Mulimuli i le Ala Silisili o le Alofa

O IEOVA LE ATUA o le faaaliga moni o le alofa. (1 Ioane 4:8) Na fetalai lona Alo, o Iesu Keriso faapea, e ao ona tatou alolofa i le Atua ma o tatou tuaoi. (Mataio 22:37-40) O le mea moni, ua faagaoioia e le Atua le lagi ma le lalolagi aoao e faavae i lenei uiga! O lea, ina ia ola e faavavau i so o se mea, e tatau lava ona tatou mulimuli i le ala o le alofa.

Sa faaalia e le Atua le alofa mo le nuu o Isaraelu, ae na ia teena mulimuli ane lena faalapotopotoga ona o le lē faamaoni. Ona ia faailoa mai lea o le faapotopotoga o soʻo o Iesu e avea o Lana faalapotopotoga fou. Faapefea? E ala i faaaliga faapitoa a le agaga paia e faamalosia ai i latou e tautala i gagana ese ma perofeta ane ai. O lea, i le Penetekoso i le 33 T.A., e 3,000 tagata Iutaia ma tagata fou na oo ina talitonu ma latou tuua le faalapotopotoga tuai mo le faalapotopotoga fou a le Atua. (Galuega 2:1-41) Ona o meaalofa a le agaga paia na tuuina atu mulimuli ane e ala i aposetolo o Iesu, o na la faaaliga, na faagata ina ua maliliu le au aposetolo. (Galuega 8:5-18; 19:1-6) Ae talu mai lena taimi, o na meaalofa na faamaonia ai le fiafia o le finagalo o le Atua i le Isaraelu faaleagaga.—Kalatia 6:16.

Sa aogā vavega na faia ona o meaalofa mai le agaga paia. Ae peitai, o le faaalia o le alofa po o le lē manatu faapito mo isi, e sili atu lona tāua na i lo o le maua o meaalofa mai le agaga. Na faaalia e le aposetolo o Paulo lenei mea i lana uluai tusi i tagata Korinito (pe tusa o le 55 T.A.). I lana tusi, na ia tautala ai e uiga i le alofa e avea o le “ala e silisili lava.” (1 Korinito 12:31) O lena ala o loo talanoaina i le 1 Korinito mataupu e 13.

A Leai se Alofa, ua Lē Aogā i Tatou

Sa manatu Paulo faapea: “Afai ou te tautala i gagana a tagata atoa ma agelu, a e leai soʻu alofa, ua avea aʻu ma ʻapa memea taalili, po o se sumepalo tagitagi.” (1 Korinito 13:1) A leai se alofa, o lona uiga e leai se aogā e tautala ai i se gagana a tagata na tuuina mai e le agaga po o se gagana a agelu i le lagi. Sa filifilia e Paulo e tautala i ni upu se lima e faatonu ai na i lo o ni upu e sefuluafe o se gagana sa lē malamalama ai tagata. (1 Korinito 14:19) O se tagata e aunoa ma le alofa o le a pei “o se ʻapa memea taalili”—o se paʻō leoleoā e faaoso ita—po o se “sumepalo tagitagi,” e paʻō vale. O le tautala i gagana e aunoa ma le alofa, sa lē o se auala e faamālūina ma atiina aʻe ai faaleagaga e viia ai le Atua ma fesoasoani ai i ona tagata. I aso nei, tatou te faaalia le alofa e ala i le faaaogāina o tautalaga e faigofie ona malamalama i ai i le faiva faa-Kerisiano.

