Le Faamasinoga a Ieova mo Aʻoaʻo Pepelo

“Ua ou iloa foi le mea e inosia i perofeta o Ierusalema; ua latou mulilulua, ma savavali ma le pepelo; . . . ua avea i latou uma ia te au e pei o Sotoma, ma e o nonofo ai e pei o Komoro.”—IEREMIA 23:14.

1. Aisea e tauaveina ai e se tasi o loo faia se sao i le aʻoaʻoga mai le Atua se tiute tauave mamafa?

O SO o se tasi lava e auai i le aʻoaʻoga mai le Atua, ua na tauaveina se tiute tauave mamafa. Ua lapatai mai le Iakopo 3:1 e faapea: “Oʻu uso e, aua le toatele outou e fai ma aʻoaʻo, ina ua tatou iloa e atili ai ona faasalaina o i tatou.” Ioe, o aʻoaʻo o le Afioga a le Atua, ua faaee atu i ai avega tauave tāua e talaina atu se tala e logoleleia, na i lo o Kerisiano lautele. O le ā le uiga o lenei mea mo i latou o ē ua faamaonia o ni aʻoaʻo pepelo? Ia, seʻi o tatou tagai la i le tulaga i aso o Ieremia. O le a tatou iloa ai pe ua faapefea ona faaatagiaina ai le mea o loo tupu i aso nei.

2, 3. O le ā le faamasinoga na tuuina atu e Ieova ia Ieremia e tusa ai ma aʻoaʻo pepelo i Ierusalema?

² I le 647 T.L.M., o lona 13 o tausaga o le pulega a le Tupu o Iosia, na tofia ai Ieremia e avea ma perofeta a Ieova. Sa iai se mea na lē fiafia ai le finagalo o Ieova ia Iuta, o lea, na ia aauina atu ai Ieremia e faailoa atu. Sa faia e perofeta po o aʻoaʻo pepelo o Ierusalema ni “mea e inosia” i fofoga o le Atua. Sa matuā leaga lava i latou, o lea na faatusaina ai e le Atua Ierusalema ma Iuta ia Sotoma ma Komoro. Ua taʻu mai ia i tatou e le Ieremia mataupu e 23 e uiga i lenei mea. Ua faapea mai le fuaiupu e 14:

³ “Ua ou iloa foi le mea e inosia i perofeta o Ierusalema; ua latou mulilulua, ma savavali ma le pepelo; ua faamalolosia foi e i latou lima o ē amio leaga, ina ia lē toe foi mai se tasi ai lana amio leaga; ua avea i latou uma ia te aʻu e pei o Sotoma, ma e o nonofo ai e pei o Komoro.”

4. E faapefea ona tutusa le faaaoaoga leaga tau amio a aʻoaʻo i Ierusalema ma Kerisinetoma i aso nei?

⁴ Ioe, o nei perofeta, po o aʻoaʻo, sa latou faataatiaina ni faaaoaoga leaga tau amio, ma iu ai ina faamalosi atu i tagata e faia faapena. Tagai i tulaga o Kerisinetoma i aso nei! Po ua lē pei ea i latou o na tagata i aso o Ieremia? I aso nei, ua faataga ai e taʻitaʻi lotu ē mulilulua ma tauatane e umia pea o latou tofiga faalelotu, ma ua faatagaina foi i latou e taitaia sauniga faalelotu. Pe e lē o se mea ea la e ofo ai i le toatele o sui faalelotu o loo faia foi amioga lē tatau?

5. Aisea e sili atu ai ona leaga tulaga o amioga a Kerisinetoma na i lo o Sotoma ma Komoro?

⁵ Na faatusaina e Ieova tagata na aināina Ierusalema, ia i latou sa nonofo i Sotoma ma Komoro. Ae e sili atu ai ona matautia le tulaga o amioga leaga a Kerisinetoma na i lo o Sotoma ma Komoro. Ioe, ua matuā sili atu lava ona leaga o ia i fofoga o Ieova. Ua solia e ona aʻoaʻo, tulafono tau amio faa-Kerisiano. Ma o lenei mea na faapogaia ai se tulaga paʻū maulalo tauamio o loo iai ituaiga uma o auala faaʻoleʻole faatogafiti e faia ai le mea leaga. Ona o le matuā taatele o lenei tulaga leaga tau amio, ua manatu ai i amioga leaga i aso nei e faapea, o se mea ua masani ai.

