“Aua le Faaitaina a Outou Fanau”

“O OUTOU tamā foi, aua le faaitaina a outou fanau.” Na faapena ona fai mai ai le aposetolo o Paulo. (Efeso 6:4, NW) I atunuu i Sisifo, o i inā o loo tofo ai mātua i omiga ma faigata o le olaga o le sosaiete faapisinisi, ua lē faigofie ai pea ia i latou ona feutagaʻi ma le agalelei ma a latou fanau. Ma o le tausia aʻe o se tamaitiiti i atunuu tau atiaʻe, ua avea foi o se luʻi. E moni, o le faagasologa o le olaga i inā e fai sina telegese atu na i lo Sisifo. Ae o tu ma aganuu faaanamua ua mauaa atonu ua taaʻina ai mātua e feutagaʻi ma a latou fanau i auala e mautinoa lava le faavaivaia ma faaita ai i latou.

I nisi atunuu tau atiaʻe e tuu ai tamaiti i se tulaga aupito sili ona maulalo, e lē amanaia ma lē faaaloalogia. I nisi aganuu, ua fai atu ai faatonuga i tamaiti i ni leo tau faamataʻu ma le pule sauā, e soona feʻei i ai ma lafo i ai ni upu malolosi e faatiga ai. Atonu e seāseā ona faalogo i se tagata matua o fai atu se upu agalelei i se tamaitiiti, ae lē taulia ai le lē faalogoina o ni upu faaaloalo e pei o le “faamolemole” ma le “faafetai.” E iai i tamā le lagona faapea e tatau ona faavae la latou pule i lima maaa; o upu mamafa e faamalolosi e tā malolosi.

O nisi aganuu faa-Aferika, ua oo lava ina manatu o se lē faaaloalo mo se tamaitiiti le nofo lava o ia ma muai faafeiloai atu se tagata matua. O se mea masani le vaaia o talavou, ua matuā faaloʻuloʻu ma ni avega mamafa i o latou ulu, a o tutū faatali ma le onosai mo se faatagaga e feiloai atu ai i ni tagata matutua. O le a alu ai lava le talanoaga faasamasamanoa a tagata matutua latou, e aunoa ma se amanaia ane o tamaiti talavou ia o loo faatalitali, seiloga lava ua latou malilie e tuu atu se faatagaga e faafeiloai mai ai nai tamaiti. E faatoʻā faataga foi nai tamaiti e ō ese atu pe a uma ona fai na faafeiloaiga.

O le mativa, o le tasi lea vala e mafai ona afaina ai le tausiga lelei o tamaiti. Ona o tupe o loo faaalu i lo latou soifua maloloina ma a latou aʻoaʻoga, ua faaaogā ma le lē tonu ai talavou i se auala mo le lelei totino o isi i le avea o ni tamaiti faigaluega mamafa. E oo lava i aiga, ua tuu atu ai ma le lē magafagafa i tamaiti avega mamafa. Ma pe a aauina atu foi e aiga o loo i nuu i tua a latou fanau i o latou aiga o loo i aai tetele e nofoaʻoʻoga ai, e faapena foi ona faia pea i latou e pei o ni pologa. E mautinoa lava, o nei faiga lē talafeagai uma ua faaita ai tamaiti!

Le Uiga o le ‘Faaitaina o i Latou’

O nisi mātua ua taaʻina i le tai fanaʻe o aganuu taatele i le tausia o tamaiti, ua itiiti ai lava sina manatu i iʻuga e oo i ai. Ae peitai, i se mafuaaga lelei ua uunaia ai e le Afioga a le Atua mātua ina ia aua le faaitaina a latou fanau. O le uluai faaupuga faa-Eleni ua tuuina atu i le “aua le faaitaina” o le uiga moni “aua e te faatupuina le toʻatamaʻi.” (Kingdom Interlinear) I le Roma 10:19, ua tuuina atu ai i le veape lava lea e tasi le “e faaoso ai le lotoa.”

O lea, ua fai mai ai le Today’s English Version: “Aua tou te tausia a outou fanau i se auala e faaita ai ia i latou.” Ua faapena foi ona fai mai le The Jerusalem Bible: “Aua lava neʻi faaosoina le ita o lau fanau.” O lea la, e lē o tautala le Tusi Paia i ni nai faaita laiti atonu na faapogaia ma le leʻi fuafuaina e se matua i lana tamaitiiti ona o le lē lelei atoatoa, e lē o faaleaogāina foi e le Tusi Paia aʻoaʻiga ua faatatauina ma le tonu. E tusa ai ma le tusi Lange’s Commentary on the Holy Scriptures, o loo tautala lenei fuaiupu o le Tusi Paia e uiga i faiga “soona nātivale, soonafai, faiga lē alofa i tamaiti, i lena mea . . . ua latou fulitua mai ai ma oo ina faaosoosoina e faasagatau mai, e matuā tetee mai ma le ita.”

