Tauaofia Faatasi ma Ē Alolofa i le Saolotoga mai le Atua

E MATUĀ tele lava auala ua tuese ai Molimau a Ieova i se tulaga sa leʻi faapea ona iai muamua. Ua na o i latou lava e tautala i le “gagana mamā.” (Sefanaia 3:9, NW) Ona e na o i latou lava e autasi, ua ia i latou ai le faailoga ua faaesea ai i latou, o le alofa lea e pei ona faamatalaina e Iesu Keriso. (Ioane 13:35) Ma ua na o i latou ua olioli i le saolotoga lea na fetalai ai Iesu Keriso faapea o le a aumaia e le upu moni, e pei ona faamauina i le Ioane 8:32: “E iloa foi e outou le mea moni, e tuu saʻoloto foi outou e le upu moni.”

O na upu, na fetalai tuusaʻo atu e Iesu Keriso le Alo o le Atua i ona soʻo, ua faamaonia le moni. Ma ua sili nei ona talisapaia i se tulaga sa leʻi faapea ona iai muamua e na Molimau uma lava a Ieova o ē na auai i Tauaofiaga Itumalo o “Ē Alolofa i le Saolotoga.” O le polokalama o le tauaofiaga na matuā oʻooʻo ai i o latou loto vala eseese o lo latou saolotoga, i le faapefea ona latou tala atu se tala e ō faatasi ma lo latou saolotoga, ma maeu le faamanuiaina o i latou i le avea o se nuu saoloto.

O nei tauaofiaga talafeagai lelei ma aogā, na amata mai i le Itu i Matu ia Iuni 7, 1991, i Los Angeles, Kalefonia, i Amerika. Na tatalaina le tauaofiaga i le 10:20 i le taeao faatasi ai ma le tātāina o musika, ona sosoo ai lea ma se pese ma le tatalo. O le lauga amata, o se taulimaga malosi na faavae i le Iakopo 1:25. E tusa ai ma le faaliliuga a le The Jerusalem Bible, ua faitauina ai faapenei lenei mau: “O le tagata o lē e vaavaai totoʻa i le tulafono lelei atoatoa o le saolotoga, ma faamasani i ai—e lē o sē faalogologo ma faagalogalo i ai, ae ia faatinoina ma le filigā—o le a fiafia o ia i mea uma lava na te faia.” E pei lava ona tatou vaavaai i se faʻata ina ia iloa ai po o fea e manaomia ona faaleleia o o tatou foliga, o lea e manaomia ai ona tatou tausisi i le autiloina e lē aunoa o le tulafono lelei atoatoa a le Atua lena e maua ai le saolotoga, ina ia iloa ai po o gafea tatou te manaomia ai ona fai ni suiga i o tatou uiga totino. Ma e ao ona tatou maumauai i le autiloina o lena faʻata.

Ona sosoo ai lea ma le lauga a le taʻitaʻifono, “Afifio mai, Outou Uma o Ē Alolofa i le Saolotoga.” E alolofa Molimau a Ieova i le saolotoga, ma latou te mananao ia tumau ona nonofo saoloto. Na sii mai e le failauga pule faalemalo o ē na faaalia faapea e lē mafai ona iai se saolotoga pe a leai se tulafono. Ioe, e lē saoloto Kerisiano e faia le mea latou te loto i ai, ae saoloto e faia le finagalo o Ieova. Latou te mananao ina ia faaaogā atoatoa lo latou saolotoga, ae ia lē faaaogāseseina. Ae maise lava talu mai le 1919 na olioli ai Molimau a Ieova i le faateleina o le saolotoga. Sa tuliloa e le failauga le faamamafaina o le saolotoga i matua o le tauaofiaga ma lomiga faa-Kerisiano. O le a aʻoaʻoina e le au usufono uma ni mea e sili atu e uiga i le saolotoga mai le Atua ma le auala e faaaogā ai.

