Molimau a Ieova i le Lalolagi Aoao—Le Atu Filipaina

O LE 7,083 o motu lafulafua o le teropika o loo atiae ai le Malo o le Atu Filipaina, o le vaega lea e pito i luga o atumauga faasolosolo e tau lē iloa atu.a Ma o le 62,000,000 o tagata o loo nofoia Filipaina, e fiafia tele e talatalanoa i so o se mataupu. Ua avea lenei uiga tausaafia ma iuga e fuatele mai ai le molimauina atu o le Malo i lenei laufanua.

Molimau atu i Aʻoga

I le motu o Masbate, sa mafai ai e se teine aʻoga talavou ona molimau atu i lona faiaoga ma le vasega i se suega sa faia e faaaogā ai le tali saʻo po o le sese. Na ia faapea mai:

“O le fuaiupu sa faapea, ‘Afai e alofa le Atua ia te aʻu, o le a ia lē aumaia la ia te aʻu ni faafitauli pe faapuapuagatia aʻu.ʻ Ina ua siaki e loʻu faiaoga a matou pepa suega, na ia mauaina ai o tamaiti uma lava seʻi vagana ai aʻu, na tali mai e saʻo. Sa tuu mai e loʻu faiaoga le avanoa e faamatala ai i le vasega le mafuaaga na ou tali atu ai e sese. Na ou fai atu, e lē o le Atua na aumaia faafitauli ia i tatou, e ui lava ina ia faatagaina sauaga, ma tuuina atu i tatou e tofotofoina. I le faaaogāina o laʻu Tusi Paia lea e masani ona ave i le aʻoga, sa matou fefulifulisai ai ma le vasega i upu i le 1 Ioane 4:8, ‘O le Atua o le alofa lava ia.’ Ina ua maeʻa laʻu faamatalaga, sa faatalitonuina loʻu faiaoga, na tātā lana kesi ma faapea atu: ‘E saʻo Marilou.’ E na o aʻu lava na saʻo le tali i lenei fesili, ma na ou mauaina ai togi e pito sili ona maualuluga.”

Ua Salalau le Feau o le Malo i So o se Mea

A o auai i le faiva mai lea fale i lea fale i se isi vaega o Filipaina se tuafafine paeonia sauatoa (tagata talaʻi sauatoa o le tala lelei), sa fetaui ai o ia ma se tinā e toatolu lana fanau laiti. Sa faaalia e le fafine le naunau tele i le feau o le Malo, ma na avea lena mea ma ala na faigofie ai ona amata se suesuega faale-Tusi Paia ma ia. E ui lava na lē fiafia lona toalua e faia ni ana lesona faale-Tusi Paia, ae maise lava mai i Molimau a Ieova, ae na faaauau pea le suesuega.

Na siitia e le tamaloa lona auaiga i se tasi aai, ma le manatu e faapea o le a muta ai le fesootaiga a Molimau ma lona toalua. Peitai, e leʻi umi ae latou mauaina lenei fafine, ma ia toe amataina ai lana suesuega faale-Tusi Paia. O le mea moni, na matuā ita tele lona toalua. Na oo lava lona ita i le fale faigaluega, ma na masua atu ai ona faalogona i se tasi o tamaloa sa ia faaleleia lana taavale. E leʻi iloa e le tamaloa e faapea, o le tamaloa lenei sa ia talanoa atu i ai, o se tasi o Molimau a Ieova.

Sa faapea atu le Molimau, atonu o le a matuā aogā tele mo le aiga atoa pe afai e faaauau pea le suesuega faale-Tusi Paia a lona toalua. E ono mafai ona ia faatatauina muamua lava mataupu silisili o le Tusi Paia i totonu o le aiga. Sa ia fautuaina foi le mafai ona aogā i le tane lava ia na mataupu silisili e ala i lona aʻoaʻoina e uiga i le Malo o le Atua.

O le ā na iu i ai lenei talanoaga? Ua faateleina le saolotoga o le toalua o le tamaloa e faaauau ai lana suesuega faale-Tusi Paia, ma na ia filifili loa e toe foi atu ma lona auaiga i le mea sa latou nonofo ai muamua. I inā na agaigai ai i luma faaleagaga le fafine, ma avea ai o ia ma tagata talaʻi e leʻi papatisoina. Na talia foi e lona toalua se suesuega faale-Tusi Paia, ma ua amata ona auai le aiga atoa i sauniga faa-Kerisiano.

[Faaopoopoga i lalo]

[Pusa i le itulau 8]

FAAMAUMAUGA A LE ATUNUU

Tausaga Faaleauaunaga o le 1993

TUMUTUMUGA O LE AU TALAʻI: 116,576

FAATATAUGA: 1 le Molimau i le 549

Ē NA AUAI I LE FAAMANATUGA: 357,388

TUUFAATATAUGA O PAEONIA: 22,705

TUUFAATATAUGA O SUESUEGA FAALE-TUSI PAIA: 94,370

AOFAI O Ē NA PAPATISOINA: 7,559

AOFAI O FAAPOTOPOTOGA: 3,332

OFISA O LE LĀLĀ: MANILA

[Ata i le itulau 9]

Aumaia e le molimau atu i nofoaga i le maketi ni iuga lelei

[Ata i le itulau 9]

Ofisa o le lālā o le Sosaiete o le Olomatamata i Manila