“Le Aao o Ieova” i Loʻu Olaga

E PEI ONA FAAMATALAINA E LAWRENCE THOMPSON

I SE tasi po i le 1946, sa ma nofonofo ai ma loʻu tamā i le taavale ma matamata i le malamalama mai o le itu i Matu, i le feemoemoai solo mai i le lagi. Sa ma talatalanoa e uiga i le malualii o Ieova ma lo tatou faatauvaa. Sa toe fafagu ia i maʻua mea na tutupu i tausaga a o faasaina le galuega a Molimau a Ieova i Kanata. Na tamau e Tamā ia te aʻu le auala na faatumauina ma taitaiina ai e Ieova Ona tagata i na tausaga.

E UI sa na o le 13 oʻu tausaga, ae na mafai ona ou talisapaia le moni o mea sa taʻua e Tamā. Sa ia tamauina foi ia te aʻu le uiga o le faanatinati ma le matuā telē o le galuega talaʻi e ao ona faia. Na sii mai e Tamā le Numera 11:23 ma faamamafa mai ia te aʻu e faapea, e moni, e lē taitai ona puupuu le aao o Ieova. Ua na o le lē lava o lo tatou faatuatua ma le faalagolago ia te ia, e faatapulaa ai mea o le a ia faia mo i tatou. Sa o se fetufaaiga tautele o se tamā i se atalii, lea o le a lē taitai ona ou faagaloina.

Sa matuā aafia foi loʻu uluai olaga i le suesueina o lomiga a le Olo Matamata, ae maise le tusi Salvation, na lomia i le 1939. O le a lē galo ia te aʻu le tala faatusa mataina na faatomua ai le tusi: “O le nofoaafi, ua tumu i le pasese, o loo alu saoasaoa i le selau maila po o le [160 kilomitaa] i le itula. E tatau ona sopoia le vaitafe i luga o se alalaupapa lea sa toetoe lava limasefulu pasene lona faaofuofu, o lea ua mafai ai ona iloa atu e tagata o loo i le pito i tua le afi o le nofoaafi . . . O tamaloloa e toalua o loo tietie i le pito i tua . . . ua iloa atu le mumū o le faatausiusiuga o le alalaupapa ma toulu ifo i le vaitafe. Ua la iloa ua latou fesagai ma se lamatiaga matautia. Ua avea o se faalavelave faafuasei moni lava. Pe e mafai ona taofia le nofoaafi i lea lava taimi ina ia faasaoina ola o le toatele o le pasese o loo i totonu?”

I le faatatauina o le tala faatusa, na faaiu faapea le tusi: “E faapena foi i aso nei, o loo faafesagai nuu ma tagata uma o le lalolagi ma le faalavelave faafuasei uigaese. Ua lapataia i latou e pei ona poloai le Atua, o loo fotuai mai le mala o Amaketo. . . . I le lapataia, e tatau nei i tagata taitoatasi ua lapataia ona filifili le ala o le a ia uia.”

O le nofoaafi saoasaoa, le alalaupapa ua mu, ma le faanatinati o le galuega talaʻi, ua faamauina e lē toe matafiesea i loʻu mafaufau.

Uluai Gaoioiga i le Talaʻiga

Na amata ona faia soʻu sao i le galuega talaʻi i le 1938, ina ua lima oʻu tausaga. E ave aʻu e Henry ma Alice Tweed, o ni paeonia e toalua (faifeau faataimi atoa), faatasi ma i laʻua, ma, matou te faaalu le 10 i le 12 itula i le aso e talatalanoa ai i tagata. Sa matuā atoatoa loʻu olioli i na aso i le auaunaga ia Ieova. O lea sa faatumulia aʻu i le fiafia i le tausaga na sosoo ai ina ua faataga aʻu e Papa ma Mama e avea o se tagata talaʻi, ma faia se lipoti o laʻu galuega.

