Lipoti a Ē Faalauiloa le Malo

“E le Faailogaina Tagata e le Atua”

NA TUSIA e le aposetolo faagaeeina o Peteru i le afe iva selau tausaga ua mavae e faapea: “E le faailogaina tagata e le Atua; a e peitai o le mataʻu ia te ia i nuu uma lava, ma fai le amiotonu ua talia i latou e ia.” (Galuega 10:34, 35) Ua maua i Molimau a Ieova tagata mai i ituaiga uma ma talaaga faalelotu. Latou te faanaunau i le amiotonu, ma latou te matatau i le Atua. E tali aloaia i latou uma e Ieova i le sosaiete o le lalolagi fou, e pei mo se faaaoaoga, le mea sa ia faia i se tasi fafine i Chad.

Sa leʻi faamalieina lenei fafine i lana lotu. I ni tausaga ua mavae, sa ia mauaina ai se kopi o le tusi Lou Talavou—Mauaina mai ai Aogā Silisili, sa lolomia e Molimau a Ieova, ma sa ia talisapaia le fautuaga lelei o loo iai i le tusi. Na amataina se suesuega faale-Tusi Paia, ma e iai pea le fafine i le suesuega. E ui i lea, ina ua faalaeiauina o ia e auai i sauniga i le Maota o le Malo, sa leʻi sau o ia. Aisea? E ui lava sa leʻi teena e lona toalua lana suesuega, peitai na musu o ia e faataga lona toalua ina ia auai i sauniga i le Maota o le Malo.

Ina ua manao le fafine e auai i le fonotaga matagaluega, sa faaali atu e le Molimau o loo faia le suesuega i le tane le polokalama, o loo faamatilatilaina ai fautuaga lelei o le a tauaaoina ai. Na malie o ia e alu lana avā, ae e “na o le faatasi lava.” Sa faatasi atu le avā ma sa matuā fiafia i le polokalama. Ina ua uma ona faamatala atu e le avā ia te ia mea na ia aʻoaʻoina mai le fonotaga, sa leʻi toe taofia loa e le tamaloa lona toalua i le faatasi atu i isi sauniga. Sa faagaeeina o ia i le mea moni e faapea, o le faapotopotoga, o loo tuufaatasia ai tagata mai vaega eseese o tagata o ē e matuā manatunatu loloto mo isi tagata. Mulimuli ane, sa auai o ia i le tauaofiaga Itumalo ma sa faatumulia o ia i le fiafia i le vaai atu i lana fanau o loo sisii mai i vae o Molimau mai isi atunuu. Na aai faatasi Molimau ma tamaiti ma faia faalelei e pei lava o se aiga. Na avea lenei mea ma ala na suia ai o ia.

Peitai, e tele ni teteega na sosoo mai ai. E ui lava o lenei fafine e matamuli, ae sa amata ona faia ana tali i sauniga ma tetee atu ma le lē fefe i faifaiga mai i ona auaiga ma ona tuaoi. I tausaga e tele sa faatasia ai o ia ma lana tane, sa na ona nonofo e tusa ma le tu tau maliliega. O le a faapefea nei ona ia lagā le mataupu ina ia faaipoipoina faaletulafono i laua? Ina ua uma se tatalo faatauanau ia Ieova, ona talanoa atu loa lea o ia i lona toalua, ma sa ia faapea mai o le a mafaufau i ai. Mulimuli ane, sa ia faia faapea ma ua faaipoipoina nei e tusa ma le tulafono lenei ulugalii.

E tele faafitauli na tutupu mai i se tuafafine o lona toalua sa latou nonofo faatasi, peitai sa tu malosi le tane e lagolagoina lana avā. Mulimuli ane, sa asiasi atu le tamā o le tamaloa. Sa ia faatonuina lona atalii ina ia faatea i lona toalua ona ua suia lana lotu. Sa fai atu le tamā i lona atalii o le a ia totogia le tau mo se isi “avā e sili atu.” Na tali atu le atalii e faapea: “E leai, ou te lē faia lena mea. O ia o se avā lelei. Afai e manao o ia e alu, ua ese la, ae ou te lē tuliina o ia.” Sa faaaloalo tele le avā i le tamā o lona toalua, ma sa avea lena mea na maasiasi ai tele le tamā i lana amio. Peitai, ina ua toe foi o ia i lona nuu, sa tusi atu i lona atalii e filifili. Na ia faapea atu, a lē faateaeseina e lona atalii lona toalua, o le a lē toe taʻua o ia o se atalii. Peitai, sa au pea le atalii i lona toalua. Seʻi tagai faalemafaufau i le olioli o le fafine i le vaai atu i le tu maumauai o lona toalua.

Ua oo nei ina fiafia le la fanau tama e toalua e ō ma lo la tinā i le Maota o le Malo. Na oo lava foi ina talosaga atu i lo la tamā mo ni o la fusiua, auā o lea la te vaaia uso uma o loo fai a latou lauga o faia faapea. Ua avea nei lenei fafine ma tuafafine ua papatisoina.

O ia o se tasi o le 345 o Molimau fiafia i Chad o loo folafolaina le tala lelei o le Malo o Ieova, ma talisapaiaina le moni o le manatu e faapea, “E le faailogaina tagata e le Atua.”