Fesili mai le Au faitau

◼ O le ā e ao ona faia e se aiga Kerisiano pe afai e a’oga se latou tamaitiiti i se a’oga e faamalosia ai faatonuga faalotu?

E lē fiafia mātua Kerisiano e aʻoaʻoina a latou fanau i aʻoaʻoga a lotu sese. Ae atonu e iai ni tulaga e lē mafai ai e tamaiti ona aloese mai i le iai i se vasega o loo aʻoaʻoina ai mataupu faalotu, e ui lava latou te lē auai i faiga o gaoioiga faalotu po o aso faamanatu.

Sa faataatia e le uo a le Atua o Aperaamo se faaaʻoaʻoga lelei e tusa ai ma faatonuga faalotu mo fanau. Sa ia tausia aʻe lana fanau i le nuu o Kanana, o i inā sa siosiomia ai i latou i faiga sese faalotu ma “tupua” inosia. (Faatusatusa Esoto 34:11-15; Levitiko 18:21-30; Teuteronome 7:1-5, 25, 26; 18:9-14.) Ae peitai, sa avea o ia ma puna o faatonuga faalotu mo lona aiga. Sa mautinoa e le Atua faapea o Aperaamo o le a “poloai atu i ana fanau ma lona aiga pe a mavae atu o ia; latou te tausia le ala o Ieova, i lo latou fai amiotonu.”—Kenese 18:19.

I le avea o se talavou, sa maua ai foi e Iesu aogā mai faatonuga faaleaiga ma faalefaapotopotoga i le tapuaiga moni. I lea, sa ‘tupu ai lona poto ma lona tino, ua alofagia ai e le Atua atoa ma tagata.’—Luka 2:52.

I le tele o vaega o le lalolagi, e maua ai e talavou Kerisiano aʻoaʻoga masani i aʻoga a le malo. E lē o mea uma e aʻoaʻoina ai e ōgatasi ma upu moni faale-Tusi Paia ma le mea moni faavae. Mo se faaaʻoaʻoga, e tele lava tupulaga o talavou Kerisiano ua auai i vasega e aʻoaʻo ai le faasaienisi ma suesuega tau le tino o meafaiola e avea o se vaega o a latou mataupu masani. O le toatele o i latou ua faamatuu atu e aʻoaʻoina le talitonuga taatele o le evolusione ma manatu e fesootai atu i ai e uiga i amataga ‘faalenatura’ o le ola i le lalolagi.

Ae peitai, o lenei faamatuu atu, sa leʻi liliuina ai nei Kerisiano talavou e pipii atu i le aʻoaʻoga e lē faaleatua o le evolusione. Aiseā? Auā foi, i le aiga ma i sauniga faa-Kerisiano, sa latou muai maua ai faamatalaga saʻo lelei e faavae i le Afioga faagaeeina a le Atua, lena na fesoasoani ia i latou i le toleniina ‘o o latou mafaufau e iloa ai le lelei ma le leaga.’ (Eperu 5:14) E toatele mātua sa suesue ma a latou fanau faamatalaga paleni lelei e uiga i le evolusione i le tusi faamalosi faatuatua o le Life—How Did It Get Here? By Evolution or by Creation?a I le faaauupegaina ai, sa lē talia e nei tamaiti aʻoga mea na aʻoaʻoina i le potu aʻoga e uiga i le evolusione faapea o se mea e ao ona talitonu i ai. Ae sa mafai ona latou faailoa atu i a latou tali e fai i le potu aʻoga, ma i suega e faapea, sa latou uaʻi atu ma mafai ai ona aʻoaʻoina auiliiliga na tuuina mai. O isi sa oo lava ina iai le avanoa e saunia ai nisi o faamatalaga e tusa ai ma mea moni o loo aumaia i le Tusi Paia e Lē na Foafoaina le tagata.—1 Peteru 3:15.

E lē faapea o le a tuuina mai na aʻoaʻoga i se tulaga e lē uigā, faapea ua na o ni faamatalaga masani. Atonu o le a oo lava ina faatinoina e le faiaʻoga lena lotu ma i lea ua taumafai ai ina ia taaʻina ai mafaufau ma loto o tamaiti aʻoga. O lea la, ua filifili ai Molimau a Ieova ina ia faamatuuese mai a latou fanau mai vasega o loo aʻoaʻo ai mataupu faalotu. O lenei mea o le a mafai ai e a latou fanau ona faaaogā taimi aʻoga i se auala sili ona aogā e faauma ai a latou meaaʻoga mo isi mataupu, pe suesue foi i le potu tusi a le aʻoga.