Na sosoo ma na faamatalaga fetaui lelei ni faatalanoaga o ē alolofa i le saolotoga, i latou na olioli i le iai i inā i le tauaofiaga. O na tauaofiaga o ni taimi o le olioli, e pei lava o tausamiga faaletausaga e tolu a Isaraelu anamua sa faailogaina i le olioli tele. Sa faamaonia i nisi o faatalanoaga faapea o tauaofiaga, o taimi olioli ia o le atiina aʻe ai faaleagaga.

Ona sosoo ai lea ma le lauga autū, “Le Fuafuaga ma le Faaaogāina o lo Tatou Saolotoga ua Foaiina mai e le Atua.” E mai i lenei lauga, na aʻoaʻoina ai e le au usufono faapea e na o Ieova lava e iai le saolotoga aʻiaʻi, auā o ia o le Pule Silisiliese ma e ou le malosi uma lava. Ae peitai, ona o lona suafa ma mo le lelei o ana meafaiola, na te faatapulaaina ai i nisi taimi lana saolotoga e ala i le faatelegese o lona toasa, ma faaalia ai le pulea o ia lava. O ana meafaiola popoto uma lava e iai lo latou saolotoga faatatau, ona o i latou e gauai atu ia Ieova ma e faatapulaa lea e ala i le tuuina mai o ana tulafono faaletino ma ana tulafono tau amio. Ua uma ona foaiina atu e Ieova ia te i latou le saolotoga latou te olioli ai, ae maise ina ia mafai ai ona latou āva ma olioli e ala i le tapuai atu ia te ia. Ona o le faaaogā lelei o lo latou saolotoga, ua maua ai e Molimau a Ieova se talaaga lelei i le lalolagi aoao ona o a latou amio lelei ma le maelega i la latou faiva.

Afiafi o le Aso Faraile

“Tele Mea e Fai—I Galuega e Oti ai po o i le Auaunaga ia Ieova?” o le matua faatupu manatu lena o le lauga lea na tatala ai le sauniga i le afiafi o le Aso Faraile. O galuega e oti ai e aofia ai e lē na o galuega o le tino ae faapea foi ma isi galuega e oti ai faaleagaga, e iʻuvale, ma e lē fua mai—e pei o faufauga ina ia maua ai tupe. E tusa ai ma lenei mea, o le faamaoni i le suesueina ma le faaeteete o oe lava e matuā manaomia, ina ia iloa ai po o tatou faamuamua le Malo i o tatou olaga.

I le tutusa lelei lava ma lena autū, o le isi lauga na sosoo ai, “Faataulauina lo Tatou Tofiga o ni Faifeau a le Atua.” Na faaalia e le failauga faapea e ao i Kerisiano ona aua le lotomalie i na o sina vaega o le auaunaga, po o le na ona faafetaiaia o itula faatulagaina. E ao ona latou mananao ina ia uigā i vala uma o la latou faiva faa-Kerisiano. O nei manatu sa tamau i mafaufau o le aofia e ala i faataʻitaʻiga ma faatalanoaga na faia. Sa apoapoaia tagata uma ina ia faataunuuina a latou faiva i le matuā tele latou te mafaia.

Ona sosoo ai lea ma le lauga “Se Nuu Saoloto ae Nofo Sauni e Tali Fuaitau Atu.” Sa faamamafa e le failauga lena manatu, faapea e ui lava e pele i tagata o Ieova le saolotoga ua aumaia e le upu moni ia i latou, ae e ao ona latou manatua faapea o lenei saolotoga e ō faatasi ma le talaina mai o ni tala. E ao ona latou faaaogā lo latou saolotoga, e lē fai ma faamolemolega mo le faia o amioga leaga, ae mo le viiga o Ieova. I le avea o ni Kerisiano, latou te tala atu ai i “faipule silisili” ma e ao foi ona latou felagolagomai ma toeaina o le faapotopotoga. (Roma 13:1) Latou te tala atu foi e tusa ma o latou laei, teuga, ma amioga. E lē tatau lava ona galo ia i latou faapea “e taitasi i tatou ma tala i lana amio i le Atua.”—Roma 14:12; 1 Peteru 2:16.

