Ia Atiina Aʻe Pea e le Tasi le Isi

“Aua neʻi alu atu se upu leaga ai o outou gutu, na o le upu lelei e ati ae ai.”—EFESO 4:29.

1, 2. (a) Aiseā e mafai ai ona faapea atu o le tautala, o se mea ofoofogia? (e) O le ā le faaeteetega ua alagātatau mo i tatou i le faaaogāina o o tatou laulaufaiva?

“O LE TAUTALA, o se sootaga malosi lea na te fusia faatasi ni uō, aiga, ma ni sosaiete . . . Mai le mafaufau o le tagata ma le galulue faatasi o fesootaiga o musele o le laulaufaiva, ua tatou maua ai leo na e mafai ona faailoa atu ai le alofa, le matauʻa, ma le faaaloalo—o le mea moni, ma so o se faalogona lava faaletagata.”—Hearing, Taste and Smell.

² O lo tatou laulaufaiva, e sili mamao atu na i lo o na o se totoga mo le foloina ma le tofoina o mea; o se vaega lea o lo tatou tomai e fetufai ai mea o loo tatou mafaufau ma lagona ai. Na tusia e Iakopo e faapea: O “le laulaufaiva, o le mea itiiti lea, . . . o lea ua tatou vivii aʻi i le Atua le Tamā, o lea foi ua tatou fetuu aʻi i tagata ua faia e foliga i le Atua.” (Iakopo 3:5, 9) Ioe, e mafai ona tatou faaaogāina o tatou laulaufaiva i ni auala lelei, e pei o le vivii ai ia Ieova. Ae ona o le lē lelei atoatoa, ua faigofie ai lava ona tatou faaaogā o tatou laulaufaiva e tautala ai i upu faatiga po o upu lē aogā. Na tusi mai Iakopo: “Oʻu uso e, e le tusa ona faia faapea o na mea.”—Iakopo 3:10.

3. O ā vala e lua o la tatou tautala e ao ona tatou uaʻi totoʻa atu i ai?

³ Ona e leai se tagata e mafai ona pulea atoatoa lona laulaufaiva, e mautinoa la e tatau ona tatou tauivi ina ia faaleleia lea itu. Ua apoapoaia i tatou e le aposetolo o Paulo: “Aua neʻi alu atu se upu leaga ai o outou gutu, na o le upu lelei e ati ae ai i mea e aoga, e tupu ai le lelei i e faalogologo i ai.” (Efeso 4:29) Ia matau, o lenei sooupu, e lua ona vala: o mea e ao ona tatou taumafai e alofia, ma mea e ao ona tatou taumafai e faia. Seʻi o tatou talanoaina la nei vala uma.

Alofia le Tautala i Upu Leaga

4, 5. (a) O le ā le taua ua faia e Kerisiano e faatatau i upu leaga? (e) O le ā le foliga e ono fetaui i ai le faaupuga “upu leaga”?

⁴ Ua muamua ona uunaia i tatou e le Efeso 4:29 e faapea: “Aua neʻi alu atu se upu leaga ai o outou gutu.” Atonu e lē faigofie lena mea. O se tasi o mafuaaga e faigata ai, ona e taatele nauā le tautala i upu leaga i le lalolagi o loo siomia ai i tatou. E toatele talavou Kerisiano e faalogo pea i upu palauvale i aso uma, ona atonu ua manatu uō i le aʻoga faapea, o le a atili faaopoopo ai le faatāuaina o i latou pe atili ai foi ona foliga mai faapea e sili atu ona latou malolosi. Atonu e lē mafai ona tatou alofia le faalogo pea i upu lē migao, ae e mafai ma e tatau foi ona tatou taumafai ma le loto atoa ina ia aua neʻi taofia i o tatou loto na upu. E lē tatau ona tatou mafaufau i ai pe tautala ai o tatou gutu.

⁵ I le faamamafaina o le lapataiga a Paulo, ua faaaogā ai se upu Eleni e tutusa ma se iʻa elo, po o se fua pala o se laau. Seʻi vaai faalemafaufau i lenei mea: Seʻi faapea ua e matauina se tagata ua lē mafai ona onosai ma ua matuā ita lava. Ma iʻu loa ina faapasae atu lona ita, ona peiseai lea ua e vaai atu i se iʻa ua manogi leaga o sau mai lona gutu. Ona e toe vaai atu lea o toulu mai i fafo fua pala namu leaga, ma ua pisipisi solo i tagata i ona tafatafa. O ai o ia? Pagā le matagā pe ana faapea o ia o se tasi o i tatou! Ioe, e mafai ona faafetaui na foliga ia i tatou pe afai tatou te luai atu ‘ni upu leaga ai o tatou gutu.’