“Savavali ma le Pepelo”

6. O le ā na fai atu ai Ieremia e uiga i le leaga tele o perofeta i Ierusalema?

⁶ Mātau le mea o taʻua i le fuaiupu e 14 e uiga i perofeta i Ierusalema. Sa latou “savavali i le pepelo.” Ma o loo faapea mai le faaiuga o le fuaiupu e 15: “Auā o perofeta o Ierusalema ua oo atu ai le amio faalematau i le nuu uma.” Ma ua faaopoopo mai le fuaiupu e 16 e faapea: “O loo faapea ona fetalai mai o Ieova o ʻau, Aua tou te faalogologo i upu a perofeta o e vavalo ia te outou; ua latou faasese ia te outou e fai mea faatauvaa; ua latou tautala atu i le faaaliga mai o latou lava loto, a e le mai le fofoga o Ieova.”

7, 8. Aisea ua pei ai taʻitaʻi lotu o Kerisinetoma o perofeta pepelo i Ierusalema, ma ua faapefea ona aafia ai tagata o ō i lotu?

⁷ I le pei o perofeta pepelo i Ierusalema, ua savavali ai foi taʻitaʻi lotu o Kerisinetoma i le pepelo, i le faasalalauina atu o talitonuga faaaposetate, o aʻoaʻoga e lē o maua i le Afioga a le Atua. O ā nisi o nei aʻoaʻoga sese? O le lē mafai ona oti o le solu, le Tolutasi, le pulekatolio, ma se afi i seoli e faapuapuagatia ai tagata e faavavau. Ua latou faamalieina foi taliga o o latou tagata faalogologo e ala i le talaʻi atu o mea o fia faalogologo i ai tagata. Ua latou faapea mai i taimi uma e leai se mala o fesagai ma Kerisinetoma, auā o loo ia te ia le filemu mai le Atua. Ae o loo tautatala atu taʻitaʻi lotu “i faaaliga mai o latou lava loto.” E sese. O i latou o ē e talitonu i na tala pepelo, ua faaonanaina faaleagaga i latou. Ua taitaiseseina i latou i lo latou faaumatiaga!

⁸ Manatu i le mea ua fetalai mai ai Ieova e uiga i nei aʻoaʻo pepelo i le fuaiupu e 21: “Ua ou le aauina atu o ia perofeta, a ua latou taufetuli; ua ou le tautala atu ia te i latou; a ua latou vavalo.” O lea, i aso nei, ua lē o aauina atu taʻitaʻi lotu e le Atua, latou te lē o aʻoaʻoina foi ana upu moni. O le ā le iuga? O loo matuā valelea lava na tagata lotu i le Tusi Paia, ona o loo fafagaina i latou e a latou faifeau i manatu faafilosofia faalelalolagi.

9, 10. (a) O ā ituaiga o miti na faia e aʻoaʻo pepelo o Ierusalema? (e) Ua faapefea ona tutusa le aʻoaʻo atu o taʻitaʻi lotu o Kerisinetoma o “miti pepelo”?

⁹ E lē gata i lea, ua folafola atu e taʻitaʻi lotu i aso nei ni faamoemoega sese. Mātau le fuaiupu e 25: “Ua ou faalogo i mea ua fai atu ai perofeta, o e ua vavalo ma le pepelo i loʻu igoa, ua faapea atu, ‘Ua fai laʻu miti, ua fai laʻu miti!’” O ā ituaiga o miti? Ua taʻu mai e le fuaiupu e 32 ia i tatou e faapea: “‘Faauta, e fai moʻu fili i latou o e vavalo i miti pepelo, o loo fetalai mai ai Ieova, ma latou talatala atu ai, ma faaseseina ai loʻu nuu i a latou upu pepelo, ma lo latou mitamitavale; a o aʻu na ou le aauina atu i latou, ma aʻu lei fai atu ia te i latou; o le mea lea e le aoga ai lava i latou i lenei nuu, o loo fetalai mai ai Ieova.”

