Le Talisuaga Afiafi a le Alii—E Faafia ona Tatau ona Faamanatuina?

O LE aso Kirisimasi, o le Eseta, o “tagata paia.” E tele aso malōlō ma faigaai o faamanatuina e ekalesia a Kerisinetoma. Ae e te silafia e fia faamanatuga na poloaiina e Iesu Keriso ona soʻo ina ia faamanatuina? O le tali e, Na o le tasi! E leai lava nisi faigaai na faavaeina e le Puna o le Faa-Kerisiano.

E manino, afai na faatuina e Iesu le na o le tasi le faamanatuga, e matuā tāua tele la. E tatau ona tausia e Kerisiano e pei ona poloaiina e Iesu. O le ā lenei faamanatuga tutasi?

Le Faamanatuga e Tasi

Sa faaofi mai e Iesu lenei faamanatuga i le aso na ia maliu ai. Na ia faamanatuina le faigaai faa-Iutaia o le paseka faatasi ma ona aposetolo. Ona ia faasolo atu lea o le areto lē faafefeteina o le Paseka ia i latou, ma faapea atu: “O loʻu tino lenei, ua foaiina atu mo outou.” Ona sosoo ai lea ma le faasoloina atu e Iesu o se ipu uaina, ma faapea atu: “O lenei ipu o le feagaiga fou lea i loʻu toto, ua faamaligiina mo outou.” Na toe fetalai atu foi: “Ia outou faia lenei mea ma faamanatuga ia te au.” (Luka 22:19, 20; 1 Korinito 11:24-26) Ua taʻua lenei faamanatuga o le Talisuaga Afiafi a le Alii, po o le Faamanatuga. Ua na o lea le faamanatuga na poloaiina e Iesu ona soʻo ina ia tausia.

E tele ekalesia ua faapea mai o loo latou faia lenei faamanatuga e fesootai ai ma isi o a latou faigaai uma, ae e faamanatuina e le toatele i se tulaga e ese mai le auala na poloaiina e Iesu. Atonu o le eseesega e sili ona mataina o le faia soo o le faamanatuga. E faamanatu e nisi ekalesia faalemasina, faalevaiaso, e oo lava foi ina faia i aso uma. Pe o le finagalo lea o Iesu ina ua ia taʻu atu i ona soʻo: “Ia outou faia lenei mea ma faamanatuga ia te au”? Ua faapea mai le New English Bible: “Ia faia lenei o se faamanatuga ia te au.” (1 Korinito 11:24, 25) E faafia ona tausia se faamanatuga po o se faamanatuina o se aso tāua? E masani lava, e na o le faatasi i le tausaga.

Manatua foi, na amataina e Iesu lenei masani ona maliu ai lea i le aso 14 o Nisani, i le kalena faa-Iutaia.a O le aso lena o le Paseka, o se tausamiga e faamanatu atu ai i tagata Iutaia lo latou laveaiga na latou tofo ai i Aikupito i le 16 senituri T.L.M. I lena taimi, o le taulaga na faia i se tamai mamoe na iu i ai i le faasaoina o ulumatua a tagata Iutaia, lea na fasiotia ai e le agelu a Ieova ulumatua uma o Aikupito.—Esoto 12:21, 24-27.

E faapefea ona fesoasoani lenei mea i lo tatou malamalamaga? Ia, na tusi le aposetolo Kerisiano o Pauro e faapea: “O Keriso la tatou paseka ua fasia mo i tatou.” (1 Korinito 5:7) Sa o se taulaga silisili o le Paseka le maliu o Iesu, ua avatu ai i tagata le avanoa mo se faaolataga e matuā faamamaluina. O lea, mo Kerisiano, ua suitulaga le Faamanatuga o le maliu o Keriso i le Paseka a tagata Iutaia.—Ioane 3:16.

O le Paseka sa o se faamanatuga faaletausaga. Ma le talafeagai ai la, e faapena foi le Faamanatuga. O le Paseka—le aso na maliu ai Iesu—e paʻū pea i le aso 14 o le masina faa-Iutaia o Nisani. O lea, e tatau ona faamanatuina faatasi i le tausaga le maliu o Keriso i aso o le kalena e paʻū i ai Nisani 14. I le 1994, o lena aso o le Aso Toonai, Mati 26, pe a mavae le goto o le la. Ae aisea la, ua lē faia ai e ekalesia a Kerisinetoma lenei mea o se aso faapitoa mo le faamanatuga? O le a taliina lena fesili i se tepa puupuu i talafaasolopito.