6. Ua faapefea ona faatatau le Efeso 4:29 i upu faitio, e lē aogā?

⁶ O se isi faatatauga o le Efeso 4:29 mo i tatou, ia aloese mai le soona faitio. E moni, e tofu uma lava i tatou ma manatu faaalia ma lagona e uiga i mea tatou te lē fiafia i ai pe lē taliaina, ae, pe na e talanoa ea i se tagata o lē e foliga mai e tautala lava o ia (pe tautala pea) i tala leaga e uiga i tagata uma, nofoaga, po o se tala? (Faatusatusa i le Roma 12:9; Eperu 1:9.) O ana tala e faalotovaivai ai, e faatiga, pe faaumatia ai. (Salamo 10:7; 64:2-4; Faataoto 16:27; Iakopo 4:11, 12) Atonu na te lē o iloaina le telē o lona faaatagiaina o tagata faitio na o loo faamatalaina mai e Malaki. (Malaki 3:13-15) Pagā le faateʻia ai o ia pe afai e taʻu atu e se tagata o loo tu i ona tafatafa e faapea, ua toulu mai i lona gutu se iʻa ua manogi leaga po o se fua pala namu leaga!

7. O le ā le iloiloga totino e ao ia i tatou taitoatasi ona faia?

⁷ Ona e faigofie ona iloa le faia pea e se isi o ni upu leaga po o ni faitioga, ia fesili ifo ai la ia te oe lava, ‘Pe ou te manao ea ou te fia pei o lena tagata? Po o faapena moni ea aʻu?’ O se mea e atamai tele ona manatunatu i lea taimi ma lea taimi e uiga i le agaga o a tatou upu. Po o ni upu leaga moni, ma ni faitioga? Po o a tatou upu e pei o upu a le au faamafanafana pepelo e toatolu a Iopu? (Iopu 2:11; 13:4, 5; 16:2; 19:2) Aiseā e lē vaai ai se itu lelei e talanoa i ai? Afai e faaautū se talanoaga i na o le faitio, aiseā e lē tataʻi ai le talanoaga i ni mea e atiina aʻe ai?

8. O le ā le lesona ua saunia i le Malaki 3:16 e faatatau i tautalaga, ma e faapefea ona tatou faaalia o loo tatou faatatauina le lesona?

⁸ Na tuuina mai e Malaki lenei faatusatusaga: “Ona fetautalatalai lea e na matatau ia Ieova; ua liliu mai foi e Ieova ona fofoga, ma ua faafofoga mai; ona tusia lea o le tusi e faamanatu i ona luma, mo e matatau ia Ieova, ma mafaufau i lona suafa.” (Malaki 3:16) Sa e matauina ea le auala na tali mai ai le Atua i talanoaga e ati aʻe ai? O le ā le iʻuga o talanoaga faapena e uiga i aumea? E mafai ona tatou aʻoaʻoina totino ai se lesona e faatatau i a tatou talanoaga i aso fai soo. Maeu le lelei mo i tatou ma isi foi pe afai e atagia atu i a tatou talanoaga masani a tatou ‘taulaga o viiga i le Atua.’—Eperu 13:15.

Galulue e Atiina aʻe Isi

9. Aiseā ua avea ai sauniga faa-Kerisiano o ni taimi lelei e atiina aʻe ai isi?

⁹ O sauniga a le faapotopotoga, o taimi sili ona lelei na e talanoa ai i ‘so o se mea lelei e atiina aʻe ai e tusa ma le manaoga o iai, ina ia tau o upu lelei e fia faalogo i ai tagata e alu atu ai o tatou gutu.’ (Efeso 4:29) E mafai ona tatou faia lena mea pe a avatu se lauga i mataupu faale-Tusi Paia, le faia o se faataʻitaʻiga, po o se tali i vaega e faia i fesili ma tali. I lea ua tatou faamamafa ai le Faataoto 20:15: “O laugutu e i ai le poto, o ipu tāua [ia].” Ma o ai e iloa pe fia ni loto tatou te pāʻia pe atiina aʻe foi?

