O ai o le a Faasaoina i “Aso Vale”?

“E iu foi ina faaolaina o i latou uma lava o e valaau atu i le suafa o Ieova.”—IOELU 2:32.

1. E tusa ai ia Tanielu ma Malaki, o le ā e faailogaina ai i latou o ē mauaina le faaolataga i “aso vale” o loo fotuai mai?

AO TEPA taulai mai i o tatou aso, na tusia ai e le perofeta o Tanielu e faapea: “E oo mai foi aso vale, e leai sona tusa talu ona faatoa tupu o nuu, ua oo i ia lava aso; o ona po foi ia e laveaiina ai ou tagata, o i latou uma o e ua tusia i le tusi.” (Tanielu 12:1) O le mea moni, o ni upu faamafanafana loto na upu! O le a manatua e Ieova ona tagata faamaonia, e pei lava foi ona folafola mai i le Malaki 3:16: “Ona fetautalatalai lea e na matatau ia Ieova; ua liliu mai foi e Ieova ona fofoga, ma ua faafofoga mai; ona tusia lea o le tusi e faamanatu i ona luma, mo e matatau ia Ieova, ma mafaufau i lona suafa.”

2. O ā iʻuga o le mafaufau i le suafa o Ieova?

² O le mafaufau i le suafa o Ieova, e taʻitaʻiina ai i le poto saʻo e uiga ia te ia, lana Keriso, atoa ma fuafuaga silisili uma a lona Malo. O lea, ua aʻoaʻoina ai ona tagata ina ia āva ia te ia, ia ulu atu i se faiā vavalalata ua tuuina atu ia te ia, ma ia alolofa ia te ia ‘ma o latou loto atoa ma o latou manatu atoa ma o latou malosi atoa.’ (Mareko 12:33; Faaaliga 4:11) Ua faia e Ieova le sauniuniga alofa, e ala i le taulaga a Iesu Keriso, mo ē agamalu i le lalolagi ina ia maua ai le ola e faavavau. O le mea lea, e mafai ai e i latou ia, ona toe faaleoina atu ma le mautinoa upu a au faalelagi sa vivii atu i le Atua i le taimi o le fanau mai o Iesu e faapea: “O le viiga i le Atua i mea aupitoaluga; ma le [filemu] i le lalolagi; o le finagalo alofa i tagata.”—Luka 2:14.

3. A o leʻi oo mai le filemu i lenei lalolagi, o le ā le gaoioiga a Ieova e tatau ona faia?

³ Ua lalata tele mai lena filemu na i lo le mea o loo manatu i ai tagata. Ae muamua, e tatau ona faaoo mai le faasalaga a Ieova i lenei lalolagi iʻuvale. Ua folafola mai e lana perofeta o Sefanaia: “O loo latalata mai le aso tele o Ieova, e lata mai lava, o loo matuā tele vave mai lava, o le taalili o le aso o Ieova; e matuā tagiaue ai le toa. E fai lea aso ma aso o le toasa, o le aso o le puapuaga ma le tiga, o le aso o le faatafunaina ma le faagaogaoina, o le aso o le pouliuli ma le pogisa, o le aso o ao ma le faamalumalu, o le aso o le pu ma le pāpā o alaga i le taua, e sii i aai nofo ʻolo atoa ma ʻolo maualuluga. Ou te faatiga foi i tagata, latou te savavali ai pei o tagata tauaso, auā ua latou agasala atu ia Ieova.”—Sefanaia 1:14-17; tagai foi i le Sapakuka 2:3; 3:1-6, 16-19.