Ua Lamatia Tu Masani Faaaposetolo

E mautinoa, i le faagasologa o le uluai senituri T.A., na faamanatuina e i latou na taitaiina e aposetolo o Iesu le Talisuaga Afiafi a le Alii e pei ona ia poloaiina. Ae peitai, i le senituri lona lua, na amata suia ai e nisi le taimi o lona faamanatuina. Na latou faia le Faamanatuga i le aso muamua o le vaiaso (ua taʻua nei o le Aso Sa), ae lē o se aso e tutusa ma Nisani 14. Aisea sa faia ai faapea?

Mo tagata Iutaia, e amataina se aso i le ta o le ono i le afiafi, ma faaiu i le taimi lava lea e tasi i le aso e sosoo ai. Na maliu Iesu ia Nisani 14, 33 T.A., lea na amata mai i le afiafi o le Aso Tofi, seia oo i le afiafi o le Aso Faraile. Na toetu o ia i le aso lona tolu, i le vaveao o le Aso Sa. Na mananao nisi e tausia le faamanatuina o le maliu o Iesu i se aso mautu o le vaiaso o tausaga taitasi, na i lo o le aso e paʻū i ai Nisani 14. Latou te tagai foi i le aso na toetu ai Iesu e faapea e sili atu ona tāua na i lona maliu. O lea, ua latou filifilia ai le Aso Sa.

Na poloaiina e Iesu le faamanatuina o lona maliu, ae lē o lona toetu. Ma, talu ai e paʻū le Paseka faa-Iutaia i aso eseese i tausaga taitasi, e tusa ai ma le kalena faa-Gregoria lea o loo tatou faaaogāina nei, o se mea masani la le faapea, e tatau foi ona faia le mea lava lea e tasi i le Faamanatuga. O lea, e toatele ua pipii i le uluai fuafuaga ma tausia le Talisuaga Afiafi a le Alii ia Nisani 14 i tausaga taitasi. Na oo ina taʻua ai i latou o le au Kuatatesimane [Quartodecimans], o lona uiga o “Ē e faamanatuina le aso 14” (“Fourteenthers”).

Ua iloa e nisi o tagata aʻoga e faapea, o loo mulimuli “Ē e faamanatuina le aso 14” i le ata moni o uluai faaaposetolo. Na taʻua e se tasi tusitala o talafaasolopito e faapea: “E tusa ai i le aso mo le faamamaluina o le Pascha, le [Talisuaga Afiafi a le Alii], sa faaauau ai pea le faaaogāina o ekalesia o le au Kuatatesimane i Asia Itiiti faatasi ma le ekalesia a Ierusalema. I le senituri lona 2, na faamanatuina ai e nei ekalesia i la latou Pascha le aso 14 o Nisani le aafiaga o le togiola i le maliu o Keriso.”—Studia Patristica, Tusi V, 1962, itulau 8.

Tuputupu aʻe se Finauga

A o mulimuli le toatele i Asia Itiiti i tu masani faaaposetolo, na faatulagaese ai le Aso Sa mo lea masani i Roma. Pe tusa ma le tausaga 155 T.A., na asiasi atu ai i Roma se sui o faapotopotoga o Asia, o Polycarp mai Semurana, e talanoaina lenei mea ma isi faafitauli. E faanoanoa ai, sa leai se maliega na oo i ai lenei mataupu.

Sa tusi Irenaeus mai Lyon i se tusi: “Sa lē mafai e Anicetus [o Roma] ona tauanau Polycarp ina ia lē tausia mea sa masani ona ia faia faatasi ma Ioane le soʻo o lo tatou Alii ma isi aposetolo o ē na ia auaumea i ai; pe faatosina foi e Polycarp ia Anicetus ina ia tausia, auā na faapea mai Anicetus e ao ona ia piiama i le tu masani a ē matutua na muamua atu ia te ia.” (Eusebius, Tusi 5, mataupu 24) Mātau, sa lipotia mai e Polycarp le faavae o lona tulaga i le pule a le au aposetolo, ae o Anicetus, na pipii atu i le tu masani a ē matutua ua mavae atu i Roma.

Sa faateteleina lenei finauga i le faatausiusiuga o le senituri lona lua T.A. Pe ā o le 190 T.A., na tofia ai se tasi e igoa ia Victor o se epikopō o Roma. Na ia talitonu e tatau ona faamamaluina le Talisuaga Afiafi a le Alii i se Aso Sa, ma na ia sailia le lagolagosua a le toatele o isi taʻitaʻi e mafai ai. Sa tauanau faamalosi e Victor ia faapotopotoga i Asia e suia le fuafuaga i le Aso Sa.

