Molimau a Ieova i le Lalolagi Aoao—Taialani
“O LE atunuu o le saolotoga.” O le uiga lena o le igoa Taialani. E eseese talitonuga faalelotu o loo iai i le sili atu i le 57,000,000 tagata agamalu ma galulue mamafa o loo āinaina. E ui lava o loo taaina le toatele i le lotu Puta, ae o loo iai foi lotu Kerisinetoma i lenei itu i saute i sasaʻe i atunuu o Asia. O loo manaomia e nei tagata uma ona faalogo i le tala lelei o le Malo o le Atua.—Mataio 24:14.a
Lagona e Tagata Sulufai le Tala Lelei
I togalauapi o loo salalau solo i atumauga o Taialani seʻi oo atu i le tuaoi o Myanmar, ua mauaina ai e le sili atu i le 10,000 tagata sulufai i Karen le upu moni o le Tusi Paia. O sui o se tasi aiga Karen e nonofo ai i lena vaipanoa o ni Molimau a Ieova. Ua latou faasalalauina atu le tala lelei i tagata sulufai. Na faapefea ona amataina la latou galuega?
I ni nai tausaga ua mavae, na motusia ai noataga a se taulealea talavou mai le Lotu Agelikana ma avea o se tasi o Molimau a Ieova. Na tetee lona auaiga ia te ia ona o uunaiga mai i a latou faifeau. Ae peitai, sa tumau ma le onosai o ia, ma fāi ifo mālie ai teteega mai lona aiga. Sa faaauau pea faitioga mai faifeau o le Lotu Agelikana seia oo mai pe ā ma le lua tausaga ua mavae, ina ua faateaeseina mai lo latou ofisa ona o amioga lē mamā. Talu ai ona sa leai se leoleo mamoe a le lotu i lena taimi, sa matuā faaletonu ai loa le aiga moni o le Molimau, atoa ma isi tauaiga, ma ua taase. O le toasefulutasi o i latou sa faamavae mai le lotu ma talosaga atu loa i Molimau ina ia faia sa latou suesuega o le Tusi Paia.
Na manaia le agaigai i luma o lenei suesuega, faatasi ai ma isi tagata sulufai ua auai. Na vave le salalau atu o le upu moni, na iu i le papatisoina o Molimau fou e toʻa 17 i le vaitafe na tafe ane i le mea sa nonofo ai tagata sulufai. Maeu se vaaiga fiafia ina ua faatofuina se tinā ua iai ni fanau a ana fanau e 88 tausaga lona matua faatasi ma i latou na papatisoina!
Faagaee e le Ata Vitiō le Naunau
E tele se avanoa mo le faateleina i tagata sulufai. I le 1993 i le faamanatuina o le Faamanatuga, e 57 tagata na auai. I le taimi o le asiasiga a le ovasia matagaluega ia Me o le tausaga lena, e 67 i latou na auai i se tasi o ana lauga. Ma e tusa ma le 250 na faatasi ai e maimoaina le ata vitiō a le Sosaiete o le Olomatamata o le Jehovah’s Witnesses—The Organization Behind the Name.
O le avā a le faifeau o le lotu Papatiso sa iai i le nofoaga o tagata sulufai, na auai i se lauga faale-Tusi Paia i le lautele na faia e se tasi o Molimau, ma matauina le talanoaina o mau o le Tusi Paia. Na ia taʻu atu i lana tane le lē faamalieina o ia i lauga faisoo e faalogo i ai i le latou lotu. Sa tetee lana tane, ma fai atu ia te ia, afai o le a alu i sauniga a Molimau a Ieova, o le a mulimuli uma atu isi tagata o le aurotu ia te ia. Ina ua toe alu foi lana avā i le sauniga, sa tuli o ia e lana tane i le agaese ma susunu pepa sa tusi ai ana faamaumauga ma ana lomiga faale-Tusi Paia. E ui lava i na mea, ae ina ua faaali le ata vitiō, na toe sau foi o ia. Mulimuli ane na taʻu atu e lenei fafine i lana tane le mea sa ia vaai i ai. Ma se loto ua suia, na manao ai le tamaloa e vaai i le ata vitiō, ma ua salamō ai i lona susunuina o faamaumauga ma lomiga faale-Tusi Paia a lana avā.
O lea, ua lagonaina e tagata le tala lelei i Taialani. Ua latou mauaina le saolotoga faaleagaga i “le atunuu o le saolotoga.”—Ioane 8:32.
[Faaopoopoga i lalo]
a Mo ni faamatalaga faaopoopo, tagai i le 1994 Calendar of Jehovah’s Witnesses.
[Pusa i le itulau 24]
FAAMAUMAUGA A LE ATUNUU
Tausaga Faaleauaunaga o le 1993
TUMUTUMUGA O LE AU TALAʻI: 1,434
FAATATAUGA: 1 le Molimau i le 40,299
Ē NA AUAI I LE FAAMANATUGA: 3,342
TUUFAATATAUGA O PAEONIA: 232
TUUFAATATAUGA O SUESUEGA FAALE-TUSI PAIA: 1,489
AOFAI O Ē NA PAPATISOINA: 92
AOFAI O FAAPOTOPOTOGA: 39
OFISA O LE LĀLĀ: BANGKOK
[Ata i le itulau 25]
Au talaʻi o le Malo o loo talaʻia ma le maelega le tala lelei
[Ata i le itulau 25]
Le uluai ofisa o le lālā, 1947
[Ata i le itulau 25]
Aiga Peteli i luma o le lālā fou i Bangkok, na umusaina ia Fepuari 8, 1992