E Mafai Faapefea ona Faatusa Tagata i le Atua?

“ONA faia lea e le Atua o le tagata i lona faatusa, o le faatusa o le Atua na ia faia ai o ia; na faia e ia o i laua o le tane ma le fafine.” O le faamatalaga lena a le tala faagaeeina, ae o le ā lona uiga? Na faapefea ona faia le uluai tane ma le fafine i le faatusa o le Atua?—Kenese 1:27.

Pe sa tino faaletino i laua e pei o le Atua? E leai, e lē talafeagai. O le tagata lava o le tagata, i le tino, na fuafuaina ina ia ola i le lalolagi. O le Atua o le agaga, e afio i le mamalu faalelagi e lē mafaatusatusaina, e lē mafai e se tagata ona faalatalata atu i ai. (Esoto 33:18-20; 1 Korinito 15:50) Na faapefea la ona faia le tagata i le faatusa o le Atua? I le tuuina lea i le tagata o le tomai e faatinoina ai uiga matilatila o le Atua—o le alofa, faamasinotonu, poto, ma le malosi—atoa ai ma isi uiga.

Uiga o Ieova

O loo atagia mai uiga o Ieova le Atua i ana foafoaga uma, ae sa sili ona faatinoina na uiga i ana feutagaiga ma le uluai ulugalii, o Atamu ma Eva. (Roma 1:20) Na iloatino lona alofa ina ua ia foafoaina le lalolagi ina ia fetaui lelei ma le tagata e nofo ai. Na foafoaina e Ieova mo le tagata se avā lelei atoatoa ina ia fai ma ana aumea, ma o le tinā o lana fanau. Na ia tuuina i laua i se faatoaga matagofie, ma avatu ia i laua le anoanoai o mea e manaomia ina ia faaauau ai ona ola ma fiafia. Ae o le mea e sili ona matagofie i mea uma, o le avanoa na tuu atu i ai e le Atua ia te i laua e ola ai e faavavau.—Kenese 2:7-9, 15-24.

Na iloa le atamai o le Atua i lona tofotofoina o le uluai ulugalii. Ana fai e tumau i laua e avea ma sui o le aiga faalevateatea o Ieova, ma ana fai e ola e faavavau e avea ma mātua o ituaiga uma o tagata, e manaomia la ona avea i laua ma faaaoaoga o le faamaoni ma le tapuaiga moni. I lea, na tuuina atu ai e Ieova ia i laua le avanoa e faataitaia ai le tulaga o o la loto i lalo o se tofotofoga talafeagai—ina ia aua neʻi o la aai i le fua o le laau e iloa ai le lelei ma le leaga. Maeu le atamai o Ieova, i le faatagaina o tagata e faamaonia lo la usiusitai ma alolofa mo ia, a o leʻi tuuina atu ia i laua faaeaga matalasi sa i lona finagalo!

Sa vaaia le faamasinotonu o le Atua i lona tausisia o faatulagaga maualuluga i ana meafaiola, ma i lona lē faagutugutulua i na faatulagaga. Sa vaaia lenei mea i lona tuuina atu ia Atamu ma Eva o avanoa uma e faia ai le mea ua tonu. Ma ina ua lē taulau ona la faia faapea, na iloa ai lona faamasinotonu i lona tausalaina o i laua ina ia faapologaina e tusa ai ma le faasalaga mo le fouvale.

Na vaaia ai le malosi o Ieova i lona faataunuuina o lana faasalaga. Sa finau atu Satani, le fouvale sili e faapea, o Ieova o se pepelo, ma sa ofoina atu e Satani ni mea silisili ia Eva pe afai e lē usitai o ia i le Atua. (Kenese 3:1-7) Ae sa lē mafai e Satani ona faataunuu lana folafolaga. Sa lē mafai ona ia taofia Ieova mai le tuliesea o Atamu ma Eva mai le faatoaga i Etena, ma sa lē mafai foi ona ia taofia le faataunuuga o afioga a le Atua ia Atamu e faapea: “O le efuefu oe, e te toe foi atu lava i le efuefu.” (Kenese 3:19) Ae peitai, sa leʻi tuuina atu loa e Ieova i le taimi lava lea le faasalaga oti, ma i lenei tulaga, na faaalia atili ai lona alofa. Na ia faatagaina le taimi mo Atamu ma Eva ina ia faia ni fanau, ma e ala i na fanau o le a iloatino ai lana uluai fuafuaga mo tagata.—Kenese 1:28.