10. Pe a uma ona manatunatu po o ai e masani ona tatou talanoa atu i ai, o le ā le fetuunaiga atonu e lelei ona faia? (2 Korinito 6:12, 13)

¹⁰ I le taimi a o leʻi amataina sauniga ma pe a uma foi sauniga, o taimi avanoa na e atiina aʻe ai e le tasi le isi i talanoaga lelei e fia faalogo i ai tagata. O le a faigofie ona faaalu nei taimi e talanoa fiafia ai ma aiga ma ni nai uō o ē o tatou mafana atu i ai. (Ioane 13:23; 19:26) Ae peitai, ina ia ōgatasi ma le Efeso 4:29, aiseā e lē saili ai isi e talanoa atu i ai? (Faatusatusa i le Luka 14:12-14.) E mafai ona tatou muai filifili ina ia alofia le na o le faatalofa vave atu i nisi tagata fou, tagata matutua, po o talavou, e oo foi i le nonofo faatasi ma talavou ma talanoa i mea latou te fiafia i ai. O lo tatou naunau moni, ma taimi mo talanoaga e atiina aʻe ai, o le a atili ai ona uunaia isi e faaleoina atu lagona o Tavita i le Salamo 122:1.

11. (a) O le ā le masani ua faia e le toatele e faatatau i nofoaga e nonofo ai? (e) Aiseā e naunau ai isi e fesuisuiai o latou nofoaga?

¹¹ O le isi fesoasoani i talanoaga e atiina aʻe ai, o le fesuisuiai o nofoaga tatou te nonofo ai i sauniga. O se tinā failele, atonu e manao e nofo latalata i tua, po o se tagata e vaivai lona tino atonu e manaomia ona faanofo ese, ae faapefea isi o i tatou? Atonu e fai ma masani lo tatou toe foi atu lava e nonofo i se nofoaga po o se vaipanoa faapitoa; e pei o se manulele e toe foi atu lava i lona faamoega. (Isaia 1:3; Mataio 8:20) Peitai, talu ai e mafai lava ona tatou nonofo i so o se mea, aiseā la e lē fesuisuiai ai lou nofoaga—i le itu taumatau, i le itu tauagavale, ia latalata i luma, ma faapena ai lava—ma i lea, o le a sili ai ona masani lelei ma tagata eseese? Ona e leai se tulafono faapea e ao ona tatou faia o lenei mea, ua iloa ai e toeaina ma isi tagata taʻumatuaina o ē e fesuisuiai o latou nofoaga, le faigofie ona talanoa atu i mea lelei i le toatele na i lo o na o ni nai uō mamae.

Ia Atiina aʻe i se Auala Faaleatua

12. O le ā le faanaunauga lē manaomia na faaalia i le faagasologa atoa o talafaasolopito?

¹² O le faanaunauga o se Kerisiano ina ia atiina aʻe isi, e ao ona uunaia ai o ia e faataʻitaʻi i le Atua i lenei vala, na i lo o le mulimuli i le masani a tagata e faia ni tulafono se tele.a Ua tele tausaga o naunau tagata lē lelei atoatoa e fia pule i ē o siomia i latou, ma e oo lava i nisi o auauna a le Atua ua lolo atu i lenei auala. (Kenese 3:16; Failauga 8:9) I taimi o Iesu, o taʻitaʻi Iutaia ‘sa latou saisai avega mamafa ma faaee i ua o tagata, ae latou te leʻi mananao e amoina e i latou lava.’ (Mataio 23:4) Sa latou suia aganuu mamā e fai ma poloaiga o uputuu. I lo latou soona faamamafaina o tulafono faaletagata, sa latou lē amanaia ai mea e sili ona tāua na faailoa mai e le Atua. E leai lava se tasi na atiina aʻe i lo latou faia o le tele o tulafono e lē faale-Tusi Paia; o lo latou ala, e lē o le ala lena a le Atua.—Mataio 23:23, 24; Mareko 7:1-13.

13. Aiseā e lē talafeagai ai ona faia ni tulafono se tele mo uso Kerisiano?

¹³ E mananao moni lava Kerisiano e pipii atu i tulafono a le Atua. E ui i lea, e mafai foi ona tatou paʻūū atu i le faanaunauga e faia ni tulafono mamafa se tele. Aiseā? O se tasi o mea, ona o le eseese o uiga ma mea e fiafia i ai, o lea ua iloa ai e nisi faapea, o mea e fiafia i ai nisi, e lē fiafia i ai isi, ma oo ai se lagona faapea e tatau ona taofia. E eseese foi le agaʻigaʻi i luma o Kerisiano i le taʻumatuaina faaleagaga. Ae po o le faia ea o le tele o tulafono o se auala faaleatua lea e fesoasoani ai i se tasi ina ia agaʻi i le taʻumatuaina? (Filipi 3:15; 1 Timoteo 1:19; Eperu 5:14) E tusa lava foi po ua tuliloaina moni e se tagata se auala e foliga mai ua maoaʻe pe lamatia ai, po o le faia ea o se tulafono e faasā ai o le vaifofō sili lea ona lelei? O le auala a le Atua, o le taumafai lea o tagata taʻumatuaina e toe faafoi mai lena tagata fai mea sese, e ala i le talanoa atu i ai ma le agamalu.—Kalatia 6:1.

