Sōsō Mamao pe a Faamatauina e Tulaga Matautia

E TOAITIITI tagata e sili atu ona manatunatu mamafa i tulaga matautia na i lo o seila. E tatau lava ona mataala pea mo so o se suiga o le tau, le tulaga o le tai, ma le matuā latalata o o latou vaa i le talafatai. Pe a ō mai faatasi le matagi ma le malosi o le tai ma avatu ai le vaa agaʻi i le matafaga, e mautinoa ua fesagai seila o le vaa ma se galuega fita ma le matautia.

I lalo o nei tulaga—a o vaaia ua latalata le vaa i se matafaga—e ao i se seila ona faamamao lona vaa ma le talafatai, ae maise pe a na o le pau le mea e mafai ona alu ai le vaa o lona la. O loo faamatalaina i se tusi mo folauga e faapea, ‘o le āfatia o se vaa a o lalata i se matafaga, atonu o se tulaga e sili ona leaga’ o le a oo i ai le seila. O le ā le vaifofo ua fautuaina? ʻAua le faatagaina lou vaa e maua i sea tulaga faigata.’ O le auala e sili ona saogalemu e alofia ai le mauaina o le vaa i luga o se fagaoneone po o se matafaga papa, o le sōsō mamao lea ma tulaga matautia.

E ao i Kerisiano ona mataala i lamatiaga na e ono faaleagaina ai lo latou faatuatua. (1 Timoteo 1:19) I aso nei, o tulaga ua iai, ua matuā lē talafeagai mo le faatumauina o se ala sologa lelei. E pei ona mafai ona sipa ese se vaa mai le alavaa saʻo ona o matagi ma le tai, e faapena foi ona leiloa lo tatou ola tuuina atu ona o le tauiviga faifai pea ma lo tatou tino lē lelei atoatoa, ma le osofaiga faifai pea mai le agaga o lenei lalolagi—lea ua toetoe faatusaina i se afā malosi.

O se Tagata na Soifua aʻe i se Tulaga Matautia

Pagā le faigofie ona oo atu i vai matautia faaleagaga e aunoa ma le iloaina!

Seʻi manatu i se faaaoaoga i se mea na tupu e latalata i se ogasami, e taʻua o le Sami Mate. O loo tatou faasino atu i le faaaoaoga a Lota. O lana filifiliga e nofo i Sotoma, na aafia ai o ia i le tele o faafitauli ma faanoanoaga. Ina ua uma se fefinauaiga i le va o a la leoleo manu, ona malilie ai lea o Aperaamo ma Lota ia la nonofo eseese. E pei ona tatou iloa, na filifilia e Lota le Itumalo o Ioritana, ma faatuina lona faleie i aai o le Itumalo. Mulimuli ane, ona ia filifili lea e nofo i Sotoma, e ui ina sa faanoanoa o ia ona o le tulaga o amioga a tagata Sotoma.—Kenese 13:5-13; 2 Peteru 2:8.

Aisea na faaauau ai pea ona nofo Lota i se aai na matuā logologoa le leaga i amioga lē mamā na sa matuā faatiga ia Ieova, ma na oo ai lava ina lagona le oi mai tagata o ē na nonofo latalata ane? O Sotoma o se nuu tamaoaiga, ma sa mautinoa le fiafia o le avā a Lota i lelei faaletino e maua i le olaga i le aai. (Esekielu 16:49, 50) Atonu sa faatosinaina foi Lota i le olaola mai o le tamaoaiga o Sotoma. Po o le ā lava lana mafuaaga mo lona nofo ai i inā, ae sa tatau lava ona ia tuua vave le aai na i lo o le mea sa ia faia mulimuli. Na faatoʻā tuua lava e Lota ma lona aiga le nuu matautia ina ua nanati atu agelu a Ieova ma aveesea mai i latou.

Fai mai le tala o i le Kenese e faapea: “Ua malama le taeao ona nanati lea o agelu ia Lota, o loo faapea atu, Ina tulai ia, ave lau avā ma ou afafine e toalua, o loo iinei, ina neʻi malaia oe i le sala a le aai!” Peitai, e ui lava ina ua uma lena lapataiga faanatinati, ae sa “faatuatuai” pea Lota. Sa iu lava ina oo atu agelu ma fetagofi “i lona lima, ma le lima o lana avā, ma lima o ona afafine e toalua, . . . ua la taʻitaʻi atu foi ia te ia, ma tuu atu ia te ia i tua o le aai.”—Kenese 19:15, 16.

