Avega Tauave e Ō Faatasi ma le Iloaina o le Lotu Saʻo

“E sili ona manuia i latou o e faalogo i le afioga a le Atua, ma tausi i ai.”—LUKA 11:28.

1. O le taimi lava latou te iloaina ai le lotu saʻo, o le ā le ituaiga tagata o le a avea le lotu saʻo ma mea e ola aʻe ai o latou olaga?

E LĒ lava le na ona iloa o le lotu saʻo. Afai o i tatou o ni ē naunau i le mea ua saʻo ma moni, o le taimi lava tatou te mauaina ai le lotu saʻo, o le a fausia aʻe loa o tatou olaga e tusa ai. O le lotu moni ua lē na o se filosofia faalemafaufau; o se auala e ola ai.—Salamo 119:105; Isaia 2:3; faatusatusa i le Galuega 9:2.

2, 3. (a) Na faapefea ona faamamafaina e Iesu le tāua o le faia o le finagalo o le Atua? (e) O le ā le avega tauave ua i luga o tagata taitoatasi o ē ua iloa le lotu saʻo?

² Na faamamafaina e Iesu Keriso le tāua o le faia o le mea ua faaalia mai e le Atua, o Lona finagalo. I le faaiuga o le Lauga lauiloa i luga o le Mauga, na faailoa mai ai e Iesu e faapea, e lē o i latou uma e faapea atu ia te ia le Alii e, (lea ua faapea mai o Kerisiano) e ulu atu i le Malo; e na o i latou e faia le finagalo o lona Tamā. Na ia fetalai e faapea o isi, o le a teena o ni “e fai amio leaga.” Aisea ua taʻua ai o ē fai amio leaga? Talu ai ona ua faapea mai le Tusi Paia, o le lē taulau ona faia o le finagalo o le Atua o le agasala lea, ma o agasala uma o le amioleaga. (Mataio 7:21-23; 1 Ioane 3:4; faatusatusa i le Roma 10:2, 3.) Atonu e iloa e se tasi le lotu saʻo, atonu na te viiviia i latou o loo aʻoaʻoina, ma atonu na te viia foi i latou o ē o faia, ae ua iai foi ia te ia le avega tauave e faatatauina ai i lona lava olaga. (Iakopo 4:17) Afai na te taliaina lena avega tauave, o le a ia iloaina la o le a faamanuiaina lona olaga, ma o le a ia maua le fiafia lea e lē mafai ona maua mai i se isi lava auala.

³ I le mataupu faatoʻā mavae atu, na tatou talanoaina ai faailoga e ono e iloa ai le lotu moni. O na faailoga taitasi e lē na ona fesoasoani ia i tatou e iloa ai le lotu saʻo, ae ua tuuina mai ai foi ia i tatou taitoatasi ni luʻi ma ni avanoa. I le ā le auala?

E Faapefea ona E Tali atu i le Afioga a le Atua?

4. (a) Pe a amata ona auaufaatasi tagata fou ma Molimau a Ieova, o le ā o le a lē pine ae latou matauina e tusa ai o le faaaogāina e Molimau o le Tusi Paia? (e) E faapefea i le lelei o le fafagaina i le itu faaleagaga ona aafia ai auauna a Ieova?

⁴ A o suesueina e Molimau a Ieova le Tusi Paia ma tagata fou fiafia, o le toatele o nei tagata fou e vave lava ona latou iloa e faapea, o mea o loo aʻoaʻoina, e mai le Tusi Paia. O tali o a latou fesili, e lē o faasino atu i ni faavae faalelotu, i aganuu a tagata, po o manatu o tagata lauiloa. O le Afioga lava a le Atua o le faavae autū. Pe a latou ō i le Maota o le Malo, latou te matauina foi i inā e faapea, o le Tusi Paia o le tusi autū. E lē umi se taimi ae matauina e tagata o loo saili ma le faamaoni i le upu moni e faapea, o le vala autū o le olioli o loo latou vaaia i Molimau a Ieova, ona o le mea moni e faapea, ua matuā lelei ona fafagaina faaleagaga i latou mai le Afioga a le Atua.—Isaia 65:13, 14.

5. (a) O le ā le luʻi ua ofoina atu ia i latou o ē e matauina Molimau a Ieova? (e) E mafai faapefea ona latou auai i le fiafiaga o Molimau?

