Puapuagatia le Lotu i Amerika Latina—Aiseā ua Ō Ese ai le Faitau Miliona o Tagata?

MAI le itu i matu o le tuaoi o Mekisikō i le itu i saute o le faatausiusiuga o Sili, e faigata tele ona maua ai se aai po o se nuu o Amerika Latina e lē gugutu mai e faapea, o le nofoaga autū lea o le lotu Katoliko Roma. Ae peitai, na faapea mai Joseph E. Davis, le faatonu o le polokalama a se faalapotopotoga e lagolagoina gaoioiga a le Lotu Katoliko e faapea: “O se suiga mataʻina ua tulai mai i Amerika Latina.” Na ia taʻua foi e faapea, o Amerika Latina, o se nofoaga sa i lalo o taaʻiga a le Lotu Katoliko Roma mo le sili atu i le tolu senituri, ua toeitiiti nei suia atoatoa.

E lē tau nanāina e faapea, ua agaʻi ina faavaivaia le pule a le Lotu Katoliko. Talu ai nei lava, o le aofai o i latou o loo auai i le lotu Katoliko ua faaitiitia i le na o le 15 pasene o le faitau aofai o Amerika Latina. Na lipotia mai e le 1991 Britannica Book of the Year e faapea: “Ua faaalia mai e Epikopo Katoliko Roma ma le pope lava ia le matataʻu e faapea, e tusa ai ma le talafaasolopito o le Lotu Katoliko i Amerika Latina, ua liliu nei i se tulaga mataʻutia mai le faatuatuaga tuai.” Aiseā ua tupu ai lenei mea? Aiseā ua toatele ai i latou ua tuua le lotoā o le Katoliko? O le ā le mea ua tupu ia i latou ua ō ese?

Le Sailiga mo se Faamalamalamaga

Ua tuuaia e taʻitaʻi Katoliko o latou faafitauli i luga o le faatuputeleina o “ituaiga.” Na finau mai se patele Papalagi e faigaluega i Polivia e faapea: “Ua pei lava le lotu o se laau ua tauau ina leai se malosi ona o ituaiga eseese e pei o vao.”

I Anitenitina, e 140 tapuaiga fou ua lipotia mai i tausaga taitasi, lea atonu ua mafua ai le faaitiitia o sui o le Lotu Katoliko mai le 90 pasene i le 60 pasene, po o le 70 pasene talu mai le tausaga e 1971 e oo i le 1979. I Tijuana i Mekisikō, e 10 pasene o le lua miliona o i latou o loo nonofo ai ua ō atu i le 327 lotu eseese e lē o ni Katoliko. Na lipotia mai e le mekasini o le Time e faapea: “Ma le ofo tele, toetoe lava sili atu tagata Porotesano i Pasili e ō i le lotu i Aso Sa na i lo tagata Katoliko.” E leai la se mea e ofo ai, ona e pei ona taʻua e se tasi nusipepa e faapea, ina ua “feiloai katinale i Amerika Latina ma le pope i le Laumua o le Vatikana e talanoaina mataupu e lua e sili ona tāua mo le lotu i aso nei,” o se tasi o na mataupu o le “faafitauli o ituaiga.”

I se fonotaga ma epikopo i Mekisikō, na taʻua ai e le pope e faapea, o le manuia o le tele o tapuaiga fou “ona o le faalotolotolua ma le faaleogalua o fanau a le lotu na e lē o auai i le galuega faaevagelia.” Aiseā la ua faaleogalua ai “fanau a le lotu” e faamalieina ai manaoga faaleagaga o tagata Amerika Latina, ae meamanū o le toatele o i latou e faaaloalo i le Tusi Paia? Na faamatala mai e se faatonu o le Ultima Hora i La Paz i Polivia e faapea: “Ua tele mea ua auai le lotu i le lalolagi ma ua aliali mai ai i aso taitasi le faateleina pea o lona tuulafoaia o ona tagata. E lē o se mea la tatou te ofo ai pe a iloa, e pei o le mea moni ua tupu, ua sili atu ona aafia patele i mea tau i le vafealoaʻi, faiga tau tamaoaiga, le avea ma tagata tusitala, po o faiga faapolotiki na i lo le avea o i latou ma taʻitaʻi lotu.”

Pe Toatele atu le Au Polotiki Na i lo le Au Talaʻi?

E aunoa ma se taumasalosalo, o le mafuaaga o le ʻinoʻino o le toatele o tagata Amerika Latina i le lotu Katoliko, ona o lona auai i mea faapolotiki, talu mai le tausaga e 1971 e oo i le 1979 ma le 1981 e oo i le 1989. O se suesuega na faasalalauina i le 1985 na faia ai le faaiʻuga o loo i lalo e faatatau ia Marianola (Maryknoll), le Catholic Foreign Mission Society of America, ma le tele o ona misiona i Amerika Latina e faapea: “Ua faamanuiaina Marianola i lona aumaia o le feau faa-Marxist-Leninist o le malosi o fouvalega i le lautele ma ua taliaina ma le saʻo ona sa faatagaina e avea o se tagata faaoosala a le Lotu Katoliko. E lē gata ina oo atu lana feau i le toatele o tagata lotu, ae ua oo atu foi i tagata Amerika e maualuluga o latou tulaga i faiga faalemalo.”