¹⁰ O ā miti po o faamoemoega pepelo ua aʻoaʻo atu e taʻitaʻi lotu? Ioe, e faapea e na o le pau lava le faamoemoe o le tagata mo le filemu ma le saogalemu i aso nei, o Malo Aufaatasi. I tausaga na seʻi faatoʻā mavae atu, sa latou taʻua ai Malo Aufaatasi “o le faamoemoega mulimuli lea mo le maliega o le filemu,” “o le nofoaga autū lea o le filemu ma le faamasinotonu,” “o le faamoemoe sili tumau mo le filemu o le lalolagi.” Pagā se tau faasese! E na o le pau lava le faamoemoe mo tagata o le Malo o le Atua. Ae e lē o talaʻia pe aʻoaʻo atu e taʻitaʻi lotu le upu moni e uiga i lena pulega faalelagi, lea sa avea ma matua autū o le talaʻiga a Iesu.

11. (a) O ā iuga leaga ua aumaia e aʻoaʻo pepelo o Ierusalema i le suafa o le Atua? (e) I le eseesega ma le vasega faa-Ieremia, o le ā ua faia e aʻoaʻo o lotu sese o aso nei e uiga i le suafa o le Atua?

¹¹ Ua taʻu atili mai i le fuaiupu e 27 nisi mea. “O loo manatu i latou ia faagaloina e loʻu nuu o loʻu igoa i a latou miti ua latou talatala atu ai o le tasi i le tasi, e pei ona faagalogalo e o latou tamā o loʻu igoa ona o Paala.” Sa faamalosia e perofeta pepelo o Ierusalema tagata ina ia faagalogalo le suafa o le Atua. Pe e lē o faia ea foi faapena e aʻoaʻo pepelo o lotu sese i aso nei lenei lava mea e tasi? O le mea e sili ona leaga, ona ua latou nanaina le suafa o le Atua, o Ieova. Ua latou aʻoaʻo e faapea, e lē manaomia ona faaaogā lea suafa, ma ua latou aveesea mai i a latou faaliliuga o le Tusi Paia. Latou te matuā teena lava se tasi na te aʻoaʻoina tagata e faapea, o le suafa o le Atua o Ieova. Ae i le vasega faa-Ieremia, le vaega totoe o Kerisiano faauuina, faatasi ma a latou aumea, ua latou faia e pei ona sa faia e Iesu. O loo latou aʻoaʻoina le faitau miliona o tagata e uiga i le suafa o le Atua.—Ioane 17:6.

Faaalialia o Lo Latou Sese

12. (a) Aisea ua tele ai le nofosala o aʻoaʻo pepelo faalelotu i le toto? (e) O le ā le vaega na faia e taʻitaʻi lotu i taua e lua a le lalolagi?

¹² Ua faaalialia pea e le vasega faa-Ieremia taʻitaʻi lotu e faapea, o i latou o ni aʻoaʻo pepelo o ē o loo taitaiina a latou lafu agaʻi i le ala vatele i le faaumatiaga. Ioe, ua faamanino mai e le vaega totoe le pogai ua tatau ai i na faimiti le faamasinoga aasa a Ieova. Mo se faaaoaoga, ua masani pea ona faasino atu e auauna a Ieova i le Faaaliga 18:24, lea o loo faapea mai ua iloa ua nofosala Papelonia le Aai Tele i le toto “o i latou uma ua fasiotia i le lalolagi.” Seʻi manatu i taua uma na faia ona o feeseeseaiga faalelotu. Pagā le matuā tele o le nofosala i le toto, o aʻoaʻo pepelo faalelotu! Ua faapogaia e a latou aʻoaʻoga fevaevaeaiga, ma ua atili faateleina ai le feitagai o tagata o faatuatuaga eseese ma vaega o atunuu. E faatatau i le Taua Muamua a le Lalolagi, ua faapea mai ai le tusi o le Preachers Present Arms: “Na avatu ma le maelega e clercs [faifeau] se uunaiga tāua faaleagaga ma le alofa i faigā taua. . . . O lea sa matuā aafia ai lotu i faigā taua.” Sa faapena foi ona moni lenei mea i le taimi o le Taua Lona Lua a le Lalolagi. Sa lagolagoina atoatoa e taʻitaʻi lotu atunuu fetauai ma faamanuia a latou vaegaau. O taua e lua a le lalolagi, na amata ia Kerisinetoma, lea na fasiotia ai e isi tagata lotu isi tagata lotu. O loo faaauau pea ona avea feeseeseaiga masani ma feeseeseaiga faalelotu i Kerisinetoma ma pogai o le totomasaa seia oo mai lava i aso nei. Pagā se iuga matautia o a latou aʻoaʻoga sese!

