Po o le a Manuia ea Fuafuaga mo le Saogalemu Faavaomalo?

UA TAʻUA mai e le mekasini One World a le WCC (World Council of Churches): “O le Taua Faaupufai o Malo, lea sa saisaitia ai le lalolagi mo le sili atu i le 40 tausaga, ua foliga mai ua faaiʻuina ona o le fesoasoani a le Atua.” Ua faaopoopo mai le tusitala o le Lotu Egelani o John Pobee, e uiga i le Polokalama a le WCC i Aʻoaʻoga Faafaifeau: “O mea mataʻina o loo tutupu i Europa Tutotonu ma Sasae . . . e foliga mai o se faailoga lelei lea mo le filemu ma le saogalemu i Europa ma le lalolagi atoa.”

E lē na o sui o le WCC o loo latou faafesootaia le Atua ma fuafuaga a tagata mo le saogalemu faavaomalo. Ia Aperila 1991, e leʻi pine lava talu ona mavae le taua i le Fagaloa i Peresia, ae auina atu loa e Pope Ioane Paulo se feau i le failautusi sili o Malo Aufaatasi o Javier Pérez de Cuéllar, lea na ia faapea atu ai: “O epikopō a Lotu Katoliko o Sasae Tutotonu ma Sisifo e talitonu i le galuega a Malo Aufaatasi . . . Ua latou faamoemoe faapea, e ala i Malo Aufaatasi ma ana faalapotopotoga faapitoa, o le a mafai ai e i latou o ē na tuua e le taua talu ai nei i se tulaga matuā matitiva, ona taulau i le mauaina o le fealofani ma le autasi o manatu i faiā faavaomalo.”

E lē gata i lea, o le Vatikana, sa avea o se tasi o Setete e 35 na faavaeina ma sainia uma le Helsinki Agreement i le 1975, ma le Stockholm Document i le 1986. Ina ua faalauiloa mai e Malo Aufaatasi le 1986 e avea ma “Tausaga Faavaomalo o le Filemu,” na tali mai i ai le pope e ala i le valaauliaina o sui o lotu autū i le lalolagi ina ia auai i le faamanatuina o le “Aso Tatalo o le Lalolagi mo le Filemu.” Ia Oketopa 1986, sa nonofo faatasi ai sui o le Lotu Puta, Hinitu, Isalame, Shinto, Egelani, Luteru, Orthodox Eleni, Lotu Iutaia, ma isi faatuatuaga i Assisi, i Italia, ma feauauai i le faia o tatalo mo le filemu i le lalolagi.

I ni tausaga mulimuli ane, i se lauga na ia faia i Roma, na toe faamanatu atu ai e le Aki Epikopō o le Lotu Egelani i Canterbury le sauniga o loo taʻua i luga. Na ia faapea mai: “I Assisi, ua tatou iloa nei e mafai e le Epikopō i Roma [le pope] ona tuufaatasia Lotu Kerisiano. E mafai ona tatou tatalo faatasi, talanoa faatasi ma gaoioi faatasi mo le filemu ma le nofo lelei o le fanau a tagata . . . I le tausolomua i le faia o tatalo mo le filemu o le lalolagi, sa oo ai ia te aʻu se lagona faapea ua ou iai i luma o le silafaga a le Atua o lē na fetalai mai ‘Faauta ua ou faia se mea fou.’”

O isi lotu, e ui lava sa leʻi iai ni o latou sui i Assisi, ae ua faamoemoe ma le mautinoa foi i le fuafuaga a tagata mo le saogalemu faavaomalo. Na faapea mai se faatonu i le nusipepa aloaia o le Die Kerkbode, a le Lotu Dutch Reformed i Aferika i Saute: “Ua tatou tofo nei i le suiga agaʻi atu i se lalolagi fou. O le mea na foliga mai sa lē mafai ona faia i nai tausaga ua mavae, lea ua mafai nei ona tatou vaai i ai. O le leleiga lea ua faia i luma o le tulaga tāua a le lalolagi i le va o Rusia ma atunuu i Sisifo ua aafia ai uiga i le tele o atunuu. I lo tatou itu o le lalolagi, e oo lava i vaega faaleaganuu sa feteenai, ma fili sa feitagai, ua mafai ona talanoa atu le tasi i le isi, ma o le uunaiga agaʻi atu i le ‘filemu’ ua laualuga i so o se mea . . . Mai se vaaiga faa-Kerisiano, ua ao nei ona talia taumafaiga uma e aumaia ai le filemu i le va o tagata. Ua mafai ona tatou tatalo mo le filemu i o tatou taimi.”

Po o faamanuia ea e le Atua fuafuaga a le tagata mo le saogalemu faavaomalo?

O le ā o Fai mai ai le Tusi Paia?

Pe a oo i le tulaga o le faalagolago i taumafaiga a tagata, ua ofoina mai ai e le Tusi Paia se lapataiga tuusaʻo: “Aua tou te faatuatua i alii, po o le fanau a tagata, e le o i ai se olataga. E alu ese lona agaga, e foi atu i le eleele na i ai o ia; e faaumatia i lea lava aso ona manatunatu.” (Salamo 146:3, 4) O le agaʻigaʻi atu i luma i le filemu i le taimi nei, e foliga mai atonu e faalaeiauina ai. Ae e tatau ona tatou talia le tulaga moni. O le malosi o tagata e faatapulaa. E masani lava, ona sili atu ona tetelē mea e tutupu ai na i lo o i latou. E seāseā lava ona latou iloa ni mea faalilolilo, po o malosi lilo, e faaleagaina a latou fuafuaga sili ona lelei ua uma ona faataatitia.