4. O ai i aso nei ua tali atu i le valaaulia ina ia iloa ma auauna i le Atua?

⁴ O le itu e fiafia ai, ona e faitau miliona i latou i aso nei, ua tali atu i le valaaulia ina ia iloa ma auauna i le Atua. Na valoia mai e uiga i Kerisiano faauuina, o ē ua aveina atu i le feagaiga fou e faapea: “Auā e iloa aʻu e i latou uma lava, o tagata nuu atoa ma alii, o loo fetalai mai ai Ieova.” (Ieremia 31:34) O i latou ia o loo taulamua i le galuega o le molimau atu i aso nei. Ma i le taimi nei, a o faateleina pea i latou o le vaega totoe faauuina ua faaiʻuina lo latou olaga faalelalolagi, a ua agaʻi atu i lumāmea le “motu o tagata e toatele” o “isi mamoe” ina ia ‘tuuina atu le auaunaga paia i le Atua i le ao atoa ma le po’ i lana fuafuaga e pei o se malumalu. (Faaaliga 7:9, 15; Ioane 10:16) Po o oe ea o se tasi o loo olioli i lenei faaeaga e lē mafaatusalia?

Le Auala e Aumaia ai i Totonu “Mea ua Manaomia”

5, 6. A o leʻi luluina nuu uma i le faaumatiaga, o le ā le galuega faasaoola o le a faia?

⁵ Seʻi tatou suʻe atu nei la i le Hakai 2:7, lea o loo vavalo mai ai Ieova e uiga i lona maota faaleagaga o le tapuaiga. Ua fetalai mai o ia: “Ou te luluina foi nuu uma; ona oo mai ai lea o mea ua manaomia [mai] nuu uma; ou te faatumuina foi lenei fale i le pupula.” Ua faaalia e valoaga o le Tusi Paia faapea, o le ‘luluina o nuu’ e faatatau lea i le faaooina mai o le faasalaga a Ieova i luga o atunuu. (Nauma 1:5, 6; Faaaliga 6:12-17) O lea, o le gaoioiga a Ieova ua valoia mai i le Hakai 2:7 o le a taualugaina i le luluina o atunuu ia lē toe iai—o le a faaumatia. Ae faapefea “mea ua manaomia [mai] nuu uma”? Pe e tatau ea ona latou faatali mo lena luluuga mataʻutia i le taimi mulimuli ina ia aumaia ai i latou i totonu? Leai.

⁶ Ua faapea mai le Ioelu 2:32: “E iu foi ina faaolaina o i latou uma lava o e valaau atu i le suafa o Ieova; auā e i ai le faaolataga i le mauga o Siona ma Ierusalema, faapei ona fetalai mai ai o Ieova, e i ai foi i e ua totoe o i latou ia e valaauina e Ieova.” Ua tosina mai i latou e Ieova, ma ua latou valaau atu i lona suafa faatasi ma le faatuatua i le taulaga a Iesu, a o leʻi oo atu i le luluuga faaiʻu o le puapuaga tele. (Faatusatusa i le Ioane 6:44; Galuega 2:38, 39.) Ae e fiafia, ona ua sili atu nei i le fa miliona le aofaiga o le motu o tagata e toatele, ua ‘ō mai i totonu’ o le maota o le tapuaiga a Ieova e faatalitali ai mo lona ‘luluina o nuu uma’ ia Amaketo.—Faaaliga 7:9, 10, 14.

7. O le ā e aofia ai i le ‘valaau atu i le suafa o Ieova’?

⁷ E faapefea ona valaau atu i latou ia e faasaoina i le suafa o Ieova? Ua faailoa mai ia i tatou e le Iakopo 4:8 e faapea: “Ia outou faalatalata atu i le Atua, ona faalatalata mai lea o ia ia te outou. Tagata agasala e, ina fafano ia o outou lima, o outou e faalotolotolua e, ina faamamā ia o outou loto.” E pei ona faia e le vaega totoe faauuina o ē o loo āsā le ala, e tatau foi ia i latou o loo faamoemoe e iai i le motu o tagata e toatele o ē faasaoina atu ia Amaketo ona gaoioi ma le tonu. Afai o e faamoemoe e faasaoina atu, e tatau la ona e matuā sailiili i le Afioga ua faamamāina a Ieova ma ia faatatauina ana tapulaa amiotonu i lou olaga. E lē tatau ona e faalotolotolua i le tuuina atu o lou ola ia Ieova, ma ia faailogaina lenei i le papatisoga i le vai. O lou valaau atu ia Ieova i le faatuatua e aofia ai foi le molimau atu mo ia. O lea ua tusia ai e Paulo i le Roma mataupu e 10, fuaiupu e 9 ma le 10: “Afai e te taʻutino i lou gutu i le Alii o Iesu, ma talitonu i lou loto ua toe faatuina mai o ia e le Atua nai e ua oti, e faaolaina ai oe; auā o le loto e talitonu ai, e oo mai ai le amiotonu; a o le gutu e taʻutino ai, e oo mai ai le ola.” Ma i le fuaiupu e 13, o loo sii mai ai e le aposetolo le valoaga a Ioelu, ma faamamafaina ai faapea “e faaolaina i latou uma o e valaau i le suafa o [Ieova].”

