E Matuā Faamagaloina e Ieova

“Ia lafoai e le ua amioleaga lona ala, ma le tagata agasala ia lafoai e ia ona manatunatu; a ia foi mai ia Ieova, . . . auā na te matuā faamagaloina.”—ISAIA 55:7.

1. O ā mea ua faamanuiaina ai nei i latou ua maua le faamagaloga a Ieova?

E FAAMAGALO e Ieova tagata fai mea sese ua salamō ma ua mafai nei ona latou olioli i le filemu o le mafaufau i se parataiso faaleagaga. Ua mafaia lenei mea ona ua latou ausia mea manaomia nei: “Ia outou saili ia Ieova manū o mafai ona maua o ia; ia outou valaau ia te ia manū o latalata mai o ia; ia lafoai e le ua amio leaga lona ala, ma le tagata agasala ia lafoai e ia ona manatunatu; a ia foi mai ia Ieova, ona alofa mai lea o ia ia te ia; ia foi mai i lo tatou Atua, auā na te matuā faamagaloina.”—Isaia 55:6, 7.

2. (a) O le ā le uiga o le ‘saili ia Ieova’ ma ‘foi mai ia te ia,’ e pei ona taʻua i le Isaia 55:6, 7? (e) Aiseā na manaomia ai e tagata Iutaia na faaaunuuaina i Papelonia ona toe foi mai ia Ieova, ma o le ā na tupu i nisi o i latou?

² Ina ia “saili ia Ieova” ma valaau atu ia te ia ma le manatu e talia mai, e tatau i le tagata amio leaga ona lafoai ona ala sese, ma so o se manatu ina ia faamanuʻalia isi. O le manaoga ia “foi mai ia Ieova” e faaalia ai sa lafoaia e lē ua fai mea sese le Atua, o lē na iai sa la faiā vavalalata i se taimi ua mavae. Sa faapena tagata na nonofo i Iuta, sa faaaunuuaina i Papelonia ona o lo latou lē faamaoni i le Atua. Sa manaomia ona toe foi mai ia Ieova tagata o Iutaia na sa faaaunuuaina, e ala i lo latou salamō mai mea sese na mafua ai ona faaaunuuaina i latou i Papelonia ma valoia ai le faatafunaina o lo latou laueleele mo le 70 tausaga. I le 537 T.L.M., na toe nofoia ai lena laueleele e se vaega totoe o ē matataʻu i le Atua, o tagata Iutaia na tatalaina mai Papelonia ona o se poloaiga faalemalo. (Esera 1:1-8; Tanielu 9:1-4) Ona o le matagofie tele o iʻuga o lena toe faafoisiaina, na faatusaina ai le laueleele o Iuta i le Parataiso o Etena.—Esekielu 36:33-36.

3. Ua faapefea ona oo i le vaega totoe o le Isaraelu faaleagaga se mea na tupu e pei o lena na tupu i tagata matataʻu o le Atua o ē na faaaunuuaina na toe foi mai i Iuta?

³ Sa tofo foi Isaraelu faaleagaga i se mea faapena e pei o le mea na tupu i tagata o Iutaia sa matataʻu i le Atua o ē na toe foi atu i Iuta ina ua mavae le faaaunuuaina i Papelonia. (Kalatia 6:16) Sa faia e le vaega totoe o Isaraelu faaleagaga ni suiga i o latou ala ma o latou manatu ina ua faatoʻā uma lava le Taua Muamua a le Lalolagi. O le tausaga e 1919 na faailogaina ai le iʻuga o lo latou faaaunuuaina mai le finagalo malie atoatoa o le Atua i le nofoaga o Papelonia Tele, le emepaea o lotu sese i le lalolagi. Ona sa latou salamō mai agasala e aofia ai le fefe i tagata ma le lē toe auai pea i le auaunaga a Ieova, na ia faasaolotoina ai i latou mai Papelonia Tele, ma toe aumaia i latou i lo latou nofoaga saʻo faaleagaga, ma toe faaaogāina ai i latou e talaʻi le feau o le Malo. Talu mai lena taimi, ua olaola ai se parataiso faaleagaga i le lotolotoi o tagata o le Atua, ina ia viia ai lona suafa paia. (Isaia 55:8-13) O na tulaga tutusa i aso anamua, atoa ma se faaaʻoaʻoga faapena i aso nei, ua tatou maua ai le faamaoniga manino faapea, e iai faamanuiaga e mulimuli mai i le faamagaloga a le Atua, ma e moni lava e matuā faamagaloina e Ieova i latou ua salamō.