I le tali atu e avea ma sui o i latou i Asia Itiiti, na teena ai e Polycrates o Efeso le lolo atu i lenei faatauanauga. Na ia taʻua: “Matou te tausia le aso e aunoa ma le aiā fua i ai, pe faaopoopo, po o le toese foi.” Ona ia lisiina lea o le tele o faamaoniga, e aofia ai le aposetolo o Ioane. Na ia taʻua: “O i latou uma nei, o loo tausia le aso lona sefulufa mo le Paseka e tusa ai i le Tala lelei, e matuā leai se avanoa e eseese ai ma i inā.” Na faaopoopo mai Polycrates: “O aʻu i laʻu vaega, uso e, . . . ou te lē fefe i faamatauga. Auā ua taʻua e aposetolo e sili ona lelei ia te aʻu, E tusa ona sili o lo matou anaana i le Atua i lo matou anaana i tagata.”—Eusebius, Tusi 5, mataupu 24.

Na lē fiafia Victor i lenei tali. Ua taʻua e se tasi o galuega o talafaasolopito na ia “faateaeseina uma ekalesia i Asia, ma ia faataamilo ana tusi i Ekalesia uma o loo malilie i lona taofi, ina ia lē tatau ona faia se fetufaaiga ma ekalesia ua faateaese.” Ae peitai, o “lenei gaoioiga tele ma le toa sa ia faia, na teena ma le lē fiafia e tane popoto uma ma le lotonaunau o lana lava vaega, na tusi saʻo atu nisi o i latou ia te ia, i le fautuaina o ia . . . ina ia faatumauina le alofa, autasi, ma le filemu.”—Antiquities of the Christian Church a Bingham, Tusi 20, mataupu 5.

Faavaeina le Aposetasi

E ui i ia teteega, ae sa faateteleina le solomuli ese o Kerisiano i Asia Itiiti i le finauga po o afea e faamanatu ai le Talisuaga Afiafi a le Alii. Na sosolo mālie atu le eseese o aso i isi mea. Ua faamanatuina e nisi le vaitaimi atoa mai ia Nisani 14 e oo atu i le Aso Sa e sosoo ai. Ua faia e isi lea tulaga i se auala faifai pea—i vaiaso taitasi i Aso Sa.

I le tausaga e 314 T.A., na taumafai ai le Fonotaga i Arles (Falani) e faamalosia le fuafuaga a Roma ma tineia so o se fesuiaiga. Na tumau pea ē na totoe o le au Kuatatesimane. Ina ia faamautu lenei mea ma isi mataupu ia o loo fevaevaeai ai ē o faapea mai o Kerisiano i lana emepaea, na taloina ai e le emeperoa faapaupau o Konesetatino i le 325 T.A. se faapotopotoina o le tino o le lotu atoa, le Fonotaga o Naisia. Na tatalaina atu ai se faatonuga e taitaiina ai ē uma i Asia Itiiti e usitai i le mea ua faaaogā e Roma.

E lelei le mātau o se tasi o finauga autū ua muai aumaia mo le tuulafoaiina o le tausiaina o le Faamanatuga o le maliu o Keriso e tusa ai ma le aso i le kalena faa-Iutaia. Ua taʻua i le History of Christian Councils, e K. J. Hefele e faapea: “Sa faalauiloaina le leai o se aogā patino mo lenei mea, le silisili ona paia o tausamiga uma, le mulimuli i le tu masani (le fuafaatatau) a tagata Iutaia, o ē ua sala o latou lima i soligatulafono e silisili ona gatete ai, ma o ē ua faatauasoina o latou mafaufau.” (Tusi 1, itulau 322) Ua faapea mai J. Juster, o le iai i sea tulaga sa vaai i ai o se “‘gauai faalumaina’ i le Sunako lea o loo faasoesa i le Ekalesia,” na sii mai i le Studia Patristica, Tusi IV, 1961, itulau 412.

Sa o se faatava i Iutaia! Na vaai ia i latou o ē na faamanatuina le Faamanatuga o le maliu o Iesu i le aso tonu na maliu ai, e faapea o ni tagata Iutaia. Sa galo ia i latou o Iesu foi o se Iutaia, ma na ia tuu i lea aso lona uiga, i le ofoina o lona soifua e fai ma sui o tagata uma. Talu mai lea taimi, na tausalaina ai le au Kuatatesimane o ni ē e tetee ma faia fevaevaeaiga ma na sauaina. Sa faatonuina i le Fonotaga i Anetioka i le 341 T.A. e faapea o le a faateaeseina i latou. Ae ui i lea, sa iai pea le toatele o i latou i le 400 T.A., ma na latou faaauau ai pea i ni vaega laiti i se taimi umi mulimuli ane ai.