Ona sosoo ai lea ma le faapea mai o le aposetolo: “Afai foi o ia te au ona perofeta ane, ma le iloa o mea lilo uma, ma le poto uma lava; afai foi o ia te au le faatuatua uma e ave ese ai mauga, a e leai soʻu alofa, ou te le aoga lava.” (1 Korinito 13:2) O perofeta ane faavavega, ma le tautala faapitoa i mealilo paia, ma le poto mai le agaga paia, atonu e maua ai e nisi ni aogā, ae e lē maua e i latou o loo iai na meaalofa pe afai sa leai se alofa o i latou na tuuina atu i ai ia meaalofa. Sa faaaogā e Paulo se malamalamaga faapitoa o mealilo paia e fesoasoani ai i isi, ma ona o se meaalofa o le poto na mafai ai ona ia valoia le faasaoina o tagata na lavevea i le vaa na āfatia. (Galuega 27:20-44; 1 Korinito 4:1, 2) Ae afai sa ia te ia ‘le poto uma lava ma le faatuatua uma’ ae e leai se alofa, semanū o le meanoa o ia i fofoga o Ieova.

I aso nei, ona o le agaga o Ieova ua mafai ai e ana Molimau ona malamalama i valoaga o le Tusi Paia ma mealilo paia, ma ua taʻitaʻiina ai i latou e tufaina atu lena poto i isi. (Ioelu 2:28, 29) O le agaga foi e fua mai ai le faatuatua manaomia e aveesea ai toʻatugā e pei o ni mauga. (Mataio 17:20) Talu ai ona e faia e le agaga nei mea, o se mea sese tele la le sailia ai o viiga faaletagata mai na mea. E leai so tatou aogā seʻi vagana ua tatou faia mea mo le viiga o le Atua faatasi ma le alofa mo ia ma uso a tagata.—Kalatia 5:6.

E Lē Aogā se Taulaga e Faia, ae e Leai se Alofa

Na faapea mai Paulo: “Afai foi ou te tufatufaina aʻu mea uma e fagaina aʻi e matitiva; afai foi ou te tuuina atu loʻu tino ina ia susunuina, a e leai soʻu alofa, e leai lava sona aoga ia te au.” (1 Korinito 13:3) Ana leai se alofa ia Paulo, semanū e leai se aogā na te avatu ai ana mea uma sa ia te ia e fafaga ai isi. E tauia i tatou e le Atua mo le alofa lea o loo avatu ai a tatou meaalofa, ae e lē ona o lo latou tāua faaletino po o lo tatou sailia ai o ni viiga o ni ē foai atu, pei o Anania ma Safaira o ē tala pepelo. (Galuega 5:1-11) Sa faataatia e Paulo se faaaʻoaʻoga lelei e ala i le foai atu ma le alofa o ia lava ina ia avatua ai le faiva o le mapusaga mo tagata talitonu i Iutaia.—1 Korinito 16:1-4; 2 Korinito 8:1-24; 9:7.

E oo lava i sē e fasiotia faamaturo e avea o se molimau i le upu moni ae a aunoa ma le alofa, e lē aogā lea i le Atua. (Faataoto 25:27) Sa talanoa Iesu e uiga i lana taulaga, ae na leʻi gugutu pe mimita ai. Na i lo o le gugutu ai, sa ia foaiina atu o ia lava ma le loto malie ona o le alofa. (Mareko 10:45; Efeso 5:2; Eperu 10:5-10) O ona uso faaleagaga na ‘tuuina atu o latou tino o le taulaga ola’ i le auaunaga a le Atua, ae e lē o se tulaga faamaturo e viiviia ai i latou lava, ae i ni auala e lē taualoa e faamamaluina ai Ieova ma faatino ai lo latou alofa mo ia.—Roma 12:1, 2.

Nisi o Auala o le a Faagaoioia ai i Tatou ona o le Alofa

Na tusi Paulo faapea: “E onosai ma agalelei le alofa.” (1 Korinito 13:4a, “NW”) Mo le toatele, o le uiga o le onosai o le Atua mo i latou talu mai le agasala a Atamu, o le salamō e taʻitaʻiina atu ai i le faaolataga. (2 Peteru 3:9, 15) Afai e ia i tatou le alofa, o le a tatou aʻoaʻo ai ma le onosai isi i le upu moni. O le a tatou alofia le faapasae atu o faalogona ootia ma o le a magafagafa ma faamagalo. (Mataio 18:21, 22) O le alofa e agalelei foi, ma ua tosina atu i tatou i le Atua ona o lona agalelei. O le fua o Lona agaga o le agalelei o le a taofia ai i tatou i le faatalitalia o isi e faia mea e sili atu na i lo o mea o finagalo ai Ieova ia i tatou. (Efeso 4:32) O le alofa e oo lava ina uunaia ai i tatou ia agalelei atu i tagata lē loto faafetai.—Luka 6:35.