14. O ā fuafuaga o le tulafono na avatu e le Atua ia Isaraelu?

¹⁴ E moni, a o faaaogāina Isaraelu e avea ma ona tagata, sa faataatia e le Atua le faitau selau o tulafono e uiga i le tapuaiga i le malumalu, o taulaga, e oo lava i le tumamā. Sa fetaui lelei lenei mea mo se nuu faapitoa, ma o le tele lava o tulafono, sa iai so latou aogā faavaloaga, ma sa fesoasoani i le taʻitaʻiina atu o tagata Iutaia i le Mesia. Na tusia e Paulo: “Ua fai mo tatou taʻitaʻitama le tulafono, na te taʻitaʻiina i tatou ia Keriso, ina ia taʻuamiotonuina i tatou i le faatuatua. A ua oo mai le faatuatua, o lenei ua le toe pule ia te i tatou le taʻitaʻitama.” (Kalatia 3:19, 23-25) Ina ua uma ona soloia le Tulafono i luga o le satauro, sa leʻi tuuina mai e le Atua i Kerisiano se lisi umi o ni tulafono i le tele o vala o le olaga, e peiseai o le auala lena e tausia ai pea le atiina aʻe o i latou i le faatuatua.

15. O le ā le taʻiala na saunia e le Atua mo tagata tapuai Kerisiano?

¹⁵ O le mea moni, e lē faapea ua aunoa i tatou ma ni tulafono. Ua poloaiina i tatou e le Atua ina ia tatou faamamao mai le ifo i tupua, faitaaga ma le mulilua, faapea ma le faaaogāseseina o le toto. Sa ia faasāina faapitoa le fasioti tagata, le pepelo, faiga faataulaitu, ma le tele lava o isi agasala eseese. (Galuega 15:28, 29; 1 Korinito 6:9, 10; Faaaliga 21:8) Ma ua ia ofoina mai i lana Afioga fautuaga manino i le tele o mataupu. Ae i se tulaga e sili mamao atu i lo o Isaraelu, ua ia i tatou ai le avega tauave ina ia aʻoaʻo ma faatatau mataupu silisili o le Tusi Paia. E mafai e toeaina ona atiina aʻe isi e ala i le fesoasoani ia i latou e saili ma mafaufau i nei mataupu silisili na i lo o le na ona vaavaai mo tulafono po o le faia foi o ni tulafono.

Toeaina o Ē Atiina Aʻe

16, 17. O ā faataʻitaʻiga lelei na faataatia e aposetolo e faatatau i le faia o tulafono mo uso tapuai?

¹⁶ Na tusia e Paulo: “A o le mea ua tatou oo i ai [“e tusa ma lo tatou agaʻigaʻi i luma,” NW], ia savavali faatatau i lea lava mataupu.” (Filipi 3:16) I le ōgatasi ma lena manatu faaleatua, sa feutagai ai le aposetolo ma isi i se auala e atiina aʻe ai. Mo se faaaʻoaʻoga, sa mapuna aʻe se fesili e uiga i le pe e tatau ona ʻai o aano o manu, na atonu sa aumai mai se malumalu o se atua ese. Pe sa faia la e lenei toeaina se tulafono mo i latou uma sa iai i uluai faapotopotoga ona o lona tausisi pea i na faiga pe ona e faigofie? E leai. Sa ia iloa lelei faapea o le eseese o malamalamaga ma le agaʻigaʻi i luma i le taʻumatuaina, e mafai ona taʻitaʻiina ai na Kerisiano i le faia o ni filifiliga eseese. Ae mo ia, sa maumauaʻi pea o ia e faataatia se faaaʻoaʻoga lelei.—Roma 14:1-4; 1 Korinito 8:4-13.

