Isi Misionare mo le Seleselega Faalekelope

O SETEMA o se masina lea o le seleselega mo faifaatoaga, ae o se seleselega e sili atu ona tāua na tosina ane i ai se aofia tele i le Maota Fono o Molimau a Ieova i le Aai o Jersey, e faafesagaʻi ma le Vaitafe o Hudson mai le Aai o Niu Ioka, ia Setema 8, 1991. Na faauuina ai le vasega lona 91 o le Aʻoga Faale-Tusi Paia o Kiliata a le Olomatamata. Sa auai i inā sui e 4,263 o le aiga Peteli ma ni malo valaaulia, faatasi ma le isi 1,151 na faafesootai atu i uaea o le telefoni i ofisa ulu i Purukulini, ma faatoaga i Wallkill ma Patterson.

Na amataina e le peresitene o le Aʻoga o Kiliata, o Frederick W. Franz, ua toeitiiti 98 tausaga o lona soifua, le polokalama i se tatalo uigā ma le faaaloalo loloto. Sa avea Albert D. Schroeder, o se sui o le Vaega Pule ma o lē sa fai muamua ma lesitala ma faiaʻoga o le aʻoga, o se taʻitaʻifono o le polokalama o le faauuga. Na ia faamanatu atu i le aofia le Salamo 2:1, 2 atoa ma isi valoaga o loo muai valoia ai lenei taimi o le luluina ma le faanunununu o atunuu. Ua iʻu lenei tulaga o le fenuminumiai i le tatalaina ai o le tele o laufanua fou mo le galuega o le seleselega.

O le lauga muamua o le aso sa tauaaoina e George M. Couch, o se sui o le Komiti i Peteli. O lana matua “Ia Faitau Ou Faamanuiaga.” Sa ia faamanatu atu i tagata aʻoga i Kiliata faapea ua lē o vave tele ona amataina lenei faiga. Na ia taʻua faapea e mautinoa le faamanuiaina o tagata aʻoga lava latou peitai, o nei faamanuiaga faatoʻā oo mai pe a mavae le tele o galuega mamafa. Sa faapena foi ona tauivi Iakopo ua 97 tausaga o lona soifua ma se agelu i le po atoa—mo le mauaina o se faamanuiaga. (Kenese 32:24-32) Na timaʻia e le Uso o Couch tagata aʻoga ina ia aua le nofoaʻi i mafaufauga sese ae ia avea o se faamanuiaga i isi e ala i le atiina aʻe o le filemu o le mafaufau ona o le tatalo ma le maumauai.

Sa sosoo ai ona saunoa John E. Barr o le Vaega Pule i le matua “Ia ia te Outou le Alofa.” Sa loto malilie soʻo o Iesu e maliliu mo le tasi ma le isi. Na ia fesili atu i tagata aʻoga: “Pe o tou lagona ea le tuputupu aʻe o lenei ituaiga o alofa i o outou loto?” Na ia faapea atu: ‘A aunoa ma lenei alofa, ua ʻasa i tatou. O lona faigofie lena.’ (1 Korinito 13:3) Sa lisiina mai e le Uso o Barr nisi o auala aogā e faaalia ai le alofa. Na ia faalaeiauina tagata aʻoga ina ia tausia pea ma le faaaloalo isi uso misionare, ia saili i taimi uma se auala faautauta e faaleoina atu ai mea. Na ia fautuaina i latou ina ‘ia faagalo nai masei laiti,’ i le siiina mai o le 1 Peteru 4:8. Sa ia matauina faapea e oo lava i aso kuka o misionare, o ni taimi ia e mafai ai ona faaalia le alofa e ala i le manatu i lea galuega e sili atu na i lo o se tiute e tau ina fai. Na ia faamanatu atu i tagata aʻoga faapea: “Ia lē taitai ona tatou aitalafu i o tatou uso ma tuafāfine i le alofa.”—Roma 13:8.

“E Faapeī le Telē o Lou Mautinoa?” o le matua matagofie lena sa fafau aʻe e David A. Olson o le Komiti a le Matagaluega o le Auaunaga. Na ia faamatilatilaina vaega e lua o le mautinoa: ia Ieova ma lana faalapotopotoga, ia ua tatou maua ai mafuaaga e lē mafaitaulia (Faataoto 14:6; Ieremia 17:8); ma i le tagata lava ia. Ua iai i misionare se mafuaaga mo sina vaega o le mautinoa o ia lava, e pei o o latou talaaga o ni faifeau ma i le faatuatuaga ua tuuina atu e Ieova ma lana faalapotopotoga ia i latou. Sa faaalia e le aposetolo o Paulo lea lava mautinoa mo ni mafuaaga tutusa. (1 Korinito 16:13; Filipi 4:13) E ui i lea, na lapatai mai le Uso o Olson, faasaga i le ova mautinoa o loo faatuputupulaia e le lalolagi, e pei ona faamatalaina e se tusitala lauiloa o lē na lipotia mai faapea: “E masani lava ona ou viviiina aʻu. E faaopoopo atu ai le matalasi i laʻu talanoaga.” Peitai, o le mautinoa e paleni ma le loto maulalo e mafai ona faagaeeina ai le mautinoa i isi. Sa matuā moni lenei mea i le tulaga sa oo ia Paulo.—Filipi 1:12-14.