Seʻi manatu foi i le mea ua taʻua o le taua matagā lea na matuā faateʻia ai, mai le 10,000 i le 30,000 tagata Anitenitina na ave faamalosi ma fasiotia e aunoa ma ni faamasinoga mai le 1971 e oo i le 1979. Na tusia e se faatonu i le National Catholic Reporter, i lalo o le ulutala “Pisipisia i le Toto le Lotu i Anitenitina,” e faapea: “E tali tutusa lava le mea o loo tupu i Anitenitina ma le mea na tupu i le lotu Katoliko i Nasi i Siamani, ua toe lagā ai le fesili e faapea, pe sili atu le tāua o le malosi i le lotu na i lo le pulea e le Tala Lelei e avea ma molimau i le upu moni.”

O le faanaunauga o le lotu mo le malosi i malo faalelalolagi ua faailogaina ai ma le manino o ia e lē o se uō a le Atua. Ua faapea mai le Tusi Paia: “Tou te le iloa ea o le avea o le lalolagi ma au uō o le avea lena o le Atua ma ou fili? So o se tasi e filifilia le lalolagi e fai ma ana uō ua fai ai o ia e ia lava ma fili o le Atua.” (Iakopo 4:4, Catholic Jerusalem Bible) O lea la, e lē o se mea e ono faateʻia ai e faapea, o le toatele o tagata ua lē toe vāai atu i le Lotu Katoliko mo se taʻitaʻiga faaleagaga. Ae o le ā ua tupu i tagata o ē ua tuua le lotu Katoliko?

Mamoe ua Leai se Leoleo

Ua matuā tutusa lelei i latou ma tagata i le uluai senituri ia na lē taulau i taʻitaʻi lotu Iutaia ona leoleoina i latou faaleagaga. Ua faapea mai le Tusi Paia i le faalogona o Iesu e faapea “ua alofa o ia ia i latou ona ua pagātia ma tuulafoaiina, e pei o mamoe e leai so latou leoleo.” (Mataio 9:36, JB) E toatele ua ō ese mai le Lotu Katoliko ae ua ō atu i lotu ua taʻua o le au faievagelia. Pe o maua ai ea se lelei o mamoe mai le tausiga a i latou nei? Pe o sili atu ea le uaʻi o lotu Porotesano e pei ona taʻua e Iesu e uiga i ona soʻo moni: “E le ni o le lalolagi i latou, faapei o aʻu, ou te le so le lalolagi aʻu”?—Ioane 17:14.

O le tele o lotu e lē ni Katoliko ua taumafai e faafoliga mai e usiusitai i le Tusi Paia na i lo le avea ma ē mulimuli i uputuu faaletapuaiga. E masani ona avea lenei mea ua na o se ufiufi. O aʻoaʻoga faavae a faalapotopotoga Porotesano e tali tutusa lava ma i latou o i le Lotu Katoliko, o le toatele ua taliaina, e faigofie ona faaaogāina le faaupuga faa-Andean e faapea: “Es la misma cholita con otra pollera” (O le mea lava e tasi, e leai lava se eseesega).

Mo se faaaʻoaʻoga, toetoe lava o vaega uma o Porotesano e aʻoaʻoina o le Atua o se Tolutasi, ae e lē o se aʻoaʻoga lea a le Tusi Paia. Ua faailoa mai e le Encyclopedia of Religion e faapea: “I aso nei, ua ioe i latou o ē faamalamalamaina le Tusi Paia ma faifeau e faapea, e lē o iai i le Tusi Paia Eperu se aʻoaʻoga o le Tolutasi . . . E faapena foi i le Feagaiga Fou, e lē tau fesiligia e lē o iai se aʻoaʻoga o le Tolutasi.”a

Ua matuā manino le pipii atu o tagata Porotesano i lenei lalolagi ma ana polotiki e pei lava o tagata Katoliko. Na faapea mai le Encyclopedia of Latin America: “Ua faapipii atu e lotu Porotesano i Amerika Latina ia lava i . . . polotiki masani faapalota. E masani ona avea faifeau o se atunuu ma sui i faiga faapolotiki ma avatu foi tagata palota ina ia fiafia ai le malo i a latou lotu.” Ua fai mai le Latin American Research Review e faapea: “Sa faapipii atu lotu Porotesano i faiga polotiki i Guatemala talu mai le uluai taimi na taunuu ai i le atunuu,” ma i le faaopoopo atu i ai “ua avea ai ia lotu ma auala e faaoo atu ai faiga faapolotiki ma amioga faavafealoaloai e avea o se vaega o le tapuaiga.”