I na uluai vaitaimi, sa matou auai i le faasavaliga o faamatalaga, i le savavali i magaala autū o le taulaga ma asoa pepa ua faapipii i se laupapa o loo tauaveina faalauiloaga o faaalialia ai lotu sese, ma faalauiloa ai le Malo o le Atua. Sa matou faaaogāina foi laau pese ma tātā feau e faavae i le Tusi Paia i luma tonu o faitotoa o ē e ona fale. Matou te taina foi lauga a J. F. Rutherford, le peresitene o le Sosaiete o le Olo Matamata, o nisi o na lauga ia ua ou taurotoina. O loo oʻu faalogoina pea o ia o loo faapea mai: “Ua taʻua soo, o Lotu o se mailei ma se togafiti pepelo!”

Faasaina La Matou Galuega i Kanata

I le taua lona lua a le lalolagi, na faasaina ai le galuega a Molimau a Ieova i Kanata, e pei ona iai i Nasi i Siamani ma isi atunuu. O lea sa matou faaaogā ai na o le Tusi Paia, ae faaauau pea la matou galuega ua faatagaina mai e le Atua i le usiusitai i faatonuga a le Tusi Paia. (Mataio 28:19, 20; Galuega 5:29) Sa matou aʻoaʻoina le gafa ma osofaiga a leoleo ia matou sauniga ma i o matou aiga. Sa matou maua foi le poto masani e molimau ai i luma o faamasino ma tali atu i le au suesue.

Sa avea maʻua ma loʻu uso matua o Jim o ni ē e popoto tele e tauai tamai tusi mai i taavale i faasitepu ma poletito o fale. E faaopoopo i ai, na matou gaoioi e pei o ni ave feau, ma i nisi taimi, e pei o ni leoleo mo i latou e sopoia le tuaoi ina ia auai i tauaofiaga i le Iunaite Setete.

Sa tu lo matou fale i le itumalo o Port Arthur (ua iloa nei o Thunder Bay), Ontario, i ni [nai eka] se lua ua siosiomia e laau ma togavao. Sa iai la matou manu papalagi, se tamai povi, o puaa, ma moa—o ia mea uma sa avea o se ufiufi lelei mo la matou galuega o le fesoasoani i uso Kerisiano talavou o ē o loo tuliloaina ina ia faafalepuipui ona o le talaʻiina o le Malo o le Atua.

I le po, e ulufale mai ma ulufafo atu taavale, o loli, ma taavale toso o loo felauai ai Kerisiano talavou mai la matou fanua e lilo mai le vaai. Matou te faanonofo, faalalafi, faananā ma fafaga nei talavou, ona tuu atu lea o i latou e ō. O loʻu tamā ma loʻu tinā, faatasi ma isi o na uluai au faigaluega, o ni auauna ma le loto atoa o ē na taaina loʻu loto talavou ina ia auauna ma alofa ia Ieova le Atua.

Ia Aokuso 1941, sa ou tuuina atu ai loʻu ola ia Ieova, ma na papatisoina i se tamai vaituloto i le lotolotoi o le togavao. Sa faatasitasi ai sina vaega o i matou mo lenei mea na tupu i le leva o le po i se faleie sa faaaogā ai se molitu. Ona o le masalosalo, na asiasia ai e leoleo, i taimi uma e sulu ai le vaituloto i molī, ae e leʻi mauaina i matou.

Anoanoai Vala o le Auaunaga Faataimi Atoa

I le 1951, sa ou faauʻu ai mai le aʻoga maualuga ma malaga atu i le pe ā ma le afe maila po o le [1,600 kilomitaa] ina ia maua loʻu tofiga o se paeonia i Cobourg, Ontario. Sa laitiiti le faapotopotoga, ma e leai saʻu paga ma te paeonia. Ae i le manatuaina na faapea e lē puupuu le aao o Ieova, sa ou mautotogi ai i se potu, fai aʻu lava kuka, ma sa fiafia i le auauna ia Ieova. I le tausaga na sosoo ai sa valaaulia ai aʻu e auauna i le ofisa o le lālā o le Sosaiete o le Olo Matamata i Toronto. Na ou aʻoaʻoina ai i inā le anoanoai o lesona tāua sa faaleleia ai aʻu mo le auaunaga o le Malo i le lumanai.