Na sosoo ai ona apoapoai atu Lyman A. Swingle o le Vaega Pule i tagata aʻoga e faapea: “Agaʻi i Laufanua e Tatau ona Seleseleina, Outou ua Faauuina o Kiliata!” Sa ia faapea atu, o le aso lenei o le seleselega mo le Aʻoga o Kiliata ma mo le auuso i le lalolagi aoao, aua o le a agaʻi atu ē ua faauuina e aufaatasi ma le faitau afe o ē sa faauuina muamua o loo iai pea i le galuega faamisionare—o nisi e mai le vasega muamua, lua ma le tolu o tausaga e amata mai i le 1940! Na taʻua e le Uso o Swingle faapea i tuā i inā, e leai se tasi na ia silafia o le a faaauau pea le galuega faamisionare mo le isi 50 tausaga, pe faapea foi o le a toilalo le faiga faa-Nasi, le Fascism, ma isi faasasaaga faalemalo i le galuega talaʻi. “Afai sa tatou maofa i mea na faia e Ieova i le taimi ua tuanai,” fai mai lana fesili, “ae faapefea le lumanai?” Na faaiʻuina lana lauga i le valaau faagaee loto e faapea: “Agaʻi i le fanua!”

Ona toe tomatauina lea e faiaʻoga ulu e toalua mo le Aʻoga o Kiliata le vasega lona 91 mo le taimi mulimuli. Na saunoa Jack D. Redford i le matua “Ia Mauaina le Atamai.” Na ia faapea atu i tagata aʻoga, o le Aʻoga o Kiliata, e aʻoaʻoina ai le poto ma le malamalamaga, peitai e tatau ona latou mauaina le atamai, le tomai ina ia faaaogā ai lo latou poto i le auala saʻo. Sa ia uunaia tagata aʻoga ina ia teena le tala fatu faapea sa latou aʻoaʻoina mea uma i Kiliata. “O le mea faitaulia, o mea tou te aʻoaʻoina pe a uma le aʻoga.” E aofia i mea e tatau ona latou aʻoaʻoina i se taimi: ia feutagai ma le filemu ma tagata, ia mafai ona faapea atu “ua ou sese,” i se paaga, i isi uso misionare, ma i uso ma tuafāfine o le faapotopotoga; e tatau ona faaeteete i le talitonu i uluai faamatalaga ma vaaiga ma ia iloa faapea o faafitauli uma lava e lavelave, e manaomia ai se malamalamaga loloto o aiaiga a o leʻi avatuina se fautuaga atamai; ma ia faaaloalo i uso o le faapotopotoga mo lo latou tomai ina ia sao mai ai i tulaga faigata.—Faataoto 15:28; 16:23; Iakopo 1:19.

Na saunia e Ulysses V. Glass, o le lesitala o le Aʻoga o Kiliata, le Filipi 3:16 ma matua o lana lauga. Sa ia faamālō atu i le vasega mo le agaʻigaʻi i luma sa latou faia ma apoapoaia i latou ina ia faaauau pea ona ōgatasi ma lena mau. Na ia matauina faapea, a o tatau ona faaauau pea ona maua e tagata aʻoga le poto saʻo, o le a lē taitai ona latou iloaina mea uma. Sa ia faatusaina lea manatu i se uati. Atonu e iloa e lē ana le uati le auala e faagaoioi ai e aunoa ma sina iloa pe faapefea moni ona faagaoioi. I se tulaga tutusa, e lē tatau i misionare ona vaai maulalo ia i latou o ē, e ui ina lē tutusa le loloto o lo latou poto ma lo latou [misionare] poto, ae e iloa le mea e tāua—le auala e mataʻu ai ia Ieova. (Faataoto 1:7) Na ia faamanatu atu i le vasega le tāua o le tausia ia ‘faigofie le vaai.’ (Mataio 6:22) E mafai ona paʻia le mata faaleagaga e pei lava foi o le mata faaletino. Mo se faataʻitaʻiga, o nisi e pumoomoo le vaai—ua taulaʻi tele i nai mea ninii ae ua lē iloa ai le ata atoa—ae o isi, ua na ona vaai i mataupu e fesootai i ai ma ua matuā aloese lava mai mataupu autū e manaomia ona latou taulimaina.