E pei ona matauina ai e le tagata poto o J. S. Farrant e faapea: “O le mea moni o tamaiti, o ni tagata. E lē faapea o le a na ona latou tali mai i se auala lē gaoiā e pei ona ola aʻe ai laau totō i lo latou siosiomaga. Latou te tali mai i le faaalia o uiga.” Ma e masani o le tali mai i faiga lē tonu e iʻu i le matuā faaleagaina ai o faalogona ootia ma le faaleagaga. Fai mai le Failauga 7:7: “O le saua e faavalea ai lava le tagata poto.”

Tausia Fanau i Aʻoaʻiga a le Atua

O mātua o ē faanaunau ia faaauau ona savavali a latou fanau i le upu moni, e lē tatau ona faataga faiga o tū ma aganuu masani e fai ma faavae autū o le auala latou te tausia aʻe ai a latou fanau. (Faatusatusa 3 Ioane 4.) Ina ua uma ona lapataia mātua e uiga i le faaitaina o a latou fanau, na faaopoopo mai Paulo: “Ia tausia pea i latou i aʻoaʻiga ma tapulaa faalemafaufau a Ieova.” (Efeso 6:4, NW) O tapulaa a Ieova e sili mamao atu i aganuu masani ma manatu o tagata.

Talu ai atonu o se faiga taatele i nisi atunuu ona manatu faatauvaa i tamaiti ma tausia e pei o ni pologa faigaluega, ua faalauiloa mai ai e le Tusi Paia i le Salamo 127:3: “Faauta, o le fanau, o le tofi lea mai ia Ieova; o e ua fanau mai, o le taui lea mai ia te ia.” Pe mafai e se matua ona tausisia ni faiā lelei ma le Atua pe afai e leaga ona ia tausia lona tofi? E leai lava. E leai foi se avanoa mo se manatu faapea ua ala ona iai fanau ona e tau ina ia faia mea e mananao i ai o latou mātua. I le 2 Korinito 12:14 ua faamanatu mai ai e le Tusi Paia ia i tatou: “Auā e le tatau ona faaputu oa e le fanau mo mātua, a o mātua mo le fanau.”

E lē o le uiga faapea o le a ao i fanau ona fai ni faamolemolega e aloese ai mai le faia o ni a latou sao i feau ma tiute i le aiga. Ae pe lē ao ea ona manatunatu mo mea e sili ona lelei mo le tamaitiiti lava ia? O se faataʻitaʻiga, ina ua fesiligia Yaa, o se teine Kerisiano i Aferika po o le ā se mea sili e manao e faia e ona mātua mo ia, sa ia tali mai: “Ou te moomoo ina ia faaitiitia aʻu galuega i le aiga i aso ua faia ai aʻu fuafuaga mo le auaunaga i le fanua.” O lea la, afai ua faigata i se tamaitiiti ona vave alu i le aʻoga, po o le lē auai i sauniga ona o avega mamafa o feau i le aiga, pe ua lē sili ea ona lelei le faia o ni fetuutuunaiga?

E moni, e faaono faigata ona feutagaʻi ma le au talavou. E mafai faapefea e mātua ona feutagaʻi ma i latou i se auala talafeagai pe lē faaitaina ai i latou? Fai mai le Faataoto 19:11: “O le [faautauta] o le tagata e faagesegese ai lona ita.” Ioe, muamua lava ia e taumafai ina ia e malamalama i lau tama e pei o se isi foi tagata. O tamaiti taitoatasi e tutasi, e iai ona lava faanaunauga, mea e tomai ai, ma manaoga. O ā nei mea? Pe ua e faaalu se taimi ia e iloa lelei ai lau tama ma iloa ai foi le tali i lenei fesili? O le galulue ma tapuai faatasi, auai i faafouina o le tino a le aiga—ua saunia ai e nei mea avanoa mo mātua e atili mafuta vavalalata atu ai i a latou fanau.