Ina ua maeʻa ona ou auauna o se paeonia i Toronto mo le sili atu i se tausaga, na ma faaipoipo ai loa ma Lucy Trudeau, ma i le tau malulu o le 1954, na ma mauaina ai se tofiga e paeonia i Levis, Quebec. Sa maatiati le malulu o le tau, sa o se taufaamataʻu tagata faatupu faalavelave ma osofaiga a leoleo, ma sa o se luitau le aʻoaʻoina o le gagana Falani. I nei mea uma, sa leʻi taitai ona puupuu ai le aao o Ieova, o lea, a o iai taimi faigata, sa tele foi ni faamanuiaga na ma mauaina.

Mo se faaaoaoga, na siligia i maʻua e iloilo ni vaa tetele se lua (o le Arosa Star ma le Arosa Kulm) na fuafuaina e le Sosaiete e faaaogā e felauai ai sui usufono i le tauaofiaga telē faavaomalo i Europa i le 1955. I le naunau e maua tupe a le Sosaiete, sa masani ai ona faaalia e le sui o le kamupani o vaa le talileleia o i matou, ma sa avea o se mapusaga toafimalie mai le auaunaga fitā i Quebec i lena taimi.

I le tau e afu ai mea o le 1955, sa valaaulia ai aʻu e auauna o se ovasia femalagaai, ma sa ma faaaluina lena tau malulu e asiasia ai faapotopotoga e tumamao i le itu i mātū e matuā malulu o Ontario. I le tausaga na sosoo ai, na ma auai i le Aʻoga Faale-Tusi Paia o le Olomatamata o Kiliata i le Iunaite Setete, ma mulimuli ane tofia i maʻua o ni misionare i Pasili, i Amerika i Saute.

Sa ma galulue ma le aasa i la ma tofiga fou, ma e leʻi pine ae mafai ona talaʻi ma aʻoaʻo i le gagana Potukali. I le amataga o le 1957, sa toe tofia ai foi aʻu e galue o se ovasia femalagaai. I le taimi lea, na i lo o le matuā malulu o le itu i Matu, sa tatau ona ma onosaia le aasa o le vevela. E tele taimi matou te malōlō ai ma aveese oneone vevela mai o matou seevae po o le ta mai foi o ni fasi tolo e lamulamu e toe faafou ai lo matou malosi. Ae sa iai faamanuiaga.

I le taulaga o Regente Feijo, sa ou talanoa ai i le taʻitaʻi leoleo, ma na ia faatonuina le tapunia o faleoloa uma ma taʻu atu i tagata uma ina ia gasolo atu i le vaega autū o le taulaga. I lalo o le faapaologa o se laau lautetele ma ona fugalaau, na ou tuuina atu ai se lauga mai le Tusi Paia i tagata uma o le aai. I aso nei, o loo iai se faapotopotoga o Molimau i inā.

Tausia aʻe le Ma Fanau i Pasili

Ina ua maito Lucy i le 1958, sa ma faamautu i Juiz de Fora ma auauna ai o ni paeonia faapito. I totonu o le isi lua tausaga na sosoo ai, na fananau mai ai a ma fanau teine o Susan ma Kim. Na faamaonia o i laua o se faamanuiaga moni i le auaunaga, i le avea o se mea fou i le aai. A o ma tulei atu a la taavale pepe i luga o auala maamaā, e ō mai i fafo tagata e vaavaai ia i laua. Ona sa tele le manaoga mo se au talaʻi o le Malo i Recife, i saute o le ekueta, na matou siitia atu ai i lena nofoaga e matautia le vevela.