Ona sosoo mai ai lea ma le talanoaina o le manaomia i Kerisiano uma ona “Aua le Fefe a o Taulata mai le Iʻuga o Lenei Lalolagi.” A o matataʻu le fanau a tagata e uiga i le po o le ā o le a aumaia e le lumanai, e lē manaomia i Kerisiano ona matataʻu i le tauaveina o la latou faiva. O le lē mataʻu o le iʻuga lea o le faatuatua ia Ieova, auā o le tele o le mataʻu o se Kerisiano e faia se mea e lē fiafia ai le Atua, o le itiiti foi lea o lona fefe i tagata. O le manatuaina o mau faamafanafana mai le Tusi Paia e mafai ona faamalosia ai se tagata ina ia aua le fefe. Ina ia malosi faaleagaga ma ia lē fefe, e manaomia ai foi e auauna a le Atua ona faaaogā lelei avanoa uma e auaufaatasi ai ma uso talitonu. E manaomia foi ona manatua e tagata taitoatasi le vaega e faia e le tatalo i le avea o se tagata e lē fefe. E ala i le tumau i le lē fefe, o le a tausisia ai e Kerisiano se faiā lelei ma Ieova le Atua.

Sa faaiʻuina le polokalama o le aso muamua i le tala e maua ai se aʻoaʻoga Tuu Saoloto ina ia Siitia ai le Tapuaiga Moni. Na faaalia ai pe na faapefea i se aiga i ona po nei ona aʻoaʻoina se lesona mai ia Esera ma lana au e 7,000, o ē na faia ni taulaga ina ia toe foi atu ai i Ierusalema. Sa mafai ai i lea ona iloiloina e tagata taitoatasi ana mea e faamuamua ma iloa ai pe mafai faapefea ona faateleina ona faaeaga i le auaunaga. Sa iai se mea tāua i lenei tala mo ē matutua faapena foi ma talavou.

Taeao o le Aso Toonai

Ina ua mavae se polokalama o musika, le pese ma le tatalo, ma le talanoaina o le mau mai le Tusi Paia mo le aso, ona faatomua mai loa lea e le polokalama i le taeao o le Aso Toonai se faasologa o lauga o lona matua “Saolotoga Faatasi ma le Tauaveina o Avega i le Liʻo Faaleaiga.” I le vaega muamua, “Le Auala e Mafai ona Faaaʻoaʻo ai Tamā ia Ieova,” sa fautuaina ai tamā e uiga i auala eseese e mafai ai ona latou faaaʻoaʻo i lo tatou Tamā faalelagi. Ua manaomia ai e le 1 Timoteo 5:8 faapea ia latou saunia e lē gata i mea faaletino, ae faapea foi ma mea faaleagaga. Ia latou faaaʻoaʻo ia Ieova e ala i le avea o ni faiaʻoga lelei i o latou aiga ma e ala i le tuuina atu o le aʻoaʻiga alofa e pei ona manaomia. O nei manatu sa faaatagia i ni nai faatalanoaga.

“Le Matafaioi Lagolagosua a le Avā” o le isi lena vaega na sosoo ai o nei lauga faasolo. Sa amata lava i le faamamafa mai faapea, o loo umia e le avā se tulaga faaaloalogia i le aiga Kerisiano, o le lagolagosua lea i le tane. O le ā e manaomia mai ia te ia e lenei mea? Ina ia gauai atu ma le tatau, aua lava neʻi uunaia lana tane e faia se mea e manao i ai na o ia. E manaomia ona ia tausia lelei ana tiute tauave agaʻi i lana tane ma lana fanau, ma mafai ai ona ia maua le lotomalie moni mai le tausia mamā ma ia maopoopo lona aiga. Ma i le avea o se faifeau Kerisiano, atonu o le a tele ni avanoa na te maua e fai ai se sao i le auaunaga i le fanua. O le faatalanoaina o se aiga na faamatilatila ai le atamai o lena fautuaga faale-Tusi Paia.

