Lipoti a Ē Faalauiloa le Malo

Tumau Mausali e Aumaia ai Taui e Tele

SA VALOIAINA e Iesu le sauaina o ona soʻo, ma sa faia foi faapea e le aposetolo o Pauro, e pei ona taʻua i le 2 Timoteo 3:12 e faapea: “O i latou uma foi o e loto ina nonofo ma le amio Atua ia Keriso Iesu, e sauaina i latou.” Ae, o le tumau mausali i le auaunaga ia Ieova le Atua, e aumaia ai taui e tele.

◻ Sa tupu moni lenei mea i se taulaga i le talafatai i mātū i sasaʻe o Meleisia. E ui o ia o se tagata lotu Puta faamaoni ma sa ia tautala malosi i lana fanau, ae sa lē mafai e se tamā ona taofia ona afafine e toatolu ma ona atalii e toatolu mai le suesueina o le Tusi Paia ma Molimau a Ieova. E oo lava i lana avā, na faaalia foi le fiafia i le upu moni. I se tasi aso, na amusia ai o ia e se tamaloa la te tuaoi e faapea: “E faapefea ona e lē mafai ona puleaina lau fanau ma faatagaina i latou e avea ma Molimau a Ieova? O loo pipii mai pea laʻu fanau ia te aʻu ma le matou lotu Puta mai i tuaa. Talofa e ia te oe!”

Sa faanatinati atu loa lea tamā i le fale ma faamataʻu atu le fasiina o le tuafafine lea e faia suesuega a lana fanau. Ae sa faatoʻatoʻaina o ia e lana fanau ma faaauau pea le suesueina o le Tusi Paia ma Molimau a Ieova, ma auai i sauniga, faatasi ma le lagolagosua a lo latou tinā.

Mulimuli ane, sa taloina e le tamā le aiga atoa i ona luma. Sa ia fai atu malosi, “Ia filifili, i le va o aʻu ma le tou nonofo pea i le fale, po o le avea ma Kerisiano ma ō ese ma le fale.” Sa amata loa e le tama pito i matua, o sē e leo mālū, ona tapena ana mea e alu ese. Sa eē atu le tamā, “E leai! Talu ai o outou uma lava o se fanau fouvale, e sili ai pe a ʻou oti.” Ona ia faavave ese atu loa lea ma le fale, ae tuliloa atu e lona aiga o ē na aioi atu ia te ia e ʻaua neʻi pule i lona ola. Ona o le faagaeetia o ia i a latou olega, sa ia toe foi ai i le fale.

Sa mavae atu taimi. Ua amata ona matauina e le tamā āuga lelei o le upu moni o le Tusi Paia i amioga a lana fanau. I se tasi aso, na fetaui ai ma lana uo aamu, o sē ua avea nei ma tagata faanoanoa tele, ma sa fai ane: “Ua ou lē fiafia tele i laʻu fanau. Ua latou faaʻoleʻole ia te aʻu ma gaoi aʻu mea.” Ae sa faapea atu le tamā lea o loo suesue lana fanau ma Molimau a Ieova: “Oi, ua ese lava laʻu fanau! E agalelei ia te aʻu ma ua oo ina fesoasoani mai foi i le totogiina o laʻu nogatupe o laʻu taavale ina ua leai saʻu galuega.”

I aso nei, ua papatisoina ia teine e toatolu ma lo latou tinā. O se tasi o tama ua avea ma paeonia faapito. Ae ā le tamā sa faamaoni i lana lotu ma ita? Ua fiafia nei ma na auai i le Faamanatuga.

Ua tauia e Ieova le tama ma ona tuafafine e toatolu, faatasi ma lo latou tinā mo lo latou tutumau mausali ia te Ia. Ua avea nei i latou ma tagata talaʻi maelega o le Malo, e faafiafiaina le finagalo o Ieova.—Faataoto 27:11.