lē gata i lea, e ao i se Kerisiano ona iloa lelei le pule a le “auauna faamaoni ma le mafaufau.” (Mataio 24:45-47) Ae o le ki i le Faa-Kerisiano moni o se mea e ese mai i nei mea.

O le ā le ki? Na faamatala e le aposetolo o Paulo i lana uluai tusi i tagata Korinito: “Afai ou te tautala i gagana a tagata atoa ma agelu, a e leai soʻu alofa, ua avea aʻu ma ʻapa memea taalili, po o se sumepalo tagitagi. Afai foi o ia te au [le mea alofa o le] perofeta ane, ma le iloa o mea lilo [paia] uma, ma le poto uma lava; afai foi o ia te au le faatuatua uma e ave ese ai mauga, a e leai soʻu alofa, ou te le aoga lava. Afai foi ou te tufatufaina aʻu mea uma e fagaina aʻi [isi]; afai foi ou te tuuina atu loʻu tino [ina ia ou gugutu ai], a e leai soʻu alofa, e leai lava sona aoga ia te au.”—1 Korinito 13:1-3.

O lea, o le alofa o le ki lea i le Faa-Kerisiano moni. O le faatuatua, galuega, ma aumea saʻo e matuā tāua, e matuā tatau lava. Ae a aunoa ma le alofa, o le a lē mafai ona iloa lo latou tāua. Aiseā e faapea ai?

I le tulaga faavae, ona o le ituaiga o Atua lea o loo tatou tapuai i ai. Na faamatalaina e le aposetolo o Ioane Ieova e faapea o le Atua o le Faa-Kerisiano moni, i upu nei: “O le Atua, o le alofa lava ia.” (1 Ioane 4:8) E tele lava isi uiga o Ieova le Atua, e pei o le malosi, faamasinotonu, ma le poto, ae talu ai ona o ia o le Atua e silisili ona alofa, o ā la ituaiga o tagata e finagalo i ai o ia e avea o ona tagata tapuai? E mautinoa lava, o tagata o ē faaaʻoaʻo ia te ia ma atiina aʻe le alofa.—Mataio 5:44, 45; 22:37-39.

O se Faanaunauga Saʻo

Ioe, o le alofa ua faapogaia ai Kerisiano ina ia pei o le Atua o latou tapuai i ai. O lona uiga faapea o o latou faanaunauga, ia tutusa ma faanaunauga o le Atua. O le ā le faanaunauga sili i lo o mea uma lava na uunaia ai Ieova le Atua e auina mai Iesu i le lalolagi e aumaia ia i tatou le avanoa e maua ai le ola e faavavau? O le alofa. “Ua faapea lava ona alofa [tele] mai o le Atua i le lalolagi, ua ia au mai ai lona Atalii e toatasi, ina ia le fano [i latou uma] e faatuatua ia te ia, a ia maua . . . le ola e faavavau.” (Ioane 3:16) O le ā la e ao ona avea ma o tatou faanaunauga i le faia o le finagalo o le Atua? O le alofa foi. “O le uiga lenei o le alofa i le Atua, ia tatou tausi i ana poloaiga.”—1 Ioane 5:3, NW.

Pe ono mafai ona auauna i le Atua ona o se faanaunauga sese? Ioe. Na taʻua e Paulo nisi i ona aso o ē sa auauna ona o le matauʻa ma le fia faatautavā. (Filipi 1:15-17) E ono mafai ona tupu lena mea ia i tatou. O le lalolagi lenei o loo tumu i le faatautavā, ma e mafai ona aafia ai i tatou i lena agaga. Atonu o le a tatou mitamita i le manatu faapea o i tatou o ni failauga sili ona lelei pe o mafai foi ona tufaina atu le tele o lomiga na i lo isi. Atonu tatou te faatusatusa o tatou faaeaga o le auaunaga ma faaeaga na o loo olioli ai foi se tasi ma oo ina mitamita ai—pe matauʻa. E ono mafai ona lotoleaga se toeaina i lona tulaga pule, ma oo ai ina faavaatuʻia ai se tane talavou tomai mai le faia o se agaʻigaʻi i luma. O le naunau mo ni lelei totino atonu o le a uunaia ai i tatou e atiina aʻe se faiā ma Kerisiano mauʻoa ae lē amanaia ē matitiva.

E mafai ona tutupu mea nei ona o lo tatou lē lelei atoatoa. Ae peitai, afai—e pei o Ieova—tatou te faia le alofa ma o tatou uunaiga sili, o le a tatou tau ai la faasaga i na faanaunauga. O le manatu faapito, le naunau ina ia viiviia i tatou lava, po o le mimita faafiapoto e mafai ona titina ai lo tatou alofa, ina ia “leai lava sona aoga” ia i tatou.—Faataoto 11:2; 1 Korinito 13:3.