Sa uaʻi atu ai foi i tagata talavou i le vaega “Fanau o Ē Faalogo ma Aʻoaʻoina.” E ala i le toleniina o fanau e faalogo ma aʻoaʻoina, ua avatu ai e mātua le āva ia Ieova ma faaalia le alofa mo o latou uso faaleagaga ma a latou lava fanau. O le a maua se noataga malosi i le va o mātua ma fanau pe afai latou te faaaluina se taimi uigā lelei faatasi ma i latou. E tatau i mātua ona faaauupegaina e tali atu i fesili a a latou fanau ma faagaeeina lo latou galala mo le poto. Na toe faaalia ai foi i faatalanoaga le auala e mafai ai ona faia o lenei mea.

Ona sosoo ai lea ma le fautuaga “Tuusaoloto Pea Oe ina ia Auauna ia Ieova.” E faapefea ona fai o lenei mea? E ala i le saoloto mai le tuliloaina o galuega faalelalolagi, masaniga e faamaimau ai le taimi, ma sini manao i mea faitino. Na faataatitia e Iesu ma le aposetolo o Paulo ni faaaʻoaʻoga lelei e ala i le faia o faataulagaina totino. E manaomia i tagata o Ieova ona tausia ia faafaigofie le vaai, ia taulaʻi atu i faanaunauga o le Malo. Pe a oo i le faatauina o mea faaletino, e sili ona atamai le faasao nei ma faatau mai mulimuli na i lo o le faatau mai nei ae totogi mulimuli. E ao i talavou ona leoleo faasaga i le maelega valea e uiga i le faafiafiaina i feusuaiga lē mamā ma galuega faalelalolagi. O le faatalanoaina o se paeonia e leʻi faaipoipo na faaalia ai faamanuiaga e maua pe a tausia e se tasi le saolotoga e auauna ai ia Ieova.

Na faaiʻuina le polokalama o le taeao o le Aso Toonai i le lauga “Ulu atu i le Saolotoga e Auala i le Tuuina atu ma le Papatisoga.” Sa faamanatu atu i sui papatiso faapea a o tofu atu mea na faia i le faapologaina e ala i le fouvalega a Atamu, na tatalaina e Lē Faasaolotoina e malosi, o Iesu Keriso le auala i le saolotoga e ala i lana taulaga. Na faaalia e le failauga po o le ā e aafia i le momotu ese mai ina ia saoloto e faia le finagalo o le Atua ma faamatilatila ai avega tauave ma faamanuiaga o le a avea mo i latou ua papatisoina.

Afiafi o le Aso Toonai

O le polokalama i le afiafi o le Aso Toonai na amata i se fesili e suesueina ai tagata taitoatasi “O le Lelei o Ai o loo E Sailia?” Ua faaalia e le lalolagi le agaga o le Tiapolo o le sailia o le lelei o le tagata lava ia. Ae peitai, e ao i Kerisiano ona faaaʻoaʻo i le agaga faataulagaina totino o Iesu Keriso. Maeu se faaaʻoaʻoga na ia faataatia! Na ia tuua lona mamalu faalelagi ma i lea na faataulagaina ai lona soifua faaletagata mo lo tatou lelei. O luʻi i le po o lelei o ai o loo tatou sailia, o le a faalaualuga pe a iai ni mea e lē malamalama ai i le va o Kerisiano i faiga pisinisi po ni mataupu tau tupe, ia po o ni uiga o le lē femalilieai, ma isi mea faapena. O na mea e tofotofoina ai le alofa faa-Kerisiano. Ae e ala i le sailia o le lelei mo isi, o le a mautinoa lelei ai e se tagata le sili o le manuia o lē na te foai, ma o le a ia maua ai le faamaoniga a Ieova.

