Lipoti a Ē Faalauiloa le Malo

Faamanuiaina Tamaiti Aʻoga i Nigeria ona o le Faamaoni

NA TUSI le aposetolo o Paulo: “Afai e mafaia ia te outou, ia outou nofo lelei ma tagata uma lava.” (Roma 12:18) Ua faatatauina e tamaiti aʻoga o Molimau a Ieova i Nigeria lenei fautuaga, e tusa lava pe sa sauāina ai i latou. O le iʻuga, ua faamanuia i latou e Ieova.

◻ O se tasi o faiaʻoga sa matuā lē fiafia lava i Molimau a Ieova. A o faia le laina a tamaiti e amata ai le aʻoga i se tasi taeao, sa ia valaaulia tamaiti Molimau uma i luma ma faatonuina i latou ina ia usu le vii o le fuʻa a le malo. Sa mumusu i latou, ma taʻu atu faapea latou te mananao e avatu le tuutoina atoatoa i le Atua. Ona ave lea o i latou uma lava e le faiaʻoga i fafo ma faatonu i latou ina ia sasa le vao. O le taimi lea, o loo faaauau ai pea isi tamaiti i a latou vasega.

Na alu atu se Molimau matua ma le polosiua Aʻoga ma Molimau a Ieova i le faiaʻoga, ma faamatala atu i ai le tulaga solitu o Molimau a Ieova. Ae peitai, sa musu le faiaʻoga e talanoa i le mataupu pe talia foi le polosiua. O le mea moni, sa ia faamamafaina loa faasalaga o tamaiti.

Sa onosaia pea e Molimau talavou lenei faasalaga ma faaauau ona sasa le vao e tusa lava pe sa lē iai le faiaʻoga. I se tasi aso, na lafi ai le faiaʻoga ma na ia faatagā lē matauina tamaiti a o faaauau pea ona latou galulue ma usu pese o le Malo. Sa matuā maofa lava o ia, o lea na ia aauina atu ai i latou i a latou vasega, ma faaalia le matuā maofa i o latou uiga faaalia. O le ā na iʻu i ai? Ua faia nei se suesuega faale-Tusi Paia a le faiaʻoga ma Molimau a Ieova!

O le mea moni, sa faamanuiaina nei tamaiti aʻoga ona o lo latou faamaoni ia Ieova ma ana mataupu silisili.—Faataoto 10:22.

◻ Sa faamanuiaina foi Ruta ma ana uo ona o lo latou faamaoni i le finagalo o Ieova ina ia aua neʻi avea i latou “o ni o le lalolagi.” (Ioane 17:16) O Ruta, o lē ua 18 tausaga, na amata ona paeonia ina ua 12 ona tausaga. Sa fetaiaʻi o ia ma isi molimau ma teteega mai sui sinia o le aʻoga ona o le lē usu i le vii o le fuʻa a le malo. Na talosaga atu se faiaʻoga e fia vaai i mātua o teine. Ina ua uma ona latou avatu se faamalamalamaga, na faaaogā ai le polosiua o Aʻoga, sa faamalieina le faiaʻoga ma lē toe faatupuina ni faalavelave mo tamaiti aʻoga.

Ae peitai, i se tasi aso, na fai ai e se faiaʻoga mai Initia ni upu faalumaluma ma faasala se tasi o teine i luma o le vasega ina ua lē usu i le vii o le fuʻa. Sa puipuia pea ma le faamalosi e le teine lona faatuatuaga ma na avatu ai o ia e le faiaʻoga i le pule aʻoga. Ina ua taunuu atu i inā, sa iloa ai e le teine o loo iai foi ma le sui pule. Sa matuā ofo tele o ia, ona sa amata ona toē mai le pule ma le sui pule. I le liliu atu i le faiaʻoga, na faapea atu le tamaitai pule aʻoga: “Tamaitai, aua neʻi faapopoleina oe ona o teine nei. E tusa lava pe e te fasiotia i latou, e sili atu ia i latou le oti na i lo le usu i le vii o le fuʻa a le malo. E te leʻi faalogo lava e uiga ia i latou?” Ona talanoa loa lea o le pule ma le sui pule e uiga i le faatuatua ma le loto tetele o Molimau a Ieova. Ina ua talanoa atu i le teine, na faapea atu le pule sa ia faanoanoa lava ona o le faalumaina ua faia ia te ia. Na faaopoopo atu le tamaitai pule: “Ia faaauau pea i au galuega o le faatuatua. Ou te viia lau lotu ma lou tumau ma le lototele e lē gata i fafo ae i inei foi i le aʻoga.” Mulimuli ane, na faatoese atu le faiaʻoga o lē na tetee i le Molimau, i le faapea atu o lea ua ou malamalama nei i le tulaga solitu ua faia e Molimau.

Sa mulimuli nei tamaiti i le faaaʻoaʻoga a Eperu e toatolu o ē na lē mafai ona gausia lo latou faamaoni i le Atua e ala i le ifo i se tupua, faapea foi ma Tanielu, o lē na musu e taofia le tatalo atu ia Ieova. Sa faamanuiaina nei tane e Ieova ona sa latou faamaoni i tulafono amiotonu a le Atua.—Tanielu, mataupu e 3 ma le 6.