Na faaopoopo mai Paulo: “E lē loto leaga le alofa, e lē gugutu, e lē faafefeteina.” (1 Korinito 13:4e, “NW”) O le loto leaga o se galuega a le tino e mafai ona aveesea ai se tasi mai le Malo o le Atua. (Kalatia 5:19-21) O le alofa e taofia ai i tatou mai le loto leaga i le mauaina o mea e se tasi po o ni tulaga manuia. Afai na te maua se faaeaga o le auaunaga lea na tatou faanaunau i ai, ona o le alofa, o le a tatou olioli ai faatasi ma ia, tuu atu ai ia te ia la tatou lagolagosua, ma faafetai i le Atua ua mafai ona faaaogāina o ia e maua ai e le faapotopotoga ni aogā.

Ona o le alofa “e lē gugutu,” na te lē uunaia i tatou ina ia gugutu i mea ua tuu mai e le Atua ia i tatou e fai i lana auaunaga. Sa gugutu nisi tagata Korinito e peiseai o i latou na faapogaia meaalofa a le agaga, ae semanū o na mea e mai i le Atua, e faapena foi faaeaga i lana faalapotopotoga i aso nei. Na i lo o le gugutu e uiga i o tatou tulaga i le faalapotopotoga a le Atua, seʻi o tatou faaeteete ina neʻi o tatou paʻūū. (1 Korinito 1:31; 4:7; 10:12) O le alofa “e lē faafefeteina,” ae i le mafaufau o se tagata e lē alofa atonu ua fefete i le fia faatāuaina o ia lava. O tagata alolofa, e lē ia i latou le lagona faapea e sili i latou i lo o isi.—1 Korinito 4:18, 19; Kalatia 6:3.

E Lē Amio Matagā, e Lē Manatu Faapito, e Lē Itaitagofie

O le alofa “e le amio matagā, e le sailia e ia ana lava mea, e le faaitaitagofie.” (1 Korinito 13:5a) O le alofa na te siitia amioga lelei, amioga faaleatua, le faaaloalo mo le pule, ma e lē amio matagā i sauniga faa-Kerisiano. (Efeso 5:3-5; 1 Korinito 11:17-34; 14:40; faatusatusa i le Iuta 4, 8-10.) Ona o le alofa e oo ai i tagata uma le lagona o loo manaomia i latou, e pei o vaega uma o le tino o le tagata, o se faapotopotoga e alolofa o se nofoaga lea o le filemu ma o se lafitaga foi. (1 Korinito 12:22-25) Na i lo o le manatu faapito e ‘vaavaai mo lona lava lelei,’ o le alofa na te uunaia i tatou e faataulaga a tatou aiā i nisi taimi ae e faaalia le alofa naunau i isi ma mo lo latou lelei. (Filipi 2:1-4) O le alofa ua faia ai i tatou ‘ma mea uma mo tagata uma lava, ina ia mafai ona tatou faaolaina nisi’ e ala i la tatou faiva.—1 Korinito 9:22, 23.

O le alofa “e le faaitaitagofie.” O le oso vave o le ita o galuega na a le tino agasala, ae o le alofa ua ‘faagesegese ai lo tatou ita.’ (Iakopo 1:19; Kalatia 5:19, 20) E tusa lava pe saʻo le mea ua tatou ita ai, ae e l ē faatagaina e le alofa le tumau ona tatou ita, auā o le faia faapea ua tuuina atu ai se nofoaga mo le Tiapolo. (Efeso 4:26, 27) Ae maise lava e tatau i le au toeaina ona alofia le ita pe afai ua le taulau i uso talitonu ona faatino ni fautuaga na tuuina atu.