I le 1961, e lē gata sa mafai ona ou fesoasoani e fuafua femalagaaiga i vaalele mo Molimau e malaga atu i le tauaofiaga i São Pauro, ae sa mafai foi ona ou auai i lena tauaofiaga e lē mafaagaloina. Pe ā o le 20 minute talu ona i le ea le vaalele, ae faafuasei loa ona tifa i lalo le vaalele, ma pauu solo ai le pasese i totonu. Sa malepelepe totonu o le vaa; o nofoa sa mafaifai ese mai o latou tulaga, ma sa manunua ma tafetotoi le pasese. Ae o le mea e fiafia ai, ona sa mafai e le pailate ona toe faasagatonu le vaalele, ma matou tulaueleele ai ma le saogalemu. E leai se isi o i matou na manua tigaina, ma taofia ai le faaauau o le malaga i São Pauro i le isi vaalele. Na matou olioli i se tauaofiaga matagofie, ae na ou taʻua loʻu lē toe alu i se vaalele!

Ae peitai, ou te taunuu atu i le fale mai le tauaofiaga, o faatali mai mo aʻu le isi tofiga. E tatau ona ou faafoeina se tauaofiaga i le lotolotoi o le vaomatua i Teresina, i le Setete o Piauí. E tatau ona ou lele atu i ai i se vaalele. E ui lava ina sa ou fefe, ae na ou taliaina le tofiga, i le faalagolago i le aao o Ieova.

I le 1962, na fanau ai le ma tama tama o Greg i Recife. E ui lava sa ou lē toe paeonia ona ua toatele nei loʻu aiga, ae sa mafai ona ou faamalosia se taaiga mautinoa i le faapotopotoga laitiiti. Sa naunau pea le fanau e faatasi ma i maʻua i le faiva, talu ai sa ma faia o se mea fiafia ia i latou. Sa mafai e i latou uma taitoatasi ona faia se taulimaga i faitotoa, ina ua taitolu o latou tausaga. Sa fai ma a matou masani le lē misia o le auai i sauniga po o le faia o se sao i le auaunaga i le fanua. E tusa lava pe maʻi se tagata e toatasi o le aiga, atonu e nofo se isi ma lē o loo maʻi, ae auai uma le isi vaega i le sauniga po o le auai i le auaunaga i le fanua.

I le gasologa o tausaga, matou te talanoaina pea lava pea o se aiga tulaga o aʻoga a tamaiti ma o latou sini i le olaga, i le sauniunia lea o i latou mo se galuega i le faalapotopotoga a Ieova. Sa ma faaeteete i le lē faatagaina o i latou i taaʻiga e faavaivaia ai, e pei o le televise. Sa leai se TV i le matou aiga seia oo ina talavou tamaiti. Ma e ui lava sa iai, ae ma te leʻi faitama leaga ia i latou i mea faitino. Mo se faaaoaoga, sa ma faatauina na o le uila e tasi, ina ia faaaogā e i latou uma e toatolu.

Matou te faifai mea faatasi i le tele e mafai ai, taaalo pasiketipolo, feausi ma faia ni tafaoga o se aiga. E fesootai ā matou malaga ma le auai i tauaofiaga faa-Kerisiano, po o le asia o aiga Peteli i atunuu eseese. E aumaia e nei tafaoga ia i matou le taimi e talanoa saoloto faatasi ai, ina ia ma iloa ai ma Lucy po o ā o i totonu o loto o le ma fanau. Ma te matuā loto faafetai ia Ieova mo na tausaga faafiafiaina!

I le iuga, o le sefulu tausaga na matou iai i le Teropika i tafatafa o le ekueta, na iai sona āuga leaga i le soifua maloloina o Lucy. O lea na ma talia fiafia ai se suiga o tofiga i le mea e feoloolo ai le tau, i le itu i Saute, i Curitiba, i le Setete o Paraná.

Toe Foi i Kanata

I le 1977, ina ua mavae pe ā ma le 20 tausaga i Pasili, na ma toe foi ai ma Lucy ma le ma fanau i Kanata e fesoasoani i le tausiaina o loʻu tamā na maʻi. Pagā le ese o le siomaga faaleaganuu mo lo matou aiga! Ae sa lē o se eseesega i le itu faaleagaga, ona sa faatumauina pea le matou faasologa e tasi ma o matou uso alolofa Kerisiano.