⁵ Afai ua e iloaina lenei mea, e faapefea la ona e tali atu i ai? Afai ua e maua le manatu, ua lē o se mea tonu la mo oe le avea ma sē e tau ina matamata, ma e lē tatau ona e manao e faapena. Ua faaalia i le Tusi Paia e faapea, o i latou o ē e “na ona faalogologo i ai” ae lē “anaana i le upu” e ‘faaseseina ai i latou e i latou i mafaufauga sese.’ (Iakopo 1:22) Ua latou faaseseina i latou lava talu ai ona ua lē taulau ona latou iloaina e faapea, e tusa po o le ā latou te fai mai ai, o le lē taulau ona latou usiusitai i le Atua e faaalia ai latou te lē o alolofa moni ia te ia. O le faapea mai e iai le faatuatua ae lē lagolagoina e galuega, o le faatuatua mate lena. (Iakopo 2:18-26; 1 Ioane 5:3) I le faaeseesega, o lē ua uunaia ona o le alofa mo Ieova e avea o se “anaana i le galuega” o le a “manuia o ia i lona lava anaana.” Ioe, e pei ona faamatalaina e Iesu Keriso, “e sili ona manuia o e faalogo i le afioga a le Atua, ma tausi i ai.”—Iakopo 1:25; Luka 11:28; Ioane 13:17.

6. Afai tatou te talisapaia moni le Afioga a le Atua, o ā avanoa o le a tatou taumafai totino e aapa atu i ai?

⁶ O le a faalolotoina lena olioli a o e tuputupu aʻe i le iloaina o le finagalo o le Atua, ma faatatauina atili mea ua e aʻoaʻoina. O le ā le tele o taumafaiga o le a e faia e suesueina ai le Afioga a le Atua? E faitau sefuluafe tagata o ē e lē iloa faitau ma tusitusi, ua galulue mamafa ina ia iloa faitau, ua faia faapitoa faapea ina ia mafai ona latou faitauina le Tusi Paia ma aʻoaʻo atu na mea i isi tagata. O isi e vave ona ala i le vaveao ina ia mafai ona latou faaaluina sina taimi i aso taitasi e faitauina ai le Tusi Paia, ma fesoasoani faale-Tusi Paia e pei o Le Olomatamata. A o e faia totino le faitauina faasolo o le Tusi Paia, po o le suʻe foi o mau o loo siiina mai i isi lomiga mo suesuega, seʻi mātau ma le faaeteete tulafono ma poloaiga a Ieova, ma saili ina ia iloa le loloto o le tele o mataupu silisili o loo iai e taʻitaʻia ai i tatou. Mafaufau loloto i mea o loo faaalia i vaega taitasi e uiga i le Atua, lana fuafuaga, ma lona feagai ai ma tagata. Faaalu se taimi mo lenei mea ina ia faagaeetia ai lou loto. Mafaufau pe faamata o iai ni auala e mafai ai ona e matuā faatatauina atoatoa fautuaga mai le Tusi Paia i lou lava olaga.—Salamo 1:1, 2; 19:7-11; 1 Tesalonia 4:1.

Pe o Atoatoa Lou Tuutoina atu ia Ieova?

7. (a) Ua faapefea ona taaina e le aʻoaʻoga o le Tolutasi taumafaiga a tagata ina ia tapuai atu i le Atua? (e) O le ā atonu e tupu pe a aʻoaʻoina e se tasi le upu moni e uiga ia Ieova?

