Le Palemene a Lotu a le Lalolagi—Pe o le a Taulau Ea?
E FAITAU afe taʻitaʻi lotu na ofaga potopoto i le Palemene lona lua a Lotu a le Lalolagi sa faia i Chicago, Illinois, i Amerika, i le taumafanafana o le 1993. Sa auai uma sui mai le lotu Puta, o Kerisinetoma, lotu Hinitu, lotu Iutaia, ma le lotu Isalama. Sa auai foi nisi o tagata faataulaitu ma tagata o ē e tapuai i atua fafine. Sa latou talanoaina ai lo latou sao i le faamutaina o taua. Na faapea mai le taitaifono o le palemene, o le “lua vae tolu o fetauaiga sili i le lalolagi i aso nei, e mafua mai i lotu.”
Le Selau Tausaga ua Mavae
Pe sa faamanuiaina ea le palemene? Seʻi tagai i le mea na tupu i le selau tausaga ua mavae i le uluai Palemene a Lotu a le Lalolagi. Sa tauaofia foi i Chicago, i le taumafanafana o le 1893, ma sa sili atu i le 40 lotu na auai. Na taʻua mai i le Fono a le Palemene o Lotu a le Lalolagi, o i latou o ē na auai i le 1893, “na talitonu e faapea o le uluai fonotaga faavaomalo mo lotu eseese o le a faifai pea e mafai ona saosaolaumea i le malamalama, le filemu ma le agaigai i luma. Sa leʻi faaiuina i se tulaga faapea. O le lē faapalepale ma le sauā o lotu, sa avea ma vaega o taua i le 100 tausaga ua teʻa, ma faaauau e oo mai lava i aso nei.” Aisea ua lē taulau ai? Talu ai ona o le manatu aoao o le auaufaatasi o lotu e lē faamaonia e le Atua. Ua faapea mai le Tusi Paia: “Aua tou te amo faalegatasi ma e le talitonu.”—2 Korinito 6:14-17.
Ma le talafeagai ai, i le lomiga o le Zion’s Watch Tower o Setema 1893, na faamatilatila mai ai le lē lagolagoina e le Tusi Paia o le Palemene o Lotu a le Lalolagi i le tautino mai e faapea: “Ua mauaina e tagata e suesue i le palapala le tele o fagu omea ofoofogia mai i mea na totoe mai le faaleagaina o Papelonia ma isi aai anamua, ae o loo iai pea nisi mea e leʻi mauaina. . . . Latou te leʻi mauaina ai se mea e tasi o faapea mai na taʻua ai Mose ma Iosua o se ‘Palemene o Lotu,’ o tagata Moapi ma tagata Amoni, ma tagata Etoma. . . . Latou te leʻi mauaina foi se tasi o tautala e uiga i le toeaina malosi o Samuelu, o aauina atu i Kata ma Ekerona ina ia maua mai ai se talaaga lelei o faitaulaga o Takono ina ia sau i Sailo ma faia se fonotaga ma ositaulaga a Ieova. . . . Latou te leʻi mauaina foi se tasi o tautala e uiga i le toeaina o Elia ma lona fusipau e fai i paʻu o manu o faapea mai, na ia taloina se ‘fono’ ma ositaulaga a Paala ma Moloka mo se talanoaga faalevaiaso o ni aʻoaʻoga moni o o latou faatuatuaga, ma se vaaiga i le siitia o le feavatai mo tapuaiga a le tasi.”
Le Malo o le Atua =—Ua na o Lea le Faamoemoe
O le a lē taulau le Palemene a Lotu a le Lalolagi. Ua faaaogā e nusipepa ma sui usufono faaupuga e pei o nei, “lavelave,” “gugulu,” ma le “matuā fenuminumiai” i le fesootai atu ma le palemene. E tusa ai ma se tasi o lipoti, e oo lava i leoleo na aafia ai i le tau faafilemuina o vevesi e lua na mafua mai i fevaevaeaiga faapolotiki. I se faamaumauga i le 1952, na taʻua ai e le palemene se tasi o ona faamoemoe e faapea: “Ina ia faia se faavae tumau a le Palemene a Lotu a le Lalolagi e galulue faatasi ma le MALO AUFAATASI i le aumaia o le filemu i le lalolagi, ma le malamalamaga i tagata uma.” I le eseesega, na fetalai Iesu e faapea, o lona Malo e lē mai lenei lalolagi. O loo faasino atu le Tusi Paia i le Malo o le Atua, ua na o lea le vaifofo mo faafitauli o tagata.—Tanielu 2:44; Ioane 18:36.