I le iuga, sa faaalitino mai le faamasinotonu o Ieova, le alofa, malosi, ma le poto, i lana folafolaga ina ia auina mai se fanau na te faaumatiaina galuega a Satani, ma toe tatalaina iuga faanoanoa o lena uluai fouvalega e faasaga i le pule silisiliesee a le Atua. (Kenese 3:15) Maeu le ofoofogia o Lē na Foafoaina Mea ua ia i tatou!

Taumafaiga e Faaaoao i le Atua

E ui lava ua lē toe lelei atoatoa, ae o loo mafai pea e tagata ona faaalia uiga o le Atua. O lea, na faalaeiauina ai e Pauro Kerisiano o ona aso e faapea: “Ia faaaʻoaʻo outou i le Atua, faapei o le fanau pele.” (Efeso 5:1) I lea, i le gasologa mai o talafaasolopito, ua faaalia ai e le toatele le lē amanaia o uiga o le Atua. I le vaitaimi o Noa, sa matuā leaga tele tagata, o lea na maumauai ai Ieova ina ia faaumatia tagata uma seʻi vaganā ai Noa ma lona aiga. O Noa o “le tagata amiotonu [tonu] ia ma le sao i e tupulaga ma ia,” ma sa ia faaalia lona alofa i le Atua i lona faatinoina o faatonuga a le Atua.a “Na faia foi e Noa e faapei ona poloai atu ai le Atua ia te ia i mea uma, sa faapea lava ona fai e ia.” (Kenese 6:9, 22) Na faaalia e Noa le alofa mo ona uso a tagata, ma lona pipii mau atu i le faamasinotonu i le avea ma “lē talaʻi le amiotonu.” (2 Peteru 2:5) Na ia faaalia le poto ma faaaogāina tatau lona malosi faaletino i le mulimuli i faatonutonuga a le Atua ina ia fau se vaa tele, faatumu i meaai, aoao mai manu, ma ia ō atu i totonu o le vaa i le poloaiga a Ieova. Na ia faaalia foi lona alofa i le amiotonu i le lē faatagaina o ona tuaoi amio leaga e faaleagaina o ia.

Ua faamatala mai i le Tusi Paia le toatele o isi o ē o loo faaalia nei lava uiga tutusa faaleatua. O lē silisili o Iesu Keriso, o lē na fai ma faatusa lelei atoatoa o le Atua, ma i lea na mafai ai ona faapea atu: “O le ua vaai mai ia te au, ua vaai o ia i le Tamā.” (Ioane 14:9) Mai i uiga na faaalia e Iesu, e matilatila ai lava lona alofa. O le alofa mo lona Tamā ma tagata na uunaia ai o ia e tuua lona aiga faalelagi, ma ola o se tagata i le lalolagi. Na uunaia ai o ia ina ia faapaiaina lona Tamā e ala i lana amiotonu, ma le talaʻi atu i tagata o le tala lelei o le faaolataga. (Mataio 4:23; Ioane 13:31) Ma, o le alofa foi na uunaia ai Iesu e ofoina atu lona soifua lelei atoatoa mo le faaolataga o tagata ma, e sili atu ona tāua, mo le faapaiaina o le suafa o le Atua. (Ioane 13:1) I le finafinau atu e faataitai i le Atua, pe e iai ea se isi faaaoao sili e mulimuli i ai na i lo o Iesu Keriso?—1 Peteru 2:21.

Pe Mafai Faapefea ona Sili atu ona Tatou Pei o le Atua i Aso Nei?

I aso nei, e mafai faapefea ona tatou faaalia uiga o le Atua ma ia gaoioi e pei o le Atua? Ia, iloilo muamua le uiga o le alofa. Na fetalai Iesu: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa.” E faapefea ona tatou faaalia le alofa mo le Atua? Ua tali mai le aposetolo o Ioane e faapea: “O lenei lava le alofa i le Atua, ia tatou tausi i ana poloaiga; e le mamafa foi ana poloaiga.”—Mataio 22:37; 1 Ioane 5:3.