⁷ I le faitau miliona o tagata, ua o se saolotoga le aʻoaʻoina e faapea, o le Atua moni e lē o se Tasitolu. O le faamatalaga e faapea “o se mealilo” sa lē taitai ona faamalieina ai i latou. E mafai faapefea ona latou faalatalata atu i se Atua e faigata ona malamalama i ai? O le āuga o lena aʻoaʻoga, ua tele ai ina latou faagalogaloina le Tamā (o lē o lona suafa e lē taitai ona faalogo i ai i a latou lotu) ma tapuai ai ia Iesu e avea o le Atua, po o le taulai atu o la latou tapuaiga ia Maria (o lē ua latou manatu i ai o le “Tinā o le Atua”). Ae ua tali mai ma le fiafia tele o latou loto ina ua tatalaina e se tasi o Molimau a Ieova le Tusi Paia ma faaali atu ia i latou le suafa totino o le Atua, o Ieova. (Salamo 83:18) Sa faatumulia se tasi fafine mai Venezuela i le fiafia, ina ua faaali atu ia te ia le suafa o le Atua, na ia opoina moni ai lava le Molimau talavou o lē na faailoaina atu ia te ia lena upu moni tautele ma sa malie ai e faia se suesuega faale-Tusi Paia i lona aiga. Pe a aʻoaʻoina e na ituaiga o tagata e faapea, sa tautala Iesu i lona Tamā o “loʻu Atua ma lo outou Atua” ma sa faasino atu foi e Iesu i lona Tamā “o le Atua moni e toatasi,” ona latou iloa ai lea e faapea, o le mea ua aʻoaʻo mai i le Tusi Paia e uiga i le Atua, e faigofie ona malamalama i ai. (Ioane 17:3; 20:17) Pe a latou iloaina uiga o Ieova, ona latou lagona lea o le lalata atu ia te ia, amata ona tatalo atu ia te ia, ma mananao e faafiafia o ia. O le ā le iuga?

8. (a) Ona o lo latou alolofa mo Ieova ma lo latou faanaunauga e faafiafia o ia, o le ā ua faia e le faitau miliona o tagata? (e) Aisea e matuā tāua ai le papatisoga faa-Kerisiano?

⁸ I tausaga e sefulu ua mavae, e 2,528,524 tagata i konetineta e ono ma motu e tele na tuuina atu o latou ola ia Ieova, ma mulimuli ane faatinoina lenei tuuina atu i le papatisoina i le vai. Pe sa avea ea oe o se tasi o i latou, po o, pe ua e nofo sauni nei ea e papatiso? O le papatisoga o se laasaga tāua i le olaga o Kerisiano moni uma lava. Na faatonuina e Iesu ona soʻo ina ia faia tagata o atunuu uma ma soʻo ma papatisoina i latou. (Mataio 28:19, 20) E aogā foi ona matauina e faapea, ina ua papatisoina Iesu, ona fetalai mai loa lea o Ieova lava ia mai le lagi e faapea: “O loʻu Atalii pele oe, ua ou fiafia lava ia te oe.”—Luka 3:21, 22.

9. Ina ia faatumauina se faiā faamaonia ma Ieova, o le ā e manaomia i la tatou vaega?

⁹ O se faiā faamaonia ma Ieova o se mea e manaomia ona faapelepele i ai. Afai ua e ulu atu i lena faiā e ala i le tuuina atu ma papatisoina, ia alofia so o se mea e ono faaleagaina ai lena faiā. Aua le faatagaina popolega o le olaga ma le manatu tele i meafaitino e tuleiesea ai lena faiā ina ia faatulaga lua. (1 Timoteo 6:8-12) Ia ola moni e talafeagai ma le fautuaga o loo i le Faataoto 3:6: “Ia e manatua o ia [Ieova] i ou ala uma ona faatonuina ai lea e ia lava ou ala.”

E Faapeī le Loloto o loo Aogā ai le Alofa o Keriso ia te Oe?

10. Aisea e lē avea ai lo tatou tapuai atu ia Ieova ma mafuaaga tatou te faaleamanaiaina ai Iesu?

¹⁰ O le mea moni, o le talisapaia tatau mo Ieova e na o ia o le Atua moni, e lē faapogaia ai se tasi e faaleamanaiaina Iesu Keriso. I le faaeseesega, ua faapea mai le Faaaliga 19:10: “O le agaga o le valoaga o le mau lea ia Iesu.” I valoaga faagaeeina mai le Kenese seʻi oo i le Faaaliga, ua saunia ai auiliiliga e faatatau i le vaega fai a Iesu Keriso i fuafuaga a Ieova. Pe a masani lelei se tasi i na auiliiliga, o le a tupu aʻe ai se ata manino e aunoa ma le faaseseina i ni manatu sese mai aʻoaʻoga sese a Kerisinetoma.

11. Na faapefea i le aʻoaʻoina o le mea ua aʻoaʻo moni mai i le Tusi Paia e uiga i le Alo o le Atua ona aafia ai se fafine i Polani?