I le matauina e Paulo o mea na ia taʻua ai faapea i le 2 Timoteo 2:22 ina ua ia taʻu atu ia Timoteo: “Ia e sola ese i tuʻinanau o taulelea (talavou).” Ioe, sa malamalama Paulo o le talavou e ono mafai ona avea o se taimi o fesouaʻiina. O le taimi e tutupu ai suiga mataʻina i le tino ma faalogona ootia. E lagona ai foi le fetosinaaʻi faaleituaiga. O le taimi foi lea, e manaomia ai e talavou se taʻitaʻiga taʻumatuaina ma le alofa ina ia alofia ai mailei e paʻūū ai. Ae latou te lē mananao e faia i latou e pei o ni tagata amioleaga. Na auē le afafine ita o se tasi tamaloa Kerisiano: “Afai ou te leʻi faia le faitaaga ae ua tuuaʻia aʻu e loʻu tamā i le faia, na sili ai la pe ana ou alu e fai.” Na i lo le tuuaʻia i gaoioiga leaga, ia faaalia le mautinoa i lau tama. (Faatusatusa 2 Tesalonia 3:4.) Na i lo le faitio, ia matuā iloa lelei lau tama ma ia faautauta i se auala alofa ma le maumauai.

Ae peitai, e tele faafitauli e mafai ona alofia pe afai e muai talanoaina e mātua lamatiaga e fesagaʻi ma se tamaitiiti. Manatua, ua i mātua le tiute tauave mai le Atua ina ia toleni ma aʻoaʻo a latou fanau i le Afioga a le Atua. (Teuteronome 6:6, 7) Atonu e manaomia e lena mea se taimi e lava ma se taumafaiga. Ae faanoanoa, ona ua lē taulau i nisi mātua ona tauaveina lo latou tofiga tau aʻoaʻo atu ona o le lē lava o le onosai. O le lē iloa tusitusi ma faitau, o se faafitauli telē lava lena i le tele o atunuu tau atiaʻe, ua faavaivaia ai isi mātua.

I nisi tulaga e mafai ai ona talosaga atu i se Kerisiano taʻumatuaina ina ia fesoasoani atu. Atonu i le na o le ofoina atu o faufautuaga i se matua e lē lava se tomai. (Faataoto 27:17) Pe atonu e aofia ai le fesoasoani i le faia o le suesuega a le aiga lava ia. Ae o le a lē faamalolo ai e lenei faiga le matua mai le faia o lona tiute tauave e aʻoaʻo lana fanau i le Afioga a le Atua. (1 Timoteo 5:8) E mafai ona ia faia se taumafaiga e galulue faatasi ma lana fanau i le faiva i le fanua ma talatalanoa i mea faaleagaga i taumafataga po o isi avanoa talafeagai.

O se talavou o loo agaʻigaʻi atu i le avea o se tagata matua e tusa ai o le tulaga masani, ua faanaunau ina ia tele atu sona tutoatasi. E masani ona faaliliu sese lenei mea faapea ua lē gauai po ua lē faaaloalo. Pagā se faaita ai pe a faia o ia e ona mātua e pei o se tamaitiiti laitiiti ma mumusu e tuu atu ia te ia se saolotoga tele e faia ai ana gaoioiga! E tutusa lelei lena ma le faaita la te faia pe a la filifilia uma vala o lona olaga—o aʻoaʻoga, galuega, faaipoipoga—e aunoa ma so la talanoa atu o ia mea ia te ia i se uiga toʻafilemu ma le faaaloalo. (Faataoto 15:22) Na uunai e le aposetolo o Paulo uso Kerisiano ina ia “tagata matutua i le mafaufau.” (1 Korinito 14:20) Pe lē ao ea i mātua ona moomoo ina ia matutua a latou lava fanau—i faalogona ootia ma le faaleagaga? Ae, o le “malosi o lagona” o se talavou, e pau lava le auala e toleni ai “o le faaaogā.” (Eperu 5:14) Ina ia faaaogā ia mea, e tatau ona tuuina atu ia te ia se vaega o le saolotoga e fai ai ana filifiliga.

O le tausia o fanau i nei taimi faigata e lē faigofie. Ae o mātua e mulimuli i le Afioga a le Atua latou te lē faaita pe faaonoono i a latou fanau “ina neʻi faapalapala i latou.” (Kolose 3:21) Na i lo lea, latou te taumafai ina ia tausia a latou fanau ma le mafana, malamalama, ma le mamalu. E taʻitaʻi a latou fanau ae lē tuleia faamalosi; e fafaga i ai, ae lē tuulafoaiina; e uunaia ina ia alolofa, ae lē faaitaina pe faalotovaivaia.

[Ata i le itulau 21]

O le taaalo i le taaloga o le “oware,” o se taaloga masani e faia i totonu o fale i Ghana, ua avatu ai i nei mātua le avanoa e auaufaatasi ai ma a latou fanau