Alofa i Totonu o se Lalolagi Manatu Faapito

Na fetalai Iesu faapea o ona soʻo “e le ni o le lalolagi.” (Ioane 17:14) E mafai faapefea ona tatou aloese mai le lofituina e ala i taaʻiga a le lalolagi o loo siomia ai i tatou? O le alofa o le a fesoasoani. Mo se faaaʻoaʻoga, i aso nei ua avea tagata ma “ē alolofa i mea faafiafia na i lo ni ē alolofa i le Atua.” (2 Timoteo 3:4, NW) Na lapataia i tatou e Ioane ina ia aua neʻi o tatou faapena. Na faapea mai o ia: “Aua le alolofa i le lalolagi, po o mea o iai i le lalolagi. Afai e alofa se tasi i le lalolagi, e lē o ia te ia le alofa i le Tamā; auā o mea uma o i le lalolagi —o le tuʻinanau o le tino ma le tuʻinanau o mata ma le faalialia o lenei olaga—e lē mai le Tamā ia, ae mai le lalolagi.”—1 Ioane 2:15, 16, NW.

Peitai, e lē o se mea faigofie ona fulitua atu atoatoa i “tuʻinanau o le tino” ma “tuʻinanau o mata.” O nei mea e matuā mananao tele i ai ona e matuā manaomia lava e o tatou tino. E lē gata i lea, e matuā sili ona tele ma eseese fiafiaga o loo maua i aso nei na i lo na sa iai i aso o Ioane, o lea, afai o se faafitauli i na aso le tuʻinanau o mata, ua matuā sili atu foi la ona faapena i le taimi nei.

O le mea e malie ai, ona o le tele o faafiafiaga ua ofo mai e le lalolagi e leai ma se itu e sese ai ia mea. E leai se mea e sese ai le iai o se fale telē, se taavale manaia, se televise, po o se laau pese. E lē solia ai foi le tulafono faale-Tusi Paia i le faia o ni malaga uumi mananaia ma ni malologa e fiafia ai. O le ā la le autū o le lapataiga a Ioane? Mo le tasi o mea, pe a soona faatāua e i tatou na mea, ona latou faatupu ai lea ia i tatou le agaga o le manatu faapito, manao tele i meafaitino, ma le mimita. Ma o taumafaiga ia maua tupe e faatau ai na mea, e mafai ona faavaivaia ai i tatou i la tatou auaunaga ia Ieova. E oo lava i le olioli ai i na mea e alu ai foi le taimi, ma a o aumaia e ni faamalosiga fuafua tatau o le tino le faafouina, ae o o tatou taimi e faatapulaa, pe a manatu atu i le tiute tauave o le suesueina o le Tusi Paia, faatasitasi ma uso Kerisiano mo le tapuaiga, ma talaʻia le tala lelei o le Malo.—Salamo 1:1-3; Mataio 24:14; 28:19, 20; Eperu 10:24, 25.

I lenei tupulaga matapeapea i mea faitino, e manaomia ai le maumauai ina ia ‘tuu faamuamua le Malo o le Atua’ ma tetee atu i le ‘faaaogāina atoatoa o lenei lalolagi.’ (Mataio 6:33; 1 Korinito 7:31) O le a fesoasoani se faatuatua malosi. Ae maise lava, o se alofa moni mo Ieova ma mo o tatou tuaoi o le a faamalosia ai i tatou e tetee atu i mailei na, e ui ina leai se mea e leaga ai, peitai e taofia ai i tatou mai le ‘faaiʻuina maeʻaeʻa o la tatou faiva.’ (2 Timoteo 4:5) A aunoa ma lena alofa, o le a faigofie lava ona avea la tatou faiva e na o se taumafaiga e faaletāua.

Alofa i Totonu o le Faapotopotoga

Sa faamatilatila e Iesu le tāua o le alofa ina ua ia fetalai: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) Aiseā o le a faaalu ai e toeaina le tele o le taimi e leoleo ma fesoasoani atu ai i uso Kerisiano pe ana fai latou te lē alolofa ia i latou? Aiseā o le a faapalepale ai le faapotopotoga i vaivaiga o o latou uso—e aofia ai le au toeaina—pe ana faapea e lē o le alofa? O le alofa ua uunaia ai Kerisiano e fesoasoani le tasi i le isi i se auala faaletino pe a latou faalogo faapea o loo iai le manaomia i isi. (Galuega 2:44, 45) I taimi o sauaga, e puipui ai e le tasi Kerisiano le isi. Aiseā? Ona o le alofa.—Ioane 15:13.