O le lauga faaiʻu o le taeao sa faaulutalaina o le “Mataulia ma Galulue Faatasi ma le Faalapotopotoga a Ieova,” sa tauaaoina e Theodore Jaracz o le Vaega Pule. Na taʻua e le Uso o Jaracz faapea a o iai le faitau afe o faalapotopotoga ma sosaiete i le lalolagi, e na o le tasi lava le faalapotopotoga o nei faalapotopotoga uma e lē tupuga mai i le lalolagi. E faapefea ona mataulia le faalapotopotoga o loo fai ma sui o Ieova? Ua saunia e le Afioga a le Atua faailoga e mataulia ai. Ua faaalia mai e le Tusi Paia faapea o ana foafoaga faalelagi e matuā maopoopo. (Salamo 103:20, 21; Isaia 40:26) Ua faigofie foi ona mataulia le faalapotopotoga faalelalolagi a Ieova e ala i lona maopoopo atoa ma lona vavaeese mai le lalolagi, ma lona gauai aʻiaʻi i mataupu silisili a le Tusi Paia, o ana tapulaa maualuluga tau amioga mamā, ma le alofa i le lotolotoi o ona sui. Na uunaia e le Uso o Jaracz tagata aʻoga o Kiliata ina ia fesoasoani i le toatele e mafai ai i o latou tofiga e matauliaina faale-Tusi Paia le faalapotopotoga a Ieova. I le fesootaiga ma lena, na ia fofogaina ai se faasilasilaga faafiafia loto: O le a lē toe umi ae faaluaina le telē o le Aʻoga o Kiliata, i le tusa ma le 50 tagata aʻoga i le vasega lona 93! O le a faapea foi ona amata le Faaopoopoga o vasega o le Aʻoga o Kiliata i Siamani e tusa o le taimi lava e tasi. Sa umi o patipati ma leoleoā!

O le tumutumuga o le taeao, na mauaina ai e tagata aʻoga uma e 24 o Kiliata o latou tipiloma. E lē o toe mamao ona latou agaʻi atu loa lea i atunuu eseese e 12 i le lalolagi atoa. Sa saunia e le vasega se faaiʻuga faagaee loto, e faafetai atu ai i le Vaega Pule ma le aiga Peteli. Ina ua maeʻa le ʻaiga o le aoauli, ona faafoeina lea e le Uso o Charles J. Rice o le Komiti o le Watchtower Farms se otootoga o le Suesuega o le Olomatamata. Ona saunia lea e le au faauu se polokalama ola sa faatinoina, e ala i le saunia o nisi o mea na tutupu ia i latou i le auaunaga i le fanua i le taimi o la latou aʻoga mo le lima masina i Wallkill, Niu Ioka. Ina ua maeʻa lena, ona saunia lea e tagata talaʻi o ē na fai ma sui o faapotopotoga e latalata ane se tala ua faaulutalaina Talavou o Ē Manatuaina Lē na Foafoaina i Latou i le Taimi Nei.

Ina ia faaiʻuina le polokalama, na ofoina atu ai e le Uso o George Gangas, o se sui o le Vaega Pule ua 95 tausaga o lona soifuaga, se tatalo uigā ma le faalaeiau ia Ieova. Na tāape le aofia ma le agaga fiafia, e lē taumatea sa uunaia tagata taitoatasi ina ia faia se sao e sili atu i le galuega o le seleselega faalekelope.

[Pusa i le itulau 22]

Faitauga o le Vasega

Aofai o atunuu na auai o latou sui: 6

Aofai o atunuu na tofia i ai: 12

Aofai o tagata aʻoga: 24

Aofai o ulugalii faaipoipo: 12

Tuu faatatauga o tausaga: 33.4

Tuu faatatauga o tausaga i le upu moni: 16.13

Tuu faatatauga o tausaga i le faiva faataimi atoa: 11.3

[Ata i le itulau 23]

Vasega Faauu Lona 91 a le Aʻoga Faale-Tusi Paia o Kiliata a le Olomatamata

I le lisi o loo i lalo, ua faanumeraina laina mai luma agaʻi i tua ma o loo lisiina igoa mai le itu agavale agaʻi i le itu taumatau i laina taitasi.

(1) McDowell, A.; Youngquist, L.; Skokan, B.; Wargnier, N.; Miller, Y.; Muñoz, M. (2) Bales, M.; Perez, D.; Attick, E.; Vainikainen, A.; Mostberg, K. (3) DePriest, D.; DePriest, T.; Perez, R.; Wargnier, J.; Muñoz, J.; Miller, J. (4) McDowell, S.; Bales, D.; Skokan, M.; Attick, C.; Youngquist, W.; Vainikainen, J.; Mostberg, S.