¹¹ O le malamalama i le upu moni e uiga i le Alo o le Atua e mafai ona iai ni āuga loloto i se tasi. O le tulaga lena sa iai ia Danuta, o se fafine i Polani. Sa fesootai o ia ma Molimau a Ieova mo tausaga e valu, sa fiafia i mea na latou aʻoaʻoina, ae sa lē avea le tapuaiga moni ma vaega o lona olaga. Ona ia mauaina lea o le tusi The Greatest Man Who Ever Lived, lena o loo faamatalaina mai ai le soifuaga o Keriso i se uiga e faigofie ona malamalama ai.a I le leva o le po, na ia suesueina ai le tusi, ma mafaufau e faitau na o se mataupu se tasi. Ae peitai, faatoʻā ia tuuesea le tusi ina ua uma ona ia faitauina i le tafa mai o ata i le vaveao. Na matuā tagi o ia. Na ia augani atu e faapea: “Ieova e, faamagalo mai aʻu.” O le iuga ona o le mea na ia faitauina, sa sili atu ai ona manino o ia na i lo o le taimi muamua i le alofa ua faaalia e Ieova ma lona Alo. Na ia iloaina ai e faapea, mo le valu tausaga, na te leʻi faaalia ai se loto faafetai, ma liliu ese mai le fesoasoani na faalauteleina atu ma le onosai e le Atua ia te ia. I le 1993, na papatisoina ai o ia e faailoaina atu ai lona tuuina atu ia Ieova e faavae i le faatuatua ia Iesu Keriso.

12. E faapefea i le poto saʻo e uiga ia Iesu Keriso ona aafia ai o tatou ola?

¹² O le “iloa lelei o lo tatou Alii o Iesu Keriso” e ō faatasi ma le aasa ma le fua tele mai o se Kerisiano. (2 Peteru 1:8) O le ā le mamao o le a faia ai sau vaega i na gaoioiga, i le faasalalauina atu o le feau o le Malo i isi? O le tele ua mafai e tagata taitoatasi ona faia, ua aafia i le tele o tulaga. (Mataio 13:18-23) O nisi o tulaga e lē mafai ona tatou suia; ae e mafai ona suia nisi. O le ā e uunaia i tatou ina ia iloa ma faia ni suiga na e mafai ona fai? Na tusi mai le aposetolo o Pauro e faapea: “Ua pulunaunauina i matou i le alofa o Keriso”; i nisi faaupuga, o le alofa lea na ia faaalia i le foaiina mai o lona ola ona o i tatou, e matuā mataina ma a o faatupulaia aʻe lo tatou talisapaia i lea alofa, o le a matuā faagaeetia ai o tatou loto. O le iuga, tatou te iloa ai le matuā lē fetaui mo i tatou le faaauau pea ona tuliloa sini manatu faapito ma tele lava ina ola mo le faamalieina o i tatou lava. Na i lo o lena, tatou te fetuunaia ai o tatou tulaga ina ia faamuamua le galuega na aʻoaʻo e Keriso ona soʻo ina ia faia.—2 Korinito 5:14, 15.

Vavae Ese Mai le Lalolagi —I le ā le Tele?

13. Aisea e ao ai ona tatou mananao e leai sa tatou vaega i se lotu o loo faia e ia ia lava ma vaega o le lalolagi?

¹³ E lē faigata ona iloa talaaga ua faia e Kerisinetoma ma isi lotu, talu ai latou te mananao ia avea ma vaega o le lalolagi. Ua faaaogāina teugatupe a lotu e faatupeina ai gaoioiga tau fouvalega. Ua avea faifeau ma tagata tau lalafi solo. Ua taʻu mai i lipoti i nusipepa i lea aso ma lea aso vaega faalotu i vaega eseese o le lalolagi o loo fetauai. Ua tutumu o latou lima i le toto. (Isaia 1:15) Ma o loo faaauau pea ona taumafai faifeau i le lalolagi aoao e taaina faiga faapolotiki. O tagata tapuai moni e leai sa latou vaega i lenei mea.—Iakopo 4:1-4.

14. (a) O le ā e tatau ia i tatou taitoatasi ona alofia pe afai o le a tatou tausia le vavae ese mai le lalolagi? (e) O le ā e mafai ona fesoasoani ia i tatou e alofia ai le mailei i uiga ma faiga a le lalolagi?