I tua o le aai, na tuuina atu ai e agelu ia Lota ma lona aiga ni faatonuga mulimuli e faapea: “Ina sola ia e te ola ai, aua e te tepa i tua, aua foi e te tu i se mea o le fanua laugatasi; a ia sola lava i le mauga ina neʻi malaia oe!” (Kenese 19:17) E ui lava i na mea, ae sa toe ole atu Lota mo se faatagaga ina ia alu atu ai i le aai o latalata ane o Soara, na i lo o le lafoaia o le nuu atoa. (Kenese 19:18-22) E manino, sa lē naunau Lota e sōsō mamao i le tele e mafai ai mai tulaga matautia.

I le ala i Soara, na toe tepa ai i tua le avā a Lota i Sotoma, e foliga mai sa moomoo i mea sa ia tuua ai i inā. Talu ai ona o le lē amanaiaina o faatonuga a le agelu, na lē iloa ai lona ola. O Lota—o se tagata amiotonu—na faasaoina mai le faaumatiaga o le aai faatasi ma ona afafine e toalua. Ae pagā se tau na ia totogia mo le filifili e ola e latalata i tulaga matautia!—Kenese 19:18-26; 2 Peteru 2:7.

Taumamao Mai se Tulaga Matautia

O le mea na tupu ia Lota, ua faaalia mai ai le mea e ono tupu ia i tatou, pe afai tatou te faalatalata, po o le nofo ai i se siomaga matautia. O le atamai na te taʻu maia ia i tatou e pei o seila popoto, e lē mafai ona tatou faatagaina i tatou lava e oo i na tulaga faigata. O ā nisi o vaipanoa matautia e ao ona tatou taumamao ese mai ai? O nisi Kerisiano ua latou sē ese i le aafia tele i faiga faapisinisi, e ala i le faia o ni faigauo vavalalata faalelalolagi, po o le faaaafia o faalogona i se tasi o le isi ituaiga ae e lē o saoloto i latou e faaipoipo.

O le auala poto i na tulaga uma o le faamamao lea mai na lamatiaga. O se faaaoaoga, po o tatou mataala ea i lamatiaga faaleagaga pe a ofo mai se avanoa manaia faapisinisi? O nisi o uso ua matuā tuu i latou lava i faiga o fefaatauaiga, ae aumai ai lamatiaga i o latou aiga, i o latou soifua maloloina, ma a latou avega tauave faatiokarate. I nisi taimi, o le faatosinaga, e sau mai le matagofie o le olaga e aumaia e tupe. I nisi taimi o le fia tofoina o o latou tomai faapisinisi. O nisi e ono fai mai, o lo latou faanaunauga o le saunia lea o galuega mo isi uso, po o le mafai foi ona tele le foai mo le galuega i le lalolagi aoao. Atonu latou te mafaufau faapea, pe a solosolo lelei le pisinisi, o le a tele la lo latou taimi e tuuina atu i manaoga o le Malo.

O ā nisi o mailei? O le lē mautonu o le tulaga tautupe, ma le “taimi ma le mea e tupu ai” e mafai ona tutaia ai fuafuaga lelei i le taumafaiga o le pisinisi. (Failauga 9:11) O le tauivi ma se aitalafu telē e ono aumaia ai le faanoanoa, ma atonu o le a aveesea ai mataupu faaleagaga. Ma e tusa lava pe faapea ua olaola le pisinisi, atonu e alu ai le tele o le taimi, ma le mafaufau, ma atonu e ono manaomia ai ni aufaatasiga faalelalolagi.