Talu mai na aso, ua lē taulau ai ia Kerisinetoma ona toe foi i le uluai faatulagaga a Iesu. Ua ioe mai le polofesa o William Bright e faapea: “Ina ua tuuina atu le faamanatuina o Puapuaga mulimuli o Iesu e paʻū i le Aso Faraile Lelei, sa fai loa sina tuai ona faatatau atu i ai le aso tonu o le maliu faataulaga sa faatulaga e Sagato Pauro: ua latou faatatauina ma le saoloto i le Tausamiga o le Toetu lava ia, ma ua faavaeina ni taofi fenuminumiai i gagana masani a Eleni ma Latina i Kerisinetoma.”—The Age of the Fathers, Tusi 1, itulau 102.

Ae ā Aso Nei?

Atonu e te fesili, ‘Ua tele tausaga ua tuanai atu, pe e afaina moni ea le aso e faamanatu ai le Faamanatuga?’ Ioe, e afaina. Na faia suiga e tane loto maaa na tauivi mo le pule. Ua mulimuli tagata i o latou lava taofi na i lo le usiusitai ia Iesu Keriso. Ua faataunuuina ma le manino le lapataiga a le aposetolo o Pauro e faapea: “Auā o aʻu nei, ua ou iloa lenei mea, pe a mavae ona ou alu, e oo mai ia te outou [Kerisiano] luko saua o e le faasaoina le lafu mamoe. E tupu mai foi ia te outou lava tagata e tautala mai i mea faapiopio, e fetoso ese ai le au soo ia mulimuli ia i latou.”—Galuega 20:29, 30.

O le finauga o se mataupu tau i le usiusitai. Sa faavaeina e Iesu na o le tasi le faamanatuga mo Kerisiano ina ia tausia. O loo faamatala manino mai e le Tusi Paia le aso, ma pe ao foi faapefea ona tausia. O ai la, e iai le aiā e suia ai? Sa puapuagatia uluai Kuatatesimane i faasalaga ma le faateaina na i lo o le faagutugutulua i lenei mataupu.

Atonu e te naunau e iloa o loo iai pea Kerisiano i le lalolagi o ē o loo faaaloalo i le finagalo o Iesu ma faamanatu le Faamanatuga o lona maliu i le aso na ia faavaeina. I lenei tausaga, o le a ofaga potopoto ai Molimau a Ieova i o latou Maota o le Malo i le lalolagi aoao pe a teʻa le 6 i le afiafi o le Aso Toonai, Mati 26—pe a amata le aso 14 o Nisani. Ona latou faia loa lea e pei lava ona fetalai Iesu e tatau ona faia i lenei taimi ua sili ona uigā. Aisea e lē faamanatu ai le Talisuaga Afiafi a le Alii ma i latou? I lou faatasi atu i ai, e mafai ai foi ona e faaalia lou faaaloalo mo le finagalo o Iesu Keriso.

[Faaopoopoga i lalo]

[Pusa i le itulau 6]

“LENA TOGIOLA TAUTELE”

E silisili atu le taulaga togiola a Iesu Keriso na i lo o se aʻoaʻoga. Na fetalai Iesu ia te ia lava e faapea: “O le Atalii o le tagata na le sau o ia ina ia auauna tagata ia te ia, a e peitai ia auauna o ia, ma foaiina atu lona ola o le togiola e sui aʻi tagata e toatele.” (Mareko 10:45) Na ia faamatala foi: “Ua faapea lava ona alofa mai o le Atua i le lalolagi [o tagata], ua ia aumai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.” (Ioane 3:16) Mo ē ua maliliu, ua tatala e le togiola le ala mo le toetu ma le faamoemoe o le ola e faavavau.—Ioane 5:28, 29.

O le maliu e sili ona matuā tāua o Iesu Keriso lea e faamanatuina i le faamamaluina o le Talisuaga Afiafi a le Alii. Ua faataulauina le tele o mea i lana taulaga! Ua faaalia mai e se tasi fafine faaipoipo, o lē na toleniina e ona mātua matatau i le Atua ma o lē na savali i le upu moni a le Atua mo le tele o tausaga, lona loto faafetai i upu nei:

“Matou te tepa taulai atu i le Faamanatuga. E avea o se mea faapitoa i tausaga taitasi. Ou te manatua loʻu iai i totonu o le fale o falelauasiga i le 20 tausaga ua mavae, ma vaavaai atu i le tino oti o si oʻu tamā pele ma oo ai i se talisapaia moni mai le loto mo le togiola. Sa avea o se mataupu na ona manatua i le mafaufau a o leʻi oo i lea taimi. Ioe, sa ou iloa uma mau ma faapefea ona faamatala atu! Ae ina ua ou lagona le matuitui o le oti, ona faatumulia ai lea o loʻu loto i le olioli i mea o le a faataulauina mo i tatou e ala i lena togiola tautele.”