Ona sosoo mai ai lea ma le matua tāli faapena foi “Iloaina ma Manumalo i le Vaivaiga Faaleagaga.” Na faamamafaina i lenei lauga le manaomia ona mataulia o faailoga o le vaivai faaleagaga ma i lea ia gaoioi ma le filigā i le taua ina ia manumalo ia Satani ma ana mailei. E tatau i auauna a Ieova ona atiina aʻe le alofa loloto mo Ieova ma inoino i le mea ua leaga. E manaomia ai e lenei mea lo latou iloa lelei o Ieova e ala i suesuega totino uigā lelei e lē aunoa, ma suesuega faale-Tusi Paia i le aiga. E tatau ona latou alofia ituaiga uma o faafiafiaga na e faaviiviia ai faiga sauā ma amioga o feusuaiga lē mamā. (Efeso 5:3-5) O le tatalo e lē aunoa ma le auai i sauniga o ni faavae foi na e taulau ai i le manumalo i vaivaiga faaleagaga.

Atonu o lenei mataupu sa tele lava ina talatalanoa faapitoa i ai tagata na i lo se isi lava lauga na fofogaina mai i le tauaofiaga, o lona matua “Po o le Faaipoipoga ea o le Ki Lea i le Fiafia?” E matuā toatele le au talavou e mafaufau faapena! Ae na faamanino mai e le failauga faapea, e iai le anoanoai o foafoaga agaga o loo matuā fiafia e ui lava e leʻi faaipoipo, e pei lava foi o le toatele o Kerisiano tuuina atu o ē o loo fiafia e ui lava e lē o iai se avega tauave tau i le faaipoipoga. E lē gata i lea, e toatele ulugalii ua faaipoipo e lē o fiafia, e pei ona faaalia mai i le maualuga o le tulaga o tatalaga o faaipoipoga. Afai e te manatunatu i le tele o faamanuiaga o loo olioli ai Kerisiano uma ua tuuina atu o le a e iloa ai faapea, e ui lava e mafai ona avea le faaipoipoga o se faamanuiaga, ae e lē o le ki lena i le fiafiaga.

Ona sosoo mai ai lea ma se faasologa o lauga o lona matua “Saolotoga Faa-Kerisiano i o Tatou Aso.” Na talanoaina e le failauga muamua “Vala o lo Tatou Saolotoga Faa-Kerisiano.” O nei vala e aofia ai le saoloto ma i aʻoaʻoga sese faalotu e pei o le Tolutasi, le lē mafai ona oti o le solu faaletagata, ma le faapuapuagatia e faavavau i le afi. Ona iai lea o le saoloto mai le faapologaina i noataga o le agasala. E ui lava e lē lelei atoatoa Kerisiano, ae ua saoloto i latou mai masaniga leaga e pei o le ulaula, pelē tupe, onā, ma feusuaiga faatalitane. Ua iai foi le saolotoga mai le leai o se faamoemoe, auā ua latou maua le faamoemoe pupula mo le Parataiso ua faaosofia ai i latou e taʻu atu i isi e uiga i lea faamoemoe.

Na fesili mai le failauga na sosoo ai “Pe E te Faapelepele Totino ea i Lena Saolotoga?” O le faapelepele o le taofi mau i se mea ua pele, o le tausia ma le faaeteete. Ina ia faia lena mea, e tatau ai i se auauna a le Atua ona leoleo faasaga ina ia aua neʻi faaosoosoina e sopoloa i tala atu o le saolotoga faa-Kerisiano. O le saolotoga o le lalolagi o se matuā pepelo taufaasese, auā e iʻu ai i le faapologaina i le agasala ma le iʻuvale.

O le failauga mulimuli i lenei faasologa o lauga na talanoa i le mataupu e uiga i le “Ua Tutū Mausalī Ē Alolofa i le Saolotoga.” Ina ia faia lena mea, e tatau i Kerisiano ona pipii mau atu i o latou mātua faaleagaga, o Ieova ma lana faalapotopotoga pei se faletua. E lē mafai e tagata o Ieova ona faatagaina i latou lava e liliuese e ala i taumafaiga faaaposetate; e tatau ona latou teena i latou o ē ō mai ma a latou amioga lē mamā. O le tumau i le saolotoga faaleatua, e tatau ai i Kerisiano ona “ola i la le agaga.”—Kalatia 5:25.

