Sa Lē Avea Lona Loomatua ma Mea na Taofia ai Lana Auaunaga ia Ieova
O LE toatele o tagata matutua ua lagona e faapea, o tausaga o totoe o o latou olaga, ua itiiti ai se faamoemoe o le fiafiaga. Na taʻu mai e se loomatua lauiloa i ata tifaga e faapea: “Ua ou faaleagaina loʻu olaga, ma ua tuai tele ona fai se suiga . . . Pe a ou savalivali na o aʻu, ona ou toe mafaufau lea agaʻi i tua i loʻu olaga, ma ou te lē fiafia i le auala na ou faia ai loʻu olaga . . . Ua ou lē mautonu i so o se mea ma ua faigata ona mautū soʻu aiga.”
O se fafine matua o lē na soifua e toetoe lava 2,000 tausaga ua mavae, sa lē o se faafitauli ia te ia lena ituaiga o olaga. Sa o ia o se fafine ua 84 tausaga le matua ma ua oti lana tane, ae sa fiafia, malosi, ma sa matuā finagalo malie i ai le Atua. O lona igoa o Ana, ma sa iai se mafuaaga faapitoa mo lona olioli. O le ā lena mea?
“E Leʻi Alu Ese Ia i le Malumalu”
Ua faamalamalama mai e le tusitala Evagelia o Luka ia i tatou ia Ana. Na faapea mai o ia: “Sa i ai le perofeta fafine o Ana, o le afafine o Fanuelu o le ituaiga o Asera” i Isaraelu. I le avea o se perofeta, sa ia te ia le meaalofa o le agaga paia o le Atua, po o le malosi galue, i se uiga faapitoa. Ma sa ia Ana se avanoa matagofie e perofeta ai i se tasi o mea iloga na tupu.
Ua faamatala mai e Luka e faapea: “Ua loomatua ia, sa la nonofo ma lana tane talu ina o taupou, ua oo i lona fitu o tausaga. O ia foi le fafine nofo fua, pe atoa ona tausaga e valugafulu ma le fa.” (Luka 2:36, 37) E foliga mai na oti le tane a Ana a o talavou lava o ia. O fafine Kerisiano o so o se tausaga ua oti a latou tane, ua iloa le lotomomoia e oo i ai pe a maliu se tane sa pele ia te ia. E ui i lea, i le pei o le toatele o fafine matatau i le Atua i o tatou aso, sa lē faatagaina e Ana lea faanoanoaga i le mea na tupu e taofia ai lana auaunaga i le Atua.
Ua taʻu mai e Luka ia i tatou e faapea, o Ana sa “leʻi alu ese ia i le malumalu” i Ierusalema. (Luka 2:37) Sa fiafia tele o ia e talisapaia faamanuiaga na iu i ai mai le auauanaga i le fale o le Atua. Na faaalia i ana gaoioiga e faapea, i le pei o le tupu o Isaraelu, le faisalamo o Tavita, sa na o le tasi lava le mea na ole atu ai ia Ieova. Ma o le ā lena mea? Na pese Tavita e faapea: “E tasi le mea ua ou ole atu ia Ieova, o le mea lava lea ou te saili atu ai; ia ou nofo i le fale o Ieova i aso uma o loʻu ola, ina ia ou iloa atu ai le matagofie o Ieova, ma ou saili i lona malumalu.” (Salamo 27:4) I lenei foi tulaga, ua pei ai Ana o fafine Kerisiano i aso nei o ē ua maua le fiafia i le iai pea i le nofoaga o le tapuaiga ia Ieova.
Sa ofoina atu e Ana le auaunaga paia ia Ieova i le ao atoa ma le po. Sa ia faia lenei mea “i anapogi ma talosaga” e faailoa atu ai le faanoanoa ma faanaunauga moni. (Luka 2:37) I le tele o senituri na gauai ai tagata Iutaia i pulega a Nuu Ese, faatasi ma tulaga faalemanuia tau tapuaiga na oo atu i le malumalu ma lona faiva faaositaulaga, atonu sa avea ma mafuaaga o anapogi ma talosaga a Ana ia Ieova le Atua. Ae sa iai foi mafuaaga o lona fiafia, ae maise lava ona o se mea ese na tupu i se aso mataina i le tausaga e 2 T.L.M.
Se Faamanuiaga e Leʻi Faatalitalia
I lenei aso tāua tele, na aumaia ai le pepe o Iesu i le malumalu i Ierusalema e lona tinā, o Maria, ma lona tamāfai, o Iosefa. Na vaaia e le toeaina matua o Simeona le pepe ma tautala loa i upu faavaloaga e uiga i lena mea na tupu. (Luka 2:25-35) Sa iai Ana i le malumalu e pei ona masani ai. Ua lipotia mai e Luka e faapea: “O lea lava itu aso, ua sau ai o ia.” (Luka 2:38) Maeu le fiafia o Ana ina ua molimauina e ona mata ua pulapula la goto le Mesia mo le lumanai!
