Pe e Tatau Moni le Lotu?
PE TĀUA le lotu ia te oe? Po o oe, atonu o se sui o se vaega faalotu po o se lotu? Afai o lea, o loo e iloa foi la le tele o mea masani na o loo iai i le tele o isi tagata pe afai na e ola ai i tuā i inā i le 1844, le tausaga lena na tusia ai e le fai filosofia Siamani o Karl Marx e faapea: “O le lotu . . . o le mapusaga o tagata.” I na aso, toetoe lava o tagata uma sa ō atu i le falesa ma sa iai se aafiaga malosi a le lotu i so o se tulaga o le sosaiete faaletagata. I aso nei, ua matuā telē le suiga o lena mea, ma ua itiiti lava se vaega po o le leai foi ua faia e le lotu i olaga o le faitau selau miliona o tagata. Afai e te alu i le lotu, e tusa lena o loo e auai i se vaega toaitiiti i lou nuu.
O le ā ua faapogaia le suiga? O se tasi lenei o mea, na faatupuina e Karl Marx se filosofia na tetee i lotu lena na oo ina taaʻina ai le toatele. Atonu, sa manatu Marx e uiga i le lotu faapea o se toʻatugā i le agaʻigaʻi i luma o le fanau a tagata. Sa ia taʻua faapea e sili atu ona lelei mea faitino mo le faafetaiaʻia o manaoga o le fanau a tagata, o se filosofia ua leai ai se avanoa mo le Atua po o le tu masani o le ō i lotu. O lenei mea na taʻitaʻiina ai o ia e faapea mai: “O le uluai manaoga mo le fiafiaga o tagata, o le soloia lea o le lotu.”
O le filosofia a Marx e uiga i le manao i mea faitino, na faatupuina atili e le pule tautalatasi Siamani o Friedrich Engels ma le taʻitaʻi komunisi Rusia o Vladimir Lenin. Sa oo ina lauiloa lenei filosofia o le Marxism-Leninism. Seia oo i se taimi talu ai nei, e sili atu i le tasi vaetolu o le fanau a tagata sa ola i lalo o pulega faapolotiki, i latou na sa mulimuli atu i se tulaga sili po o se tulaga itiiti i lenei filosofia e lē talitonu i le Atua. E toatele tane ma fafine o loo faia pea faapea.
Le Tuputupu aʻe o Aʻoaʻoga Faalelalolagi
Ae o le salalau atu o le filosofia faakomunisi, sa lē na o lena le mea na faavaivaia ai le taofiofiga a le lotu i le fanau a tagata. O le tuputupu aʻe o le poto faasaienisi, sa faia foi sana vaega. Mo se faaaʻoaʻoga, o le faalauiloaina o le aʻoaʻoga o le evolusione sa taʻitaʻiina atu ai le toatele e masalomia le iai o Lē na Foafoaina Mea. Ma sa iai foi isi vala.
Ua taʻua e le Encyclopædia Britannica “le mauaina o faamalamalamaga faasaienisi mo mea uigaese na sa uluai manatu i ai faapea na faapogaia e ni malosi uigaese” ma “le soloia o le taaʻiga a lotu tuufaatasi mai so o se vala o gaoioiga e pei o gaoioiga tau vailaau, aʻoaʻoga ma gaoioiga taulima.” O atinaʻe e pei o nei mea ua taʻitaʻiina atu ai i le tuputupu aʻe o le “aʻoaʻoga faalelalolagi.” O le ā le aʻoaʻoga faalelalolagi? Ua faamatalaina “o se vaaiga i le olaga . . . ua faavae i se manatu faapea o le lotu ma talanoaga faalotu e ao ona aua le amanaia pe fuafua foi ia aua neʻi faaaofiaina. O le aʻoaʻoga faalelalolagi ua matuā taaʻina malosi ai atunuu Komunisi ma lē ni Komunisi.
Ae ua lē na o le aʻoaʻoga faalelalolagi ma faiga faa-Marxism-Leninism na faavaivaia taaʻiga a le lotu. O lotu a Kerisinetoma e tatau foi ona tuuaʻia. Aiseā? Auā mo le tele o senituri sa latou faaaogāseseina ai la latou pule. Ma sa latou aʻoaʻo foi aʻoaʻoga sa faavae i uputuu e lē faale-Tusi Paia, ma filosofia faaletagata na i lo o le aʻoaʻo o le Tusi Paia. I lea, sa matuā faavaivaia ai faaleagaga le toatele i a latou lafu e tetee atu i le faaleagaina ai i le aʻoaʻoga faalelalolagi.
E lē gata i lea, i le vaega tele, o lotu foi latou sa iʻu lava ina lolo atu i aʻoaʻoga faalelalolagi. I lona 19 o senituri, na ō mai ai aʻoaʻo o lotu Kerisinetoma ma se ituaiga o faitioga sa maualuga aʻe faapea na faaumatia ai mo le toatele, le faatuatuaina o le Tusi Paia i le avea o le Afioga faagaeeina a le Atua. O lotu, e aofia ai le Lotu Katoliko Roma, na latou talia le aʻoaʻoga o le evolusione. Ioe, sa tumau pea ona latou fai mai e talitonu i le foafoaga. Ae na latou talia faapea, o se mea tatau mo le tino o le tagata ona teʻi lava ua tupu mai, ae na o le solu na foafoaina e le Atua. I le vaitaimi o le 1960, na aumaia ai e le faa-Porotesano se aʻoaʻoga na faalauiloa mai ai le “maliu o le Atua.” E toatele taʻitaʻi lotu Porotesano sa latou talia ituaiga o olaga manao tele i mea faitino. Sa latou lagolagoina foi feusuaiga a o leʻi faaipoipo e oo lava i le tauatane. O nisi aʻoaʻo Katoliko sa latou atiina aʻe ni aʻoaʻoga o le saolotoga, i le paluina faatasi o faiga faa-Katoliko ma suiga atoatoa faa-Marxis.
