Fesili mai le Au Faitau

Fai mai le Eperu 9:16, e tatau ona oti se fai feagaiga ina ia aogā ai le feagaiga. Ae o le Atua na ia faia se feagaiga fou, ae leʻi maliu o ia. O lea, e mafai la faapefea ona tatou malamalama i lenei fuaiupu?

Ua tatou faitau ai i le Eperu 9:15-17: “O le mea foi lea o loo fai ai o ia [Keriso] ma puluvaga o le feagaiga fou, ona o lona maliu foi e togiola aʻi agasala na faia a o i le muai feagaiga, ia maua ai e i latou ua valaauina o le tofi e faavavau na folafolaina. Auā pe a fai [e se tagata se feagaiga], seʻi iloga e oti lē ana le [feagaiga], ona oo ai lea; auā e faamaonia se [feagaiga] ona o e ua oti, ina ua le aoga a o ola mai lē e ana [le tagata] le [feagaiga].”a

O Ieova o Ia moni lava o Lē na Faia le feagaiga fou. I le Ieremia 31:31-34, sa valoia faapitoa ai e le Atua faapea o ia lava o le a ia faia se feagaiga fou ma lona nuu. Ua sii mai e le aposetolo o Paulo lenei mau i le Eperu 8:8-13, lea ua faaalia ai faapea sa talisapaia e Paulo lena mea, i le tautala maumauaʻi faapea, o le Atua na faapogaia lenei feagaiga tauatua.

Ae peitai, i le Eperu mataupu e 9, sa faaauau ai ona taʻua e Paulo vaega eseese na faia e Iesu e faatatau i le feagaiga fou. Na afio mai Keriso e avea o se Ositaulaga Sili o lenei feagaiga. Mai le isi tulaga, o Iesu sa avea o le taulaga o le feagaiga fou; ua na o “le toto o le Keriso” e mafai ona “faamamaina o [tatou] loto fuatia ifo ai galuega e oti ai.” O Keriso foi sa avea o le Puluvaga o lenei feagaiga, e pei lava ona avea o Mose ma puluvaga o le feagaiga o le Tulafono.—Eperu 9:11-15.

Sa taʻua e Paulo faapea, sa manaomia le oti ina ia aogā ai le feagaiga i le va o le Atua ma tagata. O se faaaʻoaʻoga, o le feagaiga o le Tulafono. O Mose o lona puluvaga, o lē sa na aumaia lenei maliega i le va o le Atua ma Isaraelu faaletino. I lea na faia ai e Mose se vaega tāua, ma o le tagata sa feutagai ma Isaraelu ina ua aumaia i latou i lenei feagaiga. I lea, sa mafai ai ona manatu ia Mose o le tagata o lē na faia le feagaiga o le Tulafono na puna mai ia Ieova. Ae pe sa sasaa ea e Mose lona toto ola ina ia aogā ai le feagaiga o le Tulafono? E leai. Na i lo o le faia o lena mea, sa ofoina atu toto o manu e sui ai le toto o Mose.—Eperu 9:18-22.

Ae faapefea le feagaiga fou i le va o Ieova ma le nuu o Isaraelu faaleagaga? Sa faia e Iesu Keriso le vaega mamalu o le faalaa ane lea e avea ma Puluvaga i le va o Ieova ma Isaraelu faaleagaga. E ui o Ieova na faapogaia lenei feagaiga, ae sa taatia atu ia Iesu Keriso. Sa lē gata i le avea ma Puluvaga o lea feagaiga, ae sa faia e Iesu feutagaiga tuusaʻo i la le tino ma i latou o ē o le a muai aveina atu i lenei feagaiga. (Luka 22:20, 28, 29) E lē gata i lea, sa taʻuagavaaina foi o ia e saunia le taulaga na manaomia ina ia aogā ai le feagaiga. O lenei taulaga sa lē na o ni manu maulalo ae o se soifua lelei atoatoa faaletagata. O lea ua mafai ai ona faasino atu e Paulo i le Keriso o le tagata o lē na faia le feagaiga fou. Ina ua uma ona “ulu atu Keriso i le . . . lagi lava, ina ia iloa ai nei o ia i luma o le Atua mo i tatou,” ona aogā ai lea o le feagaiga fou.—Eperu 9:12-14, 24.

I le taʻua o Mose ma Iesu o ni fai feagaiga faaletagata, sa leʻi tautala ai Paulo e uiga ia Mose ma Iesu faapea o so o se tasi o i laua sa amataina ia feagaiga e lua, ia na faia moni lava e le Atua. Na i lo o lea, o na tagata e toalua sa matuā aafia lava i le avea o ni puluvaga i le faatinoina o na feagaiga e lua. I ia tulaga taitasi, sa manaomia ai se oti—e fai ma sui o Mose, ma o Iesu na ofoina atu lona lava toto faaola mo i latou o iai i le feagaiga fou.

[Faaopoopoga i lalo]