E fasefulu aso a o lumanai ai, na faateia ai e le agelu a le Atua leoleo mamoe e latalata i Peteleema i upu e faapea: “Faauta, ou te au mai ia te outou le tala lelei e olioli tele i le nuu uma; auā o le aso nei ua fanau ai i le aai a Tavita, lo outou Faaola, o le Alii ia o Keriso.” Na vivii atu ʻau faalelagi e mano o mano ia Ieova ma faaopoopo atu e faapea: “O le viiga i le Atua i mea aupitoaluga; ma le manuia i le lalolagi; o le finagalo alofa i tagata.” (Luka 2:8-14) Sa faapena foi Ana, na uunaia o ia e molimau atu e uiga i Lē o le a avea ma Mesia!
Ina ua vaaia e Ana le pepe o Iesu, sa “faafetai atu i le Alii, ma tautala ia te ia i tagata uma lava e na faatali atu i le togiola i Ierusalema.” (Luka 2:38) E pei o le toeaina matua o Simeona, lea na faaeaina foi i le vaai atu i le pepe meamea o Iesu i le malumalu, ma le mautinoa sa faatalitali foi i ai Ana, ma tatalo mo le Faaola na folafolaina. Sa lē mafai ona ia taofiofia mai le taʻu atu o le tala lelei e faapea, o Iesu o Ia lea.
E ui lava atonu sa leʻi faatalitalia e Ana o le a soifua pea e vaai ia Iesu a o tuputupu aʻe, ae o le ā na ia faia? Sa fiafia o ia e molimau atu i isi e uiga i le faaolataga o le a oo mai e ala mai i lenei Mesia o le a afio mai.
Le Faaaoaoga Lelei a Ana
E toafia ni tagata lotu o le lalolagi ua mafai ona tuuina atu se molimau faapena, pe o loo faaauau pea ona ofoina atu le tapuaiga i le ao atoa ma le po pe a 84 tausaga le matua? Atonu ua leva ona talosaga atu mo se penisione. Sa ese Ana ma Simeona mai le tele o tagata lotu o le lalolagi. Sa la faataatiaina ni faaaoaoga lelei mo auauna matutua uma lava a Ieova. O le mea moni, sa la fiafia i le fale o le tapuaiga ia Ieova, ma vivii atu ia te ia ma o la loto atoa.
Ia Ana, ua tatou maua ai se faaaoaoga mataina o se tagata e mataʻu i le Atua ua oti lana tane. O le mea moni, o le faamatalaga a Luka e uiga i lenei loomatua loto maulalo, ua lelei lona faatusatusaga ma agavaa o fafine taʻuaogaina ua oti a latou tane o loo faaauivi mai i le 1 Timoteo 5:3-16. O i inā, ua faapea mai ai le aposetolo o Pauro, o se fafine ua oti lana tane ia “tumau pea i le faatoga ma le tatalo i le po atoa ma le ao,” ma “sa toatasi foi lana tane,” ma “ua na tausisi i galuega lelei uma lava.” O Ana o se ituaiga o fafine faapena.
I aso nei, ua tatou maua ai fafine matutua ua oti a latou tane o loo ofoina atu le auaunaga paia i le Atua i le po atoa ma le ao i le faitauafe o faapotopotoga o Molimau a Ieova i le lalolagi aoao. Maeu le tele o lo tatou talisapaia mo nei “Ana” faaonaponei o loo i lo tatou lotolotoi!
E oo lava i tausaga matutua, e mafai lava e tane ma fafine ona faia se tuuina atu i le Atua, ma faatinoina lenei mea i le papatisoga i le vai. E taulia pea tagata ua matutua tele e auauna ia Ieova, ma ia molimau atu e uiga i le Malo Faa-Mesia lea ua faavaeina nei i le lagi, ma ua toe o se aga ona aumaia lea o faamanuiaga faaoaina i tagata usiusitai uma. O tagata ua matutua tele o loo ofoina atu le auaunaga paia i le Atua e mafai ona molimau i faamanuiaga a Ieova ia i latou, e pei lava o Ana, sa faapitoa ona faamanuiaina i le tele o senituri ua mavae. Sa lē avea lona loomatua ma mea e taofia ai lana auaunaga ia Ieova, ma vivii atu i lona suafa paia—ma e faapena foi i latou.