¹⁷ Ua faaalia i Tusi Paia Kerisiano Eleni e faapea, na saunia e aposetolo se fautuaga aogā i nisi o mataupu totino, e pei o na e faatatau i laei ma teuga, ae latou te leʻi lolo atu e faia le anoanoai o ni tulafono. O se faaaʻoaʻoga lelei foi lena i aso nei mo ovasia Kerisiano, o ē naunau e atiina aʻe le lafu. Ma ua faalauteleina moni ai i lenei mea se faiga faavae na mulimuli ai le Atua e oo lava ia Isaraelu anamua.

18. O ā tulafono e faatatau i laei na tuu atu e Ieova ia Isaraelu?

¹⁸ Sa leʻi tuuina atu e le Atua ia Isaraelu ni tulafono auiliili e uiga i laei. E foliga mai sa faaaogā e tane ma fafine ofu talitutusa, po o ofu tetele, e ui lava o ofu o fafine atonu sa suʻi ai ni teuteu ma sa sili ona felanulanuaʻi. Sa ofu uma foi e tane ma fafine se ofu lino e pito i totonu o se sa·dhinʹ. (Faamasino 14:12; Faataoto 31:24; Isaia 3:23) O ā tulafono na avatu e le Atua e uiga i laei? E lē tatau i tane po o fafine ona oofu i ni ofu e faafoliga ai i latou e pei o se tasi o le isi ituaiga, e pei ona manino mai i faanaunauga o tauatane. (Teuteronome 22:5) Ina ia faaalia e ese i latou mai nuu sa siomia ai, sa suʻiina ai e tagata Isaraelu se tuupao i pito o o latou ofu, e iai le manoa lanumoana i luga aʻe o le tuupao, ma atonu sa iai ma ni faapona o manoa i pito o ofu. (Numera 15:38-41) Ona pau lava lena o le faatonuga na aumaia e le Tulafono e faatatau i faiga o laei.

19, 20. (a) O le ā le faatonuga ua aumaia e le Tusi Paia i Kerisiano e uiga i laei ma teuga? (e) O le ā le manatu e ao ona iai i toeaina e uiga i le faia o tulafono e faatatau i foliga totino?

¹⁹ Ona ua lē o iai Kerisiano i lalo o le Tulafono, po o iai la nisi tulafono auiliili e uiga i laei po o teuga o faataatia mai i le Tusi Paia mo i tatou? Atonu e leai. Na saunia e le Atua ni mataupu silisili paleni lelei na e mafai ona tatou faatatauina. Na tusia e Paulo: “Ia faapea foi fafine, ia latou teuteu ia i latou i ofu e onomea, ma ia le teuanoai, a ia faamatuāfafine; aua neʻi teteu ma le lauulu fili, po o auro, po o penina, po o ofu tau tele.” (1 Timoteo 2:9) Na timai mai Peteru e faapea, na i lo o le pupū tele i teuga o le tino, e ao i fafine Kerisiano ona uaʻi atu i “le tagata lilo o le loto, ia teua lea i le mea e le pala, o le loto agamalu ma le filemu.” (1 Peteru 3:3, 4) O lena fautuaga sa faamauina, ua taʻua ai faapea, o nisi Kerisiano i le uluai senituri, atonu sa manaomia ona matuā onomea, ma sa faatapulaa o latou laei ma teuga. Peitai, na i lo o le faatonuina—po o le faasāina—o nisi teuga, sa na ona saunia e aposetolo o se fautuaga e atiina aʻe ai.

²⁰ O Molimau a Ieova, e ao ona faaaloalogia i latou i o latou foliga onomea, ma e masani lava ona latou faia faapea. Ae peitai, e eseese lava ituaiga o teuga a lea atunuu mai lea atunuu ma e oo foi la i totonu o se nuu po o se faapotopotoga. E moni, o se toeaina e malolosi ona manatu pe iai se lagona faapitoa i laei ma teuga, e mafai ona ia filifili ma le tusa teuga mo ia ma lona aiga. Ae e tusa ai ma le lafu, e manaomia ona ia manatua le manatu o Paulo: “E leai foi so matou fia pule i lo outou faatuatua, a o fesoasoani i matou i lo outou olioli; auā o le faatuatua tou te tumau ai.” (2 Korinito 1:24) Ioe, i le tetee atu i so o se taumafaiga e faataatia ni tulafono mo le faapotopotoga, ua galulue ai toeaina ia atiina aʻe le faatuatua o isi.