4. O le ā le mataʻu ua iai i nisi o auauna a Ieova?

⁴ O lea ua mafai foi e auauna a Ieova i aso nei ona faalagolago i lana faamagaloga. Peitai, o nisi o i latou ua faanoanoa ona o mea sese i aso ua mavae, ma e toetoe lava ina faavaivaia atoa i latou i faalogona agasala. Ua manatu i latou faapea e lē tatau ona latou nonofo i le parataiso faaleagaga. O le mea moni, ua matataʻu nisi faapea atonu po ua latou faia se agasala e lē mafaamagaloina ma o le a lē taitai ona maua le faamagaloga a Ieova. Pe talafeagai lea manatu?

Nisi o Agasala e Lē Mafaamagaloina

5. Aiseā ua mafai ai ona faapea atu o nisi agasala e lē mafai ona faamagaloina?

⁵ E iai nisi o agasala e lē mafai ona faamagaloina. Na fetalai Iesu Keriso: “O agasala uma ma upu leaga e faamagaloina ia i tagata; a o le upu leaga i le Agaga, e le faamagaloina lea i tagata.” (Mataio 12:31) O lea la, o le upu leaga i le agaga paia, po o le mana galue o le Atua, e lē faamagaloina lea. Sa faasino atu e le aposetolo o Paulo i lena agasala ina ua ia tusi mai: “Auā e le mafaia ia te i latou e na muai faamalamalamaina, . . . ma ua pauu i latou, e le mafaia ona toe faafouina o i latou ina ia salamo, ina ua toe faasatauroina e i latou lava le Alo o le Atua, ma faainosia o ia i luma o tagata.”—Eperu 6:4-6.

6. O le ā e iloa ai pe mafai ona faamagaloina se agasala pe leai?

⁶ E na o le Atua lava na te silafia po ua faia e se tagata se agasala e lē mafaamagaloina. Ae peitai, na faamalamalama e Paulo lenei mataupu ina ua ia tusi mai: “Auā afai tatou te agasala ma le loto i ai pe a uma ona talia o le malamalama o le upu moni, ua le toe lava se taulaga mo agasala, na o le faatali ma le mataʻu tele i le faasala.” (Eperu 10:26, 27) O se tagata e agasala ma le loto i ai, e gaoioi maumauai, po o le “uamaaa ma e masani lava ona latou faia mea leaga latou te mananao i ai.” (Webster’s New Collegiate Dictionary) So o se tasi e faaauau pea ma le uamaaa ona faia le agasala ae ua uma ona ia iloa le upu moni, e lē faamagaloina. I lea, atonu e lē gata i le agasala lava ia, ae o le tulaga o le loto, mo le fia faia o le agasala, o le mea lena e āfaina, ma iloa ai pe mafai ona faamagaloina le agasala pe leai. I le isi itu, e faapefea le tulaga pe afai e matuā faaatuatuvaleina se Kerisiano fai mea sese ona o lana mea sese? O lona matuā popole tele atonu ua faaalia ai le mea moni faapea na te leʻi faia se agasala e lē mafaamagaloina.

Sa Lē Mafaamagaloina a Latou Agasala

7. Aiseā e mafai ai ona tatou fai atu o nisi o taʻitaʻi lotu na tetee ia Iesu, sa latou faia se agasala e lē mafaamagaloina?

⁷ O nisi o taʻitaʻi lotu Iutaia o ē na tetee ia Iesu, sa latou agasala ma le loto i ai, ma o na agasala e lē mafai ona faamagaloina. E ui lava ina sa latou vāai i galuega a le agaga paia e ala i galuega lelei ma vavega sa faia e Iesu, ae sa faapea na tagata faafiaamiotonu, o lona mana e mai ia Pelesepulo, po o Satani le Tiapolo. Sa latou agasala ma lo latou iloa lelei lava o gaoioiga e lē mafaafitia a le agaga o le Atua. I lea, na latou faia ai le agasala e lē mafaamagaloina, auā na fetalai Iesu: “O lē fai upu i le Agaga Paia, e le faamagaloina lea i le olaga nei po o lē atali.”—Mataio 12:22-32.