Na faapea mai foi Paulo e uiga i le alofa: “E le tuuina atu i nisi le leaga.” (1 Korinito 13:5e) O le alofa, na te lē manatua pe faia ni faamaumauga o ni mea sese, e pei o le faamauina o se aitalafu. O le alofa e vaai i mea lelei i uso talitonu ma e lē taui atu i mea sese po o mea ua manatu i ai e sese. (Faataoto 20:22; 24:29; 25:21, 22) O le alofa ua fesoasoani ia i tatou e “tausisi i mea e tupu ai le filemu.” (Roma 14:19) Sa iai se feeseeseaiga ia Paulo ma Panapa ma na alu ai le tagata i lona lava ala i le auaunaga a le Atua, ae o le alofa na fofō ai le faafitauli ma taofia ai i laua mai le iai pea o se loto matauʻa.—Levitiko 19:17, 18; Galuega 15:36-41.

E Fiafia i le Amiotonu ma le Upu Moni

E faatatau i le alofa, na faaauau ona faapea mai Paulo: “E lē fiafia i le amioletonu, ae e fiafia i le upu moni.” (1 Korinito 13:6, “NW”) O nisi e faapena ona fiafia i le faia o le amioletonu, o lea “latou te le momoe [ai], seʻi iloga ua latou faia se mea leaga.” (Faataoto 4:16) Ae i le faalapotopotoga a le Atua, tatou te lē tauvā pe olioli foi le tasi i le isi pe afai ua maileia se tasi i le agasala. (Faataoto 17:5; 24:17, 18) Ana faapea sa lava le alofa mo le Atua ma le amiotonu i le faapotopotoga i Korinito, semanū e lē talia le faia o amioga lē mamā i inā. (1 Korinito 5:1-13) Faatasi ai ma isi mea, o le alofa mo le amiotonu ua taofia ai i tatou mai le fiafia i televise, ata tifaga, po o tifaga e faaatagia ai le amioletonu.

O le alofa e “fiafia i le upu moni.” I inei o le upu moni ua faia ai se faaeseesega ma le amioletonu. O le uiga moni o lenei mea e faapea, o le alofa ua faapogaia ai i tatou e olioli i taaʻiga mo le amiotonu lea ua faia e le upu moni i tagata. Tatou te maua le olioli i mea e atiina aʻe ai tagata ma faaauiluma ai le ala o le upu moni ma le amiotonu. O le alofa ua na puipuia i tatou mai le faia o tala pepelo, tatou te lagona ai le olioli pe a taʻumamāina ē amio saʻo, ma faapogaia ai lo tatou olioli pe a manumalo le upu moni a le Atua.—Salamo 45:4.

Le Auala e Feagai ai le Alofa ma Mea Uma

I le faaauauina o lana faamatalaga o le alofa, na tusi mai Paulo e faapea: “E ufiufi i mea uma, e talitonu i mea uma, e faamoemoe i mea uma, e onosai i mea uma.” (1 Korinito 13:7) Ona o le “ufiufi i mea uma,” e teena ai e le alofa le ita, e pei ona faia e se taualuga lelei i le timu. Afai e faatiga mai se tasi ia i tatou ma toe talosaga mai mo se faamagaloga, ona o le alofa tatou te ufiufi ai i le mea sese, ma faamagalo le tagata na faatiga mai na i lo o le faitatala solo e uiga i mataupu. O le alofa tatou te taumafai ai ina ia ‘maua lo tatou uso.’—Mataio 18:15-17; Kolose 3:13.