O le lauga faaiʻu o le Aso Toonai sa o se pogai moni o le fiafia. Sa faaulutalaina “Le Tagata Silisili o Ē Uma na Soifua Mai.” O Iesu Keriso o le tagata silisili lea, ona o lona faaaafia o olaga o le fanau a tagata i se tulaga sili atu ona malosi na i lo le tuufaatasiga o autau uma i le laueleele, autau uma i le sami, o palemene uma, ma tupu. O ia o le Alo o le Atua, o lē na soifua i le lagi a o leʻi afio mai i le lalolagi. Sa matuā faaaʻoaʻo lelei lava Iesu i lona Tamā faalelagi i mea na ia fetalai ai ma aʻoaʻo ma le auala na ia soifua ai o lea ua mafai ai ona ia faapea atu: “O le ua vaai mai ia te au, ua vaai o ia i le Tamā.” (Ioane 14:9) Maeu le lelei o le faatinoina e Iesu faapea “o le Atua o le alofa lava ia”! (1 Ioane 4:8) Ina ua uma ona faamatalaina uiga o Iesu mo se taimi, na taʻua ai e le failauga faapea o se faasologa o ni mataupu na faaulutalaina “Soifuaga o Iesu ma Lana Faiva” sa lomia i Le Olomatamata talu mai Novema 1985. I le tali atu i le tele o talosaga, ua tatalaina ai nei e le Sosaiete le tusi fou The Greatest Man Who Ever Lived. E 133 ona mataupu ma e lomia i lanu felanulanuai. O mataupu i faasologa na toe faatonutonuina, ma ua tuufaatasia nei mataupu uma i itulau e 448 o le tusi. O le mea moni, na faaiʻuina lenei aso o le tauaofiaga i se faalogona sili ona maualuga o le olioli!

Taeao o le Aso Sa

I le sauniga i le taeao lava o le Aso Sa na amata i le faasologa o lauga “Auauna o ni Ē Faifaiva i Tagata.” O le lauga i le “Puʻeina o Iʻa—Faaletino ma Faafaatusa” na faataatia ai se faavae mo lauga na mulimuli mai. Na faaalia e le failauga faapea ina ua uma ona faapogaia faavavega e Iesu le puʻeina o iʻa, sa ia valaaulia loa tagata faifaiva na aafia ai ina ia avea ma faifaiva i tagata. Auā sa toleni e Iesu ona soʻo mo sina taimi ina ia avea ma faifaiva i tagata, ma na amataina i le Penetekoso i le 33 T.A., sa manuia i latou i le fesoasoani atu i le motu o tagata o tane ma fafine ina ia avea ma soʻo.

O le isi failauga sa feagai ma le faataoto i le upega, o loo faamauina i le Mataio 13:47-50. Sa ia faasino atu faapea o le upega faafaatusa na aofia ai uma Kerisiano faauuina ma Kerisinetoma, ma o Kerisinetoma, ona o la latou galuega i le faaliliuina, lomia, ma le faasalalauina atu o Tusi Paia, e ui lava sa tele mea na maua i a latou taumafaiga ae na maua ai le anoanoaʻi o iʻa lē talafeagai. Ae maise lava talu mai le 1919 sa iai se galuega o le tuueseeseina na faia ai, na lafoai ai iʻa lē talafeagai, ae aoaoina iʻa lelei i totonu o faapotopotoga pei ni ipu na sa fesoasoani e puipuia ma faasaoina Kerisiano moni mo le auaunaga i le Atua.

O le lauga lona tolu, “Faifaiva mo Tagata i Ogasami Faalekelope,” na faamamafaina ai le avega tauave a Kerisiano uma tuuina atu ina ia faia se sao i le faiga faiva o loo faia i le lalolagi aoao. Ua sili atu nei i le 4,000,000 ua faia se sao i lenei galuega i atunuu e 212, ma i tausaga na seʻi mavae atu ua sili atu i le 200,000 tagata na papatisoina i tausaga taitasi. Sa uunaia ai tagata uma lava o Ieova ina ia faaleleia o latou tomai i le faiga faiva, ma sa faatalanoaina ai nisi o tagata “faifaiva” faapitoa o ē na taulau.

