O Ai e Talitonu i Agaga Leaga?

PE E te talitonu e mafai e agaga lē vaaia ona taaina lou olaga? E toatele o le a tali mai ma le malosi, e leai. E ui e ioe o loo soifua le Atua, ae ua latou faaamuamu i le manatu e faapea, e iai peresona e sili atu ona malolosi na i lo o tagata o loo faia amioga leaga.

O le taatele o le lē talitonu i agaga lē vaaia i atunuu i Sisifo, ua mafua ona o taaʻiga a Kerisinetoma, lea ua faitau senituri o ia aʻoaʻo e faapea, o le lalolagi, o le ogatotonu o le vateatea, o loo taatia i le va o le lagi ma se afi i seoli i lalo ifo o le eleele. E tusa ai ma lenei aʻoaʻoga e faapea, ua maua e agelu le manuia i le lagi a o temoni ua pulea mataupu i seoli.

A o faapogaia e mea na maua i suesuega faasaienisi le tetee o tagata i manatu sese e uiga i le fausaga o le vateatea, ua lē toe avea ai o se mea masani le talitonu i agaga lē vaaia. Ua taʻua i le New Encyclopædia Britannica e faapea: “I le mavae atu o le fouvalega a Copernican (na faavae i aʻoaʻoga a le tagata suesue i fetu mai Polani o Copernicus) i lona 16 o senituri, lea . . . na lē toe manatu ai i le Lalolagi e faapea o le ogatotonu o le vanimonimo, ae, na i lo o lea, ua na o se paneta i le faasologa o le la, ma o se vaega laitiiti o se aniva i se vateatea vāvāloloa—ua lē talafeagai ai la ona toe talitonu i le iai o agelu ma temoni.”

E ui ina toatele e lē talitonu i agaga leaga, e faitau miliona i latou e talitonu i ai. Ua faia e agelu na pauu mai se vaega tāua i le tele o lotu, i aso ua mavae ma aso nei. E ese ai mai la latou vaega o le avea o ni ē e faaleagaina le itu faaleagaga, o nei agelu leaga ua vaaia o ni sui o mala, e pei o taua, oge, ma mafuie, faapea ma le faapogaia o maʻi, faaletonu o le mafaufau, ma le oti.

O Satani le Tiapolo, le agaga leaga sili i le Faa-Kerisiano ma le faa-Iutaia, ua taʻua e tagata Musalimi o Iblis. I le lotu Peresia anamua o le Zoroastrianism, na iloa ai o ia faapea o Angra Mainyu. I le lotu Gnostic, lea na olaola i lona lua ma lona tolu o senituri T.A., sa manatu ai i le Tiapolo e faapea o Demiurge, o le igoa na tuuina atu i se atua e fuā ma e maulalo ifo, o lē o loo tuuina atu i ai e le toatele o tagata le tapuaiga ma le lē iloa.

Ua avea ma vala tāua i lotu i Sasae ia agaga leaga e maulalo ifo i lo o le agaga leaga sili. E talitonu tagata lotu Hinitu e faapea, o asuras (temoni), e tetee atu i devas, (atua). Ma e sili ona matautia i asuras ia rakshasas, o agaga leaga auleaga e nonofo i tuugamau.

Ua manatu tagata lotu Puta i temoni e faapea, o ni uiga ua faaperesonaina latou te taofia tagata mai le mauaina o le Nirvana, o le leai lea o ni tuinanau. O le taufaaosooso sili ia i latou, o Mara, faatasi ma ona afafine e toatolu o Rati (Tuinanau), Raga (Fiafia), ma Tanha (Tafitifiti).

E faaaogā e tagata tapuai o Saina ni tafunai, suluafi, ma mea faapāpā e puipuia ai i latou faasaga i kuei, po o temoni o le natura. E taofi foi lotu a Iapani faapea e tele temoni, e aofia ai ma tengu taufeai, o agaga leaga latou te uluitinoina tagata seʻi vaganā ua tuliesea e se patele.

I lotu e lē iloa faitau ma tusitusi i Asia, Aferika, Oceania, ma atunuu o Amerika, ua talitonu ai i mea faiola agaga faapea e mafai ona latou fesoasoani pe afaina ai foi, e tusa ai ma tulaga ma o latou lagona o iai. E faaaloalo tagata i nei agaga faapea e mafai ona tutuliesea mala ma maua ai ni lelei.

E faaopoopo atu i nei mea uma le salalau atu o le naunau i faiga faataulaitu ma faaagaga, ma e manino lava e faapea, o le talitonuga i agaga leaga e iai sona talafaasolopito umi, ma ua salalau atu. Ae po o se mea tatau ona talitonu faapea o loo iai na meafaiola? Ua faapea mai le Tusi Paia, o loo iai. Ae peitai, afai e iai, aisea ua faataga ai i latou e le Atua e taaina tagata ma oo atu ai i le leaga?