¹⁴ Ae o le vavaeese mai le lalolagi e aofia ai isi mea e sili atu. Ua lauiloa le lalolagi i le manao i tupe, ma mea e mafai ona faatau mai i tupe, le faanaunauga mo le fia lauiloa totino, ma le faaauau pea ona tuliloa fiafiaga, faatasi ai ma mea na e faaalia ai le leai o se manatu mamafa mo isi, o le pepelo ma upu matagā, le fouvale i le pule, ma le lē taulau ona faatinoina le pulea totino. (2 Timoteo 3:2-5; 1 Ioane 2:15, 16) Ona o lo tatou lava lē lelei atoatoa, atonu i nisi taimi tatou te faaatagia atu ai nisi o na uiga. O le ā e mafai ona fesoasoani ia i tatou i la tatou tauiviga ina ia alofia na mailei? E manaomia ona faamanatu pea ia i tatou pe o ai o loo i tua o nei mea uma. “A o le lalolagi uma o loo nofo toilalo i loo leaga.” (1 Ioane 5:19) E tusa lava po o le ā le faatosina mai o se auala faaʻoleʻole, e tusa lava po o le ā le toatele o isi tagata o loo ola i lena ituaiga o olaga, ae a tatou iloa le fili sili o Ieova, o Satani le Tiapolo, o loo i tua o na mea uma, ona tatou iloa lea o le matuā matagā moni o lena mea.—Salamo 97:10.

O le ā le Mamao e Oo atu i ai Lou Alofa?

15. Na faapefea e le alofa lē manatu faapito na e matauina ona fesoasoani ia te oe e iloaina ai le lotu saʻo?

¹⁵ Ina ua faatoʻā e faatasitasi lava ma Molimau a Ieova, e mautinoa ua e fiafia i lena alofa latou te faatinoina ia i latou lava ona o lona eseesega ma le agaga o le lalolagi. I le faamamafaina o le alofa lē manatu faapito, ua faaesea ai le tapuaiga mamā a Ieova mai isi ituaiga uma o tapuaiga. Atonu o le mea lenei ua na faatalitonuina oe e faapea, o Molimau a Ieova o loo latou faatinoina moni lava le lotu saʻo. Na fetalai Iesu Keriso lava ia e faapea: “O le mea lea e iloa ai e tagata uma lava o oʻu soo outou, pe afai ua outou fealofani.”—Ioane 13:35.

16. O ā avanoa atonu o loo iai mo i tatou taitoatasi e faalautele atu ai lo tatou alofa?

¹⁶ Pe o faaalia e lena uiga o oe foi o se tasi o soʻo o Keriso? Po o iai ni auala e mafai ona e faalauteleina atu ai lou alofa? Ma le mautinoa e mafai e i tatou uma lava ona fai. E iai mea e sili atu na i lo o le na ona faauo atu i isi i le Maota o le Malo. Ma afai tatou te faalauteleina atu lo tatou alofa na o i latou o ē e alolofa mai ia i tatou, o le ā la le eseesega o i tatou mai le lalolagi? Ua augani mai le Tusi Paia e faapea: “Ia muamua i mea uma ona maua e outou o le alofa naunau o le tasi i le tasi.” (1 Peteru 4:8) O ai atonu e faasili agaʻi i ai lo tatou alofa? Pe o se uso po o se tuafafine Kerisiano o lē e ese lona talaaga mai ia i tatou, ma o ē latou te faia mea e faatiga ai i tatou? Pe o se tasi ea ua lē mafai ona auai pea i sauniga ona o ni maʻi po o le tino matua? Pe o a tatou paaga faaipoipo ea? Pe atonu o o tatou mātua ua matutua? O nisi o ē ua lelei tele i le faatinoina o fua o le agaga, e aofia ai le alofa, ua latou lagona e faapea, e pei lava ua faatoʻā toe tau aʻoaʻoina i latou i nei uiga, ina ua latou fesagai ma tulaga e sili ona faigata na e mafai ona mapuna aʻe i le tuuina atu o le tausiga atoatoa i se sui o le auaiga, o lē ua maʻi, ua matuā lē mafai ona toe tausia e ia ia lava. E tusa lava pe fesagai ma nei tulaga, o le mea moni, o lo tatou alofa e ao ona faalautele atu i isi e lē o ni o tatou tauaiga.