Sa matuā aafia lava se toeaina Kerisiano i Sepania i tulaga faigata tautupe, ina ua faia e se kamupani inisiua se ofo e tofotofoina ai o ia. E ui lava o le avanoa lea na te maua ai ni tupe se tele i le avea ma sē fai inisiua e pule ia te ia lava, ae na te leʻi taliaina le ofo. Na ia faamatala mai e faapea: “Sa lē o se filifiliga faigofie, ae ua ou fiafia ona sa ou tali atu e leai. O se tasi o mafuaaga, sa ou lē naunau e saili ni aʻu tupe—e tusa lava pe i se tulaga e lē tuusao—e ala i aʻu sootaga faatiokarate. Ma e ui lava ina sa ou fiafia i le manatu o loʻu pule lava o aʻu ia ia te aʻu i le galuega, ae o le a tele ai ina ou malaga ma faaalu ai taimi e tele i le galuega. O lona uiga o le a oo ina tuulafoaia ai loʻu aiga ma le faapotopotoga. I nei mea uma lava, sa ou manatu ai e faapea, ana fai na ou taliaina le ofo, semanu e faapenei ua lē mafai ona ou puleaina loʻu olaga.”

E leai se Kerisiano e manao e leiloa le puleaina o lona olaga. Na faaalia e Iesu ni iuga pagatia o sea ituaiga o auala e ala i le faamatalaina mai o le faataitaiga i se tamaloa o lē na manao e faaputuputu ia tele lona tamaoaiga ina ia litaea ma faafaigofie ai lona olaga. Ae i lena lava po, na ia faapea ifo ai ua lava ma totoe ana tupe, na oti ai o ia. Na lapatai mai Iesu: “O loo faapea foi lē faaputu oa ia te ia, a e le mauoa i le Atua.”—Luka 12:16-21; faatusatusa i le Iakopo 4:13-17.

E tatau foi ona leoleoina i tatou mai i le faateleina o auaufaatasiga ma tagata o le lalolagi. Atonu o se tuaoi, o se uo i le aʻoga, o se tagata lua te faigaluega faatasi, po o se tasi lua te fai pisinisi faatasi. Atonu tatou te manatu faapea, ‘E faaaloalo o ia i Molimau, o loo ola i se olaga mamā tau amio, ma o nisi o taimi ma te talanoa ai e uiga i le upu moni.’ Peitai, o mea na tutupu i isi ua faamaonia ai, e iai le taimi, atonu e oo ina tatou faasilia ai lena ituaiga o aumea o le lalolagi na i lo o se uso po o se tuafafine faaleagaga. O ā nisi o lamatiaga o na ituaiga o faigauo?

E ono mafai ai ona tatou faaleamanaiaina ai le puupuu o le taimi ua tatou ola ai, po o le faateleina o lo tatou naunau i mea faitino, na i lo o mea faaleagaga. Atonu, ona o le fefe ina neʻi lē fiafia a tatou uo o le lalolagi, ua tatou mananao ai e taliaina i tatou e le lalolagi. (Faatusatusa i le 1 Peteru 4:3-7.) I le isi itu, na faataua e le faisalamo o Tavita le auaufaatasi ma tagata o ē alolofa ia Ieova. Na ia tusi e faapea: “Ou te taʻu atu lou suafa i oʻu uso; ou te vivii atu ia te oe i totonu o le faapotopotoga.” (Salamo 22:22) O le a malupuipuia i tatou pe afai tatou te faataitai i le faaaoaoga a Tavita, i le sailia o le fefaauoaiga na e mafai ona atiina aʻe ai i tatou faaleagaga.

O se isi o tulaga lamatia, o le aafia faafaalogona lea i se isi o le isi ituaiga, pe afai e lē o saoloto se tasi e faaipoipo. Atonu e aliaʻe ai se tulaga matautia pe afai ua tosina atu se tasi i le isi e aulelei, e mālie lana talanoa, ma o lē o loo tutusa a la vaaiga ma uiga mālie. Atonu o le a fiafia le tasi i lana aumea i le faapea mai, ‘Ou te iloa lava pulea aʻu. E na ona ma uo lava.’ Ae a oo loa ina faagaeetia faalogona, e faigata tele ona toe pulea.