8. Aiseā na lē mafai ai ona faamagaloina le agasala a Iuta le Sekara?

⁸ E lē faamagaloina foi le agasala a Iuta le Sekara. O lona faalataina o Iesu sa faia ma le loto i ai, o se iʻuga mautinoa lea o le fuafuaina lelei o se ala pepelo ma le lē faamaoni. Mo se faataʻitaʻiga, ina ua vaai atu Iuta o uu e Maria Iesu i se suauu manogi, ona ia fesili atu lea: “Pe se a le mea na le faatau ai lena uu manogi i tenari e tolu selau, ma avatu ai i e matitiva?” Na faaopoopo mai le aposetolo o Ioane: “Ua le faapea ane [Iuta], ina ua alofa o ia i e matitiva, a ona o ia o le gaoi, ua ia te ia foi le ete, ma na tauave mea [“tupe,” NW] na fafao ai.” E leʻi pine mulimuli ane, ae faalata loa e Iuta Iesu i tupe siliva e 30. (Ioane 12:1-6; Mataio 26:6-16) E moni sa toe salamō Iuta, ma pule i lona lava ola. (Mataio 27:1-5) Ae e leʻi faamagaloina o ia, ona o lona ala maumauai manatu faapito, ma ana gaoioiga faaʻoleʻole, na atagia ai lona agasala i le agaga paia. Maeu le talafeagai ona taʻua e Iesu Iuta “o le tagata o le malaia”!—Ioane 17:12; Mareko 3:29; 14:21.

Na Faamagaloina a Latou Agasala

9. Aiseā na faamagalo ai e le Atua le agasala a Tavita sa faia ma Patesepa?

⁹ O agasala ma le loto i ai, e matuā eseese mamao lava ma mea sese a i latou ua faamagaloina e le Atua. Seʻi fai le Tupu o Tavita o Isaraelu ma faataʻitaʻiga. Sa ia faia le mulilua ma Patesepa le avā a Uria, ma mulimuli ane na ia faatonuina Ioapo e faaoo le oti ia Uria i le taua. (2 Samuelu 11:1-27) Aiseā na faaalia ai le alofa mutimutivale o le Atua ia Tavita? Muamua lava ona o le feagaiga o le Malo, e lē gata foi i lea ae ona o le faaalia e Tavita lava ia o le alofa mutimutivale ma lona salamō moni.—1 Samuelu 24:4-7; 2 Samuelu 7:12; 12:13.

10. E ui ina sa matuiā le agasala a Peteru, ae aiseā na faamagalo ai o ia e le Atua?

¹⁰ Seʻi manatu foi i le aposetolo o Peteru. Sa matuiā lava lana agasala o le faafitia soo lea o Iesu. Aiseā na faamagalo ai e le Atua Peteru? I le lē pei o Iuta le Sekara, sa faamaoni Peteru i le auaunaga a le Atua ma Keriso. Na mafua ona agasala lenei aposetolo ona o le vaivaiga faaletino, ma sa salamō moni o ia ma “ua tagi lotulotu.”—Mataio 26:69-75.

11. E faapefea ona e faamatalaina le “salamō,” ma o le ā e ao i se tagata ona fai pe afai ua ia salamō moni?

¹¹ O nei uluai faaaʻoaʻoga ua faaalia ai faapea e oo lava i se tagata e faia se agasala mamafa, e mafai ona maua le faamagaloga a Ieova le Atua. Ae o le ā le uiga e manaomia ina ia mafai ai ona faamagaloina? E matuā tāua lava le salamō moni pe afai e manao se Kerisiano ua sese ina ia faamagaloina o ia e le Atua. O le salamō, o lona uiga “o le liliu ese mai le agasala ona o le faanoanoa i mea sese na faia i aso ua mavae” po o le “lagona faanoanoa po o le tigā i mea na faia e se tasi, po ua lē taulau ona faia.” (Webster’s Third New International Dictionary) O se tagata ua salamō moni o le a na faaalia le faanoanoa i so o se faalumaina, faanoanoaga, po o ni faafitauli na aumaia e lana agasala i le suafa o Ieova po o le faalapotopotoga. E ao foi i lē ua salamō ona ia fuaina mai ni fua e tatau, i le faia o galuega e talafeagai ma le salamō. (Mataio 3:8; Galuega 26:20) Mo se faaaʻoaʻoga, afai na ia faaseseina se tasi, e ao ona ia faia ni laasaga talafeagai e taui atu ai mo le mea na leiloa. (Luka 19:8) O se Kerisiano faapena ua salamō, e iai ni mafuaaga tāua faale-Tusi Paia na te mautinoa ai, o le a matuā faamagaloina e Ieova. O ā na mafuaaga?