O le alofa “e talitonu i mea uma” o i le Afioga a le Atua ma tatou matuā loto faafetai ai mo meaʻai faaleagaga na saunia e ala i le “auauna faamaoni ma le mafaufau.” (Mataio 24:45-47) E ui lava e lē oolegofieina i tatou, ae o le alofa e puipuia ai i tatou mai i le iai o se loto lē talitonu ma taofia ai i tatou mai le tuuaʻia o uso talitonu i le faia o mea leaga. (Failauga 7:21, 22) O le alofa foi “e faamoemoe i mea uma” o loo faamauina i le Tusi Paia, e pei o upu moni faatatau i le Malo o le Atua. I le uunaia i le alofa, tatou te faamoemoe ai ma tatalo mo se iʻuga sili ona lelei i tulaga e tofotofoina ai. O le alofa foi e uunaia ai i tatou e taʻu atu i isi le pogai mo lo tatou faamoemoe. (1 Peteru 3:15) E faaopoopo i ai, o le alofa “e onosai i mea uma,” e aofia ai ma agasala faasaga ia i tatou. (Faataoto 10:12) O le alofa mo le Atua, e fesoasoani foi ia i tatou e onosaia sauaga ma isi tofotofoga.

Na faaopoopo mai Paulo: “E le uma le alofa.” (1 Korinito 13:8a) E lē mafai ona uma pe lē taulau foi le alofa e pei ona faia e Ieova. Ona o lo tatou Atua e faavavau o le alofa moni o ia, e lē mafai ai ona uma lenei uiga. (1 Timoteo 1:17; 1 Ioane 4:16) O le a pulea pea le lagi ma le lalolagi e le alofa. O le mea lea, seʻi o tatou tatalo ina ia fesoasoani mai le Atua ia i tatou i le foia o uiga manatu faapito ma ia faaalia lenei fua e lē uma o lona agaga.—Luka 11:13.

Mea o le a Mavae Atu

I le faasino atu agaʻi i luma, na tusi ai Paulo: “A e pe ni [meaalofa] o perofetaga, e faaleaogaina ia; pe ni gagana, e mavae ia; po o le poto, e faaleaogaina lea.” (1 Korinito 13:8e) O ‘meaalofa o perofetaga’ ua mafai ai e i latou o iai ona faailoa atu valoaga fou. E ui lava ua mavae atu na meaalofa ina ua uma ona faavaeina le faapotopotoga Kerisiano e avea ma faalapotopotoga a le Atua, ae o lona mana e faia ai valoaga, e lē mafai ona mavae ese, ma o loo i lana Afioga valoaga uma o loo tatou manaomia i le taimi nei. Ua lē o toe maua foi le tomai na tuuina mai e le agaga e tautala ai i gagana ese, ma o le poto faapitoa “e faaleaogaina ia,” e pei ona valoia. Ae o le Afioga atoatoa a Ieova ua aumaia ai pea mea e manaomia ona tatou iloa mo le faaolataga. (Roma 10:8-10) E lē gata i lea, ua faatumuina tagata o le Atua i lona agaga ma fuaina mai ai ona fua.

Ua faaauau mai Paulo: “Auā ua tatou iloa faaleatoa, ma tatou perofeta faaleatoa; a e peitai pe a oo mai le atoatoa, ona faaleaogaina lea o le mea faaleatoa.” (1 Korinito 13:9, 10) O meaalofa o le poto ma perofetaga sa lē atoatoa. E foliga mai, o na perofetaga, sa leʻi auiliiliina, ma o perofeta taitoatasi sa na o ni vaega na latou faailoa mai e uiga i le lumanai, sa leai se poto e atoatoa ona lelei e uiga i le mea na ia valoia. Ae peitai, i le taimi nei, o le malamalama e uiga i valoaga, o loo faasolosolo mālie mai i lona atoaga. O se faataʻitaʻiga, o mea moni e uiga i le faataunuuga o valoaga a le Tusi Paia ua faamautinoa mai ai faapea, na maua e Iesu le pule tautupu i luga o le fanau a tagata i le 1914. Talu mai lena taimi, ua tatou ola ai i “ona po o le iuga” ma o loo olioli ai i le faatuputeleina o le poto ma le malamalama faaleagaga o valoaga o le Tusi Paia. (Tanielu 12:4) I lea, o loo tatou agaʻigaʻi atu ai i le poto e atoatoa ona lelei ma ua tatau nei ona lata mai le “atoatoa” o mea.

