E te Manatua?

Pe na tāua ia te oe lomiga talu ai nei o Le Olomatamata? Aiseā la e lē tofotofo ai lou manatuaina o mea i le lisi o mulimuli mai:

▫ O le ā le fuafuaga autū o faamalōlōga a Iesu?

Sa faia mo le faalaeiauina o le motu o tagata e toatele o isi mamoe i aso nei, faapea o i latou e faasaoina ia Amaketo o le a faamalōlōina i se taimi mulimuli ane pe a mavae Amaketo. (Isaia 33:24; 35:5, 6)—4/15, itulau 12.

▫ Aiseā tatou te manaomia ai pea le faamanatu mai: “Ia finafinau i le tatalo”? (Roma 12:12)

E mafai ona matuā faalavelavea i tatou i omiga ma avega tauave o le olaga i nisi taimi e faapea ai ona galo ia i tatou ona tatalo. Pe atonu foi e osofaia i tatou i faafitauli ma faapogaia ai ona faamuta lo tatou olioli i le faamoemoe o le Malo, e oo lava foi ina lē toe tatalo ai. O lea, tatou te manaomia ni faamanatu e faalaeiauina ai i tatou e tatalo, ma i lenei auala o le a sili ai ona vavalalata atu ia Ieova.—4/15, itulau 14.

▫ O le ā e faamaonia ai faapea o le Lolo i aso o Noa na tuua ai se faamatalaga e lē mafaagaloina i le fanau a tagata?

Ua fuafuaina faapea e sili atu i le 500 tala faaanamua e uiga i le Lolo na faamatalaina e sili atu i le 250 ituaiga ma nuu o tagata. I nei tala faaanamua uma lava, o loo maua ai nisi o mea faavae tali tutusa.—5/15, itulau 5.

▫ Ua tutusa faapefea perofeta pepelo i aso nei ma ona po o Ieremia?

Ua faapea mai perofeta pepelo o aso nei o i latou o sui o le Atua, ae ua latou gaoia afioga a le Atua e ala i le talaʻi atu o mea e faatosina ese ai tagata mai mea o fai mai moni ai le Tusi Paia. Ua moni lenei itu ae maise lava e faatatau i le aʻoaʻoga e uiga i le Malo. (Ieremia 23:30)—6/1, itulau 4.

▫ O le ā ua faaatagia mai i le papatisoina o se tasi i le suafa o le agaga paia?

E faaatagia ai, o se tasi ua papatisoina ua maumauai e felagolagomai ma le agaga, i le lē faia o se mea e taofia ai lona faagaoioiga i le lotolotoi o tagata o Ieova. O lea, e ao ai ia te ia ona felagolagomai ma le auauna faamaoni ma le mafaufau ma le fuafuaga o toeaina i le faapotopotoga. (Eperu 13:7, 17; 1 Peteru 5:1-4)—6/1, itulau 18.

▫ Aiseā e matuā faaleagaina ai se tagata e tapuai i tupua?

Ua faaalia i le Tusi Paia le inosia e Ieova le Atua o faatusa ma e lē fesoasoani lea i ē ua tuutoina atu i ai e vavalalata ma le Atua. (Teuteronome 7:25; Salamo 115:4-8) O Satani le Tiapolo, “ua [ia] faatauasoina manatu” o tagata “ina [ia aua] neʻi pupula” atu i ai le upu moni. (2 Korinito 4:4) O lea, pe a faaaloalo atu se tasi i se faatusa, o le mea moni, o le auauna atu lava lena o se tasi i faanaunauga o temoni. (1 Korinito 10:19, 20)—6/15, itulau 6-7.

▫ Aiseā sa manatu ai i mamoe o ni mea tāua i taimi o le Tusi Paia?

O le fulufulu mamoe o se alā manuia e faafouina ai, ma sa mafai ona faaaogā e faia ai lavalava mo le aiga pe mafai foi ona faatau atu. Sa faaaogāina foi seu o mamoe poa e fai ma pu e faailoa atu ai le Iupeli pe faaaogā e faaleoina atu ai se faailoilo po o le faatonutonuina foi o gaoioiga o taua. Ona sa aofia ai mamoe i manu mamā na sa mafai ona ʻaina e tagata Isaraelu, e mautinoa lava la le tele o meaʻai e maua pe a iai se lafu mamoe, ma maua ai pea le suāsusu, sa faaaogā mo le fofoga taumafa ma le saunia o le sisi.—7/1, itulau 24-5.

▫ O ā mea e talosaga atu ai ē alolofa i le Atua pe a latou tatalo mo le Malo o le Atua ina ia oo mai? (Mataio 6:10)

O loo latou talosaga atu ina ia gaoioi ma le tonu le Malo faalelagi o le Atua, e ala i le faaumatiaina o faiga malo faaletagata, na ua lē taulau ona faataunuuina a latou folafolaga e aumaia le filemu moni ma le saogalemu. (Tanielu 2:44)—7/15, itulau 6.

▫ O ai Apolotisi, ma pe sa latou aʻoaʻoina le Tolutasi?

O Apolotisi o tagata lotu ia na ola i le vaega mulimuli o le senituri lona lua. Sa faia a latou tusitusiga e puipuia ai le Faa-Kerisiano na latou iloa, faasaga i filosofia faatuʻiese sa taatele i le pulega a Roma i na ona po. E leai se tasi o i latou na aʻoaʻoina le Tolutasi.—8/1, itulau 24-29.

▫ Pe sa faalogonoa ma faagūgū Sakaria le tamā o Ioane le Papatiso, e pei ona foliga mai o loo faaalia i le Luka 1:62?

Na faapea atu Kaperielu, o le a aafia le tautala a Sakaria ae lē o lana faalogo. (Luka 1:18-20) Ua faapea mai le Luka 1:64: “Ona matala loa lea o lona [Sakaria] leo ma lona laulaufaiva, ona tautala lea o ia.” Matau, e matuā leai se mea i inei o taʻua ai se aafia o lana faalogo. O le taʻua o le “genogeno” i le Luka 1:62 atonu e uiga faapea sa faia ni taga ina ia maua mai ai le faaiʻuga a Sakaria.—8/1, itulau 31.