I le fitu selau tausaga a o leʻi oo i taimi o Iesu, i aso o le perofeta o Isaia, sa fuafua ai e taʻitaʻi Iutaia se saogalemu e ala i sainiga o feagaiga faavaomalo ma atunuu tuaoi i se auala e tutusa ma le mea lea o loo tupu i aso nei. I na foi aso, sa lagolagoina e taʻitaʻi lotu mea na faia e le au fai polotiki. Ae sa lapataia e Isaia: “Taupulepule ia outou, a e faaleaogaina; ina fai atu ia i se upu, a e le faatumauina.” (Isaia 8:10) O la latou taupulepulega, sa liua i le matuā lē taulau. Pe mafai ona tupu lena lava mea i aso nei?

Ioe, e mafai, talu ai ona e ala i lena lava perofeta, na faalauiloa mai ai e le Atua faapea, e iai Lana Lava auala e aumaia ai le saogalemu i le lalolagi. O le a faia, e lē ala mai i so o se faalapotopotoga lava faaletagata, ae e ala i sē e tupuga mai i le tupu o Isaraelu, o Tavita. (Isaia 9:6, 7) O lenei Suli o le Tupu o Tavita o Iesu Keriso, o lē ina ua fesiligia e Ponotio Pilato, sa ioe faapea o ia o se Tupu ae na ia fetalai atu: “E le mai le lalolagi nei loʻu malo.” (Ioane 18:36; Luka 1:32) O le mea moni, o le Malo o Iesu e tatau ona faalelagi. Ma o le Malo lea—ae e lē o Malo Aufaatasi po o so o se isi lava malo faapolotiki faalelalolagi—o le a na aumaia le saogalemu maufaatuatuaina e faavavau i lenei lalolagi.—Tanielu 2:44.

Na valoia e Iesu Keriso faapea o lona Malo o le a amata ona pule mai le lagi i le taimi e oo mai ai “taua ma tala o taua,” ma ‘o le a sii le taua e le tasi nuu i le tasi nuu, ma le tasi malo i le tasi malo.’ O le faataunuuga o lena valoaga ua faailogaina ai le 1914 o le taimi na tupu ai lena mea ma mataulia ai tausaga talu mai lena taimi faapea ‘o le faaiʻuga o le faiga o mea.’—Mataio 24:3, 6-8.

O le ā le uiga o lenei mea? E faapea o le taimi o loo totoe mo lenei faiga o mea a le lalolagi e faatapulaaina, ma ua toeitiiti lava ona uma loa lea. Po o se pogai ea lea e popole pe faanoanoa ai? E leai pe afai tatou te manatu i le sauā, le aunoa ma se faamasinoga tonu, mafatiaga, faiga taua, ma puapuaga uma lava ua faailogaina ai lenei faiga o mea. O le a avea o se mapusaga moni lava le iai i lalo o se pule, o lē ua taʻua e le Afioga a le Atua, le Tusi Paia faapea: “E afio mau ia te ia le Agaga o Ieova; o le Agaga o le poto ma le mafaufau; o le agaga o le faatonuga ma le malosi; o le Agaga o le malamalama ma le mataʻu ia Ieova.”—Isaia 11:2.

Le Saogalemu Moni i le Lalolagi

E moni, o le a leai se saogalemu moni i le lalolagi seia faataunuuina i lalo o le Malo o le Atua le valoaga a Isaia i le lalolagi atoa: “Ou te faia le lagi fou ma le lalolagi fou; e le toe manatua mea na muamua, e le alu ae foi i le loto.” (Isaia 65:17) E tusa lava po o le ā le tele o tatalo e ofoina atu e taʻitaʻi lotu e fai ma sui o lenei lalolagi, ae e lē mafai lava e fuafuaga a tagata mo le saogalemu faavaomalo ona suia ai le auala a le Atua mo le aumaia o le filemu ma le saogalemu.

O le saogalemu tumau i le lalolagi atoa lea e aumaia e le Malo o le Atua o le a mamalu. O se tasi lenei o faamatalaga o loo maua i le Tusi Paia: “Ona latou tuʻi ai lea i a latou pelu e fai ma uamea o suotosina, o latou tao foi e fai ma polo teu vine; e le sii atu foi le pelu e le tasi nuu i le tasi nuu, latou te le toe aʻoaʻo foi i taua. A e taitasi ma nofo i lalo o lona vine, ma lalo o lona mati; e leai foi se na te faamatau mai; auā ua faapea ona tulei mai ai o le siufofoga o Ieova o ʻau.”—Mika 4:3, 4.

E na o le saogalemu ua faamautinoaina e le Atua lava ia e mafai ona tumau ma maufaatuatuaina. O lea, na i lo o le tuu atu o lou faatuatua i alii, aiseā e lē tuu atu ai lou faatuatua ia te ia? Ona e iloa ai lea o le moni o upu a le faisalamo: “Amuia le tagata o i ai le Atua o Iakopo e fai mona fesoasoani; o i ai lona faamoemoe ia Ieova lona Atua; o le na faia le lagi atoa ma le lalolagi, o le sami ma mea uma o i ai; o le na te tausia le faamaoni e faavavau.”—Salamo 146:5, 6.

[Pusa i le itulau 7]

Le Lotu Katoliko ma Faiga Faapolotiki Faavaomalo

“E ui lava na fetalai Iesu faapea ‘e lē mai le lalolagi nei’ lona Malo, ae o taʻitaʻi lotu tulaga maualuluga ma le pope i le avea o se faalapotopotoga, na faia so latou sao ma le naunautai i tauiviga faapolotiki faavaomalo ma faaleatunuu talu mai le taimi o Konesetatino.”—The Catholic Church in World Politics, a Polofesa Eric Hanson o le Iunivesite o Jesuit Santa Clara.