Le Faaaloalogia o Faatusa—O se Fefinauaiga

I SE vaipanoa o Polani, ua sauni ai se tamaloa e alu malaga. Ae, e tasi lava le mea tāua e tatau ona ia manatua. Ua ia tootuli atu i luma o le faatusa o Iesu, fai se taulaga, ona ia tatalo lea mo le puipuiga a o alu lana malaga.

I le faitauafe maila le mamao i Bangkok, i Taialani, e mafai ona e molimauina le uluai faigaʻai faaletausaga a tagata lotu Puta, lea e faia i le tau e totogo ai mea i le tausaga. I le taimi o le faigaʻai, e faia ai ni solo e feaveaʻi ai le faatusa o Puta i ala tetele.

E tatau ona e iloa faapea, o le faaaloalogia o faatusa e pei ona faatoʻā uma atu ona faamatalaina, ua matuā salalau atu. O le mea moni lava, e faitau piliona tagata e ifo atu i luma o faatusa. Mo le faitau meleniuma, ua manatu pea tagata i faatusa o se auala tāua lea e faalatalata atu ai i le Atua.

O le ā sou manatu i le faaaogāina o faatusa i le tapuaiga? E saʻo pe sese le faaaloalogia o faatusa? O le ā le lagona o le Atua e uiga i lea mea? Pe mata e iai se faamaoniga o lona talia o tapuaiga faapena? Atonu e lē taitai lava ona oo ane ia te oe se manatu e uiga i na fesili. Ae, afai e te faatāuaina le iai o se faiā ma le Atua, e manaomia ona e iloa tali i na fesili.

E ioeina faapea, mo le toatele e lē o se mataupu faigofie lea mo i latou e faia i ai se faaiʻuga. O le mea moni, sa avea o se mataupu aasa ma o ni fefinauaiga sauā i nisi taimi mo le faitau afe o tausaga. Mo se faaaʻoaʻoga, i tuā i le tausaga e 1513 T.L.M., na faatamaʻia ai e le taʻitaʻi Eperu o Mose le faatusa auro o se tamai povi ma na fasiotia i le pelu tagata e 3,000 o ē na faaaloalo atu i ai.—Esoto, mataupu 32.

O teteega malolosi i le faaaogāina o faatusa faalotu, ua lē gata mai i na o tagata Iutaia. O tagata tusitala masani o le talafaasolopito anamua ua latou faasaoina mai se tala faaanamua e uiga ia Takhmūrūp, o se pule Peresia o lē na faapea mai sa ia faia le anoanoai o ni taua faasaga i le faaaloalogia o faatusa mo le faitau selau tausaga ua mavae a o leʻi oo ia Mose. I Saina na taʻua ai i tala faaanamua se tupu faapea na ia tuuina atu se osofaiga faavaegaau faasaga i faatusa o atua eseese. Ina ua uma ona faaumatia ia faatusa, sa ia taʻuvaleaina faapea o se mea valea le faaaloalo atu i atua e faia i omea. Mulimuli ane, ina o tamaitiiti lava Muhammad, sa iai tagata Arapi o ē na tetee i le faaaogāina o faatusa i le tapuaiga. O a latou taaʻiga na faia ia Muhammad na fesoasoani i lona tulaga e uiga i le ifo i tupua i tausaga mulimuli ane. I le Korana, o loo aʻoaʻo ai e Muhammad faapea, o le ifo i tupua, o se agasala e lē mafai ona faamagaloina, e lē tatau foi ona tatalo mo tagata ifo i tupua, ma e faasāina foi le faaipoipo atu i tagata ifo i tupua.

E oo lava i tagata taʻutaʻua i lotu a Kerisinetoma o lona lua, tolu, fa, ma lona lima o senituri T.A., e pei o Irenaeus, Origen, Eusebius o Kaisareia, Epifania, ma Aokusitino, sa latou tetee i le faaaogāina o faatusa i le tapuaiga. Pe tusa o le amataga o lona fa o senituri T.A., i Elvira, Sepania, na faavae ai e se vaega o epikopō ni nai iʻugafono faasaga i le tuuina atu o le faaaloalo i faatusa. O lenei Fono taʻutaʻua i Elvira na iʻu i le faasāina o faatusa mai falesa ma i le faavaeina o ni faasalaga matuiā faasaga i tagata tapuai i faatusa.

Tagata Faasagatau i Faatusa

O nei mea sa tutupu na faataatia ai se vaaiga mo se tasi o fefinauaiga aupito silisili i le talafaasolopito: o le fefinauaiga faasaga i faatusa i lona valu ma lona iva o senituri. Ua taʻua e se tasi tusitala o talafaasolopito faapea o lenei “fefinauaiga ogoogo na faia mo le tasi ma le ʻafa senituri, ma sa o se vaitaimi o mafatiaga lē mafaamatalaina” ma faapea sa o “se tasi o pogai na vave ona vaevaeina ai le emepaea o Sasae ma le emepaea o Sisifo.”

O le upu “iconoclast” e sau mai upu Eleni o le eikon, o lona uiga “faatusa,” ma le klastes, o lona uiga “o lē talepe mea.” I le ola ai la e tusa ma lona igoa, o lenei gaoioiga faasaga i faatusa sa aofia ai le aveesea ma le faaumatia o faatusa i Europa atoa. Sa faatutūina ni nai tulafono tetee faasaga i faatusa ina ia faasāina ai le faaaogāina o faatusa i tapuaiga. O le faaaloalogia o faatusa sa oo ina avea o se finauga aasa faapolotiki lena na tosoaiina atu ai emeperoa ma pope, taʻitaʻiau ma epikopo i se taua moni lava faalotu.

Ma o lenei mea sa sili atu na i lo na o se taugaupu. Ua taʻua e le Cyclopedia of Biblical, Theological, and Ecclesiastical Literature, a McClintock ma Strong e faapea, ina ua uma ona tuuina atu e le Emeperoa o Leo III se poloaiga aloaia faasaga i le faaaogāina o faatusa i falesa, “sa tutū aʻe le anoanoai o tagata faasaga i le poloaiga, ma na oo ai faiga sauā, ae maise lava i Constantinople,” ma sa avea o se mea na tupu pea i aso taitasi. Sa faia ni fetaiaiga i le va o vaegaau faalemalo ma tagata na iʻu ai ina faasalaina i le oti ma fasiotia ai ma le lē alofa tagata. Sa matuiā sauaga sa faia i monike. I le faitau selau tausaga mulimuli ane, i le vaitaimi o lona 16 o senituri, na faia ai nisi o felafolafoaiga faalauaitele i Zurich, i Suiselani, e uiga i le mataupu o faatusa i falesa. O le iʻuga, na toe faagaoioia ai le tuuina atu o se poloaiga e poloaia ai le aveesea o faatusa uma lava mai falesa. O nisi tagata toe fuatai sa matauina i lo latou matuā naunau ma fai ma masani ona sauā i le taʻusalaina o le tapuaiga i faatusa.

E oo lava i aso nei, o loo iai se fevaevaeaiga i le va o aʻoaʻo faifeau faaonaponei e faatatau i le faaaogāina o faatusa i le tapuaiga. O le a fesoasoani ia te oe le mataupu o loo mulimuli mai e fuafua tatau pe mafai ona fesoasoani moni faatusa i le tagata ina ia faalatalata atu ai i le Atua.