13. Ua faamaonia faapefea i le Ieremia 23:22 e faapea, e leai se faiā a taʻitaʻi lotu o Kerisinetoma ma Ieova?

¹³ Faamolemole, mātau le Ieremia mataupu e 23, fuaiupu e 22 e faapea: “A e afai ana latou tutu mai a o fai laʻu pule, po ua latou faailoa atu aʻu upu i loʻu nuu, ma latou faafoi ia te i latou ai o latou ala leaga, ma le leaga o a latou amioga.” Afai o loo tutū perofeta a lotu o Kerisinetoma i le itu a Ieova, i se faiā vavalalata ma ia e pei o se auauna faamaoni ma le mafaufau, latou te ola aʻe foi la i tapulaa a le Atua. Semanu latou te taʻu atu foi i tagata i Kerisinetoma ina ia faalogo i upu moni o le Afioga a le Atua. Na i lo o lea, ua faapogaia e aʻoaʻo sese o aso nei le faatauasoina o o latou tagata ina ia avea ma auauna a le Fili sili o le Atua, o Satani le Tiapolo.

14. O le ā le faaaliga malosi na tuuina atu i taʻitaʻi lotu o Kerisinetoma i le 1958?

¹⁴ O le faaalialia e le vasega faa-Ieremia o le mea moni e uiga i taʻitaʻi lotu, ua matuā sili atu ona malosi. Mo se faaaoaoga, i le Fonotaga Faavaomalo a Molimau a Ieova i le 1958 o le Finagalo o le Atua na faia i le Aai o Niu Ioka, na tauaaoina ai e le sui peresitene se faamatalaga na faapea sona vaega: “E aunoa ma se masalosalo po o se faatalatu, matou te folafola atu ai le aa ua faapogaia ai solitulafono uma, amioga leaga a tagata talavou, le feainai, le feitagai, le faailoga tagata, . . . ma le fenuminumiai o lotu sese, o lotu pepelo; lea o loo iai i tua le fili lē vaaia o tagata, o Satani le Tiapolo. O tagata e sili ona tuuaia mo tulaga o iai le lalolagi, o aʻoaʻo ia ma taʻitaʻi lotu; ma o i latou e sili ona sese, o taʻitaʻi lotu o Kerisinetoma. . . . Ina ua mavae nei tausaga e tele talu mai le Taua Muamua a le Lalolagi, ua maua ai e Kerisinetoma se faiā ma le Atua e pei o lena na iai ma Isaraelu i aso o Ieremia. Ioe, ua fesagai nei Kerisinetoma ma se faaumatiaga e sili ona matautia ma atoatoa, na i lo o lea na vaaia e Ieremia o tupu ia Ierusalema.”

Le Faamasinoga o Aʻoaʻo Pepelo

15. O ā valoaga o le filemu na faia e taʻitaʻi lotu? Pe o le a faataunuuina ea?

¹⁵ E ui lava i lenei lapataiga, ae ua faapefea ona gaoioi taʻitaʻi lotu talu mai lena taimi? E pei lava ona lipotia mai e le fuaiupu e 17 e faapea: “O loo tautala atu pea i latou i e ʻinoʻino mai ia te au, O loo fetalai mai Ieova, E manuia outou; ma ua latou faapea atu ia te i latou uma o ē savavali e tusa ma le finau vale o latou loto, E le oo ia te outou se malaia.” Pe e moni lenei mea? E leai! O le a faaalialia saʻo e Ieova le pepelo o nei valoaga a taʻitaʻi lotu. O le a na lē faataunuuina mea o latou fai atu ai i lona suafa. Ae peitai, o faamautinoaga sese a taʻitaʻi lotu e uiga i le filemu ma le Atua, e matuā faaʻoleʻole lava!

16. (a) O le ā le tulaga o amioga a lenei lalolagi, ma o ai e tuuaia mo lenei mea? (e) O le ā le mea o loo faia e le vasega faa-Ieremia e uiga i tulaga tau amioga lē mamā o lenei lalolagi?

