Fesili Mai le Au Faitau

Pe e ao ona tatou malamalama mai le Iopu 1:8 faapea i le vaitaimi na ola ai Iopu, sa na o ia lava le tagata na faamaoni ia Ieova?

E leai. E lē saʻo lena faaiʻuga e tusa ai ma le Iopu 1:8, lea e faapea mai:

“Ua fetalai atu Ieova ia Satani, Ua e mafaufau ea i laʻu auauna o Iopu, auā e leai se tasi e tusa ma ia i le lalolagi, o le tagata ua sao lana amio ma le amiotonu, o le ua mataʻu i le Atua, ma ʻaloʻalo ese i mea leaga?” Sa faia e le Atua se fuafuaga faapena i le Iopu 2:3, i le fesili atu ia Satani: “Ua e mafaufau ea i laʻu auauna o Iopu, auā e leai se tasi e tusa ma ia i le lalolagi, o le tagata ua sao lana amio ma le amiotonu, o le ua mataʻu i le Atua, ma ʻaloʻalo ese i mea leaga?”

Ua faaalia i le tusi a Iopu lava ia faapea e lē na o Iopu se tagata ola na talia e le Atua o se tagata faamaoni. E amata i le mataupu e 32, ua tatou faitau ai e uiga ia Eliu. E ui lava ina o se tagata talavou, ae sa faasaʻo e Eliu le sese o le manatu o Iopu ma faaneeneeina ai le Atua moni.—Iopu 32:6–33:6, 31-33; 35:1–36:2.

O lea la, o le fetalaiga a le Atua faapea ‘e leai se tasi i le lalolagi e tusa ma Iopu,’ sa tatau ona uiga faapea, o Iopu sa faapitoa lava lona tulaga ese i le avea o se tagata amio saʻo. Sa faapena ona ola Iopu i le vaitaimi i le va o le maliu o Iosefa i Aikupito ma le amataga o le auaunaga a Mose e avea o se perofeta a le Atua. I lena vaitaimi, sa nonofo ai i Aikupito se aofaiga tele o tagata Isaraelu. E leai la se mafuaaga e manatu ai faapea o i latou uma sa lē faamaoni ma sa lē fiafia i ai le Atua; atonu e toatele i latou o ē na faatuatua ia Ieova. (Esoto 2:1-10; Eperu 11:23) Peitai, e leai se tasi o i latou na faia se vaega lauiloa e pei ona sa faia e Iosefa, e leai foi se tasi o na tagata tapuai sa mataʻina i le tapuaiga moni na faia e pei o Mose i le taʻitaʻiina ese atu o le nuu o Isaraelu mai Aikupito.

O lea, sa ola foi i se isi mea se tagata na mataʻina i lona faamaoni. “Sa i le nuu o Usa le tasi tagata, o lona igoa o Iopu; na sao le amio a lea tagata ma le amiotonu, sa mataʻu foi o ia i le Atua, ma ʻaloʻalo ese i mea leaga.”—Iopu 1:1.

O lea, sa mafai ai ona taʻua e Ieova Iopu o se faaaʻoaʻoga iloga pe mataʻina o le faatuatua ma le tuutoina atu ia te ia. Sa faapena ona faatulaga tutasi mai e tusitala o le Tusi Paia o Esekielu ma Iakopo Iopu o se faaaʻoaʻoga o le amiotonu ma le onosai.—Esekielu 14:14; Iakopo 5:11.