Le Faiaʻina o le Aʻoaʻoga Faalelalolagi
I lea, sa oo ina pule maumauai ai le faalelalolagi, ae maise lava i le vaitaimi o le 1960, ma faasolo mai ai seia oo i le pe ā ma le ogatotonu o le 1970. Ona toe sui foi lea o mea. Sa foliga mai e pei ua toe olaola le lotu ae leai, e lē o lotu ua leva ona iai. I le lalolagi aoao, na molimauina ai i le faaiʻuga o le 1970 ma le 1980 se faatelega vave o vaega o lotu fou.
Aiseā ua toe faatuputeleina ai le lotu? Na taʻua e se tagata Falani na te suesueina tulaga e uiga i tu ma amioga o Gilles Kepel [male] faapea, “ona ua aʻoaʻoina tagata lautele e uiga i faiga faalelalolagi . . . ua faamautinoa mai ai faapea, o tu faalelalolagi ua taʻitaʻiina atu ai i latou i le leai o se taunuuga, ma faapea e ala i le faamautinoaina o lo latou saolotoga mai le Atua, ua seleseleina ai e tagata mea na latou lūlūina ona o lo latou mimita ma le vālea, mea ua taʻua, le faia o amioga leaga, o le tatalaina o faaipoipoga, le AIDS, le faaaogāseseina o vailaau oona, [ma le] pule o le tagata lava ia i lona ola.”
O le faiaʻina o aʻoaʻoga faalelalolagi ua vave ai ona toe aumaia se malosi fou ona e foliga mai e talu ai nei, ua masofa i lalo le filosofia faa-Marxism-Leninism. Mo le toatele o tagata, o lenei filosofia e lē talitonu i le Atua, ua oo ina avea o se lotu moni ia i latou. Seʻi manatu la, i le matuā feita o i latou o ē o loo tuu atu i ai lo latou faamoemoe! Na taʻua e se nusipepa le Washington Post mai Moscow se tasi tagata sa iai muamua i le Vaega Komunisi o Aʻoga Maualuga o lē na faapea: “O se atunuu, e ola e lē na o i lona tamaoaiga ma tulafono, ae faapea foi ma ona tala o le vavau ma uluai tamā na faavae ai. O se mea e matuā faatamaʻia ai mo so o se sosaiete le iloa ane faapea o a latou tala o le vavau aupito sili e faavae e lē i le upu moni, ae e faavae i manatu o so o se tagata ma faiga maelega valea. Ae o le mea lena ua tatou oo nei i ai ona o aʻoaʻoga a Lenin ma fouvalega o faiga malo.”
Pe a tautala e uiga i le lalolagi o pulega faakomunisi ma le lalolagi o mauoa, na ioeina ai e le tagata suesue ma o se fai filosofia Falani o Edgar Morin faapea: “E lē gata ua tatou vaaia le masofa i lalo o le lumanai pupula o loo tuuina mai i le tagata galue, ae faapea foi ma le masofa i lalo o le tulaga otometi ma le agaʻigaʻi i luma faalenatura o le sosaiete faaletino, o i inā sa manatu i ai o le a otometi ona agaʻigaʻi ai i luma le faasaienisi, faalemafaufau, ma le faatemokalasi. . . . E leai se agaʻigaʻi i luma o faamautinoa mai nei. O le lumanai lea sa tatou faamoemoe i ai ua masofa i lalo.” Ua faapena le faalogona gaogao o le toatele o ē o tuu atu lo latou faatuatua i taumafaiga a le tagata e foafoaina se lalolagi sili ona lelei e aunoa ma le Atua.
Toe Faafou le Naunau i le Lotu
O lenei lagona mautinoa i le lalolagi aoao ua faapogaia ai nisi tagata loto faamaoni e iloa le manaomia o se itu faaleagaga i o latou olaga. Ua latou iloa le manaomia o se lotu. Ae ua lē o faamalieina i latou i le tele o lotu autū, ma o loo iai foi masalosaloga o nisi e uiga i lotu fou—e aofia ai lotu mavae e faia faamalologa, vaega faalotu e iai se mana malosi faataulaitu, vaega faalotu e fai faalilolilo a latou aʻoaʻoga, ma e oo lava i vaega o tagata tapuai ia Satani. O le maelega valea faalotu, ua oso aʻe foi i luga ona ia foliga matagā. O lea, ioe, ua toe olaola mai le lotu i ituaiga eseese. Ae po o le toe foi atu i le lotu o se mea lelei mo tagata? O le mea moni, pe o talia moni e so o se lotu manaoga faaleagaga o le fanau a tagata?
[Ata i le itulau 3]
“O le lotu o le mea e moomia e le tagata ola ua mafatia, o le lagona lea a se lalolagi ua leai se alofa, ma o le solu i se tulaga ua leai se ola. Ua avea o le mapusaga o tagata”
[Ē Ana le Ata]
Photo: New York Times, Berlin—33225115
[Ata i le itulau 4]
Sa iloa e Karl Marx ma Vladimir Lenin le lotu o se toʻatugā i le agaʻigaʻi i luma o le fanau a tagata
[Ē Ana le Ata]
Musée d’Histoire Contemporaine—BDIC (Universitiés de Paris)
O talitonuga ma mafaufauga faa-Marxist-Leninist na siitia ai ni faamoemoega maualuluga i loto o le faitau miliona o tagata
[Ē Ana le Ata]
Musée d’Histoire Contemporaine—BDIC (Universitiés de Paris)
[Ē Ana le Ata i le itulau 2]
Cover photo: Garo Nalbandian