Ua Tumau le Uiga Silisili

I le faasino atu i le agaʻigaʻi i luma o le faapotopotoga, na tusi ai Paulo faapea: “[O] ona po na ou itiiti ai, na ou tautala ai faatamaitiiti, na ou manatunatu faatamaitiiti, na ou filifili faatamaitiiti; a ua oo ina ou tagata matua, ona ou tiai lea o [uiga o] tamaiti.” (1 Korinito 13:11) Talu ai o se pepe e gaoioi e faavae i le laitiiti o le poto ma le malosi faaletino, e mafai ona taumalua i lea itu ma lea itu, e pei o loo faalue i se moega faalue. Ae o se tagata matua e sili atu lona malosi faaletino, e sili atu lona poto, ma e masani lava ona lē o se mea faigofie ona taumalua pe maluelue. Ua ia aveesea mafaufauga, uiga, ma ala faatamaitiiti. E faapena foi i le faalapotopotoga faalelalolagi a le Atua, ina ua teʻa ma uiga faatamaitiiti, sa filifili ai loa o Ia faapea ua lē o toe manaomia e lena faalapotopotoga ni meaalofa mai le agaga o perofetaga, gagana ese, ma le poto. E ui la ina lagona e sui o le faapotopotoga i aso nei faapea, ua oo i ona tausaga matua, ua iai foi le lagona ua lē toe manaomia na meaalofa, ae ua fiafia i latou e auauna i le Atua i lalo o le taʻitaʻiga a lona agaga.

Na faaopoopo mai Paulo: “Auā o ona po nei tatou te vaavaai faanenefu ai i le faaata, a o ia ona po tatou te fesagai ai; o nei ona po ou te iloa ai faaleatoa, a o ia ona po ou te iloa tino ai, pei ona iloatinoina o aʻu.” (1 Korinito 13:12) I le taimi na fou ai le faapotopotoga, sa lē o le taimi lea a le Atua e faailoa mai ai nisi o mea. I lea, sa latou iloa faanenefu ai e na o se auivi, e pei o vaai Kerisiano i se faaata e lē manino lelei e nenefu le vaai atu i se ata. (Galuega 1:6, 7) Ae ua lē o toe faanenefu nei la la tatou vaai. Ua vaaia manino lava i le taimi nei le faataunuuga, ma ua fesagaʻi tonu lava o tatou mata ma valoaga, auā o le taimi atofa lenei a le Atua mo le faaalia mai. (Salamo 97:11; Tanielu 2:28) E ui ina sa iloa e Paulo lava ia le Atua, ae o le taualuga o le poto o Ieova ma se faiā sili ona vavalalata ma Ia, o le a oo mai pe a toe faatuina le aposetolo i le ola faalelagi, ma i lea o le a maua ai le taui atoatoa o lana auaunaga faa-Kerisiano.

I le faaiʻuina o lana faamatalaga i le tutasi o le alofa, na tusi ai Paulo: “A o lenei, o tumau le faatuatua, ma le faamoemoe, ma le alofa, o na mea e tolu; a o le sili o na mea o le alofa lea.” (1 Korinito 13:13) E ui lava i le leai o ni meaalofa faavavega a le agaga, ae ua iai nei i le faapotopotoga le poto e sili ona atoatoa ma se pogai mo le faatuatua, le faamoemoe, ma le alofa e sili ona mausalī. Ua iai le faatuatua faapea o mea uma na folafola mai e le Atua ua lelei e pei ona ua uma ona faataunuu. (Eperu 11:1) O taualumaga o le faatuatua o le a iʻu i le iloa ai o mea na valoia i le Afioga a le Atua. O vala o le faamoemoe o le a taofia pe a tatou vaaia mea na faamoemoe i ai. A o le alofa e tumau e faavavau. I lea, seʻi tau ina faaauau pea e Molimau a Ieova ona mulimuli uma i le auala sili o le alofa.