‘Saili, Saili, Saili’

8. (a) E tusa ai ma le perofeta o Sefanaia, o le ā o loo manaomia e Ieova mo le faaolataga? (e) O le ā le lapataiga ua aumaia ia i tatou e le upu “atonu” i le Sefanaia 2:3?

⁸ A suʻe ane i le tusi o le Tusi Paia o Sefanaia, mataupu e 2, fuaiupu e 2 ma le 3, tatou te faitau ai i le mea o loo manaomia e Ieova mo le faaolataga e faapea: “Manū o lei oo mai le toasa tele o Ieova ia te outou; manū o lei oo mai ia te outou le aso o le toasa o Ieova. Ia outou saili ia Ieova, outou uma ua agamalu i le nuu, o e ua faia lana faamasinoga; ia outou saili le amiotonu, ia outou saili le agamalu, atonu e lilo ai outou i le aso o le toasa o Ieova.” Matau le upu “atonu.” E lē faapea a faasaoina loa, ona faasaoina ai lava lea. O lo tatou lafitaga i lena aso, e faalagolago lea i le faaauau pea ona tatou faia o mea nei e tolu. E tatau ona tatou saili ia Ieova, saili le amiotonu, ma ia saili le agamalu.

9. E faapefea ona tauia i latou o ē saili i le agamalu?

⁹ O le mea moni, e ofoofogia le taui mo le sailia o le agamalu! I le Salamo 37, fuaiupu e 9 e oo i le 11, tatou te faitau ai faapea: “O e faatalitali ia Ieova, o i latou lava ia e fai mo latou le nuu. E toe itiiti, ona leai lea o le tagata amio leaga; . . . A o e agamalu, e fai mo latou le nuu; e faafiafia foi i latou ia te i latou ona o le manuia e tele.” Ae faapefea le sailia o le amiotonu? Ua taʻua i le fuaiupu e 29: “E fai lava le nuu mo tagata amiotonu, e nonofo ai pea i latou.” Ae mo le sailia o Ieova, ua taʻu mai ia i tatou e le fuaiupu e 39 ma le 40: “O loo mai ia Ieova le faaolataga o e amiotonu; o ia lava lo latou malosi i ona po o le puapuaga. E fesoasoani foi Ieova ia te i latou, ma laveai ia te i latou; e laveaiina lava i latou e ia ai tagata amio leaga, na te faaolaina foi i latou, auā ua latou faatuatua ia te ia.”

10. O ai ua matauina i lo latou mumusu e saili ia Ieova ma saili i le agamalu?

¹⁰ Ua lē taulau i lotu a Kerisinetoma ona saili ia Ieova. Ua faafitia foi e o latou taʻitaʻi lotu lona suafa tautele, i le fiapopoto ma aveesea ai mai a latou faaliliuga o le Tusi Paia. E sili atu ia i latou le tapuai i se Alii po o se Atua e leai se igoa ma faaaloalo i se Tolutasi faapaupau. E lē gata i lena, e lē o sailia e Kerisinetoma le amiotonu. O le toatele o ona tagata lotu o loo faaaogāina pe lagolagoina tifiga o le olaga e lē faatuaoia. Na i lo le sailia o le agamalu e pei ona faia e Iesu, ua latou faia ni faiga faaalialia vale, mo se faaaʻoaʻoga i luga o televise, i olaga soonafai ma amioga lē mamā e pei ona masani ai. O loo fafagaina e taʻitaʻi lotu i latou lava i tupe maua a a latou lafu mamoe. Ua taʻua i upu a le Iakopo 5:5, o loo latou “nonofo i le [lalolagi] ma le sololelei, ma le fiafia i la le tino.” A o lalata tele mai le aso o Ieova, e mautinoa o le a latou iloa ai le faatatauina o nei upu faagaeeina ia i latou: “E le aoga le oloa i le aso o le toasa.”—Faataoto 11:4.