E moni, ina ia usiusitai i poloaiga a Ieova, e tatau ona tatou iloa i latou. E aofia ai le faitau, suesue, ma le mafaufau loloto i le Afioga a le Atua, le Tusi Paia, ma i lomiga faale-Tusi Paia. E pei o le faisalamo, e ao ona tatou faapea atu: “Ua tele lava loʻu naunau i lau tulafono; ou te mafaufau i ai i le aso atoa.” (Salamo 119:97) A o faasolo ina faalolotoina lo tatou malamalama i le Afioga a le Atua, o le a taaina ai i tatou i le ala o manatunatuga o le Atua. O le a tatou alolofa ai i le amiotonu, ma inoino i le amio leaga. (Salamo 45:7) O le tulaga lena sa sese ai Atamu. Na ia iloaina le tulafono a Ieova, ae e leʻi lava lona alofa ina ia pipii i ai. Pe a faitauina le Afioga a le Atua, e ao ona tatou tuufesili pea ia i tatou lava, ‘E faapefea ona faatatauina lenei mea ia te aʻu? O le ā e mafai ona ou faia ina ia sili atu ai ona ogatasi laʻu amio ma uiga o le Atua?’

Na fetalai foi Iesu e faapea: “E te alofa atu foi i lē lua te tuaoi, ia pei o oe lava ia te oe.” (Mataio 22:39) O tagata taitoatasi uma e malolosi faaletino, e alofa ia te ia lava ma manao i le mea e silisili mo ia lava. E lē sese lena mea. Ae po o tatou faaalia ea se alofa faapena mo o tatou tuaoi? Po o tatou mulimuli i le faatonuga faale-Tusi Paia e faapea: “Aua neʻi e faafiti se mea lelei i e ua tatau i ai, pe a ua e mafai ona faia”?—Faataoto 3:27; Kalatia 6:10.

Ae faapefea le uiga o le poto? O lo tatou saili ina ia faatinoina lenei uiga, e taitaiina atu ai i tatou i le suesueina o le Tusi Paia, talu ai ona o le puna lena o le atamai mai le Atua. Ua faitauina faapenei le Salamo 119:98-100: “O au poloaiga e sili ai ona poto o aʻu i e ita mai ia te au; auā e ia te au lava ia e faavavau. Ua sili ona atamai o aʻu i e aʻoaʻo mai ia te au uma lava; auā o au tulafono ou te mafaufau i ai. O loʻu lotomatala ua sili i e toeaina, auā ua ou anaana i au feau.” I le Faataoto 3:18, ua faamatalaina ai le poto e pei o se “laau o le ola.” Afai tatou te maua le poto ma faatinoina, o le a tatou maua la le faamaoniga a le Atua, ma le taui o le ola e faavavau.—Failauga 7:12.

Ae faapefea le faamasinotonu? I lenei lalolagi amio leaga, e tāua tele le uiga o le faamasinotonu mo i latou o ē e mananao e faafiafia le Atua. Na alofa Iesu i le amiotonu (faamasinotonu) ae inoino i le amio leaga. (Eperu 1:9) O loo faia foi e Kerisiano i aso nei lea lava tulaga e tasi. O le faamasinotonu e uunaia ai i latou e talisapaia uiga saʻo. Latou te alofia ai auala lē amiotonu o lenei lalolagi, ma avea le faia o le finagalo o le Atua o se mea e sili ona tāua i o latou olaga.—1 Ioane 2:15-17.

I le manatu atu i le malosi, ua ia i tatou uma sina fua o lenei uiga. Ua iai uma ia i tatou se malosi faaletino ma le atamai, ma a o tatou tuputupu aʻe o ni Kerisiano, ua tatou atiina aʻe ai le malosi i se uiga faaleagaga. E faaopoopoina mai e Ieova lo tatou malosi e ala i lona agaga paia i le tele ua tatou maua, e ui lava ina foliga mai tatou te vaivai, e mafai lava ona tatou faataunuuina le finagalo o Ieova. Na faapea mai Pauro: “Ou te mafaia mea uma lava i le faamalosi mai o Keriso ia te au.” (Filipi 4:13) Ua avanoa lenei lava malosi ia i tatou pe afai tatou te tatalo mo le agaga o Ieova.