¹⁶ Po o e manatu ea e faapea, ‘Pe o le a faaʻoleʻoleina ea aʻu i aʻoaʻoga sese a taʻitaʻi lotu? E matuā leai lava!’ Ia oe neʻi e maoaluma! Ia manatua, o aʻoaʻoga sese a taʻitaʻi lotu ua faaauilumaina ai se tulaga matautia faaʻoleʻole tau amio. Ua faatagaina e a latou aʻoaʻoga e toetoe lava o mea uma, e tusa lava po o le ā le lē mamā. Ma ua salalau atu lenei tulaga paʻū maulalo tau amio i so o se ituaiga o faafiafiaga, o ata tifaga, TV, mekasini ma musika. E tatau ai la ia i tatou ona matuā faaeteete, ina ia aua neʻi o tatou pauu i taaʻiga faaʻoleʻole faatosina tauamio a lenei lalolagi iuvale. E mafai ona maileia le au talavou i ata vitio ma musika matagā. Ia manatua, o le uiga o tagata i aso nei e faapea, e taga lava so o se mea, o se iuga tuusao lena o aʻoaʻoga sese a taʻitaʻi lotu ma le lē taulau ona latou faafaatauaina tapulaa amiotonu a le Atua. O loo tauivi pea le vasega faa-Ieremia ma nei manatu, ma o loo fesoasoani i auauna a Ieova e tetee atu i le leaga lena o loo laualuga i Kerisinetoma.

17. (a) E tusa ai ma le faamatalaga a Ieremia, o le ā le faamasinoga na oo i luga o Ierusalema amio leaga? (e) O le ā ua toeitiiti nei ona tupu lea ia Kerisinetoma?

¹⁷ O le ā le faamasinoga o le a oo i aʻoaʻo pepelo o Kerisinetoma, mai ia Ieova, le Faamasino sili? Ua tali mai le fuaiupu e 19, 20, 39, ma le 40 e faapea: “Faauta, ua alu atu le afā mai ia Ieova i le toasa, o le afā fulifaō; e pesi tetele mai i luga o ulu o e amio leaga. E lē toe liliu le toasa o Ieova, seia faia e ia, seia faataunuuina foi e ia manatu o lona finagalo; . . . ou te matuā faagaloina ai outou, ma ou lafoaiina ai outou ai oʻu luma, atoa ma le aai na ou foaiina atu ia te outou ma o outou tamā. Ou te faaeeina atu foi ia te outou le luma e faavavau, ma le masiasi e faavavau, e le galo lava.” O mea uma na sa tutupu ia Ierusalema amio leaga ma lona malumalu, ma i aso nei, o le a lē pine ae oo se mala faapena ia Kerisinetoma amio leaga!

Folafolaina atu “le Avega Mai ia Ieova”

18, 19. O le ā le “avega mai ia Ieova” na folafolaina atu e Ieremia ia Iuta, ma o ā iuga?

¹⁸ O lea, o le ā le avega tauave a le vasega faa-Ieremia ma a latou aumea? Ua taʻu mai e le fuaiupu e 33 ia i tatou e faapea: “A fesili mai foi ia te oe lenei nuu, po o le perofeta, po o le faitaulaga, e faapea mai, Se a ea le avega mai ia Ieova? Ona e tali atu ai lea ia te i latou, [“O outou—Pagā se avega!,” NW] Ou te lafoaiina outou, o loo fetalai mai ai Ieova.’”

¹⁹ O le upu Eperu mo le “avega” e lua ona uiga. E mafai ona faasino atu i se faalauiloaga o se faasalaga matuia mai le Atua, po o se mea mamafa ua matuā mafatia ai se tasi pe faavaivaia ai. I inei, o loo faasino atu ai le faaupuga “avega mai ia Ieova” i se valoaga mamafa—le faalauiloaina o le faaumatiaga o Ierusalema. Pe sa fia faalogo tagata i na fetalaiga faavaloaga mamafa mai ia Ieova, sa taʻu atu pea e Ieremia ia i latou? E leai, sa toē tagata ia Ieremia ma faapea atu, ‘O le ā se isi valoaga (avega) o ia te oe? Matou te mautinoa o le a avea foi lau valoaga o se isi avega mamafa!’ Ae o le ā na taʻu atu e Ieova ia i latou? O lenei: “[“O outou—Pagā se avega!,” NW] Ou te lafoaiina outou.” Ioe, sa avea na tagata o ni avega mamafa ia Ieova, ma sa ia aveesea i latou mai le toe faamamafa atu o avega ia te ia.