Ae peitai, i nisi nofoaga, ua teena ai na talosaga; atonu e manaomia e le pule aʻoga po o faipule silisili faapea e ao i tamaiti uma ona auai ma faaiʻuina se mataupu faalotu ina ia mafai ai ona faauu. E tatau i aiga taitasi ona filifili i le mea e ao ona fai e tusa ai ma lena mea.

O nisi o auauna a le Atua i aso ua mavae sa oo i ni tulaga faapena e aunoa ma le iloa, na sa tatau ai ona latou tumau i le aʻoaʻoina atu ia i latou o aʻoaʻoga faalotu po o gaoioiga a o tumau pea lo latou faamaoni i le Atua moni. Sa faapena foi Mose. Sa tausia aʻe o ia o se tama a le afafine o Farao o Aikupito, ma “na aʻoaʻoina [o ia] i le poto uma lava o Aikupito.” (Galuega 7:20-22) O lena mea atonu sa aofia ai e oo atu lava i se tulaga sili o talitonuga ma faiga faalotu na sa taatele i Aikupito. Ae sa malu puipuia Mose e ala i aʻoaʻoga silisili ona maualuga sa foliga mai na ia maua mai i lona aiga ma atonu foi ma isi tagata Eperu.—Esoto 2:6-15; Eperu 11:23-26.

Seʻi manatunatu foi i le faaaʻoaʻoga a isi Eperu talavou e toatolu, o aumea a Tanielu, o ē na tuuina atu i ai se aʻoaʻoga faapitoa i Papelonia ma sa faia o ni ē galulue mo le malo. (Tanielu 1:6, 7) Sa leʻi saoloto i latou e faia pe lē faia foi so o se mea sa latou mananao i ai. I se tasi o mea, na poloaiina ai e le Tupu o Nepukanesa ina ia latou faapotopoto faatasi ma isi alii maualuluga i le tupua auro na ia faatuina i le fanua laugatasi o Turu, o i inā o le a faia ai gaoioiga o le tuutoina atu faaleatunuu. Na faapefea ona tali atu nei Eperu e toatolu? E mafai ona tatou mautinoa faapea sa ono mafai lava ona latou filifili e ō ese mai i inā, ae sa lē mafai lena mea.b Ae sa tumau pea ona latou faamaoni i o latou talitonuga ma, i le Atua e ona le Malosi Uma lava. O o latou loto fuatiaifo faaleatua na faatagaina ai i latou ina ia iai a o tumau pea ma le maumauai ona tetee atu i le faia ai o se sao po o le auai totino, i so o se gaoioiga faalotu sese.—Tanielu 3:1-18.

Pe a uunaia faamalosi tamaiti aʻoga uma ina ia auai i se vasega e aʻoaʻo ai mataupu faalotu ma atonu ina ia aʻoaʻo ia mafai ai ona pasi i suega faatulagaina, atonu e mafai lava ona iai tamaiti mai aiga o Kerisiano moni, e pei ona sa iai le toatolu lena ona o le poloaiga a Nepukanesa. Ae o le a tuu faamuamua e talavou Kerisiano le Atua. O le a leai se manaoga mo i latou e luʻia ai ni faamatalaga taitasi lē saʻo ua faia po o ni faiga lē faale-Tusi Paia o faia ai e isi, e pei lava ona lē taumafai talavou Eperu e toatolu e aiā fua ina ua ifo isi i le tupua auro. Ae peitai, o le a lē auai talavou Kerisiano lava latou i faiga tapuaiga, auai i tatalo, pese faalotu, ma isi mea faapena.

E ao i nei talavou ona faamalosia i latou i isi taimi ina ia ave i fale le poto e atiina aʻe ai ‘mai tusitusiga paia na e mafai ona faapoto ai ia te i latou mo le faaolataga e ala i le faatuatua ia Keriso Iesu.’ (2 Timoteo 3:15) E ala i fesootaiga ma a latou fanau, e ao lava i mātua ona vaavaai lelei pea po o ā mataupu o loo aʻoaʻoina i le vasega. O lenei mea o le a fesoasoani i Kerisiano matutua e iloa ai po o le ā le mea e manaomia ona faasaʻoina pe faamalamalamaina mai le Tusi Paia ina ia lē fenuminumiai pe taʻitaʻiseseina ai a latou fanau.

[Faaopoopoga i lalo]

Ae faapefea la e uiga i piliota a vasega ua faatulaga mo le aʻoaʻoina ai e uiga i le lotu autū a le atunuu pe oo lava foi i lotu lautele?