11. O ai le tagata o le agasala, ma ua faapefea ona ia faafaupuʻeina le anoanoai o toto masaa?

¹¹ I le uluai senituri T.A., e pei ona faamatala atu e le aposetolo o Paulo i lana tusi lona lua i tagata Tesalonia, sa faateʻia ai nisi o Kerisiano, i le manatu faapea na oo atu le aso o Ieova ia i latou i lena taimi. Peitai, sa lapatai atu Paulo e faapea, e tatau ona oo muamua mai le faaaposetasi sili, ma seʻi faaalia mai “le tagata o le agasala.” (2 Tesalonia 2:1-3) Ma, i lenei 20 senituri, tatou te talisapaia le mamao ua oo mai ai le faaaposetasi atoa ma le agasala o taʻitaʻi lotu a Kerisinetoma i luma o fofoga o le Atua. I le gasologa o nei aso e gata ai talu mai le 1914, ua faafaupuʻeina ai e taʻitaʻi lotu le anoanoai o toto masaa e ala i le lagolagoina o taua. (Ioelu 3:10) Ua faaauau foi ona latou aʻoaʻoina aʻoaʻoga sese, e pei o le mauaina o se solu faaletagata e lē mafai ona oti, pulekatolio, faapuapuagatia i le afi i hele, papatisoga o pepe, le Tolutasi, ma isi aʻoaʻoga faapena. O fea la o le a latou tutū ai pe a faaooina mai e Ieova lana faasalaga faafaamasinoga? Ua faapea mai le Faataoto 19:5: O “le ua tala pepelo, e le sao lava ia.”

12. (a) O ā “lagi” ma le “lalolagi” faaletagata ua toeitiiti faaumatiaina? (e) O le ā ua tatou aʻoaʻoina e uiga i le faaumatiaga o loo fotuai mai o lenei lalolagi?

¹² I le 2 Peteru 3:10, tatou te faitau ai faapea: “A e sau le aso o [Ieova] pei o se gaoi i le po, e mavaeeseina ai le lagi ma le gogolo tele, e teʻa eseese ai foi o mea na fai aʻi ina ua mu; o le lalolagi foi ma galuega o i ai e susunuina lava.” O le a tafiesea mai le lalolagi a le Atua, pulega uma o loo faamalumalu mai e pei o ni lagi i luga o le fanau a tagata, faatasi ai ma mea uma o loo fai aʻe ai le sosaiete faamaʻia a tagata i aso nei. O falegaosimea ma ē faatauina atu auupega o taua, o ē matapeapea i tupe, o tagata lotu pepelo ma o latou taʻitaʻi lotu, o ē lagolagoina faiga faapiʻopiʻo, sauā, ma solitulafono—o i latou uma na o le a tafiesea. O le a liu suavai i latou i le toasa o Ieova. Ae i le fuaiupu e 11 ma le 12, o loo faaopoopo mai ai e Peteru lenei lapataiga mo Kerisiano: “O lenei, o le a teʻa eseese nei mea uma, pe faapefea la outou amio e tatau ai i le amio lelei ma le amio Atua; o loo faatalitali ma naunau atu ia aulia mai le aso o [Ieova].”

Ua Gaoioi Mekaeli!

13, 14. O ai Lē sili na te taʻumamāina le pulega a Ieova, ma ua faapefea ona ia gaoioi talu mai le 1914?

¹³ O le a faapefea ona sao mai so o se tasi i le “aso o le puapuaga” a Ieova? O le Sui a le Atua mo le sauniunia o le faasaoina, o le agelu sili lea o Mekaeli, o le uiga o lona suafa “O Ai e Pei o le Atua?” Ua fetaui lelei ai, auā o Ia lea na te taʻumamāina le pulega a Ieova, ma faaeaina Ieova o le Atua moni e toatasi ma o le Alii Pule Silisiliese amiotonu o le vateatea aoao.