Mafuaaga mo le Mautinoa o le Faamagaloga a le Atua

12. E faavae i le ā le mea o fai mai ai le Salamo 25:11 e mafai ai e se tagata ua salamō ona tatalo mo se faamagaloga?

¹² E mafai e se tagata fai mea sese ua salamō ona tatalo ma le mautinoa mo le faamagaloga e faavae i le suafa o Ieova. Na ole atu Tavita: “Ieova e, ona o lou suafa, ia e faamagalo mai ai laʻu agasala, auā ua tele lava ia.” (Salamo 25:11) O se tatalo faapena e ō faatasi ma le salamō mo so o se faalumaina na aumaia e le tagata fai mea sese i le suafa o Ieova, e ao foi ona avea o se taofiofiga mo le faia o se agasala matuiā i le lumanai.

13. O le ā le vaega a le tatalo e fai i le faamagaloga a le Atua?

¹³ E tali mai Ieova i tatalo mai le loto a ana auauna na sese a ua salamō. Mo se faaaʻoaʻoga, sa leʻi faataliga tuli Ieova ia Tavita o lē na tatalo atu mai le loto ina ua uma ona ia iloa le tele o ana agasala na faia ma Patesepa. O le mea moni, o le tele o faaupuga a Tavita i le Salamo e 51 ua faaalia ai le tele o faatoga ma le loto maulalo. Sa ia aioi atu faapea: “Le Atua e, ia e alofa mai ia te au, e tusa ma lou lava alofa; e tusa ma le tele o lou alofa mutimutivale, ia e sōloiesea oʻu solitulafono. Ia e matuā fufulu mai ia te au i laʻu amio leaga, ma ia e faamamā mai ia te au i laʻu agasala. O taulaga i le Atua, o le loto momomo lea; le Atua e, e te le inosia le loto momomo ma le nutimomoia.”—Salamo 51:1, 2, 17.

14. Ua saunia faapefea e le Tusi Paia se faamautinoaga faapea e faamagalo e le Atua i latou e faaalia le faatuatua i le taulaga togiola a Iesu?

¹⁴ E faamagalo e le Atua i latou o ē faaalia le faatuatua i le taulaga togiola a Iesu. Na tusia e Paulo: “O ia foi ua tatou maua ai le togiola i lona toto, o le faamagaloina o [“a tatou,” NW] agasala.” (Efeso 1:7) I se uiga faapena, na tusia ai foi e le aposetolo o Ioane: “Si aʻu fanau e, ou te tusi atu nei mea ia te outou, ina neʻi agasala outou; pe afai foi e agasala se tasi, o ia te i tatou le fautua [“fesoasoani,” NW] i luma o le Tamā, o Iesu Keriso lea, o lē amiotonu. O le togiola [“talafeagai,” NW] foi o ia mo a tatou agasala, e le gata foi i a tatou, a e atoa foi ma agasala a le lalolagi uma lava.”—1 Ioane 2:1, 2.

15. Ina ia faaauau ona olioli i le alofa mutimutivale o le Atua, o le ā e tatau i se tagata agasala ua salamō ona fai?

¹⁵ O le alofa mutimutivale o Ieova, ua avatu ai i le tagata fai mea sese ua salamō se faavae e mautinoa ai faapea e mafai ona faamagaloina o ia. Na faapea mai Neemia: “O oe o le Atua o lē faamagaloina sala, o lē alofa fua, ma lē alofa mutimuti vale, e tele gese lou toasa, ma ua tele lou alofa.” (Neemia 9:17; faatusatusa i le Esoto 34:6, 7.) O le mea moni, ina ia faaauau pea ona olioli i le alofa mutimutivale o le Atua, e tatau i le tagata agasala ona tauivi ina ia tausi i le tulafono a le Atua. E pei ona fai mai ai le faisalamo, “ia oo mai ia te au ou alofa mutimuti vale, ia ou ola ai; auā o lau tulafono, o loʻu fiafia lea. Ieova e, ua tele lou alofa mutimuti vale; ia e faaolaola mai ia te au e tusa ma au faamasinoga.”—Salamo 119:77, 156.