Molimau atu i le Malo—O le ā le Tāua ia te Oe?

17. Afai ua tatou maua aogā totino mai asiasiga a Molimau a Ieova, o le ā e ao nei ona uunaia i tatou e fai?

¹⁷ O se auala tāua e mafai ona tatou faaalia ai le alofa mo o tatou uso a tagata, o le molimau atu lea ia i latou e uiga i le Malo o le Atua. E na o le tasi lava le vaega o tagata o loo faia lenei galuega na valoia mai e Iesu. (Mareko 13:10) O i latou nei o Molimau a Ieova. Ua tatou maua mai ai aogā totino. Nei la, o lo tatou faaeaga le fesoasoani atu i isi. Afai e ia i tatou le silafaga a le Atua i le mataupu, o le a faamuamua la lenei galuega i o tatou olaga.

18. Atonu e faapefea i lo tatou faitauina o le tusi Jehovah’s Witnesses—Proclaimers of God’s Kingdom ona aafia ai lo tatou lava auai i le molimauina atu o le Malo?

¹⁸ O le tala e fiafia ai i le auala o loo tauaveina ai le feau o le Malo i vaega uma o le lalolagi i nei aso e gata ai, o loo faamatala mai i le tusi Jehovah’s Witnesses—Proclaimers of God’s Kingdom. Afai ua lomia i lau gagana, aua neʻi lē taulau ona faitau i ai. Ma a o e faia faapea, ia mātau faapitoa auala uma o tuuina atu ai e tagata taitoatasi se molimau e uiga i le Malo. Faamata o loo iai nisi o a latou faaaoaoga e mafai ona e faataitai i ai? E tele avanoa ua tatalaina mai mo i tatou uma lava. Tau ia ina ia avea lo tatou alofa mo Ieova, e uunaia i tatou ina ia faaaogā tatau na avanoa.

19. E faapefea ona tatou maua aogā pe afai tatou te taliaina le avega tauave na e ō faatasi ma le iloaina o le lotu saʻo?

¹⁹ O lea, pe a tatou faatatauina ia i tatou lava le faia o le finagalo o Ieova, ua tatou maua la le tali i le fesili, O le ā le uiga o le olaga? (Faaaliga 4:11) O le a tatou lē toe tautagotago ai, ma tuua ai i se faalogona lē aogā. E leai se galuega e mafai ona e tuuina atu atoatoa i ai o le a na aumaia ia te oe le faamalieina sili na i lo le tuuina atu atoatoa o oe lava i le auaunaga ia Ieova le Atua. Ma maeu se lumanai ofoofogia o loo ia taofia! O se olaga e faamalieina e faavavau i lana lalolagi fou, lea o le a mafai ai ona tatou faaaogāina atoatoa o tatou tomai ma le malosi e talafeagai ma le fuafuaga alofa lea e pei ona foafoaina ai e le Atua tagata uma.

[Faaopoopoga i lalo]

E Faapefea ona E Tali?

◻ Aisea e matuā tāua ai mo se lotu lona taliaina o le Tusi Paia o le Afioga a le Atua ma faaaloalo ia Ieova o le Atua moni?

◻ O le ā ua aʻoaʻoina e le lotu moni e faatatau i le tulaga o Iesu o se Togiola?

◻ Aisea e ao ai i Kerisiano ona tumau i le vavae ese mai le lalolagi ma ia faatinoina le alofa lē manatu faapito?

◻ O le ā le vaega a le molimau atu i le Malo e faia e le lotu saʻo?

[Ata i le itulau 16]

O le papatisoga o se laasaga e matuā tāua i le taliaina o avega tauave o le tapuaiga moni. I masina taitasi, e faia ai e se aofaiga e 25,000 i le lalolagi aoao lena laasaga

Rusia

Senegal

Papua Niu Kini

Iunaite Setete o Amerika

[Ata i le itulau 17]

O le faasalalauina o le upu moni o le Tusi Paia i isi o se vaega o le tapuaiga moni

Iunaite Setete o Amerika

Iunaite Setete o Amerika

Pasili

Hong Kong