¹⁴ Maeu ni mea mataʻina na tutupu ua faamatala mai e le Faaaliga mataupu e 12, fuaiupu e 7 e oo i le 17, e uiga i le “aso o le Alii” talu mai le 1914! (Faaaliga 1:10) Na lafo ifo e le agelu sili o Mekaeli Satani fouvale mai le lagi i le lalolagi. Mulimuli ane, e pei ona faamatala mai i le Faaaliga mataupu e 19, fuaiupu e 11 e oo i le 16, o lē ua taʻua o le “Faamaoni ma le Moni,” ‘na te solia le soligāvine o le toasa mamafa o le Atua e ona le malosi uma lava.’ Ua taʻua lenei fitafita malosi faalelagi o le “Tupu o tupu ma le Alii o alii.” I le faaiʻuga, ua taʻu mai ai e le Faaaliga mataupu e 20, fuaiupu 1 ma le 2, e uiga i se agelu sili o lē na ia lafoina ifo Satani i le tō e lē gata ma taofia ai i inā mo tausaga e afe. Ua manino mai la, o nei mau uma o loo faasino atu i Lē na te taʻumamāina le pule silisiliese a Ieova, o le Alii o Iesu Keriso, o lē na faanofotupuina e Ieova i lona nofoalii mamalu faalelagi i le 1914.

15. I le ā le auala faapitoa ua toeitiiti ona “tulai” ai lea o Mekaeli?

¹⁵ E pei ona taʻua i le Tanielu 12:1, ua “tulai” Mekaeli e fai ma sui o tagata o Ieova talu mai lava ona tofia o ia o le Tupu i le 1914. Peitai, ua toeitiiti nei ona “tulai” loa lea o Mekaeli i se uiga e sili ona faapitoa—e fai ma Sui o Ieova i le aveeseina o amioga leaga uma mai le lalolagi ma avea ai ma Faaolataga o le sosaiete o tagata o le Atua i le lalolagi atoa. O le mataʻutia o na “aso vale” ua faaalia lea i upu a Iesu i le Mataio 24:21, 22 e faapea: “O ia ona po e oo ai le puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli. A le faapuupuuina foi ia aso, e le faaolaina se tasi; a e faapuupuuina ia aso ona o e ua filifilia.”

16. O ai tagata o le a faasaoina i le taimi o le puapuaga tele?

¹⁶ Maeu lo tatou fiafia ona o le a iai ni tagata e faaolaina i lena taimi! Leai, e lē o ni tagata e pei o tagata fouvale o Iutaia o ē na maileia i Ierusalema i le 70 T.A., lea na avea ai nisi o i latou e pei o ni pologa i Roma. Na i lo lena, o i latou o ē faasaoina i “le taimi o le iʻuga” o le a pei o le faapotopotoga Kerisiano lea sa muai sosola ese mai Ierusalema a o leʻi amata le osofaiga mulimuli. O le a avea i latou ma tagata o le Atua, le faitau miliona o le motu o tagata e toatele faatasi ma so o se tasi o ē faauuina atonu o le a totoe ai pea i le lalolagi. (Tanielu 12:4) O loo “o mai nai le puapuaga tele” le motu o tagata e toatele. Aiseā? Auā “ua ta foi o latou ofu, ma ua faasinasinaina o latou ofu i le toto o le Tamai mamoe.” Ua latou faaalia le faatuatua i le malosi faatogiola o le toto masaa o Iesu ma ua faaalia lena faatuatua e ala i le auauna ma le faamaoni i le Atua. E oo foi i le taimi nei, ua faasalafa atu e Ieova, o “lē tietie . . . i le nofoālii,” lona fale fetafai e puipuia ai i latou, a o leoleoina ma taʻitaʻia atu i latou i puna o vai ola, e le Tamai Mamoe, o Iesu Keriso.—Faaaliga 7:14, 15.