Talaʻiina o le Tala Lelei

O lo tatou faatinoina o uiga autū e fa o le Atua, ua faigofie ona matauina i lo tatou usitaia o le poloaiga e faapea: “Ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia; ia outou aʻoaʻo atu ia te i latou ia tausi i mea uma ua ou fai atu ai ia te outou; faauta foi, ou te ia te outou i aso uma lava, e oo lava i le gataaga o le lalolagi.” (Mataio 28:19, 20) E aumaia e sea ituaiga o galuega faaleaoaoga le ola ia i latou o ē e taliaina. Maeu se faatinoina lelei o le alofa mo i latou o ē, i le tele lava na amata mai o ni tagata ese sa tatou matuā lē masani ai!

E lē gata i lena, o ia aʻoaʻoga o le auala poto lea. E aumaia ai fua e tumau. O ā isi galuega e mafai ona faapea atu ai: “A ē fai lena mea, e faaolaina ai oe e oe atoa ma e ua faalogologo ia te oe”? (1 Timoteo 4:16) E leai se isi e lē taulau i le galuega o le faia ma soʻo. E maua uma faamanuiaga e faavavau e lē gata ia i latou o faalogologo, ae o i latou foi o ē aʻoaʻo atu.

Ae mo le faamasinotonu, o loo aʻoaʻoina e Kerisiano mataupu silisili e tonu ma le amiotonu i a latou tagata aʻoga o le Tusi Paia. Tatou te fesoasoani ia i latou ina ia auauna ia Ieova, “le Atua, o lē faamasino.” (Malaki 2:17) O i latou na i aso nei o ē ua tuuina atu o latou ola e auauna ai ia Ieova ma mulimulitui i le faamaoni, ua tauamiotonuina, faamaonia, ma taitaiina atu ai i lo latou faasaoina ia Amaketo.—Roma 3:24; Iakopo 2:24-26.

Maeu se faatinoga o le malosi i le talaʻiina ma le aʻoaʻoina o le tala lelei i le lalolagi aoao! (Mataio 24:14) E manaomia le onosai e faaauau ai ona talaʻi i oganuu o loo toatele ai i latou e lē fia faalogo. Ae ua aumaia e Ieova e ala mai i lona agaga, le malosi e manaomia ina ia tumau ai seʻi oo i le iuga.—Isaia 40:30, 31; Mataio 24:13; Luka 11:13.

E moni, i le avea ma fanau lē lelei atoatoa a Atamu, e lē mafai ai ona tatou faatinoina nei uiga lelei i se tulaga lelei atoatoa. Ae ia manatua, na faia le tagata i le faatusa o le Atua, ma afai tatou te finafinau ia pei o le Atua, ona tatou faataunuuina lea i sona vaega, le mafuaaga mo lo tatou iai i inei. (Failauga 12:13) Afai tatou te vilivilitai i tatou lava e faia le mea e sili tatou te mafaia, ma ole atu mo le faamagaloga pe a tatou sese, ona mafai lea ona tatou faamoemoe e faasaoina atu i le lalolagi fou amiotonu a le Atua, lea atonu o le a iu ina tatou mauaina ai le lelei atoatoa. Ma, o le a tatou iai i se lalolagi parataiso e faatumulia i tagata lelei atoatoa, o le a faatinoina e i latou uma uiga o Ieova le Atua i lona atoaga. Maeu se fiafiaga! I le iuga, i se uiga atoatoa o le faaupuga, o le a pei ai tagata o le Atua.

[Faaopoopoga i lalo]

[Ata i le itulau 25]

Na faaalia e Iesu ia i tatou le auala e atiina aʻe ai uiga tauatua o Ieova

[Ata i le itulau 26]

I le iuga, o le a maeʻa lelei ai ona avea tagata ma faatusa o le Atua