I nisi taimi e oo mai ai faamaoniga aupito sili o le alofa i ni nai mea iti. O se toeaina, ua iai i ni omiga mai se galuega mamafa, atonu o le a faalatalata atu i ai se uso Kerisiano o lē o le a na toe fai atu foi se faitioga e foliga mai e lē o tāua tele i le toeaina. Pe ao i le toeaina ona ita? Na i lo le faatagaina o lenei mea e avea o se pogai e fevaevaeai ai, e ao ona ia feutagaʻi ma le onosai ma le agalelei ma lona uso. La te talanoa faatasi le mataupu, ma e faamalosia atili ai foi le la faauoga. (Mataio 5:23, 24; 18:15-17) Na i lo le tausisi atu o le tagata lava ia i lana aiā tatau, la te taumafai uma ina ia atiina aʻe le loto faamagalo lea na fautuaina e Iesu, ia nofo sauni e faamagalo o latou uso e “faafitugafulu ni fitu.” (Mataio 18:21, 22) I lea auala, ua taumafai malosi ai Kerisiano ina ia oofu i latou lava i le alofa, “auā o le fusi lea e atoatoa ona lelei o le autasi.”—Kolose 3:14, NW.

Ia Faamalosia lo Tatou Alofa o le Tasi mo le Isi

Ioe, o le alofa, o le uunaiga saʻo lea mo le auauna atu ia Ieova. O le alofa o le a na faamalosia i tatou ina ia tausia le vavae ese mai le lalolagi, ma o le alofa foi o le a na faamautinoa o loo tumau pea ona Kerisiano moni le faapotopotoga. Ona e lē o faaitiitia ai le fai mea mafai, o le a fesoasoani ai le alofa ia i latou o pule ina ia lē soona manatu mamafa faapea o i latou e faimea mafai ua galo ai ia i latou ona agalelei ma agamalu i a latou feutagaʻiga ma isi. O le alofa e fesoasoani ia i tatou uma lava ina “ia usiusitai i . . . taʻitaʻi ma . . . gauai i ai.”—Eperu 13:17.

Na uunaia i tatou e le aposetolo o Peteru ina ia ia i tatou le “alofa naunau” o le tasi mo le isi auā o le “alofa e ufiufi ai agasala e tele.” (1 Peteru 4:8) E mafai faapefea ona tatou faia o lenei mea? Na foafoaina le tagata i le faatusa o le Atua ma i lea e iai le uiga masani o le alofa. Ae o le ituaiga o alofa lea o loo tatou talanoa ai i inei na te manaomia se isi mea e sili atu. O le mea moni, o le fua sili lea o le agaga o le Atua. (Kalatia 5:22) O lea, ina ia atiina aʻe le alofa, e tatau ona faaavanoa i tatou lava mo le agaga o le Atua. Faapefea? E ala i le suesue o le Tusi Paia, lea na faagaeeina e le agaga o Ieova. (2 Timoteo 3:16) E ala i lo tatou tatalo mo le agaga o Ieova ina ia atiina aʻe lo tatou alofa mo Ieova ma mo o tatou uso. Ma e ala i le auaufaatasi ma le faapotopotoga Kerisiano, o i inā e saoloto ai ona tafe mai le agaga e aunoa ma le taofiofia.

E manaomia foi ona tatou iloiloina i tatou lava ina ia iloa ai po o iai ni gaoioiga po o ni manatunatuga lē alofa. Ia manatua, o le alofa e tupu mai i le loto, ma “e sili le faaʻoleʻole o le loto i mea uma, ma ua matuā leaga lava.” (Ieremia 17:9) E ui i fesoasoani uma lava ua aumaia e Ieova, ae i nisi taimi o le a tatou gaoioi ai i ni ala lē alofa. Atonu o le a tatou soona tautala atu ma le lē talafeagai i se uso Kerisiano, pe atonu tatou te fulufululele ma tetee atu i nisi taimi i se mea o fai mai. I lea, e lelei ai ona tatou faaleo atu le tatalo a Tavita: “Le Atua e, ia e suesue mai ia te au, ma ia e silafia loʻu loto; tofotofo mai ia ia te au, ma ia e silafia oʻu manatunatu; ma ia e silafia po o ia te au se ala e tiga ai; ma e taʻitaʻiina mai aʻu i le ala o le faavavau.”—Salamo 139:23, 24.

E pei ona fai mai le Tusi Paia, “e le uma le alofa.” (1 Korinito 13:8) Afai tatou te faatinoina le alofa o le tasi i le isi, o le a lē taitai lava ona maua i tatou o iai i se manaomia i taimi o tofotofoga. O le alofa o loo iai i tagata o le Atua ua sili ona saosaolaumea i le parataiso faaleagaga o loo iai i aso nei. E na o i latou o ē e iai le alofa naunau mai le loto mo le tasi i le isi, o le a maua le fiafia i le ola ai i le lalolagi fou. I lea, ia faataʻitaʻi ia Ieova i le faaalia o lena alofa ma i lea ua faamalosia ai le fusi o le autasi. Ia atiina aʻe le alofa, ma maua ai le ki i le Faa-Kerisiano moni.