17. Ua faapefea ona faalaeiauina patino le motu o tagata e toatele e gaoioi ina ia lilo ai i le taimi o aso vale?

¹⁷ I le sailia o Ieova, le amiotonu, ma le agamalu, e lē tatau lava i le faitau miliona o le motu o tagata e toatele ona tuua lo latou uluai alofa mo le upu moni ina ia maalili! Afai o oe o se tasi o nei tagata e pei ni mamoe, o le ā e tatau ona e faia? E pei ona taʻua i le Kolose mataupu e 3, fuaiupu e 5 e oo i le 14, e tatau ona e ‘toeseina atoatoa le tagata tuai atoa ma ana amio.’ Ia sailia le fesoasoani mai le Atua, ma taumafai e ‘faaofuina oe lava i le tagata fou, e faavae i le poto saʻo.’ I le agamalu, ia atiina aʻe ma faatumauina le maelega i le viiaina o Ieova ma i le faalauiloaina atu o ana fuafuaga silisili i isi. O lea, atonu o le a lilo ai oe i “aso vale,” le aso o “le toasa tele o Ieova.”

18, 19. I le ā le auala e matuā tāua ai le tumau ina ia faaolaina ai?

¹⁸ Ua latalata mai lena aso! O loo faanatinati mai ia i tatou. Pe tusa nei o le 57 tausaga talu ona faasolosolo pea le aoaoina o tagata o le motu o tagata e toatele. Ua maliliu le toatele o i latou ia ma o loo faatalitali mo lo latou toetutū. Peitai, ua faamautinoa mai ia i tatou e le valoaga a le Faaaliga e faapea o le a ō mai le motu o tagata e toatele o se vaega nai le puapuaga tele e fai ma faavae o le sosaiete o “le lalolagi fou.” (Faaaliga 21:1) Po o le a e iai ea i inā? E mafai ona e iai, auā ua fetalai mai Iesu i le Mataio 24:13: “O lē tumau seia oo i le gataaga, e faaolaina lea.”

¹⁹ Atonu o le a faafaupuʻe mai pea puapuaga ua oo i tagata o Ieova i lenei faiga tuai o mea. Ma atonu foi o le a e mafatia i ni faigatā, pe a pa mai le puapuaga tele e sili ona mataʻutia. Peitai, ia pipii mau pea ia Ieova ma lana faalapotopotoga. Ia mataala pea! “Ia outou faatalitali ia te au, o loo fetalai mai ai Ieova, ia oo i le aso ou te tulai atu ai i le vete; auā ua tonu ia te au e faapotopotoina nuu ese, e aofia lava malo; ina ia sasaa atu i luga ia i latou loʻu ita, o loʻu ita tele uma lava; auā e faaumatia le lalolagi uma i le afi o loʻu fuā.”—Sefanaia 3:8.

20. A o lalata tele mai le faaiʻuga o “aso vale,” o le ā e tatau ona tatou faia?

²⁰ Mo lo tatou puipuiga ma le faalaeiauga, ua sauniunia ai ma le alofa e Ieova ‘se gagana mamā’ mo lona nuu, lea ua aofia ai le feau silisili o lona Malo o loo fotuai mai, “ina ia latou valaau uma lava i le suafa o Ieova, ma auauna ia te ia ma le loto gatasi.” (Sefanaia 3:9) A o leʻi faapea le lalata tele mai o le faaiʻuga o “aso vale” e pei ona iai muamua, talosia ia tatou fesoasoani atu i isi o ē agamalu ‘ina ia valaau atu i le suafa o Ieova’ mo le faaolataga.

O E Manatua?

◻ O le ā le gaoioiga a Ieova e muamua a o leʻi aumaia le filemu i le lalolagi?

◻ E tusa ai ma Ioelu, o le ā e tatau ona tatou faia ina ia faasaoina ai?

◻ E tusa ai ma Sefanaia, e mafai faapefea ona maua e ē agamalu le puipuiga mai le toasa aasa o Ieova?

◻ O ai “le tagata o le agasala,” ma ua faapefea ona ia faafaupuʻeina le toto masaa?

◻ E tāua faapefea le tumau ina ia faasaoina ai?