O le auai o tagata Porotesano i polotiki ua masani ona taʻitaʻiina atu ai i latou i le auai i taua. Na faailoa mai e lē ua maliu o Harry Emerson Fosdick, sa manatu i ai o se faifeau Porotesano e sili ona malosi lana taaʻiga i le talafaasolopito o Amerika e faapea: “O le talafaasolopito o lo tatou itu i Sisifo ua na o taua lava. Ua tatou ofoina atu tagata mo taua, aʻoaʻoina tagata mo taua; ua tatou faamamaluina foi taua; ua tatou faia fitafita ma o tatou toa ma e oo lava i totonu o tatou falesā ua tatou tuu ai fuʻa o le taua . . . Tatou te viia le Perenise o le Filemu i le isi pito o tatou gutu ae faamamaluina taua i le isi pito o tatou gutu.”

O le ā e Ao ona E Faia?

Ina ua uma ona faamatalaina tapuaiga sese e pei o se fafine talitane faafaatusa o loo faitaaga faatasi ma malo o le lalolagi, ona faapea mai lea o le tusi o le Tusi Paia o le Faaaliga: “Loʻu nuu e, ia outou o ese ia te ia, ina neʻi faatasia outou i ana amioga leaga ma tofusia faatasi ai i ona mala.”—Faaaliga 18:4, JB.

Ua iloa e le toatele e faapea, e tele mea leaga ua faia i le igoa o le lotu, peitai latou te mumusu e ō ese ai ona ua latou fai mai o le Lotu Roma e iai sona talafaasolopito ua leva. Peitai, ia manatua, sa sili atu foi ona leva le faiga tau tapuaiga a Iutaia; peitai sa teena e le Atua tagata Iutaia e avea ma ona tagata ona ua latou liliuese mai ana aʻoaʻoga moni. Sa tuua e auauna faamaoni a le Atua le lotu Iutaia ina ua latou iloa faapea ua faaaogāina nei e le Atua le faapotopotoga Kerisiano e fai ma ona sui. E mafai faapefea ona e iloaina le faapotopotoga o Kerisiano moni i aso nei?

Toeitiiti lava atoa le miliona o tagata Amerika Latina ua avea ma Molimau a Ieova i le luasefulu tausaga ua mavae. Aiseā na latou faia ai lenei suiga? Na iloiloina e se nusipepa i Martínez de la Torre i Veracruz i Mekisikō lenei fesili. Na faapea mai: “O nei tagata aʻoga o le Tusi Paia ua faia aʻe i tagata toetoe lava 100 pasene o i latou na auai muamua i isi tapuaiga, ae maise lava le lotu Katoliko, ona ua latou iloa ua lolo atu tapuaiga i faiga faapolotiki ma taliaina ma faamaonia faiga e lē faale-Tusi Paia e pei o le faafefiloi faatasi ma isi faatuatuaga, o amioga lē tatau, ma faiga sauā. Ua avea o se puna o le faamalieina mo i latou le mulimuli i mataupu silisili faale-Tusi Paia e faatatau i faiga tau amio e aunoa ma le auai i ifoga i tupua po o uputuu faaanamua. Ua avatu ai ia i latou se autasi i le tapuaiga lea e foliga mai e lauiloa ai i latou po o fea lava latou te iai.”

Na faaupu mai e se tasi nusipepa i Amerika Latina lenei lava manatu e faapea: “O Molimau a Ieova o ni tagata e galulue mamafa, e faamaoni, ma e matataʻu i le Atua. O ni tagata e lagolagoina ma tausisi atu i upu na aʻoaʻoina ai i latou ma le alofa, ma o la latou tapuaiga e faavae i aʻoaʻoga o le Tusi Paia.” Matou te valaauliaina oe ina ia e suesueina le Tusi Paia ma Molimau a Ieova, e tusa lava po o fea e te nofo ai. O le a e aʻoaʻoina ai e faapea o lo latou faamoemoe ma le ala atoa o o latou olaga e faavae uma lava i le Tusi Paia. Ioe, o le a e aʻoaʻoina ai le auala e te tapuai ai i le Atua ‘i le agaga ma le upu moni.’—Ioane 4:23, 24.

[Faaopoopoga i lalo]

[Siata i le itulau 21]

MOLIMAU A IEOVA I ISI ATUNUU O AMERIKA LATINA

1971 1992

Atunuu Au Talaʻi Au Talaʻi

Anitenitina 20,750 96,780

Costa Rica 3,271 14,018

Dominican Republic 4,106 15,418

Ekutoa 3,323 22,763

El Salvador 2,181 20,374

Guadeloupe 1,705 6,830

Guatemala 2,604 13,479

Honduras 1,432 6,583

Kolomepia 8,275 55,215

Mekisikō 54,384 354,023

Panama 2,013 7,732

Paraguay 901 4,115

Pasili 72,269 335,039

Peru 5,384 43,429

Polivia 1,276 8,868

Puerto Rico 8,511 25,315

Sili 8,231 44,067

Uruguay 3,370 8,683

Venezuela 8,170 60,444

AOFAI 212,156 1,143,175