I Kanata, na avea le auaunaga faataimi atoa o se mataupufai faaleaiga, a o auauai le ulu atu o la ma fanau teine i le faiva o le paeonia faataimi atoa. Sa matou tauofo uma atu i taumafaiga a le matou aiga. So o se totogi e maua mai i galuega faavaitaimi, sa tuu atu i le faaputugā tupe faaalu ina ia lagolagoina ai le matou aiga ma taavale e tolu na manaomia ina ia ufitia ai a matou oganuu vava mamao. I vaiaso uma, pe a maeʻa le matou suesuega faale-Tusi Paia o se aiga, ona matou talanoaina lea o a matou fuafuaga faaleaiga. Ua fesoasoani nei talanoaga e faamanino ai mo tagata uma po o fea o loo matou agaʻi i ai, ma o le ā o loo matou faia i o matou olaga.

O le ma tama, o Greg, sa avea foi le auaunaga faasauatoa o sona sini, e pei o ona tuafāfine matutua. Talu mai lava ina ua faatoʻā lima ona tausaga, na ia faaalia le faanaunauga e fia galue i se ofisa o le lālā o le Sosaiete, e taʻua o Peteli. Sa lē galo ia te ia lena sini, ma ina ua maeʻa ona faauʻu mai i le aʻoga maualuga, na ia siligia i maʻua ma lona tinā: “E te lua manatu e tatau ona ou talosaga mo Peteli?”

E ui ina faigata ia i maʻua ona tuu atu le ma tama e alu, ae sa ma tali atu e aunoa ma le faatalatu: “O le a tele lou lagonaina o le aao o Ieova i Peteli—le ogatotonu o le faalapotopotoga a Ieova.” E leʻi atoa le lua masina ae agaʻi atu loa o ia i Peteli i Kanata. O le 1980 lena, ma o loo ia auauna ai pea talu mai lena taimi.

Na aumaia e le 1980 ma agaʻi mai ai ni luitau fou mo i maʻua ma Lucy. Ua ma toe foi i le mea na ma amata ai—na o i maʻua e toalua. I lea taimi, ua faaipoipo Susan ma o loo paeonia ma lona toalua, ma o loo auauna pea Kim ma Greg i Peteli. O le ā o le a ma faia? Na vave ona taliina lena fesili i le 1981, ina ua valaaulia i maʻua e auauna i se matagaluega i Potukali, lea o loo taatia pe ā o le 1,200 maila [2,000 kilomitaa] mai Kanata. O loo ma olioli pea i le galuega femalagaai.

Talu mai lena taimi, ua faaipoipo Kim ma sa auai i Kiliata, ma o loo auauna nei ma lona toalua i le galuega matagaluega i Pasili. O loo iai pea Susan ma lona toalua i Kanata, o loo tausia se la fanau e toalua, ma o loo paeonia le toalua o Susan. E ui lava ua valavala lo matou aiga i le tino, ona o o matou tofiga eseese i le auaunaga faataimi atoa, ae o loo matou tumau vavalalata pea i le faaleagaga ma faalogona.

O loo ma aloalo atu ma Lucy i se lumanai fiafia faatasi ma le matou aiga i se lalolagi mamā. (2 Peteru 3:13) E pei o Mose anamua, ua matou uluai tofo i le moni o le tali i le fesili faatupu manatu i le Numera 11:23: “Ua faapuupuuina ea le lima o Ieova? o lenei, e te iloa lava pe taunuu ia te oe laʻu upu pe leai.” O le mea moni, e leai se mea e mafai ona taofia Ieova mai le faamanuiaina o ana auauna, mo la latou auaunaga ma le loto atoa.

[Ata i le itulau 25]

O maʻua ma laʻu avā, o Lucy