16. O le ā le faamafanafanaga o iai i le mea moni faapea, e faapalepale Ieova e tusa ma o tatou tulaga agasala?

¹⁶ O le mea moni faapea e faapalepale mai Ieova e tusa ma o tatou tulaga agasala, e faamafanafanaina ai foi se tagata agasala ua salamō, ma aumaia ai se mafuaaga e tatalo atu ai ma lona mautinoa o le a faamagaloina o ia e le Atua. (Salamo 51:5; Roma 5:12) Na tuuina mai e le faisalamo o Tavita se faamafanafanaga ina ua ia faailoa mai faapea: “E lei faia e ia [Ieova le Atua] ia i tatou e tusa ma a tatou agasala; e lei taui mai foi o ia ia i tatou e tusa ma a tatou amio leaga. Auā e pei ona maualuga o le lagi i le lalolagi, e faapea ona tele o lona alofa i e matatau ia te ia. E pei ona vava mamao o sasae ma sisifo, e faapea lava ona faamamao e ia ia i tatou o a tatou solitulafono. E faapei ona alofa mutimuti vale o le tamā i lana fanau, e faapea lava ona alofa mutimuti vale o Ieova i e matatau ia te ia. Auā ua silafia lava e ia le mea na fai aʻi i tatou; ua manatu ia o le efuefu lava i tatou.” (Salamo 103:10-14) Ioe, e sili atu lava ona alofa mutimutivale lo tatou Tamā faalelagi ma tigā alofa na i lo o se matua faaletagata.

17. O le ā le sootaga o le talaaga o se auaunaga faamaoni a se tasi i le Atua i aso ua mavae ma le faamagaloina o agasala?

¹⁷ E mafai e se tagata agasala ua salamō ona tatalo mo le faamagaloga ma lona mautinoa o le a lē faagaloina e Ieova le talaaga o lana auaunaga faamaoni i aso ua mavae. Sa leʻi ole atu Neemia mo le faamagaloina o ana agasala, ae na ia faapea atu: “Loʻu Atua e, ia e manatu mai ia te au, ia ou manuia ai.” (Neemia 13:31) O se Kerisiano ua salamō, e mafai ona maua se faamafanafanaga mai i nei upu: “Auā e le amioletonu le Atua, na te le faagalogaloina la outou galuega ma le faamalosi i le alofa ua outou faaali mai i lona suafa.”—Eperu 6:10.

Fesoasoani Mai Toeaina

18. O le ā e ao ona faia pe afai o le agasala a se Kerisiano ua mafua ai ona maʻi o ia faaleagaga?

¹⁸ Ae faapefea pe afai e lagona e se Kerisiano faapea e lē fetaui mo ia ona tumau ai i le parataiso faaleagaga, po ua lē mafai ona tatalo ona ua avea lana agasala ma pogai ua maʻi ai faaleagaga? Na tusi mai le soʻo o Iakopo e faapea: “Ina aami atu ia i toeaina o le ekalesia, ia latou tatalo mo ia, pe a uma ona faauu ia te ia i le suāuu i le suafa o le Alii [“Ieova,” NW]. O le tatalo foi e faia i le faatuatua e faaolaina ai le maʻi, e faatuina foi o ia e le Alii; afai foi ua agasala, e faamagaloina ia.” Ioe, e mafai e toeaina o le faapotopotoga ona tatalo ma le uigā faatasi ma se uso talitonu ua salamō po o lo latou tatalo foi mo ia, i le faamoemoe e toe faafoisia o ia i le soifua malōlōina lelei faaleagaga.—Iakopo 5:14-16.