21. E mafai faapefea e toeaina ona saunia ni fesoasoani e atiina aʻe ai pe afai ua lē talafeagai laei o se tasi?

²¹ E pei ona iai i le uluai senituri, i nisi taimi, atonu sa mulimuli atu ai se tagata fou po o se uso ua vaivai faaleagaga i se auala ua masalomia pe lē atamai foi e uiga i laei, po o le faaaogāina o vali laugutu ma vali mata, po o le ʻulaina foi o ni maʻa tāua. Ona ā lea? Ua toe aumaia foi e le Kalatia 6:1 se taʻiala mo toeaina Kerisiano o ē mananao moni e fesoasoani. A o leʻi filifilia e se toeaina e avatu se fautuaga, e atamai mo ia le faafesootaʻi atu o se isi uso toeaina, e fautuaina ia aua neʻi alu i se toeaina na te iloa e tutusa o la uiga po o manatu. Afai o se āega faalelalolagi o laei po o teuga e foliga mai o aafia ai le toatele o le faapotopotoga, e mafai la e toeaina ona talanoaina se auala e sili ona lelei e saunia ai le fesoasoani, e pei o le faia o se mataupu agalelei ma atiina aʻe ai i le sauniga, po o le avatuina o le fesoasoani i tagata taitoatasi. (Faataoto 24:6; 27:17) O lo latou sini, o le faalaeiauina lea o le vaaiga i fafo e pei ona faaalia i 2 Korinito 6:3: “Ua matou le tuuina atu se mea e tasi e tausuai ai, ina neʻi taʻuleagaina le galuega.”

22. (a) Aiseā e lē tatau ai ona avea o se mea e faateʻia ai pe a aliali mai sina eseesega o manatu? (e) O le ā le faaaʻoaʻoga lelei na saunia e Paulo?

²² O toeaina Kerisiano o ‘ē o leoleoina le lafu a le Atua o loo i la latou tausiga’ o le a mananao e faia le mea o loo faaalia mai e Peteru, o le aua ‘le fia pule i ē ua avea ma tofi o le Atua.’ (1 Peteru 5:2, 3) I le faagasologa o la latou galuega alofa, atonu o le a lagā ai ni fesili e uiga i ni mataupu atonu e eseese i ai ni manatu. Atonu o se tu masani i le faapotopotoga ona tu ma faitau palakalafa i le Suesuega o Le Olomatamata. O faatulagaga a vaega mo le auaunga i le fanua ma isi lava auiliiliga e tele e uiga i le faiva lava ia, atonu e taulimaina i se tu e masani ai. Peitai, po o le a avea o se faafitauli pe a iai se tasi e ese foi lana ia auala? O ovasia alolofa o le a mananao e “faia mea uma lava ma le matagofie ma le saunia lelei,” o le faaupuga lena na faaaogāina e Paulo e faatatau i meaalofa faavavega. Ae ua faaalia i mau e faamaonia ai faapea o le faanaunauga autū o Paulo, “o le atiina aʻe o le faapotopotoga.” (1 Korinito 14:12, 40, NW) Na te leʻi faaalia se faanaunauga e faatutūina ni tulafono se tele, e peiseai o ona sini autū o le saʻo aʻiaʻi po o le matuā atoatoa ona lelei. Na ia tusi mai faapea: “Ua foaiina mai ia te i matou e le Alii e ati ae, a e le ina ia lepetia outou.”—2 Korinito 10:8.

23. O ā nisi o auala e mafai ona tatou faataʻitaʻia ai le faaaʻoaʻoga a Paulo i le atiina aʻe o isi?

²³ E lē taumatea sa galue Paulo ina ia atiina aʻe isi e ala i tautalaga mautinoa ma faalaeiau. Na i lo le auaufaatasi ma na o ni nai uō toaitiiti, sa alu atu o ia e asiasi i uso ma tuafāfine, i latou uma o ē sa malolosi faaleagaga, ae maise foi i latou o ē na manaomia ona atiina aʻe. Ma sa ia faamamafa le alofa—na i lo o ni tulafono—auā o le ‘alofa e atiina aʻe ai.’—1 Korinito 8:1.

[Faaopoopoga i lalo]

Manatu mo le Autaluga

◻ Aiseā e talafeagai ai le faia o se suiga, pe afai ua tauau ina tatou lolo atu i le faia o faitioga ma tala lē aogā?

◻ O le ā e mafai ona tatou faia ina ia sili ai ona atiina aʻe i tatou i le faapotopotoga?

◻ O le ā le auala faaleatua e uiga i le faia o le tele o tulafono mo isi?

◻ O le ā o le a fesoasoani i toeaina e alofia ai le faia o tulafono faaletagata mo le lafu?