I le isi lauga na sosoo ai, o lona matua “Mataala e Lē Aunoa i le Taimi o le Iʻuga,” na faanumera mai ai e le failauga ni fesoasoani se fitu e fesoasoani ai i tagata o le Atua ia tumau i le mataala: tau ma mea e faatosina ese ai, ia tatalo ma le faatauanau, ia pipii mau lava i le faalapotopotoga a Ieova, ia faaleo atu le lapataiga e uiga i le faaiʻuga o lenei faiga o mea, ia suesue ifo oe lava, ia mafaufau loloto i le faataunuuga o valoaga, ma ia manatua pea ua matuā latalata mai lo latou faaolataga na i lo o le taimi na avea ai i latou ma tagata talitonu.

Na faaiʻuina le polokalama o le taeao i le talanoaina o le “O Ai o le a Faasaoina i le ‘Aso o le Puapuaga’?” Na faaalia e le failauga pe ua faapefea i le valoaga a Ioelu ona iai se faatatauga o lona faataunuuina i taimi o le au aposetolo, ma o loo iai se faataunuuga atili i le taimi nei, ma o le a iai se faataunuuga atoa i le lumanai lata mai.

Afiafi o le Aso Sa

Na amata le polokalama o le afiafi i le lauga mo le lautele, “Faafeiloaʻia le Lalolagi Fou o le Saolotoga a le Atua!” lea na faaauauina le matua o le tauaofiaga, o le saolotoga. Sa faasino mai faapea ua valoia e le Afioga a le Atua se lalolagi fou o i inā o le a saoloto mai ai i mafatiaga mai lotu sese, faiga faapolotiki, tamaoaiga, ma faiga faailoga lanu. O le a iai foi le saolotoga mai le agasala ma le oti. O le a toe faafoisia le soifua malōlōina lelei ina ia mafai ai ona ola e faavavau tagata i le fiafia i luga o se lalolagi parataiso. I lea, ua iai i ē alolofa i le amiotonu mafuaaga uma lava e vivii ai i Lē na Faia le lalolagi fou i lo latou alalaga mai: “Ia faafetaia Ieova, ona ua oo mai le saolotoga moni!”

Na sosoo atu i le lauga lautele se mea fou mo tauaofiaga itumalo—o le talanoaina o lesona faalevaiaso i Le Olomatamata. Ona faaiʻuina ai lea o le tauaofiaga i se lauga e faagaee ai ma apoapoaia ai “Ia Agaʻigaʻi Pea i Luma, o Ē Alolofa i le Saolotoga.” Sa taʻua puupuu e le failauga manatu tāua o le matua o le tauaofiaga o le saolotoga. Sa ia faamamafa mai le maeu o le fiafia o tagata o Ieova ona o lo latou saolotoga, i auala eseese e tele ua agaʻigaʻi ai i luma Kerisiano, ma uunaia i latou ina ia agaʻi pea i luma ma le autasi ina ia seleseleina nisi faamanuiaga atili. Sa ia faaiʻu mai i upu nei: “A o tatou faia lenei mea, tau ina ia faaauau ona faamanuia taitoatasi ma tagata uma e Ieova ina ia tatou agaʻi ai pea i luma i le avea o ni ē alolofa i le saolotoga.”

“Auā ua faatoilaloina mea uma na faia i le iu vale, (e le o lona loto lea, a e peitai ona o ia na na faatoilaloina ai,) ma le faamoemoe ia tuusaunoa ia lava mea na faia ia le faapologaina e le iu vale, a e oo i le saolotoga o le fanau a le Atua e manuia ai.”—Roma 8:20, 21.

[Ata i le itulau 25]

O se sui usufono talavou i Prague, Sekosolovakia

[Ata i le itulau 26]

1. O sui usufono o loo agaʻi atu i le mea o faia ai le papatisoga

2. Uia le papatisoga i le avea o se tasi o Molimau a Ieova

3. Tatalaina o se lomiga fou i se tasi o le tele o tauaofiaga i le lalolagi aoao

4. O lomiga fou na aumaia ai le olioli i le au usufono i Rusia