19. Afai na faateʻaina le tagata, o le ā e tatau ona ia faia ina ia faamagaloina ai ma toe faaeaina?

¹⁹ E tusa lava foi pe faateʻaina e le komiti faafaamasinoga se tagata agasala e lē salamō, ae o le a lē faapea ai ua ia faia se agasala e lē mafaamagaloina. Peitai, ina ia faamagaloina ma toe faaeaina, e tatau ona ia usiusitai ma le loto maulalo i tulafono a le Atua, ma fua mai ni fua e talafeagai ma le salamō, ma talosaga atu i toeaina mo le toe faaeaina o ia. Ina ua uma ona faateʻaina se tagata faitaaga mai le faapotopotoga i Korinito anamua, na tusi atu Paulo: “Soia le faia se tasi mea i lena tagata, tau lava o lena sala na faasalaina ai o ia e le toatele. A o lenei, ia outou faamagalo atu ma faamafanafana atu i lena tagata, ina neʻi tofatumoanaina o ia i le tiga matuā tele. O lea ou te aioi atu ai ia te outou ina ia faamauina lo outou alofa ia te ia.”—2 Korinito 2:6-8; 1 Korinito 5:1-13.

E Aumai e le Atua le Malosi

20, 21. O le ā e mafai ona fesoasoani i se tagata o popole ona o le manatu faapea atonu na ia faia se agasala e lē mafaamagaloina?

²⁰ Afai e iai ni mea e pei o le lē lelei o le soifua malōlōina po o mafatiaga ua mafua ai le popole e uiga i le faia o se agasala e lē mafaamagaloina, o le lava la o se malōlōga ma le moe, atonu e fesoasoani. Ae peitai, e ao faapitoa lava ona e manatua upu a Peteru: “Ia tuuina atu ia te ia [Ieova] mea uma tou te popole ai, auā o loo manatu mai o ia ia te outou.” Ma aua lava neʻi faatagaina Satani e faalotovaivaia oe, auā na faaopoopo mai Peteru: “Ia outou faautauta, ia outou mataala, ona o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ʻaina e ia; ia outou tetee atu ia te ia, ma ia mausali outou i le faatuatua, ina ua outou iloa o loo taufaaatoaina ia lava mea tiga i lo outou au uso o i le lalolagi. A o le Atua e ona le alofa tunoa uma lava . . . pe a tigaina outou i nai aso, ia faaatoatoaina outou e ia lava, ia faatumauina ia faamalosia, ma ia faavaeina outou.”—1 Peteru 5:6-10.

²¹ O lea, afai ua e salamō ae e te fefe faapea atonu na e faia se agasala e lē mafaamagaloina, ia manatua o ala o Ieova e atamai, e tonu, ma alofa. O lea la, ia tatalo atu ia te ia i le faatuatua. Ia ave pea i lou loto meaʻai faaleagaga ua ia saunia e ala i “le auauna faamaoni ma le mafaufau.” (Mataio 24:45-47) Ia auaufaatasi ma uso talitonu ma fai se sao e lē aunoa i le faiva faa-Kerisiano. O le a faamalosia ai lou faatuatua ma tuusaunoa ai oe mai so o se fefe faapea atonu e lē o faamagaloina e le Atua lau agasala.

22. O ā isi mea o le a sosoo ona tatou talanoaina?

²² E mafai e tagatanuu o le parataiso faaleagaga ona maua le faamafanafanaga i le iloa faapea e matuā faamagaloina e Ieova. Peitai, e lē faapea o le a aunoa ai o latou olaga ma ni tofotofoga i aso nei. Atonu o mafatia i latou ona o le maliu o se pele, po o maʻi tigaina foi se uō pele. E pei ona o le a tatou iloa, i nei tulaga ma isi foi, ua fesoasoani ma taʻitaʻiina e Ieova ona tagata e ala i lona agaga paia.

O ā Au Tali?

◻ O le ā e faamaonia ai faapea ‘e matuā faamagalo’ mai lava Ieova?

◻ O le ā le agasala e lē mafai ona faamagaloina?

◻ I lalo o ā tulaga e mafai ai ona faamagaloina agasala a se tasi?

◻ Aiseā e mafai ai e tagata fai mea sese ae ua salamō ona mautinoa le faamagaloga a le Atua?

◻ O le ā le fesoasoani ua avanoa nei mo tagata fai mea sese ae ua salamō?

[Ata i le itulau 29]

E te iloa le pogai na faamagaloina ai Tavita ma Peteru, ae e lē faamagaloina Iuta le Sekara?

[Ata i le itulau 31]

E ala i fesoasoani mai i toeaina o le faapotopotoga, e tele mea e mafai ona fesoasoani atu ai i se Kerisiano i le tulaga faaleagaga