20. O le ā le “avega mai ia Ieova” i aso nei?

²⁰ O le ā la le “avega mai ia Ieova” i aso nei? O le feau matuia faavaloaga mai le Afioga a le Atua. E tumu i iuga matautia, le faalauiloaina o le faaumatiaga o Kerisinetoma ua lata tele mai. Ae, mo tagata o Ieova, ua ia i tatou se tiute tauave mamafa o le folafolaina atu o lenei “avega mai ia Ieova.” A o lalata mai le iuga, e tatau ona tatou taʻuina atu i tagata uma e faapea, o tagata amio leaga o Kerisinetoma, o i latou o se “avega,” ioe, “Pagā se avega!” ia Ieova le Atua, ma ua toeitiiti lava ona ia aveesea lea o lenei “avega” mai ia te ia, e ala i lona lafoaiina o Kerisinetoma i se mala.

21. (a) Aisea na faaumatia ai Ierusalema i le 607 T.L.M.? (e) Ina ua uma le faaumatiaga o Ierusalema, o le ā na tupu i perofeta pepelo ma perofeta moni a Ieova, ua aumaia ai le ā le faamautinoaga mo i tatou i aso nei?

²¹ Na faaooina atu le faamasinoga a Ieova i aso o Ieremia ina ua faaumatia e Papelonia Ierusalema i le 607 T.L.M. E pei ona valoiaina, sa avea lena o se ‘faalumaina ma se matuā toilalo popo’ mo na tagata Isaraelu uamaaa lē faamaoni. (Ieremia 23:39, 40) Na faailoaina atu ai ia i latou e faapea, ua iu ina tuulafoaiina i latou e Ieova, o lē sa latou lē ava pea i ai, ona o a latou amioga leaga. O le iuga, ua matuā faagūgūina lava gutu o a latou perofeta pepelo faasausili. Sa vavalo atu pea le gutu o Ieremia. Sa leʻi tuulafoaiina o ia e Ieova. E moni, e tusa ai ma lenei ata, o le a lē tuulafoaiina e Ieova le vasega faa-Ieremia pe a aveesea mai e lana faasalaga mamafa le ola mai taʻitaʻi lotu o Kerisinetoma, ma i latou o ē o talitonu i a latou tala pepelo.

22. O le ā le tulaga o le a oo i Kerisinetoma i le faamasinoga a Ieova?

²² Ioe, o le tulaga faatafunaina, ma le lē toe aināina o Ierusalema i le 607 T.L.M. o le a tutusa pau lelei lava ma le tulaga o le a foliga mai ai Kerisinetoma mapo lotu pe a uma ona toesea lona tamaoaiga ua faaalialia ma le matagā o ia. O le faamasinoga talafeagai lenei ua poloaia e Ieova mo aʻoaʻo pepelo. E lē mafai ona lē taulau lena faamasinoga. E pei lava ona faataunuuina moni feau lapatai faagaeeina a Ieremia i aso ua mavae, o le a faapena foi ona moni lo latou faataunuuga i aso nei. O lea, seʻi o tatou pei o Ieremia. Seʻi o tatou faalauiloa atu ma le lē fefefe le avega faavaloaga a Ieova i tagata, ina ia latou iloa ai le pogai o le a oo mai ai le atoaga o lana faamasinoga amiotonu i luga o aʻoaʻo uma o lotu pepelo!

Fesili Autalu

◻ Na faapefea le leaga o Ierusalema anamua i le silafaga a Ieova?

◻ I ā auala ua ‘savavali ai i le pepelo’ Kerisinetoma?

◻ Ua faapefea ona faaalialia le sese o taʻitaʻi lotu i aso nei?

◻ O le ā le “avega mai ia Ieova” ua folafolaina atu nei?

[Ata i le itulau 8]

Na faia e perofeta o Ierusalema “mea e inosia”

[Ata i le itulau 9]

“Ua latou tautala atu i le faaaliga mai o latou lava loto”

[Ata i le itulau 10]

O Ierusalema ina ua uma lona faaumatiaga, ua faataitaia mai ai le taunuuga mulimuli o Kerisinetoma