Sa fiafia Maria, o se tuafafine talavou ua faaipoipo e faifaimea faatasi ma Mikaele.a O ia o se uso lelei, ae e faigata ona faauo solo. E tele mea la te tutusa ai, ma sa la iloa le mafai ona la talitalie faatasi. Sa logovii Maria i le manatu e faapea, o se uso talavou o loo fia mapu atu ia te ia. E leʻi leva lava, o le mea sa foliga mai o se faigauo mamā, na avea ma sootaga tau i faalogona loloto. Sa oo ina tele taimi la te faifaimea faatasi ai, ma mulimuli ane, na la faia le faitaaga. Na auē Maria ma faapea mai: “Sa tatau ona ou iloa le matautia i le amataga. O le taimi lava na lelei ai le faigauo, sa pei o se oneone mimiti na mitiiaina i maʻua i se tulaga e sili ona loloto.”

E lē tatau ona tatou faagaloina le lapataiga a le Tusi Paia e faapea: “E sili ona faaʻoleʻole o le loto i mea uma, ma ua matuā leaga lava; po o ai na te mafaia ona iloa?” (Ieremia 17:9) O o tatou loto faaʻoleʻole, e pei o le tai lea na tuleiina atu le vaa agaʻi i papa, e mafai ona ia aveina atu i tatou i se faiā taufaalogona e malaia ai. O le ā le vaifofo? Afai e te lē o saoloto e faaipoipo, ia matuā galue malosi ina ia taumamao ese i faiā taufaalogona mai i lē ua e iloa o loo e tosina atu i ai.—Faataoto 10:23.

Saoloto mai ma ia Tausisi pea i le Saoloto Mai Tulaga Matautia

Ae faapefea pe afai ua tatou iloaina ua tatou iai i le tulaga matautia faaleagaga? O seila, pe afai ua vāai atu ua lalata atu lo latou vaa i se matafaga o papa ona o le malolosi o matagi ma le tai, latou te matuā galulue malolosi ina ia faaliliuese lo latou vaa mai le matafaga ina ia aua ai neʻi malepe, seia oo ina latou mauaina se ogasami e saogalemu ai. E faapena foi ia i tatou, e tatau ona tatou tauivi ina ia faasaolotoina mai i tatou. E ala i le utagiaina o le fautuaga mai le Tusi Paia, tatalo e lē aunoa mo le fesoasoani a Ieova, ma saili le fesoasoani mai i uso Kerisiano taumatuaina, e mafai ai ona tatou toe maua se tulaga malupuipuia. O le a toe faamanuiaina i tatou i le filemu o le mafaufau ma le loto.—1 Tesalonia 5:17.

Po o le ā lava lo tatou tulaga, tatou te popoto pe afai e taumamao ma “mataupu . . . a le lalolagi.” (Kalatia 4:3) I le faaeseesega ma Lota, na filifili Aperaamo ina ia nofo mamao ese mai i tagata o le lalolagi i Kanana, e ui lava ina sa iu ai i le nofo i faleie mo le tele o tausaga. Atonu sa lē atoatoa le sologa lelei faaletino, ae o lona ola i se olaga faigofie na puipuia ai o ia faaleagaga. Na i lo o le faavaatuia o lona faatuatua, na avea o ia “ma tamā o e faatuatua uma lava.”—Roma 4:11.

E matuā malosi tele le “agaga” o le manatu e faamalieina ona lava tuinanau o le lalolagi o loo siomiaina ai i tatou, e manaomia ai ona tatou mulimuli i le faaaoaoga a Aperaamo. (Efeso 2:2) Afai tatou te talia le taitaiga a Ieova i mea uma lava, o le a faamanuiaina i tatou e ala i le mauaina o lana puipuiga alofa. O le a tatou lagona ai e pei foi ona lagona ai Tavita e faapea: “Na te faafoisia mai loʻu agaga; na te taʻitaʻi ia te au i ala o le amiotonu ona o lona suafa. E moni e mulimuli mai ia te au le agalelei ma le alofa i aso uma o loʻu ola; ou te nofo foi i le fale o Ieova i aso e tele lava.” E mautinoa, o le ō faatasi ma “le ala o le amiotonu,” o le a tatou maua ai faamanuiaga e faavavau na i lo o le ui i le ala e pagatia ai.—Salamo 23:3, 6.

[Faaopoopoga i lalo]

[Ata i le itulau 24]

Afai e te lē o saoloto e faaipoipo, ia taumamao ese i le itu tau i faalogona mai i se tasi ua e iloa o loo e tosina atu i ai